1. Ibraawe 12:1y yootiyoogaadan, nu deꞌuwaa wottaa woxxidi wurssanawu nuuni ay oottana koshshii?

 GEESHSHA MAXAAFAY nuuni Kiristtaaneti deꞌiyo deꞌuwaa wottaara geeddarssees. He wottaa woxxidi wurssiyaageeti merinaa deꞌuwaa demmoosona. (2 Xim. 4:7, 8) Nuuni wottaa wurssanawu keehi matido gishshawu, aggennan woxxanawu nuussi danddayettida ubbabaa oottana koshshees. Deꞌuwaa wottaa woxxidi wurssida kiitettida PHawuloosi nuuni he wottaa xoonanaadan aybi maaddanaakko odiis. Nuuni nu ‘tooho ubbaa diggidi nu sinttan deꞌiya wottaa genccidi woxxanaadan’ I yootiis.—Ibraawe 12:1 nabbaba.

2. ‘Tooho ubbaa diggiyoogaa’ giyoogee woygiyoogee?

² PHawuloosi nuuni nu ‘tooho ubbaa diggana’ koshshiyoogaa yootidoy issi Kiristtaane ayba toohuwaanne tookkana koshshenna gaanaassee? CHii. Nuuni tookkana bessenna tooho ubbaa diggana koshshiyoogaa yootanaassa. Hegaa mala toohoy nuuni loytti woxxennaadaaninne xalalanaadan oottana danddayees. Nuuni aggennan woxxanawu hegaa mala bessenna toohuwaa tookkidaakkonne eesuwaara shaakki eridi, he toohuwaa wottana koshshees. SHin nuuni yaatiyo wode tookkana koshshiyo toohuwaa aggiiganawu koyokko. He toohota tookkana xayikko, aggennan woxxana danddayokko. (2 Xim. 2:5) Nuuni tookkana koshshiyo toohoti awugeetee?

3. (a) Galaatiyaa 6:5y yootiyoogaadan, nuuni tookkana koshshiyaabay aybee? (b) Nuuni ha huuphe yohuwan ay beꞌanee, qassi aybissi?

³ Galaatiyaa 6:5 nabbaba. PHawuloosi nuuni tokkana bessiyaabaa  qonccissiis. I “asai ubbai huuphiyan huuphiyan ba toohuwaa tookkanau” bessiyoogaa yootiis. PHawuloosi nuuni Xoossaa ashkkara gidiyoogaadan Xoossay nuuppe koyiyoobaa ha sohuwan yootiis; hegee nuuni nu huuphen tookkana bessiyaaba. Nuuni tookkana bessiya toohuwaanne waati tookkana danddayiyaakko ha huuphe yohuwan beꞌana. Qassi nuuni geella tookkido bessenna toohotanne hegeeta wottana danddayiyo ogiyaa beꞌana. Nu toohuwaa tookkiyoogeenne bessenna toohuwaa wottiyoogee deꞌuwaa wottaa woxxidi wurssanaadan nuna maaddana.

4. Yihoowayyo merinawu haggaazanawu gelido qaalaa poliyoogee keehi deexxiyaaba gidennay aybissee? (Misiliyaakka xeella.)

⁴ Yihoowayyo merinawu haggaazanawu gelido qaalaa. Nuuni nuna Yihoowawu sheedhdhiyo wode, awu goynnanawunne I koyiyoobaa oottanawu qaalaa gelida. Nu he qaalaa naagana koshshees. Nuuni Yihoowawu qaalaa gelidobaa poliyoogee gita aawatetta gidikkonne keehi deexxiyaaba gidenna. Ayssi giikko, Yihooway nuna medhdhidoy A sheniyaa polanaadaana. (Ajj. 4:11) I nuuni A  eranaadaaninne awu goynnanaadan oottidi ba leemisuwan medhdhiis. Yaatiyo gishshawu, nuuni akko shiiqananne I koyiyoobaa oottiyoogan ufayttana danddayoos. (Maz. 40:8) Qassi, nuuni Xoossay koyiyoobaa oottiyoonne A Naꞌaa kaalliyo wode, nuuyyo “shemppo demmana.”—Maa. 11:28-30.

