1. Geeshsha Maxaafaa hiraagaa xannaꞌiyoogan ufayttanaadan nena aybi maaddana danddayii?

 BEENA giyo yelaga ishay “Geeshsha Maxaafaa hiraagaa xannaꞌiyoogaa dosays” yaagiis. I giidoban maayettayye, Geeshsha Maxaafaa hiraagati akeekanawu keehi metiyaabadan qoppay? Neeni hiraagata xannaꞌiyoogee salettiyaaba gidana danddayees gaada qoppennan waaya aggana. SHin Yihooway hiraagati ba Qaalan xaafettanaadan oottidoy aybissakko neeni loytta eriyo wode hegaa dosana danddayaasa.

2. Nuuni ha huuphe yohuwan ay beꞌanee?

² Nuuni Geeshsha Maxaafaa hiraagata xannaꞌana koshshiyo gaasuwaa xalla gidennan, eta xannaꞌiyo ogiyaakka ha huuphe yohuwan beꞌana. Qassi Daaneela maxaafan odettida naaꞌꞌu hiraagata akeekiyoogee ha wodiyan nuna waati maaddana danddayiyaakko beꞌana.

3. Nuuni Geeshsha Maxaafaa hiraagaa akeekanawu waatana koshshii?

³ Nuuni Geeshsha Maxaafaa hiraagaa akeekanawu maaduwaa oychchana koshshees. Ha leemisuwaa beꞌa. Neeni erenna issi sohuwaa baydda deꞌiyaabadan qoppa, shin nenaara biya ne laggee he sohuwaa loytti erees. Neeni deꞌiyo sohuwaanne oge ubbay awa efiyaakko I erees. Ne laggee nenaara baanawu maayettidoogan ne ufayttanaagee qoncce. Yihooway maaddiya he laggiyaa mala. I nu sinttanaabaa loytti erees. Hegaa gishshawu, nuuni Geeshsha Maxaafaa hiraagaa akeekanawu nuna ziqqi oottidi Yihooway nuna maaddanaadan oychchana koshshees.—Dane. 2:28; 2 PHe. 1:19, 20.

4. Yihooway hiraagati ba Qaalan xaafettanaadan oottidoy aybissee? (Ermmaasa 29:11) (Misiliyaakka xeella.)

⁴ Loꞌꞌo aawaagaadan, Yihooway ba naati sinttaappe ufayssiya deꞌuwaa deꞌanaadan koyees. (Ermmaasa 29:11 nabbaba.) SHin  aawaagaappe dumma hanotan Yihooway sinttappe hananabaa nuussi yootana danddayees, qassi I ubbatoo likke. Gitabati polettanaappe kase nuuni eranaadan Yihooway hiraagati ba Qaalan xaafettanaadan oottiis. (Isi. 46:10) Geeshsha Maxaafaa hiraagati saluwan deꞌiya nu Aaway siiquwan immidobata. Yaatin Geeshsha Maxaafaa hiraagati tumuppe polettanaagaa neeni waana ammanettana danddayay?

5. Yelagati Maksappe ay tamaarana danddayiyoonaa?

⁵ Yelagati darotoo Geeshsha Maxaafaa darin woy mule bonchchennaageetuura tamaaroosona. Issi issitoo eti haasayiyoobaynne oottiyoobay yelaga Yihoowa Markkati bantta ammanuwaabaa siranaadan oottana danddayees. Maksa giyo ishaa hanotaa beꞌa. I hagaadan giis: “Tana yelidaageeti tumu haymaanootiyaa tana tamaarissiyoogaanne Geeshsha Maxaafay Xoossaa ayyaanan xaafettidoogaa yelagatettan siriyoogaa doommaas.” A yelidaageeti waatidonaa? I hagaadan giis: “Eti hirggidaba gidikkonne, woppu giidi tana haasayissidosona.” Maksa yelidaageeti A oyshatuyyo Geeshsha Maxaafaappe zaaruwaa yootidosona. Maksi harabaakka oottiis. I hagaadan giis: “Taani Geeshsha Maxaafaa hiraagata xannaꞌaas, qassi ta eridobaa gubaaꞌiyan deꞌiya hara yelagatuura haasayaas.” Hegee ay demissidee? Maksi hagaadan giis: “Hegaappe simmin, Geeshsha Maxaafay Xoossaa ayyaanan xaafettidoogaa ammanaas.”

