1. Neeni Geeshsha Maxaafaa xannaꞌiyoogaa doommido wode eridobay aybee?

 NEENI Geeshsha Maxaafaa xannaꞌiyoogaa doommido wode tamaarido ubbabaa hassayay? Xoossawu sunttay deꞌiyoogaa erada maalaalettennan aggakka. Xoossay siꞌoole taman asaa xuuggennaagaa erido wode, neeni woppu geennan aggakka. Qassi ne siiqiyo hayqqidaageetuura zaarettada gayttiyoonne gannate saꞌan etaara deꞌiyo hidootan neeni keehi ufayttennan aggakka.

2. Neeni Geeshsha Maxaafaa tumaa eridoogaa bolli hara ay oottadii? (Efisoona 5:1, 2)

² Neeni Xoossaa Qaalaa loytta xannaꞌido wode Yihoowa loytta siiqadasa. He siiqoy neeni eridobaa oosuwan peeshshanaadan nena denttettiis. Geeshsha Maxaafay yootiyo maaraa goꞌettada loꞌꞌobaa kuuyadasa. Neeni Xoossaa ufayssanawu koyido gishshawu qoppiyoobaaninne oottiyooban laamettadasa. Issi naꞌi siiqiya ba aawaanne aayee leemisuwaa kaalliyoogaadan, neenikka saluwan deꞌiya ne Aawaa milataasa.—Efisoona 5:1, 2 nabbaba.

3. Nuuni nuna oychchana danddayiyo oyshati awugeetee?

³ Nuna hagaadan oychchana danddayoos: ‘Taani Kiristtaane gidido wodiyaagaappe aaruwan haꞌꞌi Yihoowa siiqiyaanaa? Taani xammaqetta simmadakka ta ishanttussinne michchonttussi siiquwaa bessiyoogan kaseegaappe aaruwan Yihoowa milataydda deꞌiyaanaa?’ Nuuni Yihoowanne harata kaseegaadan siiqennaagaa akeekikko, hidootaa qanxxana koshshenna. Koyro xeetu layttan deꞌida Kiristtaanetuura gayttidaagan hegaa malabay haniis. Yesuusi etan hidootaa qanxxibeenna, qassi nunankka hidootaa qanxxenna. (Ajj. 2:4, 7) Nuuni tumaa  koyro erido wode siiqiyoogaadan, zaaretti siiqana danddayiyoogaa I erees.

4. Nuuni ha huuphe yohuwan ay beꞌanee?

⁴ Yihoowanne harata kaseegaappe aaruwan aggennan waati siiqana danddayiyaakko ha huuphe yohuwan beꞌana. Yaatidi, Yihoowanne harata siiqiyoogan demmiyo anjjotuppe amaridaageeta beꞌana.

5-6. Kiitettida PHawuloosi haggaaziyo wode A gakkida metoti awugeetee, qassi I aggennan Yihoowawu haggaazanaadan oottidabay aybee?

⁵ Kiitettida PHawuloosi Yihoowawu haggaaziyoogan ufayttikkonne hegee ubbatoo metennaba gidenna. PHawuloosi darotoo adussa ogiyaa manddariis; qassi he wode manddariyoogee metiyaaba. PHawuloosi manddariyo wode issi issitoo ‘kixa haattaynne panggati daafirggidi ashshidosona.’ A morkketi A shocido wodetikka deꞌoosona. (2 Qor. 11:23-27) Qassi Kiristtaane ishantti PHawuloosi eta maaddanawu wozanappe oottidobaa darotoo nashshibookkona.—2 Qor. 10:10; Pili. 4:15.

⁶ Yihoowawu aggennan haggaazanaadan PHawuloosa maaddidabay aybee? PHawuloosi Geeshsha Maxaafaappenne ba deꞌuwan gakkidabaappe Yihoowa eeshshaabaa darobaa tamaariis. PHawuloosi Xoossaa Yihooway A siiqiyoogaa mintti ammaniis. (Roo. 8:38, 39; Efi. 2:4, 5) Qassi I Yihoowa keehi siiqees. PHawuloosi ‘ammaniyaageeta maaddiyoogan’ Yihoowa siiqiyoogaa bessiis.—Ibr. 6:10.

