Meeranne I azinay Jooni, a duussawunne oosuwawu Pilippinsseppe daroti yiyo biittan deꞌoosona; qassi eti ufayttiiddi etawu markkattoosona. Koronaa harggiya wodiyan, Meera ba deꞌiyo biittan deꞌiyageetu xalaala gidennan, hara biittatun deꞌiyageetakka Geeshsha Maxaafaa xannaꞌissiyogaa doomissaasu. Waatada?

Meera ba xinaateta, “Geeshsha Maxaafaa xannaꞌanawu koyiya ne eriyo hara uri deꞌii?” gaada oychchawusu. Yaatin eti ee giidi zaarikko, etaara eretissanaadan oychchawusu. Metenna ha oyshaa oychchiyogee darotoo loꞌꞌo ayfiya demissees. Ayssi giikko, Geeshsha Maxaafaappe xannaꞌiyobaa dosida asati bantta eridobaa darotoo bantta dabbotussi woy laggetussi yootanawu koyoosona. Ha oyshaa oychchidoogee ayba ayfe demissidee?

Meeri xinaate gidida Jazmina Geeshsha Maxaafaa xannaꞌanawu koyiya oyddu asatuura O gattaasu. Etappe issinno gidida Kristtina, xannaꞌiyogaa keehi dosido gishshawu saaminttan naaꞌꞌutoo xannaꞌanawu Meero oychchaasu. Meera Geeshsha Maxaafaa xannaꞌanawu koyiya hara ura eriyakkonne Kiristtino oychchaasu; yaatin Kiristtina, “Ee deꞌoosona, taani ta laggetuura nena gattana” yaagaasu. Amarida saaminttatu giddon, Kiristtina xannaꞌanawu koyiya ba oyddu laggetuura Meero eretissaasu. Guyyeppe, Kiristtina ba lagge gidida haratuura O eretissaasu; qassi etappe amaridaageetikka iigaadan oottidosona.

Kiristtina Pilippinssen deꞌiya I soo asaykka Geeshsha Maxaafaabaa tamaaranaadan koyaasu. Hegaa gishshawu Andiro giyo ba naꞌeessi hegaabaa yootaasu. Koyro heeran Andira, ‘Yihoowa Markkati iita haymaanootiya kaalloosona, Yesuusan ammanokkona, qassi Galꞌꞌa Maachchaa xalaala goꞌettoosona’ gaada qoppaasu. Shin A Yihoowa Markkatubaa qoppidobay bala gidiyogaa xannaꞌido koyro gallassan akeekaasu. Geeshsha Maxaafaappe oorattabaa eriyo wode ubban A hagaadan gawusu, “Hagee Geeshsha Maxaafan deꞌiyaba gidiyo gishshawu tuma gidana bessees!”

Amarida wodiyappe simmin, Andira ba naaꞌꞌu laggetanne xannaꞌiyogaa doommida banaara oottiyaro Meeriira gattaasu. Qassi, Meera Andiro xannaꞌissiyo wode, qooqe gidida Anjelo giyo Andiri aawaa michchiya ezggawusu; shin Meera hegaa erabeykku. Issi galla, Anjela A Geeshsha Maxaafaa xannaꞌanawu koyiyogaa Meerissi yootanaadan Andiro oychchaasu. Anjela tamaariyobaa dosaasu. Issi aginaa giddon A daro xiqiseta hassayaasu; qassi saaminttan oyddutoo xannaꞌanawu koyaasu! Qassi Andira maaddin, Anjela Intternneetiya  baggaara shiiqota ubbatoo shiiqawusu.

Meera Kiristtino xannaꞌissiyo wode Kiristtini azinay, Joshuwi eta matappe xayi erennaagaa Meera akeekada ikka xannaꞌanawu koyiyakkonne oychchaasu. Joshuwi hagaadan giis, “Tana ayba oyshanne oychchoppa, taani ezgganawu xalla koyays. Ne tana oyshaa oychchikko taani aggada baana.” Kiristtino xannaꞌissiyogaa doommin ichchashu daqiiqaa giddon, iigaappe aaruwan daro oyshata I oychchiis; qassi ikka xannaꞌanawu koyiis.

Meera metenna oyshaa oychchidoogee daroti Geeshsha Maxaafaa xannaꞌanaadan oottiis. Etappe daroti hara Yihoowa Markkatuura xannaꞌanaadan A hanotaa injjeyaasu. Meera oyddu biittatun deꞌiya muleera 28n asata Geeshsha Maxaafaa xannaꞌissiyogaa doomissaasu.

Ha taarikiyan koyro odettida Jazmina Hosppune 2021n haattan muukettaasu. Kiristtina Uddufune 2022n haattan muukettaasu; yaatada ba soo asaakko Pilippinsse simmaasu. Kiristtina Meeriira eretissido hara naaꞌꞌu xinaatetikka haattan muukettidosona. Kiristtina haattan muukettin amarida aginatuppe simmin Anjela haattan muukettasu; haꞌꞌi Anjela ubba wode aqinye gidada haggaazawusu. Kiristtini azinay Joshuwinne eta naꞌiya Andira, qassi hara daro xinaateti ayyaanaaban loytti dicciiddi deꞌoosona.

Koyro xeetu layttan, daro asati Yesuusa xeelliyagan eridobaa bantta so asawunne bantta laggetussi yootidosona. (Yoh. 1:41, 42a; Oos. 10:24, 27, 48; 16:25-33) Neeni Geeshsha Maxaafaa xannaꞌissiyogeetanne siyanawu koyiya harata hagaadan oychcha, “Geeshsha Maxaafaa xannaꞌanawu koyiya ne eriyo hara uri deꞌii?” Neeni metenna ha oyshaa oychchikko, Geeshsha Maxaafaa xannaꞌanawu koyiya daro asaa neenikka demmana danddayaasa.