5. Neeni Yihoowawu gelido qaalaa polanaadan aybi maaddana danddayii? (1 Yohaannisa 5:3)

⁵ Ha toohuwaa waata tookkana danddayay? Naaꞌꞌubay nena maaddana. Koyruwan, ubbatoo Yihoowa loytta siiqa. I neeyyo oottidonne sinttappe oottana loꞌꞌoba ubbaa wotta dentta qoppiyoogan yaatana danddayaasa. Neeni Xoossaa kaseegaappe aaruwan loytta siiqiyo wode, awu azazettanawu metootakka. (1 Yohaannisa 5:3 nabbaba.) Naaꞌꞌanttuwan, Yesuusa leemisuwaa kaalla. I maaduwaa demmanawu Yihoowa woossidonne demmana woytuwaa muletoo qoppido gishshawu, Xoossay koyiyoobaa ubbatoo oottiis. (Ibr. 5:7; 12:2) Neenikka, Yesuusaagaadan minotettaa demmanawu Yihoowa woossa, qassi merinaa deꞌuwaa hidootaa ubbatoo qoppa. Neeni Xoossaa loytta siiqiyoonne A Naꞌaa leemisuwaa loytta kaalliyo wode, Yihoowawu gelido qaalaa polana danddayaasa.

6. Nu son nuuyyo deꞌiya aawatettaa polana koshshiyoy aybissee? (Misiliyaakka xeella.)

⁶ Nu son nuuyyo deꞌiya aawatettaa. Nuuni deꞌuwaa wottaa woxxiyo wode, Yihoowanne Yesuusa nu soo asaappe aaruwan siiqana koshshees. (Maa. 10:37) SHin hegaa giyoogee, nu son nuuyyo deꞌiya aawatettaa nuuni xaasayi xeellana danddayoos giyoogaa gidenna. Qassi Xoossaanne Kiristtoosa nuuni ufayssanawu nu son nuussi deꞌiya aawatettaa polana koshshees. (1 Xim. 5:4, 8) Yaatiyo wode nu ufayttoos. Hegaa bollikka, azinaynne machchiyaa issoy issuwaa siiqiyoonne bonchchiyo wode, yelidaageeti bantta naata siiqiyoonne loohissiyo wode, qassi naati banttana yelidaageetuyyo azazettiyo wode so asay ufayttanaagaa Yihooway erees.—Efi. 5:33; 6:1, 4.

7. Son neeyyo deꞌiya aawatettaa waata polana danddayay?

⁷ Ha toohuwaa waata tookkana danddayay? Son neeyyo deꞌiya aawatettay ayba gidinkka ne qofan, wogan woy eranchchati yootiyooban ammanettiyoogaappe Geeshsha Maxaafay yootiyo loꞌꞌo zoriyan ammanetta. (Lee. 24:3, 4) Geeshsha Maxaafaa qofay deꞌiyo nu xuufeta loytta xannaꞌa. Geeshsha Maxaafay yootiyo maarata waati oosuwan peeshshanaakko ha xuufeti yootoosona. Leemisuwawu, Intte Soo Asay Ufayttana Danddayees giya broshureenne Merinawu Ufayttada Deꞌa! giya maxaafan timirtte 49ynne 50y aqo laggeta, yelidaageetanne yelagata maaddana danddayiya maarata yootees. b Son deꞌiya harati Geeshsha Maxaafay yootiyoobaa kaallana xayikkokka, neeni Geeshsha Maxaafay yootiyoobaa oosuwan peeshshanawu murtta. Neeni yaatikko, so asay goꞌettana, qassi Yihooway nena anjjana.—1 PHe. 3:1, 2.