7. Nuuni kaseegaappe aaruwan Yihoowa siiqanaadan oottiya issi ogee aybee?

⁷ Nuuni Xoossaa Qaalaa loytti xannaꞌiyoogan kaseegaappe aaruwan A siiqana danddayoos. Neeni Geeshsha Maxaafaa nabbabiyo wode, hegee Yihoowaabaa ay qonccissiyaakko akeekanawu mala. Nena hagaadan oychcha: ‘Ha taarikee Yihooway tana siiqiyoogaa waati qonccissii? Taani Yihoowa siiqanaadan oottiyaabaa ay yootii?’

8. Nuuni kaseegaappe aaruwan Xoossaa siiqanaadan woosay nuna waati maaddana danddayii?

⁸ Nuuni ubba galla Yihoowa woossiyoogeenne nuussi siyettiya ubbabaa awu yootiyoogee nuuni kaseegaappe aaruwan Yihoowa siiqana danddayiyo hara oge. (Maz. 25:4, 5) Yihoowaykka nu woosaa zaarees. (1 Yoh. 3:21, 22) Isiyan deꞌiya Keeno giyo michchiyaa hagaadan gaasu: “Taani Yihoowaabaa erido gishshawu koyro A siiqaas, shin I ta woosaa zaaridoogaa akeekido wode kaseegaappe aaruwan A siiqaas. Hegee A ufayssiyaabaa oottanawu koyanaadan tana denttettiis.” b

9. Ximootiyoosi ishanttanne michchontta loytti siiqiyoogaa waati bessidee?

⁹ PHawuloosi Kiristtaane gidin amarida layttaappe simmin, Ximootiyoosa giyo gooba yelagaara gayttiis. Ximootiyoosi Yihoowakka asaakka siiqees. PHawuloosi Piliphphisiyuusan deꞌiya Kiristtaanetussi hagaadan giis: “Intte de7uwaabau wozanappe hirggiya [Ximootiyoosa] mala asi harai ooninne tau baawa.” (Pili. 2:20) Ximootiyoosi daraajjayiyoogan woy dere haasayaa haasayiyoogan gooba gidiyoogaa PHawuloosi ha sohuwan yootana xayikkonne, Ximootiyoosi ishanttanne michchontta keehi siiqiyoogaa akeekiis. Ximootiyoosi haggaazido gubaaꞌeti I xomoosanawu yiyo wodiyaa yeemuwan naagidoogee qoncce.—1 Qor. 4:17.

10. Aananne I azinay bantta ishanttanne michchontta siiqiyoogaa waati bessidonaa?

¹⁰ Nuunikka nu ishanttanne michchontta maaddiyo ogiyaa koyoos. (Ibr. 13:16) Kasetiya  huuphe yohuwan ibay odettido Aani hanotaa ane beꞌa. Wolqqaama gotee denddi simmin Aananne I azinay Yihoowa Markka gidida issi keettaa asaa oychchanawu biidi eta keettaa kaaray he gotiyan keehi qohettidoogaa akeekidosona. Hegaappe denddidaagan, he so asawu geeshsha maayoy baawa. Aana hagaadan gaasu: “Nuuni eta maayuwaa ekkidi meeccidi tokkosidinne dakkoyidi etawu immida. Hegaa oottiyoogee nuuyyo metennaba; shin yaatidoogan hanno gakkanawu nuuni etaara keehi loꞌꞌo lagge gidida.” Aananne I keettaaway ishanttanne michchontta siiqidoogee koshshiyaaban eta maaddanaadan denttettiis.—1 Yoh. 3:17, 18.

11. (a) Nuuni haratussi siiquwaa bessanawu baaxetiyoogee eta waati maaddana danddayii? (b) Leemiso 19:17y yootiyoogaadan, nuuni haratussi siiquwaa bessiyo wode Yihooway waatii?

