XANNAꞌIYO HUUPHE YOHUWAA 14
“Ta Erissiyo Ashkkarata Gidiyoogaa Asai Ubbai Erana”
“Intte issoi issuwaara siiqettikko, ta erissiyo ashkkarata gidiyoogaa asai ubbai erana.”—YOH. 13:35.
MAZAMURE 106 Siiqiyaageeta Gidanawu Baaxetiyoogaa
HA XINAATIYAN a
Yihoowa asay issoy issuwaara siiqettiyoogaa Yihoowa Markka gidenna daroti beꞌiyo wode ay akeekiyoonaa? (Mentto 1 xeella)
1. Asay koyro wodiyawu nu shiiqotun shiiqidi ay akeekii? (Misiliyaakka xeella.)
KOYRO wodiyawu Yihoowa Markkatu SHiiquwaa Addaraashan shiiqida issi azinaanne machchee hanotaa qoppa. Gubaaꞌiyan deꞌiyaageeti eta ufayssan mokkidoogaanne eti issoy issuwaara siiqettiyoogaa beꞌidoogan he aqo laggeti keehi maalaalettidosona. SHiiquwaappe soo simmiyo wode machchiya ba azinawu hagaadan gaasu: ‘Ha asati nu eriyo asaappe dummatoosona, qassi taani etaara gayttidoogan keehi ufayttaas.’
2. Issoti issoti Yihoowawu haggaaziyoogaa aggidoy aybissee?
2 Yihoowa asay siiqettiyo siiqoy keehi dumma. Gidikkonne, Yihoowa Markkati nagaranchcha asa. (1 Yoh. 1:8) Hegaa gishshawu, nuuni gubaaꞌiyan deꞌiyaageeta loytti eriyo wode, eta balaa akeekana danddayoos. (Roo. 3:23) Issoti issoti harati oottido balaa gaasuwan Yihoowawu haggaaziyoogaa aggidoogee azzanttiyaaba.
3. Tumu Kiristtaaneta asay waati shaakki erana danddayii? (Yohaannisa 13:34, 35)
3 Ha huuphe yohuwawu denddo gidida xiqisiyaa ane zaarettidi beꞌoos. (Yohaannisa 13:34, 35 nabbaba.) Tumu Kiristtaaneta asay waati shaakki erana danddayii? Nagari baynna asa gidennan, eti issoy issuwaara siiqettiyoogan asay eta shaakki erees. Yesuusi, ‘Intte ta erissiyo ashkkarata gidiyoogaa intte hegan erana’ gibeennaagaa akeeka. I hagaadan giis: “Ta erissiyo ashkkarata gidiyoogaa asai ubbai erana.” Hegaa gishshawu, Yesuusi bana tumuppe kaalliyaageeti bantta goꞌꞌaa aggibayidi issoy issuwaara siiqettiyoogaa A kaalliyaageetu xallay gidennan, Yihoowawu goynnennaageetikka akeekanaagaa yootiis.
4. Issoti issoti tumu Kiristtaanetubaa ay eranawu koyana danddayiyoonaa?
4 Yihoowa Markka gidenna issi issi asay hagaadan oychchana danddayees: ‘Siiqoy Yesuusa tumuppe kaalliyaageeta shaakki eranaadan waati maaddii? Kiitettidaageeta siiqiyoogaa Yesuusi waati bessidee? Qassi, ha wodiyan Yesuusa leemisuwaa kaalliyoogee waani danddayettii?’ Yihoowa Markkatikka ha oyshatu zaaruwaa loytti qoppiyoogee loꞌꞌo. Yaatiyoogee, harati balabaa oottiyo wodekka nuuni issoy issuwaara mintti siiqettanaadan maaddana danddayees.—Efi. 5:2.
SIIQOY TUMUPPE YESUUSA KAALLIYAAGEETU XALLAA SHAAKKI ERISSIYAABA GIDIYOY AYBISSEE?