6. Neeni siriyaaba gidikko ay oottana koshshii, qassi aybissi?

⁶ Neenikka Maksaagaadan, Geeshsha Maxaafay yootiyoobay tuma gidiyoogaa siriyoogaa doommikko, ne yeellatana koshshenna. SHin neeni hegaara gayttidaagan issibaa oottana koshshees. Siree biratay shiyiyoogaa mala. Coo aggiigikko alꞌꞌobaa loddan loddan muleera moorana danddayees. Ne ammanuwaa xayssana danddayiya siriyaa agganawu nena hagaadan oychchana koshshees, ‘Taani Geeshsha Maxaafay sinttappe hananabaa xeelliyaagan yootiyoobaa ammaniyaanaa?’ Neeni siriyaaba gidikko polettida Geeshsha Maxaafaa hiraagata xannaꞌana koshshees. Neeni hegaadan waata oottana danddayay?

7. Hiraagaa xannaꞌiyo ogiyaara gayttidaagan Daaneela maaddidabay aybee? (Daaneela 12:10) (Misiliyaakka xeella.)

⁷ Hiraagaa xannaꞌiyo ogiyaara gayttidaagan Daaneeli nuussi ubbawu loꞌꞌo leemiso. Daaneeli hiraagata xannaꞌido gaasoy deꞌees. I tumaa eranawu koyiis. Qassi Daaneeli bana ziqqi oottiya asa. I Yihoowakko shiiqidi deꞌiyaabanne awu azazettiyaaba gidikko, hiraagata akeekanaadan Yihooway A maaddanaagaa I erees. (Dane. 2:27, 28; Daaneela 12:10 nabbaba.) Daaneeli maaduwaa demmanawu Yihoowan ammanettiyoogan bana ziqqi oottiya asa gididoogaa bessiis. (Dane. 2:18) Qassi Daaneeli loytti xannaꞌiis. A wodiyan deꞌiya Xoossaa Qaalaa I loytti pilggiis. (Erm. 25:11, 12; Dane. 9:2) Neeni Daaneela leemisuwaa waata kaallana danddayay?

8. Issi issi asay Geeshsha Maxaafaa hiraagata xannaꞌiyoy aybisee, shin nuuni waatana koshshii?

⁸ Neeni hiraagata xannaꞌiyo gaasuwaa qoppa. Neeni tumaa eranawu keehi koyiyo gishshawu  xannaꞌay? Hegaadan gidikko Yihooway nena maaddana. (Yoh. 4:23, 24; 14:16, 17) Issoti issoti hiraagaa xannaꞌiyoy aybissa gidana danddayii? Issoti issoti xannaꞌiyoy Geeshsha Maxaafay Xoossaa ayyaanan xaafettibeenna giidi qonccissanawu koyiyo gishshataassa. Eti Geeshsha Maxaafay Xoossaa ayyaanan xaafettibeennaba gidikko, likkenne likke gidennabaa xeelliyaagan nuuyyo kuuyana danddayoos giidi qoppoosona. SHin nuuni suurebaa qoppidi xannaꞌana koshshees. Hegaa bollikka, Geeshsha Maxaafaa hiraagaa akeekanawu keehi koshshiya eeshshay deꞌees.