8. Nu kuuyiyoobay nuna waati qohana danddayii?

⁸ Nu kuuyiyoobay kaalettiyoobaa. Yihooway nuuyyo dooriyo maataa immiis, qassi nuuni loꞌꞌobaa kuuyiyoogan ufayttanaadan koyees. Gidoppe attin, I nuuni kuuyido iitabaa gaasuwan gakkiya metuwaa teqqenna. (Gal. 6:7, 8) Hegaa gishshawu, nuuni balabaa doorido woy haasayido woykko oottido gishshawu iitabay nuna gakkana danddayees. Nuuni oottidobaa  gaasuwan nuna mooranchchadan xeellana danddayoos. SHin nu kuuyidobaa gaasuwan gakkanabaa eriyoogee nu nagaraa paaxanaadan, nu balaa giigissanaadaaninne zaarettidi hegaa mala balaa oottiyoogaappe naagettanaadan denttettana danddayees. Hegaadan oottiyoogee deꞌuwaa wottaa aggennan woxxanaadan nuna maaddana danddayees.

9. Neeni iitabaa kuuyikko waatana danddayay? (Misiliyaakka xeella.)

⁹ Ha toohuwaa waata tookkana danddayay? Neeni iitabaa kuuyikko waatana danddayay? Kasebaa laammana danddayennaagaa akeeka. Neeni likke gidiyoogaa bessanawu, woy harata ne balawu mooranchcha kessanawu maliyoogan ne wodiyaanne wolqqaa wurssoppa. Yaatiyoogaappe, ne balaa ammana, qassi haꞌꞌi neeni oottana danddayiyo ubbabaa ootta. Neeni oottido balabaa gaasuwan zilꞌꞌettikko, nena ziqqi oottada Yihoowa woossa, ne balaa ammana, qassi neeyyo atto gaanaadan A oychcha. (Maz. 25:11; 51:3, 4) Neeni qohido uray deꞌikko neeyyo atto gaanaadan oychcha, qassi koshshikko cimatu maaduwaa oychcha. (Yaaq. 5:14, 15) Ne balaappe tamaara, qassi hegaa zaarettada oottennan agganawu baaxeta. Neeni yaatikko, Yihooway neeyyo atto gaanaagaanne koshshiyaaban nena maaddanaagaa ammanettana danddayaasa.—Maz. 103:8-13.

10. Nuuni danddayiyoobaappe aarobaa oottanawu ubbatoo qoppiyoogee wolqqaama tooho gidiyoy aybissee? (Galaatiyaa 6:4)

¹⁰ Nuuni danddayiyoogaappe aarobaa oottanawu ubbatoo qoppiyoogaa. Nuna haratuura geeddarssiyoogee nuuyyo wolqqaama tooho gidana danddayees. (Galaatiyaa 6:4 nabbaba.) Nuuni nuna haratuura ubbatoo geeddarssikko, qanaatiyaageetanne keesettiyaageeta gidana danddayoos. (Gal. 5:26) Nuuni oottana danddayennaba gidikkonne, harati oottiyoobaa nuunikka oottanawu baaxetikko nuna qohana danddayoos. Qassi ‘koyiyoobay polettennan gamꞌꞌiyoogee azzanttiyaaba’ gidana danddayees; ubba qassi nuuni mule oottana danddayennabaa halchchiyoogee hegaappe aaruwan azzanttiyaaba. (Lee. 13:12) Nuuni hegaadan oottikko, keehi xalaliyo gishshawu deꞌuwaa wottaa loytti woxxana danddayokko.—Lee. 24:10.

