1. Yelidaageeti bantta naati waananaadan koyiyoonaa?

 YELIDAAGEETOO, intte naati Yihoowa eranaadaaninne siiqanaadan maaddanawu intte koyiyoogaa eroos. SHin Xoossaa beꞌanawu danddayokko. Yaatin, intte naati Xoossay deꞌiyoogaa tumuppe ammananaadaaninne akko shiiqanaadan waati maaddana danddayeetii?—Yaaq. 4:8.

2. Yelidaageeti Yihoowa eeshshaabaa bantta naata waati tamaarissana danddayiyoonaa?

² Naati Yihoowakko shiiqanaadan maaddiyo keehi koshshiya issi ogee Geeshsha Maxaafaa etaara xannaꞌiyoogaa. (2 Xim. 3:14-17) Gidoppe attin, yelagati Yihoowaabaa tamaarana danddayiyo hara ogiyaakka Geeshsha Maxaafay yootees. Leemiso maxaafan odettida issi aaway meretan qonccida Yihoowa eeshshaabaa ba naꞌay dogennaadan minttidi hassayissiis. (Lee. 3:19-21) Yelidaageeti bantta naati Yihoowa eeshshaabaa eranaadan maaddanawu meretaa goꞌettana danddayiyo issi issi ogeta beꞌana.

3. Yelidaahgeeti bantta naata waati maaddana danddayiyoonaa?

³ Geeshsha Maxaafay hagaadan gees: ‘Beettenna A hanotay Xoossay ha saꞌaa medhdhoosappe doommidi, etawu qonccidi beettiis; eti hegaa Xoossay medhdhidobaappe beꞌanawu danddayoosona.’ (Roo. 1:20) Yelidaageetoo, intte naatuura issi sohuwaa biidi wodiyaa aattiyoogan ufayttennan aggekketa. Yihooway ‘medhdhidobatinne’ A eeshshati waani gayttiyaakko intte naati akeekanaadan maaddanawu he wodiyaa goꞌettite. Yesuusi tamaarissido ogiyaappe yelidaageeti ay tamaarana danddayiyaakko ane beꞌoos.

4. Yesuusi ba erissiyo ashkkarata tamaarissanawu meretaa waati goꞌettidee? (Luqaasa 12:24, 27-30)

 ⁴ Yesuusi tamaarissanawu meretaa waati goꞌettidaakko akeekite. Issi wode I ba erissiyo ashkkarati qooraasetanne ciishshata akeekan xeellanaadan yootiis. (Luqaasa 12:24, 27-30 nabbaba.) Yesuusi hara mehiyaanne doꞌaa woy mittaanne maataa goꞌettana danddayees; shin ba erissiyo ashkkarati loytti eriyo kafuwaanne ciishshaa goꞌettiis. Erissiyo ashkkarati qooraasee saluwan paalliyaagaanne ciishshay dembban ciiyyiyaagaa beꞌana danddayoosona. Yesuusi hegeetukko malaatiiddi haasayidoogaa ane qoppa. I he leemisota yooti simmidi ay oottidee? I ba erissiyo ashkkarata saluwan deꞌiya eta Aawaa kehatettaa xeelliyaagan keehi maaddiyaabaa tamaarissiis. Yihooway qooraasiyawunne dembban deꞌiya ciishshawu oottiyoogaadan, ammanettida ba ashkkarata mizananne mayzzana.

5. Yelidaageeti bantta naata Yihoowaabaa tamaarissanawu meretaa waati goꞌettana danddayiyoonaa?

⁵ Yelidaageetoo, intte naata tamaarissiyo wode Yesuusa leemisuwaa waati kaallana danddayeetii? Intte dosiyo mehiyaa woy doꞌaa woy ciishshaa xeelliyaagan intte naꞌaassi yootana danddayeeta. Hegaabaa yootiyo wode, hegee Yihoowabaa ay tamaarissiyaakko intte naꞌaassi qonccissana koshshees. Yaatidi, intte naꞌay dosiyo mehiyaabaa woy doꞌaabaa woy ciishshaabaa A oychchana danddayeeta. Intte naꞌay dosiyo issibaa xeelliyaagan intte haasayikko, intte Yihoowabaa tamaarissiyo wode I kaseegaappe aaruwan loyttidi ezggana danddayees.