5. Yohaannisa 15:12, 13n Yesuusi yootidobaa qonccissa.
5 Yesuusi bana kaalliyaageeti issoy issuwaara keehi siiqettanaagaa yootiis. (Yohaannisa 15:12, 13 nabbaba.) I eta hagaadan azazidoogaa akeeka: “Taani inttena siiqiyoogaadan, inttekka issoi issuwaara siiqettite.” Hegee woygiyoogee? Yesuusi qonccissidoogaadan, hagaa mala siiqoy issi Kiristtaanee baappe aaruwan hara uraa siiqanaadan ubba qassi koshshikko, ba mala Kiristtaaniyaa gishshawu hayqqanawukka eeno gaanaadan oottees. b
6. Siiqoy keehi koshshiyoogaa Xoossaa Qaalay waati qonccissii?
6 Siiqoy keehi koshshiyaaba gidiyoogaa Xoossaa Qaalay nuna tamaarissees. Leemisuwawu, kaallidi deꞌiya xiqiseti daro asay keehi dosiyoogeetuppe amaridaageeta: “Xoossai siiqo.” (1 Yoh. 4:8) “Neeni ne shooruwaa ne huuphedan siiqa.” (Maa. 22:39) “Siiqoy daro nagaraa [kammees.]” (1 PHe. 4:8) “Siiqoi mulekka xayenna.” (1 Qor. 13:8) Hageetinne hara xiqiseti ha ufayssiyaa eeshshaa bessiyoogee keehi koshshiyaaba gidiyoogaa loytti qonccissoosona.
7. Asay issoy issuwaara siiqettanaadaaninne issuwaa gidanaadan Seexaanay tamaarissana danddayennay aybissee?
7 Daro asay hagaadan oychchees: ‘Tumu haymaanootee awugaakko waata shaakka erana danddayiyaanaa? Ubba haymaanooteekka tumaa tamaarissays giidi yootees, shin ubbaykka Xoossaa xeelliyaagan issoy haraappe dummatiyaabaa tamaarissees.’ Seexaanay worddo haymaanootee daranaadan oottiyoogan, asay tumu haymaanootee awugaakko eranawu metootanaadan oottiis. SHin I kumetta saꞌan issoy issuwaara siiqettiya Kiristtaaneti deꞌanaadan mule oottana danddayenna. Hegaa oottana danddayiyay Yihoowa xalaala. Siiquwawu pulttoy Yihoowa gidiyo gishshawu nuuni hegaa eroos; Yihoowa ayyaanay deꞌiyoogeetinne I anjjidoogeetu xalaalay issoy issuwaara siiqettana danddayoosona. (1 Yoh. 4:7) Yesuusi bana siiqiyaageetu xallay issoy issuwaara tumuppe siiqettanaagaa yootidoy hegaassa.
8-9. Daroti Yihoowa Markkatu siiquwaa beꞌidoogee eti waananaadan oottidee?
8 Yesuusi kasetidi yootidoogaadan, tumuppe A kaalliyaageeti issoy issuwaara mintti siiqettiyoogan daro asay eta shaakki erees. Leemisuwawu, Iyan giyo ishay A heeran deꞌiya isttaademiyan I koyro shiiqido gita shiiquwaa hassayees. Iyani amarida aginatuppe kase he isttaademiyan ispporttiyaa kaassaa beꞌiis. I hagaadan giis: “He gita shiiquwaa shiiqida asaa eeshshay kaassaa beꞌanawu shiiqida asaagaappe keehi dummatees. Yihoowa Markkati ashkkenne giiga maayuwaa maayidaageeta, qassi eta naatussi loꞌꞌo eeshshay deꞌees.” I gujjidikka hagaadan giis: “Ubbaappe aaruwan, ha asati ufayttiyaageetanne woppu giidaageeta. Taani ta deꞌuwan koyiyoogeekka hegaa. Taani he galla shiiqida haasayatuppe issuwaanne hassayikke, shin Yihoowa Markkati bessido eeshshaa hanno gakkanawu hassayays.” c Hegaa mala eeshshay nuussi deꞌana danddayidoogee nuuni issoy issuwaa wozanappe siiqiyo gishshataassa. Nuuni nu ishanttanne michchontta siiqiyo gishshawu eta kehatettaaninne bonchchuwan oyqqoos.