9. Geeshsha Maxaafaa hiraagaa akeekanawu koshshiya eeshshay aybee? Qonccissa.

⁹ Nena ziqqi ootta. Yihooway banttana ziqqi oottiyaageeta maaddanawu qaalaa geliis. (Yaaq. 4:6) Yaatiyo gishshawu, nuuni Geeshsha Maxaafaa hiraagaa akeekana mala A maaduwaa demmanawu woossana koshshees. Nuuni nuna ziqqi oottikko, koshshiyo wodiyan ayyaanaa qumaa nuussi immanawu Yihooway goꞌettiyo ammanettida ashkkaraa maaduwaakka ekkoos. (Luq. 12:42) Yihooway maaraa Xoossaa gidiyo gishshawu, A Qaalan deꞌiya tumaa nuuni akeekanaadan maaddanawu issi oge xalla goꞌettees giidi qoppiyoogee bessiyaaba.—1 Qor. 14:33; Efi. 4:4-6.

10. Esttirippe ay tamaaray?

¹⁰ Loytta xannaꞌa. Neeni dosiyo hiraagaa xannaꞌiyoogan doomma. Esttiro giyo michchiyaa hegaadan oottaasu. A Mase yuussaa xeelliyaagan kaseti odettida hiraagata loytta eranawu koyaasu. A hagaadan gaasu: “Tawu layttay 15 gidido wode, he hiraagati Yesuusa wodiyaappe kase xaafettidoogaa eranawu pilggiyoogaa doommaas.” Maxine Abbaa Xaatta Maxaafatubaa nabbabada eridobay A ammananaadan oottiis. A hagaadan gaasu: “Etappe amaridaageeti Kiristtoosa wodiyaappe kase xaafettido gishshawu, hegan odettida hiraagati Xoossaa ayyaanan xaafettidaageeta gidana koshshees.” Esttira gujjada hagaadan gaasu: “Issi issi hiraagata akeekanawu darotoo nabbabana koshshiis.” SHin A hegaadan oottido gishshawu ufayttawusu. A daro Geeshsha Maxaafaa hiraagata loytta xannaꞌa simmada hagaadan gaasu: “Taani Geeshsha Maxaafay tuma gidiyoogaa shaakka eraas.”

11. Geeshsha Maxaafay yootiyoobay tuma gidiyoogaa ammaniyoogee loꞌꞌo gididoy aybissee?

¹¹ Xoossaa Qaalan deꞌiya amarida hiraagati waani polettidaakko nuuni beꞌiyo wode Yihoowaaninne I nuussi immiyo kaaleto ubban loytti ammanettoos. Hegaa bollikka, ha wodiyan nuna gakkiya metoy ayba gidikkonne Geeshsha Maxaafaa hiraagati nuuni sinttanaabaa loꞌꞌobaa ubbatoo qoppanaadan maaddoosona. Daaneeli xaafido ha wodiyan polettiiddi deꞌiya naaꞌꞌu hiraagata ane qanttan pilggoos. Hegeeta akeekiyoogee nuuni loꞌꞌobaa kuuyanaadan maaddana danddayees.

12. ‘Biratay urqqaara walahettida’ tohoy ay qonccissii? (Daaneela 2:41-43)

¹² Daaneela 2:41-43 nabbaba. Daaneeli birshshido Kawuwaa Naabukadanaxoora aymuwan  ‘biratay urqqaara walahettida’ tohuwaa misiliyaa he kawoy beꞌiis. Ha hiraagaa Daaneela maxaafaaninne Ajjuutaa maxaafan deꞌiya hara hiraagatuura geeddarssiyo wode, he tohoti ha wodiyan Alamiyan Wolqqaama Gidida Inggilizenne Amarkkaa Waatta Kawotettaa qonccissiyoogaa nuuni akeekoos. Alamiyan wolqqaama gidida ha kawotettata xeelliyaagan Daaneeli “ha kawotettau baggai mino baggai laafa” gidanaagaa yootiis. Baggay laafaa gidiyoy aybissee? He kawotettati birataagaa mala minotettan oottennaadan urqqan leemisettida asay eta wolqqaa shugissiyo gishshataassa. b

