1-2. (a) Nuuni issi urawu atto gaanawu keehi metootana danddayiyoy awudee? (b) Deenisa atto giyogaa waata bessadee?

 NEENI haratuyyo atto gaanawu metootay? Issi uri haasayiyoban woy oottiyoban nuna keehi qohikko atto gaanawu nuuppe daroti metootoos. Shin nuuni yiillotiyogaa woy hanqqettiyogaa aggidi, haratuyyo atto gaanawu oottana danddayiyo amaridabati deꞌoosona. Leemisuwawu, malaalissiya hanotan atto giida Deeniso a giyo michchee hanotaa ane beꞌoos. Deenisanne I soo asay 2017n mati dooyettida Yihoowa Markkatu Waanna Biiruwa xomoosi simmoosona. Eti soo simmishin kaamiya laaggiya issi bitanee ba kaamiya essana gin ixxidi eta kaamiya domꞌꞌiis. He daafabaa gaasuwan Deenisa amarida wodiyawu bana erabeykku. A hegaappe beegottiyo wode I naati keehi qohettidoogaanne I azinay Briyani hayqqidoogaa eraasu. Deenisa he wode hanidabaa qoppada hagaadan gaasu, “Taani keehi unꞌꞌettaasinne haniyoba xayaas.” He daafay gakkiyo wode, kaamiya laaggiyagee mattottibeennaagaa woy jallissiyabaa goꞌettibeennaagaa, qassi silkkiya woy harabaa xeelliyogan A qofay shaahettibeennaagaa A guyyeppe akeekaasu. Yaaniyo gishshawu he unꞌꞌissiya hanotan A woppu gaanawu Yihoowa woossaasu.

² Eta qohida kaamiya laaggiyagee, I azinaa kaamiyan worido gishshawu oyqettidi pirddaa keetti shiiqiis. Mooranchcha giidi pirdda keettay kuuyikko I qashettana danddayees. Gidikkonne, Deenisa markkattiyobay he bitanee qashettanaadan, woy qashettennaadan oottana danddayiyogaa pirdda keettan oottiyageetuppe issoy iyyo yootiis. Deenisa hagaadan gaasu: “Ta deꞌuwan tana gakkida keehi iitabaa taani yootiyogee ta masunttaa qachchidobaa  issi uri qaaridi hegan keehi daro maxiniya qoliyogaa mala.” Amarida saaminttatuppe guyyiyan, Deenisa pirdda keetti baada I soo asay keehi azzananaadan oottida he bitaniya sinttan eqqada markkattaasu. A woygadee? Deenisa daannay bitaniya maaranaadan oychchaasu. b A haasayiyogaa wurssiyo wode daannay yeekkiyogaa doommiis. I hagaadan giis: “Taani daanna gidada oottido 25 layttatun shilootan ooninne hagaa malabaa giishin siya erikke. Qohoy gakkido so asay banttana qohida uraa maaranaadan oychchin taani mule siya erikke. Siiqiyogaanne atto giyogaa bessiyabaa mule siya erikke.”

 3. Deenisa atto gaanaadan maaddidabay aybee?

³ Deenisa atto gaanaadan maaddidabay aybee? Yihooway ay keena atto giyakko A wotta dentta qoppaasu. (Mik. 7:18) Yihooway nuuyyo atto giidoogaa nuuni nashshiyogee haratuyyo atto gaanaadan nuna denttettees.

 4. Yihooway nuuni ay oottanaadan koyii? (Efisoona 4:32)

⁴ Yihooway nuuyyo coo atto giidoogaadan nuunikka haratuyyo coo atto gaanaadan I koyees. (Efisoona 4:32 nabbaba.) Nuuni nuna naaqqiyageetuyyo atto gaanawu giigi uttanaadan I koyees. (Maz. 86:5; Luq. 17:4) Kaseegaappe aaruwan atto gaanaadan nuna maaddiya heezzubata ha huuphe yohuwan beꞌana.