¹¹ Nuuni kehanne harata siiqiyaageeta gidiyo wode, Yihoowa milatanawu nu baaxetiyoogaa eti akeekana danddayoosona. Qassi nuuni akeekiyoogaappekka aaruwan eti nu kehatettaa nashshana danddayoosona. Qommoora ibay odettido Keena O maaddidaageeta loytta hassayawusu. A hagaadan gaasu: “Tana haggaazuwaa ekki kiyida siiqiya michchontta ubbaa keehi galatays. Eti tana kaamiyan efiidi qumaa shoobboosona, yaatidi tana so moyssoosona. Eti yaatanawu keehi baaxetana koshshidoogaa haꞌꞌi akeekays. Eti hegaa ufayttiiddi oottidosona.” Nuuni oottidobawu ubba asay galatennaagee qoncce. Keena O maaddidaageetubaa hagaadan gaasu: “Eti tawu kehido kehatettaa ubbaa gishshawu kushiyaa zaaranawu koyays; shin eti ubbay deꞌiyoosaa taani erikke. SHin Yihooway kushiyaa zaarana danddayees; qassi I ta gishshaa yaatanaadan woossays.” Keena giidobay tuma. Nuuni haratussi kehiyo guuttabaakka Yihooway akeekees. I hegaa alꞌꞌo yarshshodaaninne  qanxxana koshshiyo acodan xeellees.—Leemiso 19:17 nabbaba.

12. Ishantti gubaaꞌiyaa siiqiyoogaa waati bessana danddayiyoonaa? (Misiliyaakka xeella.)

¹² Neeni isha gidikko, harata siiqiyoogaa bessanawunne eta maaddiyaabaa oottanawu waatana danddayay? Jordan giyo yelaga ishay kaseegaappe aaruwan gubaaꞌiyaa waati maaddana danddayiyaakko issi cimaa oychchiis. He cimay I ayyaanaaban diccido gishshawu, A galatidi kaseegaappe aaruwan waati oottana danddayiyaakko amaridabaa zoriis. Leemisuwawu, Jordani SHiiquwaa Addaraashaa kasetidi gakkanaadaaninne harata sarotanaadan, shiiqotun qofaa yootanaadan, ba haggaazo citaara ubbatoo sabbakanaadaaninne harata maaddana danddayiyoobata qoppanaadan I minttettiis. Jordani hegaadan oottido wode issi issibata waati oottanaakko eriyoogaa xalla gidennan, kaseegaappe aaruwan ishanttanne michchontta siiqiis. Issi ishay gubaaꞌiyawu oottiyaagaa gidiyo wode, harata maaddiyoogaa he wode doommenna; shin I eta ubba wode maaddiyoogaa Jordani akeekiis.—1 Xim. 3:8-10, 13.

13. Kiristtaana giyo ishay zaarettidi cima gidanaadan siiqoy A waati denttettidee?

¹³ Neeni kase gubaaꞌiyawu oottiyaagaa woy gubaaꞌe cima gidada oottidaba gidikko shin? Neeni kase oottido oosuwaanne hegaa oottanaadan nena denttettida siiquwaa Yihooway hassayees. (1 Qor. 15:58) Qassi neeni ubbatoo bessiyo siiquwaa I akeekees. Kiristtaana giyo ishay cima gididi oottiyo maataappe wodhdhido wode keehi azzaniis. SHin I hagaadan giis: “Taani cima gidin aggin, Yihoowawu haggaazanawu taassi danddayettida ubbabaa oottanawu kuuyaas.” Guyyeppe I zaarettidi cima gididi sunttettiis. Kiristtaani hagaadan giis: “Taani zaarettada  he aawatettan oottanawu guuttaa yayyaas. SHin, taani zaarettada cima gidada haggaazanaadan Yihooway koyikko, taani anne ta ishanttanne michchontta siiqiyo gishshawu yaatanawu kuuyaas.”

