1-2. Xammaqetti simmidikka nuuni ubbatoo ay oottana koshshii? Qonccissa.

 INTTE intte keettaa ubbatoo geeshsheetii? Intte ooratta keettaa gelanaappe kase hegaa loytti geeshshennan waayi aggana. SHin intte zaarettidi mule geeshshennaba gidikko aybi hananee? Sohuwaara keettay zaarettidi baanattananne moorettidaban kumana danddayees. Intte keettay ubbatoo geeshsha gidanaadan intte muletoo geeshshana koshshees.

² Hegaadankka, nuuni ubbatoo nu qofaanne nu eeshshaa laammanawu baaxetana koshshees. Nuuni xammaqettanaappe kase “nu ashuwaanne nu shemppuwaa tunissiya ubbabaappe nu huuphiyaa” geeshshanawu nu deꞌuwan koshshiyaaban laamettanawu minni oottidoogee qoncce. (2 Qor. 7:1) SHin, kiitettida PHawuloosi nuuni ubbatoo ‘ooraxxanaadan’ zorido zoriyaa haꞌꞌi oosuwan peeshshana koshshees. (Efi. 4:23) Nuuni aggennan baaxetana koshshiyoy aybissee? Ha alamee Yihoowa sinttan nuuni geeshsha gidennaadan oottana danddayiyo gishshataassa. Nuuni ubbatoo Yihoowa ufayssanawu nu qoppiyoobaa, nu eeshshaanne nu amottiyoobaa muletoo pilggana koshshees.

3. ‘Qofaa laammiyoogaa’ giyoogee woygiyoogee? (Roome 12:2)

³ Nuuni qoppiyo ogiyaa laammanawu waatana koshshii? (Roome 12:2 nabbaba.) “Ne qofaa laamma” geetettidi birshshettida Giriiketto qaalay “ne qofaa ooraxissa” geetettidikka birshshettana danddayees. Hegaa giyoogee, nuuni loꞌꞌo gidida  amaridabatu xallaa oottana koshshees giyoogaa gidenna. Nuussi danddayettida keenan Yihooway kessido maarawu azazettanawu, nuuni ay mala asakko qoppananne koshshiyaaban laamettana bessees. Nuuni hegaa issitoo gidennan, ubbatoo oottana koshshees.

4. Nuuni ha alamiyaa qofaappe naagettanawu waatana danddayiyoo?

⁴ Nuuni wottiyoobi baynna asa gidiyo wode, awudenne Yihoowa ufayssiyaabaa oottana danddayoos. He wodee gakkanawu, nuuni Yihoowa ufayssanawu minni baaxetana koshshees. Nuuni oottanaadan Xoossay koyiyoobaa eranawu nu qofaa laammana koshshiyoogaa PHawuloosi Roome 12:2n yootidoogaa akeeka. Nuuni ha alamiyaagaadan qoppennaadaaninne oottennaadan, nu halchchiyoobaaninne kuuyiyooban ha alamiyaa qofaa gidennan, Xoossaagaadan qoppanawu murttidaakkonne pilggana koshshees.

5. Yihoowa gallassay matidoogaa xeelliyaagan nu qofaa waati qorana danddayiyoo? (Misiliyaa xeella.)

⁵ Issi leemisuwaa beꞌa. Nuuni “Xoossaa gallassaa” matayidi xeellanaadan Yihooway koyees. (2 PHe. 3:12) Nena hagaadan oychcha: ‘Ha iita alamee mata wode xayanaagaa akeekidoogaa taani ta deꞌuwan bessiyaanaa? Yuniversttiyaa geliyoogaa woy oosuwaa dooriyoogaa xeelliyaagan taani kuuyiyoobay ta deꞌuwan aybippenne aaruwan Yihoowa haggaazuwaa kaseyiyoogaa bessii? Yihooway taassinne ta so asawu koshshiyaabaa kunttanaagaa ammaniyaanaayye, ubbatoo aquwaabaa hirggiyaanaa?’ Yihooway nuuni oottiyo ubbaban A sheniyaara maayettiyaabaa oottanawu baaxetiyoogaa beꞌiyo wode keehi ufayttees.—Maa. 6:25-27, 33; Pili. 4:12, 13.