NEEYYO SIYETTIYABAA XAASAYA XEELLOPPA

 5. Leemiso 12:18y yootiyogaadan, issi uri nuna naaqqikko nuuyyo aybi siyettana danddayii?

⁵ Issi uri haasayiyobay woy oottiyobay, ubba I nu mata lagge woy nu soo asa gidikko nuna keehi qohana danddayees. (Maz. 55:12-14) Issi issitoo, cube malaban cadettidabadan nuuyyo siyettin nuuni yiillotana woy hanqqettana danddayoos. (Leemiso 12:18 nabbaba.) Nuuni naaqettidobaa xaasayi xeellanawu baaxetana danddayoos. Shin yaatiyogee nuna mashshan caddin mashshaa he sohuwan aggiigiyogaa mala gidana danddayees. Hegaadankka, nuuni naaqettidobaa xaasayi xeellikko woppu goos giidi qoppana koshshenna.

 6. Issi uri nuna naaqqiyo wode nuuni waanana danddayiyoo?

⁶ Issi uri nuna naaqqiyo wode sohuwara yiillotana danddayoos. Geeshsha Maxaafay nuuni hanqqettana danddayiyogaa yootees. Shin nuuni hanqqettidi takkennaadan zorees. (Maz. 4:4; Efi. 4:26) Aybissi? Darotoo nuussi siyettiyabay nuuni issibaa oottanaadan denttettiyo gishshataassa. Asay yiillotidi oottiyobay darotoo loꞌꞌobaa demissenna. (Yaaq. 1:20) Hanqqettiyogee wottin deꞌiyaba; shin hanqqetti takkiyogee woy hanqqettiyogaa aggiyogee nu dooro gidiyogaa hassaya.

 7. Issi uri nuna qohiyo wode nuuyyo aybi siyettana danddayii?

⁷ Harati nuna naaqqiyo wode nuuni keehi azzanana danddayoos. Leemisuwawu, Aano giyo michchiya hagaadan gaasu: “Taani naatettan deꞌiyo wode ta aaway ta aayyiyo aggidi nu son oottiyaro ekkiis. Ta aaway tana aggi bayidabadan tawu siyettiis. Eti naata yelido wode tana sheneho giidobadan tawu siyettiis. Taani diccido wode ooninne tana koyennabadan tawu siyettiis.” Jorjeto giyo michchiya I azinay wodiraa laammido wode iyyo siyettidabaa hagaadan qonccissaasu: “Nuuni naatettaappe doommidi laggetida. Nuuni issippe aqinye gididi haggaazida! Taani keehi kayyottaas.” Wurssettan eti paraman shaahettidosona. Qassi Naaꞌoomo giyo michchiya hagaadan gaasu: “Ta azinay tana qohana gaada mule qoppabeykke. Yaatiyo gishshawu I  geeman pornograafiya beꞌiiddi takkidoogaa tawu yootido wode taani cimettidabadaaninne I tana kaddidabadan tawu siyettiis.”

 8. (a) Nuuni haratuyyo atto gaana koshshiyo gaasoti awugeetee? (b) Nuuni haratuyyo atto giyo wode demmiyo goꞌꞌay aybee? (“ Issi Uri Nu Bolli Oottido Iitabaa Doganawu Nuuni Metootikko Shin?” giya saaxiniya xeella.)

⁸ Harati haasayiyobaa woy oottiyobaa diggana danddayokko; shin nuuni zaariyo ogiya kuuyana danddayoos. Qassi darotoo nuuni oottana danddayiyo keehi loꞌꞌobay atto giyogaa. Aybissi? Nuuni Yihoowa siiqiyo gishshawunne atto gaanaadan I koyiyo gishshataassa. Nuuni lancciya oyqqidi atto geennaba gidikko, eeyyabaa oottana danddayoos; woy hegee nu payyatettaa qohana danddayees. (Lee. 14:17, 29, 30) Kiristtino giyo michchee hanotaa beꞌa. A hagaadan gaasu: “Taani hanqqettiyo woy yiillotiyo wode noocu giikke. Ta demmido qumaa coo mays. Loytta xiskkikke; sohuwara yiillotays; hegee qassi ta aqo deꞌuwanne haratuura deꞌiya dabbotaa qohees.”