9 Joona giyo ishaykka gubaaꞌe shiiqota koyro shiiqido wode keehi maalaalettiis: “Taani eti issoy issuwaara siiqettiyoogan keehi maalaalettaas. Eti loꞌꞌo asa gidiyo gishshawu nagari baynna asa gidana gaada qoppaas. Eti mintti siiqettiyoogee taani tumu haymaanootiyaa demmidoogaa ammananaadan oottiis.” d Hageetinne deꞌuwan hanida harabati Yihoowa asay tumu Kiristtaaneta gidiyoogaa qonccissoosona.
10. Nuuni nu mala Kiristtaaneta siiqiyoogaa bessana danddayiyoy awudee? (Tohossa qofaakka xeella.)
10 Doomettan qonccidaagaadan, nu mala Kiristtaaneti ubbay nagaranchcha. Eti issi issitoo nuna yiilloyiyaabaa haasayana woy oottana danddayoosona. e (Yaaq. 3:2) Harati nuna yiilloyiyo wode, haasayiyoobaaninne oottiyooban eta tumuppe siiqiyoogaa bessana danddayoos. Hegaara gayttidaagan nuuni Yesuusa leemisuwaappe ay tamaarana danddayiyoo?—Yoh. 13:15.
YESUUSI BA KIITTIDOOGEETA SIIQIYOOGAA WAATI BESSIDEE?
Kiitettidaageeti daroban baliyaaba gidikkonne Yesuusi eta siiqiis (Mentto 11-13 xeella)
11. Yaaqoobinne Yohaannisi bessido iita eeshshay aybee? (Misiliyaakka xeella.)
11 Yesuusi bana kaalliyaageeti aynne moorokkona giidi qoppibeenna. SHin eti Yihoowa ufayssanawu bantta shugo miyyiya giigissanaadaaninne laamettanaadan I eta siiquwan maaddiis. Issi wode Yaaqoobinne Yohaannisi Kawotettan gita sohuwaa Yesuusi etawu immanaadan bantta aayee baggaara oychchidosona. (Maa. 20:20, 21) Yaaqoobinne Yohaannisi oottidobay eti otorettiyoogaanne haratuppe aadhdhanawu koyidoogaa bessees.—Lee. 16:18.
12. Iita eeshshaa bessiday Yaaqoobanne Yohaannisa xallee? Qonccissa.
12 He wode iita eeshshaa bessiday Yaaqoobanne Yohaannisa xalla gidokkona. Kiitettida harati waanidaakko akeeka: “Hankko tammu erissiyo ashkkarati hegaa siyido wode, he naa77u ishantta hanqqettidosona.” (Maa. 20:24) Yaaqoobinne Yohaannisi, qassi kiitettida harati iita palamaa palamettidoogaa qoppana danddayoos. Kiitettida harati hagaadan geennan aggokkona: ‘Kawotettan gita sohuwaa demmanawu qoppidi oychchanawu intte oonee? Yesuusaara minnidi haggaaziday intte xalla gidekketa. Intteegaadan nuussikka Kawotettan gita sohoy koshshees!’ Eti qoppidobay woy haasayidobay aybanne gidin, he wode eti ubbatoo siiqettananne kehatettaa bessana koshshiyoogaa dogidosona.
13. Kiitettidaageeti moorido wode Yesuusi eta waati oyqqidee? (Maatiyoosa 20:25-28)
13 He wode Yesuusi waanibeennee? Hanqqettibeenna. I banttana ziqqi oottiyaanne ubbatoo mintti siiqettiya kiitettida harata koyana gibeenna. Eti likke gididabaa oottanawu koyiyoogaa Yesuusi eriyo gishshawu, danddayan eta haasayissiis. (Maatiyoosa 20:25-28 nabbaba.) Kiitettidaageeti bantta giddon ubbaappe ooni gitakko darotoo palamettikkokka, Yesuusi eta ubbatoo kehatettan oyqqiis.—Mar. 9:34; Luq. 22:24.