14. Jorjjiyaa biittan deꞌiya michchiyaa yootidobaappe neeni ay tamaaray?

¹⁴ Yihoowa ashkkarati bantta shoorotakka siiqiyoogaa bessoosona. (Maa. 22:37-39) Leemisuwawu, Jorjjiyaa biittan deꞌiya Eelano giyo michchiyaa hagaadan gaasu: “Sabbakanaadan tana koyro denttettidabay Yihoowa siiqiyoogaa xalla. SHin taani saluwan deꞌiya ta Aawaa loytta siiqidoogee asaakka loytta siiqanaadan oottiis. Taani eta gakkiiddi deꞌiya metuwaanne eti haasayanawu koyiyoobaa qoppanawu baaxetaas. Hegaadan etabaa loytta qoppido gishshawu eta maaddanawu loytta koyaas.”—Roo. 10:13-15.

15-16. Misilee qonccissiyoogaadan, haratussi siiquwaa bessiyo wode Yihooway waati anjjii?

¹⁵ Nuuni ishantta siiqiyoogaa bessiyo wode haratikka goꞌettoosona. Koronaa harggee doommi simmin elektronike miishshata goꞌettidi waati markkattanaakko eranaadan layttan sugida daro michchontta Pawula giyo ishaynne A keettayiyaa maaddidosona. Issi michchiyaa ba elektronike miishshaa goꞌettiyoogaa koyro metootikkokka wurssettan eraasu. A hegaa goꞌettada ba dabbotaa Godaa Kahuwaa Baalaa shoobbaasu. Etappe usuppun tammati Intternneetiyaa goꞌettidi shiiqidosona.  Pawulinne A keettayiyaa oottidobaappe he michchiyaanne I dabboti ubbay goꞌettidosona. Guyyeppe, he michchiyaa Pawulassi hagaadan gaada xaafaasu: “Nuna cimidaageeta tamaarissido gishshawu galatoos. Yihooway nuussi keehi qoppiyoogaanne intte nuna maaddanawu wozanaappe oottidobaa taani mule dogikke.”

¹⁶ Hagaa mala taarikiyaappe Pawuli gitabaa tamaariis. Siiqoy eraappe woy oottana danddayiyoobaappe keehi aadhdhiyoogaa I hassayiis. I hagaadan giis: “Taani woradaa xomoosiyaagaa gidada haggaazaas. Ishanttinne michchontti ta haasayata dogana danddayoosona; shin taani koshshiyaaban eta maaddidoogaa eti dogibeennaagaa haꞌꞌi akeekaas.”

17. Nuuni siiquwaa bessiyo wode hari ooni goꞌettanee?

¹⁷ Nuuni harata siiqiyoogaa bessiyo wode nu qoppibeenna ogetun goꞌettoos. Niwu Zilanden deꞌiya Jonatana hanotay hegaa bessees. Qeeraa saateppe guyyiyan saꞌay keehi hombbiyo wode barkka haggaaziya aqinye ishaa beꞌiis. Jonatani Qeeraa saateppe guyyiyan ubbatoo he aqinyaara haggaazanawu kuuyiis. He ishay kehatettan oottidobay A ay keena goꞌꞌanaakko I he wode akeekibeenna. Jonatani hagaadan giis: “He wode taani haggaaziyoogaa dosikke. Gidikkokka, taani aqinyee tamaarissiyo ogiyaa siyidoogeenne I haggaazuwan muruta gididoogaa beꞌidoogee taani haggaazuwaa dosanaadan oottiis. He ishay tawu mata lagge gidiis. Qassi taani haggaazuwaa dosanaadaaninne Yihoowakko shiiqanaadan tana maaddiis.”

18. Yihooway nuuni ay oottanaadan koyii?

¹⁸ Yihooway nuuni ubbay kaseegaappe aaruwan anne harata siiqanaadan koyees. Nuuni beꞌidoogaadan Xoossaa Qaalaa nabbabiyoogan, hegaa wotti dentti qoppiyoogaaninne ubbatoo woosan A haasayissiyoogan kaseegaappe aaruwan Yihoowa siiqana danddayoos. Nu ishanttanne michchontta koshshiyaaban maaddiyoogan kaseegaappe aaruwan eta siiqana danddayoos. Nu siiqoy gujji gujji biyo wode Yihoowaara, qassi nu ishanttuuranne michchonttuura kaseegaappe aaruwan dabbotoos. Hegaa bollikka nuuni etaara dabbotidi merinawu deꞌana.