 9. Nuuni uluwan lancciya oyqqiyogaa aggana koshshiyoy aybissee?

⁹ Nuna qohida uri maarotaa mule oychchana xayikkokka, nuuni darin qohettennan aggana danddayoos. Waanidi? Qommoora ibay odettido Jorjeta hagaadan gaasu: “Amarida wodiyappe simmin, ta kase azinaa bolli lancciyogaanne hanqqettiyogaa aggaas. Hegaappe denddidaagan taani keehi woppu gaas.” Nuuni uluwan lancciya oyqqennan aggiyo wode hegee nuna keehi qohennaadan oottoos. Qassi nuna maaddiyabaa oottoos; hegeekka he allaalliyabaa qoppiyogaa aggidi zaarettidi nu deꞌuwan ufayttoos. (Lee. 11:17) Shin neeni haꞌꞌikka atto gaanawu giigettabeennaba gidikko waatana koshshii?

YIILLOTIYOGAA WOY HANQQETTIYOGAA WAATA AGGANA DANDDAYAY?

10. Yiillotiyogaa woy hanqqettiyogaa agganawu nuussi wodee koshshiyoy aybissee? (Misiliyakka xeella.)

¹⁰ Yiillotiyogaa woy hanqqettiyogaa waata aggana danddayay? Issi ogee amarida wodee aadhdhanaashin naagiyogaa. Keehi qohettida uri akkametti simmin paxanawu wodee koshshees. Hegaadankka, issi urawu wozanappe atto gaanaappe kase wodee koshshana danddayees.—Era. 3:3; 1 PHe. 1:22.

11. Neeni atto gaanaadan woosay waati maaddana danddayii?

 ¹¹ Atto gaanawu nena maaddanaadan Yihoowa woossa. c Qommoora ibay odettido Aana woosay O waati maaddidaakko yootaasu. A hagaadan gaasu: “Nu soo asa ubbay haasayido woy oottido balabaa atto gaanaadan Yihoowa woossaas. Yaatada ta aawaassinne I ekkido machcheessi dabddaabbiya xaafada ta etawu atto giidoogaa yootaas.” Yaatiyogee metiyaba gidiyogaa Aana yootaasu. Shin A hagaadan gaasu: “Taani atto giyogan Yihoowa leemisuwa kaallanawu baaxetido gishshawu ta aawaynne A machchiya Yihoowabaa loytti eranawu koyanaagaa hidootays.”

12. Nuuni nuuyyo siyettiyaban gidennan, Yihoowan ammanettana koshshiyoy aybissee? (Leemiso 3:5, 6)

¹² Neeyyo siyettiyaban gidennan, Yihoowan ammanetta. (Leemiso 3:5, 6 nabbaba.) Nuussi keehi loꞌꞌobay aybakko Yihooway ubbatoo erees. (Isi. 55:8, 9) Qassi nuna qohiyabaa oottanaadan I mule azazenna. Yaatiyo gishshawu, nuuni atto gaanaadan I yootiyo wode yaatiyogee nuna goꞌꞌiyogaa nuuni ammanettana danddayoos. (Maz. 40:4; Isi. 48:17, 18) Shin nuuni nuuyyo siyettiyabay likke giidi qoppikko, haratuyyo mule atto gaana danddayokko. (Lee. 14:12; Erm. 17:9) Qommoora ibay odettido Naaꞌooma hagaadan gaasu: “Ta azinay pornograafiya beꞌido gishshawu taani ayyo atto gaana koshshenna gaada koyro heeran qoppaas. I tana zaarettidi qohaneeshsha, woy I oottidobaa gaasuwan ta ay keena azzanidaakko doganeehshsha gaada hirggaas. Qassi Yihooway taassi siyettiyabaa loytti eriyogaa akeekaas. Shin Yihooway taassi siyettiyabaa akeekees giyogee I hegan maayettees giyogaa gidennaagaa eraas. I tawu siyettiyabaanne taani lancciyogaa agganawu taayyo wodee koshshiyogaa erikkokka, taani atto gaanaadan koyees.” d

LOꞌꞌOBAA QOPPANAWU WAATANA DANDDAYAY?

13. Roome 12:18-21 yootiyogaadan, nuuni waatana koshshii?

¹³ Nuuni nuna keehi qohida urawu atto giyo wode, hanidabaa haasayennan agganawu kuuyiyogaappe aarobaa oottana koshshees.  Qassi nu halchchoy sigettiyogaa; ubba nuna qohida uri Kiristtaane isha woy michcho gidikko, yaatana koshshees. (Mat. 5:23, 24) Hegaadan oottanawu, lancciyogaa aggidi nuuni maarananne atto gaana koshshees. (Roome 12:18-21 nabbaba; 1 PHe. 3:9) Hegaadan oottanawu nuna aybi maaddana danddayii?

