He laytti Yihoowa dirijjitee laammido amaridabati Geeshsha Maxaafaa Tamaareti issippetettan goynnanaadan maaddidosona. Saaminttan saaminttan Yihoowa woossanawunne sabbanawu eti shiiqiyo shiiquwan xannaꞌiyo xiqisiya qonccissiya qofay Wochchiyo Keelan kiyiyogaa doommiis. Saaminttan saaminttan gubaaꞌe shiiqotun xannaꞌana xiqisiyanne buzo xinaatiya woy so asaa goynuwa wode ubba galla yexxana danddayiyo mazamuriya qonccissiya kalanddariyakka Geeshsha Maxaafaa Tamaareti attamissidosona.

He shiiqotun Geeshsha Maxaafaa Tamaareti haggaazuwan demmidobaa yootoosona, Yihoowa eti galatiyo gaasuwa yootoosona, mazamuriya yexxoosona woy woossoosona. Layttay iyyo 15 gidin 1923n xammaqettida Iva Berna hagaadan gaasu: “Neeni shiiquwan Yihoowa sabbanawu koyikko, denddada hagaa malabaa gaasa, ‘Goday taassi oottido loꞌꞌobaa ubbaa gishshawu taani A galatays.’” Hegaadan galatiyogaa amarida ishantti dosidosona. Michchiya Berna gujjada hagaadan gaasu: “Cima ishay Gadwini Godaa galatiyo daro gaasoy deꞌees. Shin Gadwina machchiya shiiquwa kaalettiya ishay unꞌꞌettiyogaa akeekiyo wode ba azina kootiya loddan goochchin I haasayiyogaa aggidi uttees.”

Gubaaꞌetu ubban woossiyonne Yihoowa sabbiyo dumma prograamee aginan issitoo giigees. Hosppune 1, 1923 Wochchiyo Keelay he shiiquwabaa qonccissiiddi hagaadan giis: “Shiiquwappe dariya baggay haggaazuwa xeelliyagan haasayiyogaanne haggaaziyageeta minttettiyogaa gidana bessees. . . . Ha minttettiya shiiqoti ishanttu issippetettaa minttanaagaa ammanettoos.”

Kanaadan Vankover giyosan deꞌiya layttay 19 gidido, Charles Martina giyo aassiyagee he shiiqotuppe loytti goꞌettiis. I guyyeppe hagaadan giis: “Taani sooppe so haggaaziyo wode woyganaakko koyro tamaaridoy he shiiqotuuna. Darotoo issi uri sooppe so haggaaziyo wode hanidabaa yootees. Hegee taani haasayanabaanne harati eqettiyo wode zaaranabaa eranaadan maaddiis.”

Qassi “haggaazo gallassati” ishanttu issippetettaa minttidosona. Hosppune 1, 1923 Wochchiyo Keelan hagaadan giya erissoy deꞌees: “Nuuni ubbaykka hashetidi oottana mala . . . , Masqqaynno, Uddufune 1, 1923y haggaazo gallassa gidana.  Hegaappe simmin deꞌiya aginawu koyro Masqqaynnoy ubbatookka haggaazo gallassa gidana . . . Ubba gubaaꞌiyan deꞌiyageeti hashetidi oottana koshshees.”

Geeshsha Maxaafaa Tamaare gidida yelagatikka ha oosuwa oottidosona. He wode iyyo layttay 16 gidido Hazel Berferda hagaadan gaasu: “Buletinee nuuni asaa haasayissiyo qofaa hassayanaadan maaddiya xuufe. a Ta aaye aawaynne taani he oosuwa loytti oottida.” Shin michchiya Berferda sabbakidogaa xeelliyagan issi ishawu siyettiban keehi dagammaasu. A hagaadan gaasu: “Issi cima ishay taani asawu sabbakiyogaa keehi eqettiis. ‘Wodallatanne geelaꞌota’ gujjin, Geeshsha Maxaafaa Tamaareti ubbay Medhdhidaagaa sabbana koshshiyogaa amaridaageeti he wode akeekibookkona.” (Maz. 148:12, 13) Shin michchiya Berferda sabbakiyogaa aggabeykku. A Giiliyade Timirtte Keettan naaꞌꞌantta kayan tamaarada, Paanaaman misoonaawe gidada haggaazaasu. Yelagati haggaaziyogaa xeelliyagan he ishantti guyyeppe bantta qofaa laammidosona.