13. Ha hiraagaappe nuuni tamaariyo keehi koshshiya tumay aybee?

¹³ Daaneeli qonccissido misiliyaappe keehi koshshiyaabaa tamaaroos. Ubba qassi tohuwaa misiliyaappe keehi darobaa tamaaroos. Koyruwan, Alamiyan Wolqqaama Gidida Inggilizenne Amarkkaa Waatta Kawotettay keehi wolqqaama gidiyoogaa bessiis. Leemisuwawu, eti Koyronne Naaꞌꞌantto Alamiyaa Olaa wode xoonidosona. Gidikkonne, ha wolqqaama kawotettatun deꞌiya asay issoy issuwaa eqettiyo gishshawu eta wolqqay laafiis; qassi sinttanawukka laafana. Naaꞌꞌanttuwan, Xoossaa Kawotettay asaa kawotettata ubbaa xayssanaappe kase haariya wurssetta alamiyan wolqqaama kawotettay Inggilizenne Amarkkaa Waatta Kawotettaa gidana. Hara kawotettati Alamiyan Wolqqaama Gidida Inggilizenne Amarkkaa Waatta Kawotettaa issi issitoo eqettiyaaba gidikkonne xoonana danddayokkona. Ayssi giikko, Xoossaa Kawotettan leemisettida “shuchchai” Inggilizenne Amarkkaa Waatta Kawotettaa qonccissiya misiliyaa tohuwaa gaaccanaagaa nuuni eroos.—Dane. 2:34, 35, 44, 45.

14. Birataappenne urqqaappe merettida tohuwaabaa yootiya hiraagaa akeekiyoogee nuuni loꞌꞌobaa kuuyanaadan waati maaddana danddayii?

¹⁴ Birataappenne urqqaappe merettida tohuwaabaa yootiya Daaneela hiraagay tuma gidiyoogaa neeni ammanay? Yaatikko, hegee neeni deꞌiyo ogiyaa laammana koshshees. Ha iita alamee xayanaagaa neeni eriyo gishshawu, keehi daro miishshaa woy aquwaa demmanawu baaxetakka. (Luq. 12:16-21; 1 Yoh. 2:15-17) Qassi ha hiraagaa akeekiyoogee sabbakiyoonne tamaarissiyo oosoy keehi koshshiyaaba gidiyoogaa neeni akeekanaadan maaddana. (Maa. 6:33; 28:18-20) Ha hiraagaa xannaꞌa simmada nena hagaadan oychcha, ‘Taani kuuyiyoobay Xoossaa Kawotettay asaa kawotettaa ubbaa mata wode xayssanaagaa ta ammaniyoogaa bessii?’

15. Ha wodiyan ‘huuphessa kawoynne tohossa kawoy’ oonee? (Daaneela 11:40)

¹⁵ Daaneela 11:40 nabbaba. Daaneela shemppo 11 issoy issuwaara eqettiya naaꞌꞌu kawotettatubaa yootees. Raasheenne aara hashetiya kawotettati huuphessa kawo gidiyoogaanne Alamiyan Wolqqaama Gidida Inggilizenne Amarkkaa Waatta Kawotettay tohossa kawo gidiyoogaa qonccissiya ha hiraagaa Geeshsha Maxaafan deꞌiya hara hiraagatuura geeddarssiyoogan akeekoos. c

16. ‘Huuphessa kawoy’ Xoossaa asaa waatiiddi deꞌii?

¹⁶ ‘Huuphessa kawoy’ haariyo sohotun deꞌiya Xoossaa asaa bolli he kawoy yedetaa gattiiddi deꞌees. Amarida Yihoowa Markkata eta ammanuwaa gaasuwan shociisinne qachchiis. ‘Huuphessa kawoy’ gattiyo yedetay nu ishantti yayyanaadan gidennan, eta ammanoy  minnanaadan oottiis. Aybissi? Xoossaa asaa yedetay gakkiyoogee Daaneela maxaafan odettida hiraagay polettanaadan oottiyoogaa nu ishantti eriyo gishshataassa. d (Dane. 11:41) Nuuni hegaa eriyoogee nu hidootaa mintti naaganaadaaninne Yihoowawu ammanettidi deꞌanaadan maaddana danddayees.