6. Nuuni ubbatoo ay oottana koshshii?

⁶ Nuuni ubbatoo nu qofaa qoridi koshshiyaaban laamettana bessees. PHawuloosi  Qoronttoosan deꞌiyaageetussi hagaadan giis: “Ammanuwan intte de7iyaakkonne ane inttena qoridi pirddite.” (2 Qor. 13:5) ‘Ammanuwan deꞌiyoogaa’ giyoogee, issi issitoo shiiqota shiiqiyoogaanne sabbakiyoogaa xalla gidenna. Hegee nu qoppiyoobaa, nu amottiyoobaanne nu koyiyooba bessiyaaba. Yaatiyo gishshawu, Yihoowaagaadan qoppanawunne A ufayssanawu koshshiya ubbabaa oottanawu Xoossaa Qaalaa nabbabiyoogan nu qofaa ubbatoo laammana koshshees.—1 Qor. 2:14-16.

7. Efisoona 4:31, 32y yootiyoogaadan, nuuni oottana koshshiyo harabay aybee, qassi hegee metana danddayiyoy aybissee?

⁷ Efisoona 4:31, 32 nabbaba. Nuuni laamettanawu koshshiya harabay “ooratta asatettaa” maayiyoogaa. (Efi. 4:24) Nuuni yaatanawu minni oottana koshshees. Harabata gujjin nuuni ixuwaa, yiilluwaanne hanqquwaa agganawu baaxetana koshshees. Hegee metiyaaba gidana danddayiyoy aybissee? Amarida iita eeshshata aggiyoogee keehi baaxeyiyaaba gidana danddayiyo gishshataassa. Leemisuwawu, issoti issoti “hanqqettiya” asa qassi “elle yiillotiya” asa gidiyoogaa Geeshsha Maxaafay yootees. (Lee. 29:22) Kase hegaa mala iita eeshshay deꞌiyo uri xammaqetti simmidikka laamettanawu aggennan minnidi baaxetiyoogee koshshana danddayees. Kaallidi deꞌiya hanotay hegaa bessees.

8-9. Ceega asatettaa qaari olanawu ubbatoo baaxetana koshshiyoogaa Istevena hanotay waati bessii?

⁸ Istevena giyo ishay hanqqettiyoogaa agganawu keehi metootiis. I hagaadan giis: “Taani xammaqetta simmadakka, hanqqettiyoogaa agganawu baaxetaas. Leemisuwawu, issi wode sooppe soo baada haggaazishin ta kaamiyaappe eraadooniyaa wuuqqida bitaniyaa yedettaas. Taani A gakkana hanin, I eraadooniyaa olidi woxxiis. Taani eraadooniyaa waatada wotta ekkidaakko haratuyyo yootishin, eta giddoppe issi cimay, ‘Istevenaa, neeni A oyqqiyaakko waatuutee?’ giidi oychchiis. He oyshay taani asaara saruwan deꞌanawu qoppanaadaaninne baaxetanaadan denttettiis.” b

⁹ Istevena hanotay nuuni laamettida giidi qoppiyo wodekka, iita eeshshaa akeekennan bessana danddayiyoogaa qonccissees. Ne hanotaykka hegaa mala gidikko, hidootaa qanxxoppa; qassi nena iita Kiristtaanedan qoppoppa. Kiitettida PHawuloosi, ‘Taani loꞌꞌobaa oottanawu dosikkonne iitabaa oottays’ yaagiis. (Roo. 7:21-23) Baanaynne harabay nu keettaa zaarettidi mooriyoogaadan, nagaranchcha gidida ubba Kiristtaanetikka iita eeshshaa zaarettidi bessiyoogaa doommana danddayoosona. Nuuni geeshsha gididi deꞌanawu ubbatoo baaxetana koshshees. Waatidi?

10. Nuuni iita eeshshata waati aggana danddayiyoo? (1 Yohaannisa 5:14, 15)

¹⁰ Laamettanawu nena waayissida eeshshaa xeelliyaagan Yihoowa woossa; I ne woosaa siyanaagaanne nena maaddanaagaa ammanetta. (1 Yohaannisa 5:14, 15 nabbaba.) Yihooway maalaalissiyaabaa oottidi he eeshshaa neeppe xayssana xayikkonne, neeni he eeshshaa agganaadan I neessi wolqqaa immana danddayees. (1 PHe. 5:10) Ceega asatettay zaarettidi yaanaadan oottana danddayiyaabatuppe naagettiyoogan, ne woosaara maayettiyaabaa ootta. Leemisuwawu, neeni agganawu baaxetaydda deꞌiyo eeshshata loꞌꞌo milatissidi qonccissiya biidotanne televizhiine prograameta beꞌiyoogaappe woy xuufeta nabbabiyoogaappe naagetta. Qassi, iitabaa amottoppa.—Pili. 4:8; Qol. 3:2.