14. Nuuni ay oottanawu baaxetana koshshii, qassi aybissi?

¹⁴ Yihooway asawu deꞌiya loꞌꞌo eeshshata xeellees. Nuuni Yihoowa leemisuwa kaallanawunne nuna naaqqida urawu deꞌiya loꞌꞌo eeshshata xeellanawu baaxetana koshshees. (2 Odi. 16:9; Maz. 130:3) Nuuni issi urawu deꞌiya loꞌꞌo eeshshaa koyikko loꞌꞌo eeshshaa demmoos; qassi iitaa koyikko iitaa demmoos. Nuuni haratuyyo deꞌiya loꞌꞌo eeshshaa xeellikko etayyo atto gaanawu metootokko. Leemisuwawu, Jeereda giyo ishay hagaadan giis: “Taani issi ishay mooridobaa gidennan, taani dosiyo ayyo deꞌiya loꞌꞌo eeshshata qoppiyo wode awu atto gaanawu metootikke.”

15. Neeni issi urawu atto giidoogaa yootiyogee maaddana danddayiyoy aybissee?

¹⁵ Neeni oottana koshshiya harabay he uraassi  atto giidoogaa yootiyogaa. Aybissi? Qommoora ibay odettido Naaꞌooma giidobaa akeeka: “Ta azinay tana hagaadan oychchiis, ‘Neeni tawu atto gaadii?’ ‘Ta neeyyo atto gaas’ giya qaalay ta doonaappe kiyennan ixxiis. Taani wozanappe awu atto gabeennaagaa akeekaas. ‘Ta neeyyo atto gaas’ giyogee deexxikkonne, guyyeppe hegaa awu gaas. Taani ta azinawu atto giido wode I yeekkiis. Qassi ikka taakka keehi woppu giidoogan malaalettaas. Hegaappe simmin taani zaarettada an ammanettido gishshawu nuuni zaarettidi tumu lagge gidida.”

16. Atto giyogaa xeelliyagan neeni ay tamaaradii?

¹⁶ Nuuni atto gaanaadan Yihooway koyees. (Efi. 4:32) Gidikkokka haratussi atto gaanawu metootana danddayoos. Shin nuuni nuuyyo siyettiyabaa xaasayi xeellennaageetanne hanqqettiyogaa agganawu baaxetiyageeta gidikko atto gaana danddayoos. Yaatikko nuuni loꞌꞌobaa qoppana danddayoos.—“ Atto Gaanawu Neeni Oottana Danddayiyo Heezzubata” giya saaxiniya xeella.

ATTO GIYOGEE DEMISSIYO GOꞌꞌAA LOYTTA QOPPA

17. Nuuni haratuyyo atto gaana koshshiyoy aybissee?

¹⁷ Nuuni atto gaanaadan oottiya daro gaasoti deꞌoosona. Hegeetuppe amaridaageeta ane beꞌoos. Koyruwan, maariya nu Aawaa Yihoowa leemisuwa kaalloosinne A ufayssoos. (Luq. 6:36) Naaꞌꞌanttuwan, Yihooway nuuyyo atto giidoogaa wozanappe nashshiyogaa bessoos. (Mat. 6:12) Heezzanttuwan, nu payyatettaa naagoosinne dabbotaa minttoos.

18-19. Nuuni atto giyogee ayba ayfe demissana danddayii?

¹⁸ Nuuni haratuyyo atto giyo wode nu qoppibeenna daro anjjota demmana danddayoos. Qommoora ibay odettido Deenisa oottidobay ay demissidaakko beꞌa. Deenisa he wode erana xayikkokka, daafabaa gattida bitanee shilootaappe simmin bana barkka woranawu qoppiis. Shin Deenisa atto giidoogan I keehi malaalettidi Yihoowa Markkatuura Geeshsha Maxaafaa xannaꞌiyogaa doommiis.

¹⁹ Nuuni issi urawu atto giyogee oottana koshshiya waayissiyabatuppe issuwa gidana danddayikkokka, hegee nuuni woytuwa demmanaadan oottiyabatuppe issuwa. (Mat. 5:7) Yaakko nuuni ubbay Yihoowagaadan atto gaanawu nuussi danddayettida ubbabaa oottiyageeta gidoos.