Nabbabiyageetu Oyshaa
Israaꞌeelati bazzuwan deꞌiyo wode mannaappenne kuraachchuwappe harabaa miidonaa?
Israaꞌeelati 40 layttawu bazzuwan deꞌiyo wode etawu waanna qumay mannaa. (Kes. 16:35) Qassi Yihooway naaꞌꞌu wodetun kuraachchoy etakko yaanaadan oottiis. (Kes. 16:12, 13; Qoo. 11:31) Gidikkonne, Israaꞌeelati miyo hara qumaykka deꞌees.
Leemisuwawu, uyiyo haattaynne miyo qumay deꞌiyo “shemppiyo sohuwaa” Yihooway ba asaa issi issitoo kaalettiis. (Qoo. 10:33) He sohotuppe issoy Elaama biitta; “yan tammanne naa77u haatta pulttotinne laappun tammu zambba mittati de7oosona.” Hegee temire mittaa gidennan aggenna. (Kes. 15:27) Plants Of Zi Baybil giya maxaafay qonccissiyogaadan, temire mittay “dumma dumma sohotun diccees, . . . qassi bazzo heeran darotoo zambba mittaa maanawu goꞌettoosona. Daro miiloone asay qumawu, zaytiyawunne keettaa keexxanawu he mittaa goꞌettees.”
Israaꞌeelati ha wodiyan Faren geetettidi xeesettiya sohuwan shemppennan aggokkona; he sohoy Faren Waadi shaaho. Diskevering Zi World Of Zi Baybil giyo maxaafay yootiyogaadan, ha wombbay woy shaafaa sohoy 130 kilo meetiriya aduqqees; qassi Siinan deꞌiya keehi adussa loꞌꞌiyanne erettida wombbatuppe issuwa. He maxaafay gujjidikka hagaadan gees: “Wombba gaxaappe denddidi 45 kilo meetire hemetti simmidi 4.8 kilo meetire aduqqiyanne loꞌꞌiya zambbay kumido Faren giyosaa gakkoos; he sohoy 610 meetire xoqqees. Hegee Siinan deꞌiya Edene ataakiltte soho. He sohuwan daro shaꞌu temire mittay deꞌiyo gishshawu, beni wodiyappe doommidi asay yan deꞌanawu koyees.”
Faren giyosan deꞌiya temire ayfiya
Israaꞌeelati Gibxxeppe kiyiiddi xiilliya, munaqaa, geella amarida kattanne zaytiya ekkidi kiyennan aggokkona. Eti ekkidi kiyidobati eesuwan wuridoogee qoncce. Qassi asay ‘daro mehiyanne dorssaa deeshshaa wudiya ekkidi kiyiis.’ (Kes. 12:34-39) Bazzuwan away suulliyo gishshawu, daro mehee hayqqennan aggenna. Israaꞌeelati etappe amaridaageeta shukkidi meennan aggokkona. Qassi hara meheta yarshsho oottidi shiishshennan aggokkona; ubba worddo xoossatuyyokka yarshshennan waayi aggana. a (Oos. 7:39-43) Gidikkonne, Israaꞌeelatuyyo amarida meheenne dorssaa deeshshaa wudee deꞌees. Israaꞌeelati Yihoowawu azazettennan ixxido wode I etawu yootidobaappe nuuni hegaa akeekana danddayoos: “Intte naati waayettiiddi, ha bazzuwan oitamu laittaa henttanchcha gididi yuuyana.” (Qoo. 14:33) Eti bantta mehetuppe maattaanne asho demmana danddayikkonne, heezzu miiloone gidiya asay 40 laytta takkanaadan oottiya kattaa demmennaagee qoncce. b
Meheti kattaanne haattaa awappe demmiyonaa? c He wode iray loytti bukkiyo gishshawu, bazzuwan daro mittay deꞌennan aggenna. Geeshsha Maxaafaa Loytti Akeekiyogaa (Inggilizettuwa) Paydo 1y, yootiyogaadan 3,500 layttaappe kase, “Araba heeran ha wodeegaappe aaruwan daro haattay deꞌees. Issi wode, haattay goggido cimma gidida mela wombbati woy zanggaarati daroy deꞌiyogee haattay pulttanaadan oottiya iray kase bukkidoogaa bessiyaba.” Gidikkonne, he bazzoy melanne yashshiya soho. (Zaa. 8:14-16) Maalaalissiya hanotan Yihooway haattaa pulttissennaakko, Israaꞌeelatinne eta meheti hayqqanaagee qoncce.—Kes. 15:22-25; 17:1-6; Qoo. 20:2, 11.
Israaꞌeelati ‘Xoossay haasayiyo qaala ubbaanappe attin, oytta xallan deꞌennaagaa tamaaranaadan’ Yihooway eta mannaa mizidoogaa Muusee etawu yootiis.—Zaa. 8:3.
a Israaꞌeelati bazzuwan Yihoowawu mehiya yarshshuwa yarshshido naaꞌꞌu wodetubaa Geeshsha Maxaafay yootees. Eti koyruwan yarshshidoy qeeseta sunttiyogee doomettido wodiyaana; naaꞌꞌanttuwan yarshshidoy Paasikaa Baalaa bonchchiyogaa doommido wodiyaana. Hegee hanidoy Israaꞌeelati Gibxxeppe kiyin issi laytta heeray aadhdhin, 1512 K.K.—Wog. 8:14–9:24; Qoo. 9:1-5.
b Israaꞌeelati bazzuwan takkido 40 layttaa wurssetta heeran keehi daro shaꞌu meheta olan omooddidosona. (Qoo. 31:32-34) Gidikkonne, eti Hidootaa Biittaa gelana gakkanaashin mannaa miidosona.—Yaas. 5:10-12.
c Asay ay keena mannaa ekkanaakko Yihooway yootido wode mehetubaa yootibeenna gishshawu meheti mannaa mibookkona gaana danddayoos.—Kes. 16:15, 16.