11. Nuuni ubbatoo ooratta asatettaa maayanawu waatana danddayiyoo?

 ¹¹ Neeni ceega asatettaa qaara olikkonne, ooratta asatettaa maayiyoogee keehi koshshiyaaba. Waatada hegaadan oottana danddayay? Neeni Yihoowa eeshshaabaa akeekiyo wode, A milatanawu halchcha. (Efi. 5:1, 2) Leemisuwawu, Yihooway atto giyoogaabaa yootiya taarikiyaa neeni Geeshsha Maxaafaappe nabbabiyo wode, nena hagaadan oychcha: ‘Taani haratussi atto giyaanaa?’ Yihooway hiyyeesatussi qarettiyoogaabaa neeni nabbabiyo wode, nena hagaadan oychcha: ‘Metootida ishanttussinne michchonttussi Yihoowaagaadan qarettiyaanaa, qassi hegaa oosuwan bessiyaanaa?’ Ooratta asatettaa maayiyoogan ubbatoo laametta; qassi yaatiyo wode danddayanchcha gida.

12. Geeshsha Maxaafay asay laamettanaadan oottiyoogaa Istevena hanotay waati bessii?

¹² Qommoora abaa denttido Isteveni, loddan loddan laamettana danddayiyoogaa akeekiis. I hagaadan giis: “Taani xammaqettoosappe haa simmin, hanqquwaa eexxa kiyanaadan oottiya darobay gakkiis. Hanqqettanaadan oottiya asatuppe baqatana woy he hanotaa zarbbissana koshshiyoogaa tamaaraas. Taani he hanotaa oyqqiyo ogiyaa xeelliyaagan ta keettaayyiyo gujjin, daro asay tana nashshees. Taani ta huuphiyawukka garamettays! Hegawu taani tanan ceeqettikke. SHin, hegee Geeshsha Maxaafay asay laamettanaadan oottiyo wolqqaa bessiyaaba gidiyoogaa ammanays.”

13. Iita amuwaa xayssanawu nuna aybi maaddanee? (Galaatiyaa 5:16)

¹³ Galaatiyaa 5:16 nabbaba. Nuuni loꞌꞌobaa oottanawu baaxetiyo baaxiyan xoonanaadan maaddanawu, Yihooway ba geeshsha ayyaanaa kehatettan immees. Nuuni Xoossaa Qaalaa xannaꞌiyo wode, A ayyaanay nuna kaalettanaadan koyiyoogaa bessoos. Nuuni shiiqota shiiqiyo wodekka, A geeshsha ayyaanaa demmoos. He shiiqotun, nuugaadan loꞌꞌobaa oottanawu baaxetiya ishanttuuranne michchonttuura wodiyaa aattana danddayoos; qassi hegee minttettiyaaba. (Ibr. 10:24, 25; 13:7) Qassi, nuuyyo deꞌiya shugo miyyiya giigissanawu maaddanaadan Yihoowa mintti woossikko, aggennan baaxetanaadan maaddanawu ba geeshsha ayyaanaa I nuussi immana. Yaatiyoogee, iita amuwaa muleera xayssennan aggana danddayikkonne, he iita amuwaa mintti eqettanaadan maaddana. Galaatiyaa 5:16y yootiyoogaadan, ‘ayyaanay kaalettiyoogeeti asatettaa amuwaa mulekka polokkona.’

14. Aggennan loꞌꞌobaa amottiyoogee keehi koshshiyaaba gidiyoy aybissee?

¹⁴ Yihoowaara dabbotaa minttanawu maaddiyaabata nuuni oottiyoogaa doommiyo wode, ayyaanaabaa meezeta ubbatoo oottiyoogeenne aggennan loꞌꞌobaa amottiyoogee keehi koshshiyaaba. Aybissi? Nu morkketuppe issoy mule xiskkenna gishshataassa. He morkkee, iitabaa oottanaadan nuuni paacettiyo paaciyaa. Nuuni xammaqetti simmidikka ceeriyaa kaaꞌiyoogaa, ushshaa likkiyaappe aattidi uyiyoogaa woy pornograafiyaa beꞌiyoogaa gujjin, aggana koshshiya iitabata amottiyoogaa doommana danddayoos. (Efi. 5:3, 4) Issi yelaga Kiristtaanee hagaadan giis: “Tana keehi waayissidabaappe issoy ta mala attumaageeta pokkobawu qaaqqatidi siiqiyoogaa. Hegee eesuwan dogettiyaaba gaada qoppaas, shin haꞌꞌikka tana waayissees.” Iita amoy wolqqaamikko, nena aybi maaddana danddayii?