Gita shiiqotikka nu ishantti kaseegaappe aaruwan issuwa gidanaadan maaddidosona. Gita shiiqotuppe darotun haggaazo gallassay deꞌees; leemisuwawu Kanaadan Winpingen shiiqido gita shiiquwan deꞌiyageeti ubbay Laappune 31n he kataman sabbakanaadan shoobettidosona. Ha sabbakiyo dumma gallassatun keehi daro asaara gayttin loꞌꞌo ayfee beettiis. Naasee 5n Winpingen hara gita shiiquwan 7,000 gidiya asay shiiqiis. He wode Kanaadan shiiqido gita shiiquwan kaseegaappe daro asay shiiqiis.

Yihoowa asay 1923n Kaliforniyan, Los Anjjelese kataman Naase 18-26 gakkanaashin shiiqido gita shiiqoy keehi dumma. He gita shiiquwappe kasetiya saaminttatun, shiiquwa xeelliyagan erissoti gaazeexatun kiyidosona, qassi Geeshsha Maxaafaa Tamaareti 500,000​ppe dariya shoobe woraqataa asawu immidosona. He gita shiiquwa erissuwa otobisiyaninne bantta kaamiya bolli kaqqidosona.

Qeeraa Naasee 25n Ishaa Razerfordi “Dorssaanne Deeshshaa” giya haasayan “dorssa” mala gidida suure wozanay deꞌiyo asati gannate gidana  saꞌan merinawu deꞌanaagaa loytti qonccissiis. I haasayaakka haasayiis, qassi “Akeekissuwa” geetettiya nuuni murttido murttiya qonccissiyabaa nabbabiis. Hegan, banttana Kiristtaane giyageeti worddo gidiyogaa qonccissiisinne suure wozanay deꞌiyogeeti ‘Gita Baabiloonippe’ kiyanaadan mintti yootiis. (Ajj. 18:2, 4) Guyyeppe kumetta saꞌan deꞌiya minni oottiya Geeshsha Maxaafaa Tamaareti he murttiyabaa yootiya daro miiloone trakttiya asawu immidosona.

Gita shiiquwa wurssetta gallassi Ishaa Razerfordi haasayido, “Kawotettaa Ubbay Armmageedoona Olawu Biiddi Deꞌees; Shin Haꞌꞌi Deꞌiya Miilooniyan Qoodettiya Asay Mule Hayqqenna” giya haasayaa 30,000​ppe dariya asay siyiis. Geeshsha Maxaafaa Tamaareti keehi daro asay yaana giidi qoppido gishshawu, mati keexettida Los Anjjelese isttaadeemiya keraa ekkidosona. Ishantti yan deꞌiya asa ubbay siyanaadan isttaadeemiyan deꞌiya cenggurssaa xoqqissiya miishshaa goꞌettidosona. Hegee he wode oorattaa miishshaa. Hara daro asay he prograamiya eraadooniyan siyiis.

Sabbakiyo oosoy Afirkkan, Awurooppan, Hinddeeninne Tohossa Amarkkan 1923n ufayssiya hanotan aakkiis. Hindden A. J. Josefi ba machcheesinne usuppun naatussi koshshiyabaa kunttiiddi Hindi, Tamili, Telugunne Urdu doonan xuufeta giigissiyogan maaddiis.

Geeshsha Maxaafaa Tamaare gidida Seera Liyonen deꞌiya, Alferd Josefinne Liyonard Blakmani maaddiya asa koyidi Niwu Yorke, Birukiliinen deꞌiya waanna biiruwa xaafidosona. Hosppune 14, 1923n eti koyidobawu zaaruwa demmidosona. Alfredi hagaadan giis: “Qeera galla omarssi taani qoppennan silkke tawu dawalettiis.” “Sabbakiyageeta koyada Wach Tawur Soosaytiyawu xaafiday nenee?” giidi xoqqa cenggurssan oychchiyogaa I siyiis. Alfredi, “Ee” giidi zaariis. “Yaakko, eti tana kiittidosona.” He cenggussay Wiliyam R. Browunaagaa. I Antono giyo ba machcheera qassi Luzironne Lusiro geetettiya bantta macca naatuura Karibiyane haruuruwappe he galla yaa gakkiis. Ishaa Browunaaranne A soo asaara ishantti sohuwara gayttidosona.

