Booꞌeezi “ta ishau” giido bitanee, Uruto machchiyoogee ta buzo laatay ‘moorettanaadan’ oottees giidi yootidoy aybissee? (Uru. 4:1, 6)

Beni wode, aqo oyqqida issi bitanee naꞌa yelennan hayqqikko, A gadiyaa laattiyay oonee? A soo asaa sunttay merinawu xayanee? Muuse Higgee ha oyshatu zaaruwaa eranaadan maaddees.

Hayqqida woy hiyyeesidi ba gadiyaa bayzzida bitaniyaa gadiyaa laattiyay oonee? A ishay woy A mata dabboy he gadiyaa wozees. Hegee gadiyaa laattiyay so asaa gidanaadan oottees.—Wog. 25:23-28; Qoo. 27:8-11.

Hayqqida bitaniyaa so asaa sunttay xayennaadan waatana koshshii? Uruti wodiyaagaadan he hayqqida bitaniyaa machchiyo I azinaa ishay woy dabboy machchana koshshees. Issi bitanee ba ishaa machchiyo ekkidi naꞌa yelikko, he naꞌay hayqqida bitaniyaa sunttan xeesetteesinne A gadiyaa laattees. Hagee amꞌꞌeessi qoppiyoogaakka bessiyaaba.—Zaa. 25:5-7; Maa. 22:23-28.

Naaꞌoomi hanotaa beꞌa. A Elimeleeka giyo bitaniyaa gelaasu. Elimeleekinne eta naaꞌꞌu naati hayqqido wode iyyo koshshiyaabaa kunttiya asi baawa. (Uru. 1:1-5) Naaꞌooma ba naꞌaa machchee Urutiira Yihudaa biittaa simmido wode, Booꞌeezi eta gadiyaa wozana mala oychchanaadan Urutissi yootaasu. Booꞌeezi Elimeleekassi mata dabbo. (Uru. 2:1, 19, 20; 3:1-4) SHin Booꞌeezi, I “ta ishawu” giido bitanee appe aaruwan mata dabbo gidiyoogaa akeekiis. Yaatiyo gishshawu, he bitanee wozanawu woy agganawu koyro kuuyana koshshees.—Uru. 3:9, 12, 13.

Koyro heeran, Booꞌeezi “ta ishawu” giido bitanee maaddanawu koyiis. (Uru. 4:1-4) I he gadiyaa shammanawu amarida miishshaa kessana koshshiyoogaa erees, shin Elimeleeka gadiyaa laattiya naꞌaa Naaꞌooma yelana danddayennaagaakka erees. Booꞌeezi “ta ishawu” giido bitanee he gadiyaa ekkidi ba laata gadiyaappe issuwaa oottana danddayees; yaatiyo gishshawu, hegee awu daro miishsha demissiyaaba milatana danddayees.

SHin he bitanee Uruto machchana koshshiyoogaa erido wode, he gadiyaa wozennan agganawu kuuyiis. I hagaadan giis: “Taani wozanau danddayikke; aissi giikko, hegee tana ta buzo laata gadiyaa moorissana.” (Uru. 4:5, 6) I ba qofaa laammidoy aybissee?

Booꞌeezi ta ishawu giido bitanee woy hara uri Uruto ekkin A attuma naꞌa yelikko, he naꞌay Elimeleeka gadiyaa laattees. Hegee Booꞌeezi ta ishawu giido bitaniyaa laata gadiyaa waati moorii? Geeshsha Maxaafay hegaabaa yootenna, shin amarida gaasoti deꞌoosona.

• Koyroogee, I Elimeleeka gadiyaa shammanawu kessido miishshay coo xayees; ayssi giikko, wurssettan he gadee aagaa gidenna. He gadee Uruti naꞌaabaa gidees.

• Naaꞌꞌanttoogee, Naaꞌoomissinne Urutissi miyoobaa gujjin, koshshiyaabaa kunttiyo aawatettay awu deꞌana.

• Heezzanttoogee, Booꞌeezi ta ishawu giido bitaniyaappe Uruta hara naata yelikko, eti awu deꞌiya hara naatuura laata gadiyaa shaakki ekkoosona.

• Oyddanttoogee, Booꞌeezi ta ishawu giido bitaniyawu hara naati baynnaba gidikko, Uruta yeliyo naꞌawu Elimeleeka gadiyaanne A gadiyaa laattiyo maatay deꞌana. Yaatiyo gishshawu, I hayqqikko, A gadiyaa laattanay A sunttan gidennan Elimeleeka sunttan xeesettiya naꞌaa. Booꞌeezi ta ishawu giido bitanee Naaꞌoomo maaddiyoogan ba laataa mooranawu koyibeenna. He bitanee appe kaallidi wozanawu maatay deꞌiyo Booꞌeezi he maataa ekkanaadan koyiis. Booꞌeezi “haiqqidaagaa . . . sunttaa a laata gadiyan xeesissanau” koyido gishshawu hegaadan oottanawu koyiis.—Uru. 4:10.

Booꞌeezi ta ishawu giido bitanee ba sunttaanne ba laataa naagissanawu keehi koyidaba milatees. I ba xallaa siiqiya asa. SHin, Booꞌeezi ta ishawu giido bitanee ba sunttaa naagissanawu keehi koyikkonne, I oonakko ha wodiyan nuuni erokko. Qassi Booꞌeezi demmido, Masiyaa Yesuus Kiristtoosawu mayzza aawa gidiyo dumma maataa I demmibeenna. Booꞌeezi ta ishawu giido bitanee ba xalla siiqidi metootida uraa maaddanawu koyibeennaagee azzanttiyaabaa kaalettiis!—Maa. 1:5; Luq. 3:23, 32.