15. Iita amoy “asa ubbaa gakkiya paace” gidiyoogaa eriyoogee nuna minttettiyoy aybissee? (Misiliyaa xeella.)

 ¹⁵ Neeni neessi wolqqaamida iita amuwaa xoonanawu baaxetaydda deꞌikko, hegaadan baaxetiyay ne xalla gidennaagaa hassaya. Geeshsha Maxaafay hagaadan gees: “Inttena gakkiya paacee, asa ubbaa gakkiya paace malappe attin, ainne dummatenna.” (1 Qor. 10:13a) Ha qofaa hara Geeshsha Maxaafaa birshshettay hagaadan gees: “Hara asaa gakkiya paaciyaappe dumma paacee inttena gakkenna.” Ha qofay Qoronttoosan deꞌiya attumanne macca Kiristtaanetussi odettiis. Kase etappe amaridaageeti shaaramuxiyaageeta, mattuman banttaagaa mala gidida asatuura zinꞌꞌiyaageetanne mattottiyaageeta. (1 Qor. 6:9-11) Eti xammaqetti simmidi iitabaa mule amottibookkona gaada qoppay? Hegaadan gidennan aggana danddayees. Eti ubbay tiyettida Kiristtaaneta gidikkonne, nagaranchcha asa. Eti ubbatoo iita amuwaa agganawu baaxetana koshshidoogee qoncce. Hegee nuna minttettiyaaba. Aybissi? Hegee, neeni baaxetaydda deꞌiyo iita amoy awugaakka gidin, hegaa hara uri xoonidoogaa bessiyo gishshataassa. “Intte ishantti hegaadan waayettiyoogaa eridi, ammanuwan minnidi, aara [eqettana]” danddayeeta.—1 PHe. 5:9.

16. Nuuni naagettana koshshiya qohiyaabay aybee, qassi aybissi?

¹⁶ Nena gakkiya metuwaa ooninne akeekana danddayenna gaada qoppiyoogaappe naagetta. Hegaadan qoppiyoogee neeni, ‘Ta hanotawu hidooti baa, qassi iita amuwaa eqettanawu tawu wolqqi baa’ gaada qoppanaadan oottana danddayees. Geeshsha Maxaafay hegaappe dummatiyaabaa yootees. Hagaadan gees: “Intte wolqqai danddayiyoogaappe aadhdhiya paaciyan intte paacettanau koyenna Xoossai ammanettidaagaa. SHin inttena paacee gakkiyo wode, he paaciyaa i inttena danddayissana. Qassi he paaciyaappe intte kessi  ekkiyo ogiyaakka immana.” (1 Qor. 10:13b) Yaatiyo gishshawu, iita amoy wolqqaamikkokka, nuuni Yihoowawu ammanettidi deꞌana danddayoos. Yihoowa maaduwan, iitabaa oottiyoogaa aggana danddayoos.

17. Nuuni iita amuwaappe muleera naagettana xayikkonne, waatana danddayiyoo?

¹⁷ Ubbatoo hagaa hassaya: Nuuni nagaranchcha gidiyo gishshawu, iitabaa amottiyoogaa muleera aggana danddayokko. SHin, nuuni iitabaa amottiyo wode, Yooseefi PHoxiifaara machchee matappe eesuwaara woxxidi biidoogaadan, nuuni hegaa sohuwaara eqettana danddayoos. (Doo. 39:12) Neeni iita amuwaa polana koshshenna!

18-19. Nuuni nu qofaa laammanawu baaxetiyo wode nuna woygi oychchana danddayiyoo?

¹⁸ Nu qofaa laammiyoogaa giyoogee nu qoppiyoobaynne oottiyoobay Yihoowa ufayssiyoogaa ubbatoo shaakki erana koshshees giyoogaa. Hegaa gishshawu, nena qoranawu ubbatoo hagaadan nena oychcha: ‘Taani oottiyoobay nuuni keehi eesoyiya wodiyan deꞌiyoogaa taani akeekidoogaa bessii? Taani ooratta asatettaa maayaydda deꞌiyaanaa? Asatettaa amuwaa polanaadan denttettiyaabaa eqettanawu Yihoowa ayyaanay tana maaddanaadan eeno giyaanaa?’

¹⁹ Neeni ne hanotaa pilggiyo wode, nena wottiyoobi baynna asadan xeelloppa, shin neeni laamettidoban ufaytta. Neeni giigissana koshshiyoobaa akeekikko, hidootaa qanxxoppa. SHin Piliphphisiyuusa 3:16n deꞌiya zoriyaa oosuwan peeshsha: “Nuuni hanno gakkanaassi de7ido maaraadan, ane sinttau boos.” Neeni yaatiyo wode, laamettanawu baaxetiyo baaxiyaa Yihooway anjjanaagaa ammanetta.