14. Yesuusa kaalliyaageeti ay mala wogan diccidonaa?
14 Kiitettidaageeti diccido wogay eti hegaadan qoppanaadan oottidoogaa Yesuusi akeekidoogee qoncce. (Yoh. 2:24, 25) Issi urawu gita maatay deꞌiyaaba gidikko, I hara asaappe aadhdhees giidi haymaanootiyaa kaalettiyaageeti tamaarissoosona. (Maa. 23:6) Qassi Ayhuda haymaanootiyaa kaalettiyaageeti haratuppe aadhdhoos giidi qoppoosona. f (Luq. 18:9-12) Ha qofay kiitettidaageeti banttanakka haratakka xeelliyaagan hegaadan qoppanaadan oottidoogaa Yesuusi akeekiis. (Lee. 19:11) Yesuusi kiitettidaageeti mule moori erokkona giidi qoppi erenna, qassi eti mooriyo wode eta danddayiis. Eti loꞌꞌobaa oottanawu koyiyoogaa Yesuusi erees; hegaa gishshawu, eti haratuppe aadhadhays giidi qoppiyoogaa aggidi, banttana ziqqi oottanaadaaninne issoy issuwaara siiqettanaadan Yesuusi eta danddayan tamaarissiis.
YESUUSA LEEMISUWAA WAATI KAALLANA DANDDAYIYOO?
15. Yaaqoobanne Yohaannisa, qassi hara kiitettidaageetu hanotaappe nuuni ay tamaarana danddayiyoo?
15 Yaaqoobanne Yohaannisa hanotaappe darobaa tamaarana danddayoos. Eti Kawotettan gita sohuwaa demmanawu oychchidoogee bala. SHin kiitettida haratikka balidosona, eti issippetettan deꞌanawu baaxetibookkona. SHin Yesuusi kiitettida 12tussikka keha, qassi eta siiqees. Hegaappe nuuni ay tamaariyoo? Harati oottido balaa xalla gidennan, eta balawunne mooruwawu nuuni zaariyo ogeekka meto gidana danddayees. Nuna aybi maaddana danddayii? Nu mala Kiristtaanee nuna yiilloyikko, hagaadan giidi oychchana danddayoos: ‘I oottidobay tana keehi hanqqetissidoy aybissee? Hegee taani giigissana koshshiyo ta shugo miyyiyaa bessiyaabee? Tana yiilloyida uraa geella metoy gakkiiddi deꞌiishsha? Taani yiillotanaadan oottiya gaasoy deꞌikkokka, he uraa siiqananne awu coo atto gaana danddayiyaanaa?’ Nuuni issoy issuwaara siiqettiyo wode, Yesuusa tumuppe kaalliyaageeta gidiyoogaa bessoos.
16. Yesuusa leemisuwaappe harabaa ay tamaariyoo?
16 Nu mala Kiristtaaniyaa hanotaa akeekanawu baaxetana koshshiyoogaakka Yesuusappe tamaaroos. (Lee. 20:5) Yesuusi asaa wozanan deꞌiyaabaa erees. SHin nuuni erana danddayokko. Gidikkonne, nu ishanttinne michchontti nuna yiilloyiyo wode, nuuni eta danddayana koshshees. (Efi. 4:1, 2; 1 PHe. 3:8) Nuuni etabaa loytti erikko, yaatanawu metootokko. Ane issi hanotaa beꞌa.
17. Yuuyidi xomoosiya issi ishay ba mala Kiristtaaniyaa loyttidi eridoogan waani goꞌettidee?
17 Arshsho Afirkkan yuuyidi xomoosiya ishay, asawu qarettenna asa giidi qoppido issi ishaabaa hassayees. Woradaa xomoosiya he ishay waatidee? I hagaadan giis: “He ishaa qareti baynnaagaa ga qoppiyoogaappe A loytta eranawu murttaas.” Yaatiyoogan, he ishay diccido hanotay I hegaa mala asa gidanaadan oottidoogaa woradaa xomoosiya ishay akeekiis. Woradaa xomoosiyaagee gujjidi hagaadan giis: “He ishay haraatuura laggetanawu koyidi laametiyoogee awu keehi metiyaaba gidikkokka I keehi laamettidoogaa taani akeekido wode maalaalettaas. Nuuni loꞌꞌo lagge gidida.” Nuuni nu ishanttunne michchonttu hanotaa akeekanawu baaxetiyo wode, eta siiqanawu darotoo metootokko.