6. Kiristtoofera aayyiyaa oottidobaappe ay tamaarana danddayiyoo?

⁶ Yelidaageeti issi meretay Yihoowabaa ay qonccissiyaakko bantta naatuura haasayanaappe kase, he meretaabaa pilggiiddi daro wodiyaa wurssana koshshii? Hegaadan oottana koshshenna. Qooraasee waatidi qumaa miyaakko woy ciishshay waani dicciyaakko Yesuusi darobaa qonccissibeenna. Intte naꞌay Yihoowa meretaabaa darobaa eranawu koyikkokka, issi issitoo qantta qofay woy oyshay intte yootanawu koyidobaa I akeekanaadan maaddana danddayees. Kiristtoofera giyo ishay I naatettan deꞌiyo wodiyaabaa hassayidi hagaadan giis: “Nu aayyiyaa nuuni nu matan deꞌiya meretaa nashshanaadan, akeekanawu metenna ogiyan yootawusu. Leemisuwawu, nuuni deriyaa mataara biyo wode A hagaadan gawusu: ‘Ha deree ay keena gitakko, qassi ayba loꞌꞌiyaakko beꞌite! Yihoowa oosoy maalaalennee?’ Woy nuuni abbaa mati biyo wode A hagaadan gawusu: ‘Abbaa beetaa wolqqaa beꞌite! Xoossay wolqqaama gidennee?’” Kiristtooferi hagaadan giis: “A yootiyo akeekanawu metenna loꞌꞌo qonccissoy nuuni Yihoowabaa qoppanaadan oottiis.”

7. Intte naꞌay meretaabaa loytti qoppanaadan waati loohissana danddayeetii?

⁷ Intte naati dicci dicci biyo wode, meretaabaa kaseegaappe aaruwan qoppanaadaaninne Yihoowabaa eranaadan eta loohissana danddayeeta. Xoossay medhdhidoobaappe issibaa ayyo yooti simmidi, “Hagee Yihoowabaa nena ay tamaarissii?” yaagidi oychchana danddayeeta. Intte naꞌay giyoobaa siyidi intte maalaalettana danddayeeta.—Maa. 21:16.

8. Israaꞌeelati “ogiyan hemettiyo wode” bantta naatussi ay yootana danddayiyoonaa?

⁸ Israaꞌeelati “ogiyan hemettiyo wode” bantta naata Yihoowa higgiyaabaa tamaarissanaadan etawu odettiis. (Zaa. 11:19) Israaꞌeela biittan ogee gaxare giddoora efees. Eti dumma dumma mehetanne doꞌata, kafotanne, ciishshata beꞌana danddayoosona. Israaꞌeelati manddariyo wode, yelidaageeti Yihoowa meretaabaa bantta naatuyyo yootana danddayoosona. Yelidaageetoo, inttekka intte  naata tamaarissanawu hegaadan meretaa goꞌettana danddayeeta. Yelidaageetuppe issoti issoti waatidi hegaadan oottidaakko akeekite.

9. Puniitippenne Kaatiyippe intte ay tamaarana danddayeetii?

⁹ Hindden issi gita kataman deꞌiya Punito giyo aayyiyaa hagaadan gaasu: “Nuuni gaxariyan deꞌiya nu dabbota oychchanawu biyo wodiyaa nu naata maalaalissiya Yihoowa meretaabaa tamaarissana danddayiyo loꞌꞌo injjedan xeelloos. Ta naati asaynne kaamee dariyo katamaappe gaxariyaa biyo wode meretaabaa loytti akeekoosona gaada qoppays.” Yelidaageetoo, intte naati inttenaara loꞌꞌiya sohuwan aattido wodiyaa awudenne dogokkona. Molddoovan deꞌiya Kaatiyo giyo issi michchiyaa hagaadan gaasu: “Naatettaabaappe taani dogenna keehi ufayssiya wodee nu soo asaara gaxariyan aattido wodiyaa. Eti naatettaappe doommidi taani Yihoowa meretaabaa akeekanaadaaninne I medhdhidobaappe abaa eranaadan tana tamaarissido gishshawu eta keehippe galatays.”

10. Yelidaageeti katamaappe harasaa baana danddayennaba gidikko, ay oottana danddayiyoonaa? (“ Yelidaageeta Maaddiyaabaa” giya saaxiniyaa xeella)

¹⁰ Intte gaxariyaa baana danddayennaba gidikko shin? Hindden deꞌiya Amoli hagaadan giis: “Taani deꞌiyo heeran, yelidaageeti daro saatiyaa oottoosona; qassi gaxariyaa baanawu daro miishshay koshshees. Gidoppe attin, asay allaxxiyo ufayssiya sohuwaa biidi woy pooqe keettaa baranddaa malaban kiyidi Yihoowa meretaa beꞌananne A eeshshaabaa haasayana danddayoos.” Intte loyttidi xeelliyaaba gidikko, intte naata bessana danddayiyo daro meretata intte heerankka demmana danddayeeta. (Maz. 104:24) Intte kafota, paalliya guuttabata, mittaa maataanne hegaa mala darobaa akeekana danddayeeta. Jarmanen deꞌiya Kaarina hagaadan gaasu: “Ta aayyiyaa ciishshaa keehi dosawusu; yaatiyo gishshawu taani naatettan deꞌiyo wode, nuuni issisaa biyo wode awudenne loꞌꞌiya ciishshaa  tana bessawusu.” Yelidaageetoo, intte naata tamaarissanawu nu dirijjitee giigissido meretaabaa qonccissiya daro biidotanne xuufetakka goꞌettana danddayeeta. Intte awan deꞌikkonne, Xoossay medhdhidobaa akeekanaadan intte naata maaddana danddayeeta. Intte intte naatuyyo qonccissana danddayiyo Yihoowa eeshshatuppe amaridaageeta ane haꞌꞌi beꞌoos.