Alferdi gujjidi hagaadan giis: “Wonttetta gallassi maallado Liyonardoynne taani kaseegaadan Geeshsha Maxaafaa xannaꞌiyo wode adussa bitanee penggiyakko yiis. I Ishaa Browuna. I tumaa minni sabbakiyo gishshawu kaalliya gallassi dere haasayaa haasayanawu koyiis.” Ishaa Browuni  ehiido xuufeta issi agina giddon asawu immidi wurssiis. Daro takkennan, 5,000​ppe dariya maxaafay awu kiitettiis; ubba qassi sohuwara hara maxaafati koshshidosona. Shin Ishaa Browuni erettiyoy maxaafa bayzziyogaana gidenna. I ba deꞌo layttan Yihoowayyo minnidi haggaazido wode ubban, ba haasayatun awudenne Geeshsha Maxaafaappe yootiyo gishshawu, asay A Baybil Browun giidi xeesees.

Jarmanen, Barmen giyosan deꞌiya macara biiroy keehi xuntta gidiyo gishshawu, ishantti harasaa baanawu kuuyidosona. Qassi eti Paransaaye wotaaddarati he katamaa oyqqana haniyogaa siyi uttidosona. Geeshsha Maxaafaa Tamaareti Magdiberg giyosan pooqe keettaa demmidosona. Qassi hegee attamiyo oosuwawu keehi injjetiyasa milatees. Tamme 19n ishantti macara biiruwan goꞌettiyo attamiyo miishshaanne harabata qachchidi Magdibergen deꞌiya ooratta Beeteele biidosona. Ishantti muleera kiyichchidoogaa waanna biiruwa erissido wonttetta galla Paransaaye wotaaddarati Barmene kataman deꞌiyabaa bonqqidoogaa yootiya erissoy gaazeexatun kiyiis. Hegee Yihooway eta anjjiyogaanne naagiyogaa bessiya naqaasha gidiyogaa ishantti akeekidosona.

Jorj Yangi mishiraachchuwa yootanawu, ooratta macara biiruwa essanawunne Porchugaale doonan Wochchiyo Keelaa attamiyogaa doommanawu darosaa kanttidi Brazile biis. I amarida aginatu giddon 7,000​ppe dariya xuufeta asawu immiis. Saara Pergusena Ishaa Yangi eta soo biidi oychchidoogan keehi ufayttaasu. A 1899​ppe doommada Wochchiyo Keelaa nabbabaydda takkidaba gidikkonne, bana Yihoowawu sheedhdhidoogaa bessanawu xammaqettana danddayabeykku. Amarida aginatuppe simmin Michchiya Pergusenanne I oyddu naati xammaqettidosona.

He layttaa wurssettan, Tisaase 15, 1923 Wochchiyo Keelay gubaaꞌe shiiqotuura, haggaazuwaranne gita shiiqotuura gayttidaagan laamettidabay Geeshsha Maxaafaa Tamaareta keehi maaddidoogaa qonccissiis. Hagaadan giis: “Ubba gubaaꞌiyan deꞌiyageetu ammanoy keehi minnidoogee qoncce . . . Kaalliya layttan, 1924n loytti oottanawunne ubbatoo minnidi ufayssan Xoossawu haggaazanawu giigi uttidaageeta gidoos.”

Geeshsha Maxaafaa Tamaaretussi 1924​ykka keehi ufayssiya laytta. Beeteelen oottiya ishantti Birukiliine waanna biiruwappe darin haakkennan deꞌiya Isteten Aylande goshsha gadiyan keexuwa oosuwa amarida aginawu oottidosona. He ooratta sohuwan keexettida keettay 1924 doomettan wuriis; qassi he keettay awudeegaappekka aaruwan ishanttu issippetettay minnanaadaaninne mishiraachchoy ubbasaa gakkanaadan maaddiis.