18. Issi Kiristtaanee nuna yiilloyikko nuna woygidi oychchana danddayiyoo? (Leemiso 26:20)
18 Issi issitoo nuna yiilloyida nu mala Kiristtaaniyaara haasayiyoogee koshshiyoogaa akeekana danddayoos. SHin koyro, hagaa mala oyshata nuna oychchana koshshees: ‘Aybi hanidaakko taani loytta akeekidanaa?’ (Lee. 18:13) ‘I tana erennan hanqqetissidee?’ (Era. 7:20) ‘Taani hegaadan moora erikkinaa?’ (Era. 7:21, 22) ‘Hegaabaa taani he uraara haasayikko, hanotay yaa iitanee?’ (Leemiso 26:20 nabbaba.) Nuuni ha oyshata takki giidi qoppikko, nu ishaa siiqiyoogee nuna yiilloyidabaa coo agganaadan oottiyoogaa akeekana danddayoos.
19. Neeni ay oottanawu murttadii?
19 Yihoowa Markkati issoy issuwaa siiqiyoogan tumuppe Yesuusi erissiyo ashkkara gidiyoogaa bessoosona. Nu ishanttinne michchontti moorishinkka nuuni nu goꞌꞌaa aggibayidi eta siiqiyo wode, tumuppe Yesuusa kaalliyaageeta gidiyoogaa bessoos. Nuuni nu goꞌꞌaa aggi bayidi harata siiqiyo wode, haratikka tumu haymaanootiyaa shaakki erananne siiqo Xoossaa Yihoowawu nunaara issippe goynnana danddayoosona. Simmi yaakko, tumu Kiristtaaneta shaakki erissiya siiquwaa ubbatoo bessanawu murttidaageeta gidoos.
MAZAMURE 17 “Ta Koyays”
a Nuuni issoy issuwaara siiqettiyoogaa daroti beꞌiyo gishshawu, eti Yihoowabaanne A Qaalaabaa loytti tamaaranawu koyoosona. Gidikkonne nuuni nagaranchcha gidiyo gishshawu, issi issitoo nuuni issoy issuwaa siiqiyoogee metiyaaba gidana danddayees. Siiqoy keehi koshshiyaabaa gididoy aybissakko, qassi harati balabaa oottiyo wode nuuni Yesuusa leemisuwaa waati kaallana danddayiyaakko ane pilggoos.
c Wochchiyo Keelaa, Hidaare 1, 2012, sinttaa 13-14n, (Amaarattuwaa) “Wurssettan Ta Deꞌoy Ufayssiyaagaa Gidiis” giya huuphe yohuwaa xeella.
d Wochchiyo Keelaa, Uddufune 1, 2012, sinttaa 18-19n, (Amaarattuwaa) “Kase Ta Deꞌoy Giiga Milatees” giya huuphe yohuwaa xeella.
e Ha huuphe yohoy yootiyoy 1 Qoronttoosa 6:9, 10n qonccida, cimati kaallana bessiyo wolqqaama nagaraabaa gidenna.
f Rabbi geetetti xeesettiya issi uri hagaadan giidoogee odettiis: “Abraamaagaadan xillo gidida, baa giishin hasttamu asay alamiyan deꞌees. Hasttamati deꞌikko, etappe naaꞌꞌati ta naꞌaanne tana; tammati deꞌikko, etappe naaꞌꞌati ta naꞌaanne tana; ichchashati deꞌikko, etappe naaꞌꞌati ta naꞌaanne tana; naaꞌꞌati deꞌikko, eti ta naꞌaanne tana; shin issuwaa xallay deꞌikko, hegee tana.”