11. Yelidaageeti bantta naati Yihoowa siiquwaa akeekanaadan waati maaddana danddayiyoonaa?

¹¹ Intte naati Yihoowa siiquwaabaa akeekanaadan maaddanawu daro mehetinne doꞌati bantta maratussi qarettiyoogaa qonccissana danddayeeta. (Maa. 23:37) Meretatun nuuni beꞌiyo maalaalissiya dumma dummabatakka qonccissana danddayeeta. Qommoora ibaa beꞌido Kaarina hagaadan gaasu: “Nuuni heeran hemettiyo wode, ta aayyiyaa ubba ciishshati dumma dumma gidiyoogaanne eta puulay Yihoowa siiquwaa qonccissiyoogaa taani qoppanaadaaninne akeekanaadan minttettawusu. Daro layttay aadhdhi simmin, haꞌꞌikka taani ciishshatu meraynne eti giigido hanotay waani dummatiyaakko akeekan xeellays. Yihooway nuna ay keena siiqiyaakko hegeeti ubbatoo tana hassayissoosona.”

12. Yelidaageeti bantta naati Xoossaa aadhdhida eratettaa akeekanaadan waatidi maaddana danddayiyoonaa? (Mazamure 139:14) (Misiliyaakka xeella.)

¹² Intte naati Yihoowa aadhdhida eratettaa akeekanaadan maaddite. Yihooway nuuppe aaruwan aadhdhida eranchcha gidiyoogee qoncce. (Roo. 11:33) Leemisuwawu, haattay waanidi shaara gidiyaakko, qassi he shaaray haattaa issisaappe harasaa waatidi efiyaakko intte naꞌaassi yootana danddayeeta. (Iyy. 38:36, 37) Maalaaliya ogiyan merettida asaa bollaabaakka yootana danddayeeta. (Mazamure 139:14, nabbaba.) Bilaadmiira giyo issi aaway waatidi hegaadan oottidaakko akeekite. I hagaadan giis: “Issi gallassi nu naꞌay ba bishkkiliitiyaappe kunddidi qohettiis. Amarida gallassaappe simmin he qohettida sohoy paxiis. Nu bollay bana barkka pattanaadan oottidi Yihooway medhdhidoogaa taaninne ta keettaayyiyaa ayyo qonccissida. Asi medhdhido aybinne hegaadan oottennaagaa nuuni ayyo yootida. Leemisuwawu, kaamee daafaban qohettikko, bana barkka giigissenna. Ha hanotay nu naꞌay Yihoowa aadhdhida eratettaa akeekanaadan maaddiis.”

13. Yelidaageeti bantta naati meretaabaa akeekanaadan waati maaddana danddayiyoonaa? (Isiyaasa 40:26)

 ¹³ Yihooway nuuni nu ayfiya xoqqu oottidi saluwaa xeellanaadaaninne maalaalissiya A wolqqay xoolintteti bantta sohuwan deꞌanaadan waatidi oottidaakko qoppanaadan nuna shoobbees. (Isiyaasa 40:26 nabbaba.) Intte naati saluwan deꞌiya xoolintteta xeellanaadaaninne beꞌiyoobaa takki giidi qoppanaadan eta minttettana danddayeeta. Taywaanen deꞌiya, Tishitishin giyo michchiyaa naatettan A deꞌiyo wode hanidabaa hassayada hagaadan gaasu: “Issi wode dembban dunkkaaniyan aqanawu ta aayyiyaa tana ekkada baasu, qassi yan katamaagaadan korinttiyaa pooꞌoy baynna gishshawu qamman saluwan daro xoolintteta beꞌida. He wode tanaara tamaariya naati taani Yihoowayyo azazettiyoogee metanaadan oottiyo gishshawu, ayyo ammanettada deꞌana danddayennabadan qoppada unꞌꞌettaas. He ubba xoolintteta medhdhanawu Yihooway goꞌettido wolqqaanne tana gakkiya ay metonne genccanaadan maaddanawu I he wolqqaa goꞌettiyoogaa taani qoppanaadan ta aayyiyaa tana minttettaasu. Hegaappe simmin taani meretaa akeekada Yihoowa loytta eraas; qassi kaseegaappe aaruwan awu haggaazanawu murttaas.”