17. ‘Tohossa kawoy’ haariyoosan deꞌiya Xoossaa asaa gakkiiddi deꞌiya metoy aybee?

¹⁷ Beni wode, ‘tohossa kawoykka’ Yihoowa asaa bolli yedetaa gattiis. Leemisuwawu, Koyronne Naaꞌꞌantto Amaliyaa Olaa wode, daro ishantti polotikaaban oossinne exatenna gishshawu qashettidosona, qassi Yihoowa Markka gidida amarida naata timirtte keettaappe yedettidosona. Mata layttatun, tohossa kawuwaa haaruwan deꞌiya Yihoowa asay ammanettiyoogaara gayttidaagan hara ogetun paacettiis. Leemisuwawu, dooruwawu asaa denttettiyo zamachchaa wode issi Kiristtaanee issi polotikaa dirijjitiyaa woy doorettiya uraa haraappe aatti xeellidi kaafanawu paacettana danddayees. I doorana xayikkonne ba qofaaninne ba wozanan  issi baggawu exatana danddayees. SHin nuuni oossinne mule exatennan agganawu, nu oottiyoobaaninne qoppiyoobankka naagettana koshshees.—Yoh. 15:18, 19; 18:36.

18. ‘Huuphessa kawoynne tohossa kawoy’ ooyettiyoogaa nu waati xeellana koshshii? (Misiliyaakka xeella.)

¹⁸ Geeshsha Maxaafaa hiraagan ammanennaageeti ‘tohossa kawoy huuphessa kawuwaara olettiyoogaa’ beꞌiyo wode, keehi hirggana danddayoosona. (Dane. 11:40) He naaꞌꞌu kawotussikka saꞌan deꞌiya deꞌo ubbaa xayssiyaagaa keena wolqqaama olaa miishshati deꞌoosona. SHin hegee hananaadan Yihooway paqqadennaagaa nuuni eroos. (Isi. 45:18) Hegaa gishshawu, ‘huuphessa kawoynne tohossa kawoy’ ooyettiyoogee sinttanaabaa nuuni hirgganaadan oottiyoogaappe nu ammanuwaa minttees. Hegee ha alamiyaa wurssettay matidoogaa bessees.

19. Geeshsha Maxaafaa hiraagaa xeelliyaagan nuuni akeekana koshshiyaabay aybee?

¹⁹ Geeshsha Maxaafay yootiyo issi issi hiraagati waani polettanaakko nuuni erokko. Haray atto, hananabaa yootiya Daaneelikka I xaafido ubbabay ay qonccissiyaakko loytti akeekibeenna. (Dane. 12:8, 9) SHin issi hiraagay waani polettanaakko nuuni loytti erenna gishsha xallawu hegee polettenna giyoogaa gidenna. Yihooway kase oottidoogaadan, nuuni erana koshshiyaabaa bessiya wodiyan nu akeekanaadan maaddanaagaa ammanettana danddayoos.—Amo. 3:7.

20. Nuuni mata wode polettin beꞌana Geeshsha Maxaafaa hiraagati awugeetee, qassi nu ubbatoo ay oottana koshshii?

²⁰ “Ubbabai saro; aibikka hanenna” yaagiya awaajjoy awaajettana. (1 Tas. 5:3) Hegaappe simmin, ha alamiyaa kawotettati worddo haymaanootiyaa xayssana. (Ajj. 17:16, 17) Yaatidi eti Xoossaa asaa qohanawu denddana. (Hiz. 38:18, 19) Hegaappe guyyiyan, wurssetta olaa gidida Armmageedooni doommana. (Ajj. 16:14, 16) Ha ubbabay hananaagaa nuuni ammanettana danddayoos. He wode gakkanaashin, Geeshsha Maxaafaa hiraagaa loytti akeekiyoogaaninne yaatanaadan harata maaddiyoogan saluwan deꞌiya nu siiqo Aawaa ubbatoo galatiyaageeta gidoos.