14. Yelidaageeti meretaa goꞌettidi Yihooway ufayttiya Xoossa gidiyoogaa bantta naati akeekanaadan waati maaddana danddayiyoonaa?

¹⁴ Yihooway medhdhidobati I ufayttiya Xoossaa gidiyoogaanne nuunikka ufayttanaadan I koyiyoogaa bessees. Kafotanne moleta gujjin, mehiyaa doꞌaappe daroti kaaꞌiyoogaa saynisiyaa eranchchati akeekidosona. (Iyy. 40:20) Mehetinne doꞌati kaaꞌishin beꞌidi intte naati ufayttidi miicci eriyoonaa? Eti kanaa maray issoy issuwaara warettishin woy gawaraa maray kuwaase malabaa baqqi baqqi kaaꞌishin beꞌennan aggokkona. Kaalliya wodiyan intte naati mehee doꞌay kaaꞌishin beꞌidi ufayttidi miicciyo wode nuuni ufayttiya Xoossawu haggaaziyoogaa yootana danddayeeta.—1 Xim. 1:11, NW.

15. Yelidaageeti bantta naatu qofaa eranawu aybi maaddana danddayii? (Leemiso 20:5) (Misiliyaakka xeella.)

¹⁵ Issi issitoo naati banttana gakkiya metuwaabaa yelidaageetuura haasayanawu metootana  danddayoosona. Ne hanotaykka hegaa mala gidikko, ne naati qoppiyoobaa eranawu koyennan aggakka. (Leemiso 20:5 nabbaba.) Yelida issoti issoti bantta naatuura meretaa beꞌiiddi ufayttiyo wode yaatiyoogee metennaagaa akeekidosona. Aybissi? Issi gaasoy he wodiyan naatu qofaanne yelidaageetu qofaa shaakkiyaabi darenna gishshataassa. Taywaanen deꞌiya Masahika giyo issi aaway hara gaasuwaa hagaadan giis: “Nuuni nu naatuura deretiya sohuwaa kiyo wode woy abbaa doonan hemettiyo wode darotoo nu naati kaseegaappe aaruwan ufayttoosona. Yaatiyo gishshawu, he wodiyan eta haasayissidi eta qofaa eriyoogee metennaagaa akeekida.” Qommoora ibaa denttido Kaatiya hagaadan gaasu: “Taani timirtte keettaappe simmiyo wode ta aayyiyaa tana darotoo asay allaxxiyo keehi loꞌꞌiyaasaa ekkada bawusu. Hegaa mala wodiyan, timirtte keettan hanidabaa woy tana unꞌꞌissidabaa iyyo yootanawu metootikke.”

16. So asay Yihoowa meretaa beꞌiyoogan waani ufayttana danddayii?

¹⁶ So asay Yihooway medhdhidobata beꞌiiddi issippe wodiyaa aattiyoogan ufayttana danddayoosona. Hegee eti kaseegaappe aaruwan issoy issuwaa siiqanaadan maaddees. Geeshsha Maxaafay, ‘miiccanawu wodee deꞌiyoogaa,’ qassi “ufaittidi yexxanaukka wodee” deꞌiyoogaa yootees. (Era. 3:1, 4) Nuuni dosiyoobata oottanaadan Yihooway saꞌan loꞌꞌiya sohota medhdhiis. Daro so asay gaxariyan, deretiya sohuwan woy abbaa doonan issippe meretaa beꞌiiddi ufayttiyoogaa dosees. Issi issi naati asay allaxxiyo loꞌꞌiya sohuwan woxxiyoogaanne kaaꞌiyoogaa, mehiyaa doꞌaa beꞌiyoogaanne shaafan woy abban haattaa wadhdhiyoogaa dosoosona. Nuuni Yihooway medhdhidobata beꞌiiddi wodiyaa aattananne allaxxana danddayoos!

17. Yelidaageeti bantta naati Xoossay medhdhidobata beꞌiiddi ufayttanaadan maaddana koshshiyoy aybissee?

¹⁷ Xoossay ehaana ooratta alamiyan yelidaageetinne naati Yihooway medhdhidoban awudeegaappenne aaruwan ufayttana. He wode, nuuni mehiyawu doꞌawu yayyokko woy eti nuuyyo yayyokkona. (Isi. 11:6-9) Nuuni Yihooway medhdhidoban merinawu ufayttana. (Maz. 22:26) SHin yelidaageetoo, intte naati meretan ufayttanaadan maaddanawu he wodee gakkanaashin naagoppite. Intte intte naata Yihoowaabaa tamaarissanawu meretaa goꞌettiyo wode, eti Kawuwaa Daawiti giidoogaadan, ‘Abeet Yihoowawu, ne oosuwaa mala oosoy baawa’ gaana danddayoosona.—Maz. 86:8.