11. Neeni danddayiyoogaappe aarobaa oottanawu ubbatoo qoppiyoogaa agganaadan nena aybi maaddana danddayii?

¹¹ Ha toohuwaa waata wottana danddayay? Yihooway neeppe koyiyoobaappe aarobaa oottanawu qoppoppa. Neeyyo baynnabaa neeni immanaadan I mule koyenna. (2 Qor. 8:12) Yihooway neeni oottidobaa haratuugaara geeddarssennaagaa ammanetta. (Maa. 25:20-23) Neeni kumetta shemppuwaappe haggaaziyoogaa, neeni ammanettiyoogaanne ne gencciyoogaa I xoqqu ootti xeellees. Cimatettaa, sahuwaa woy harabaa gaasuwan neeni haꞌꞌi oottana koyiyoogaa keenaa oottana danddayennaagaa nena ziqqi oottada akeeka. Barzzillaayaagaadan, neeni sahuwaa woy cimatettaa gaasuwan issi aawatettaa polana danddayennaba gidikko, he aawatettaa ekkoppa. (2 Sam. 19:35, 36) Muuseegaadan haratu maaduwaa ekka, qassi koshshiyo wode haratuyyo aawatettaa imma. (Kes. 18:21, 22) Neeni nena ziqqi oottikko, deꞌuwaa wottan nena daafurssana danddayiyaabaa oottanawu qoppakka.

12. Harati iitabaa kuuyin gakkiyaabawu nuuni oyshettiyoo? Qonccissa.

¹² Harati iitabaa kuuyin gakkiyaabawu nuuni oyshettoos giidi qoppiyoogaa. Nuuni haratuyyo kuuyana danddayokko; woy eti balabaa dooridoogaa gaasuwan gakkiyaabaappe ubbatoo eta ashshana danddayokko. Leemisuwawu, issi naꞌay woy naꞌiya Yihoowayyo haggaaziyoogaa agganawu kuuyana danddayoosona.  He kuuyidobay yelidaageeti keehi azzananaadan oottana danddayees. SHin bantta naꞌi iitabaa kuuyido gishshawu banttana mooranchchadan xeelliya yelidaageeti deexo toohuwaa tookkoosona. Hegee Yihooway eti tookkanaadan koyiyo tooho gidenna.—Roo. 14:12.

13. Issi naꞌi iitabaa kuuyiyo wode aaway woy aayyiyaa oottana danddayiyoobay aybee?

¹³ Ha toohuwaa waata wottana danddayay? Yihooway nu ubbawu koyidobaa dooriyo maataa immidoogaa hassaya. I asa ubbay koyidobaa dooranaadan paqqadiis. Awu haggaazanawu woy haggaazennan agganawu dooranakka danddayoos. Neeni nagaranchcha aawa woy aayo gidiyoogaa Yihooway erees; yaatiyo gishshawu, neeni danddayiyo ubbabaa oottanaadan I koyees. Ne naꞌi dooridoban I oyshetteesippe attin, ne oyshettakka. (Lee. 20:11) Neeni aawa woy aayo gidiyoogaadan ne mooridobaa ubbatoo qoppennan aggakka. Yaatikko, nena qofissidabaa Yihoowayyo yoota, qassi neeyyo atto gaanaadan A oychcha. Neeni kasebaa giigissananne hanidabaa laammana danddayennaagaa I erees. Qassi I ne naꞌi zeridobaa cakkennaadan oottana mala neeppe naagenna. Ne naꞌi Yihoowakko simmanawu bawu danddayettida ubbabaa oottikko, I hammu giidi ekkanaagaa hassaya.—Luq. 15:18-20.

14. Ubbatoo nuna mooranchchadan xeelliyoogee nuuni wottana koshshiyo tooho gididoy aybissee?

¹⁴ Ubbatoo nuna mooranchchadan xeelliyoogaa. Nuuni nagaraa oottikko nuna mooranchchadan xeelliyoogee bessiyaaba. SHin, ubbatoo nuna mooranchchadan xeellanaadan Yihooway koyenna. Hegee nu wottana bessiya tooho. Nuuni nuna ubbatoo mooranchchadan xeelliyaakkonne waati erana danddayiyoo? Nuuni nu nagaraa paaxikko, nu nagaraappe simmikko, qassi hegaa zaarettidi oottennan agganawu baaxetikko, Yihooway nuuyyo atto giyoogaa ammanettana danddayoos. (Oos. 3:19) Nuuni hegeeta ootti simmidi nuna ubbatoo mooranchchadan xeellanaadan Yihooway koyenna. Ubbatoo nuna mooranchchadan xeelliyoogee nuna keehi qohiyoogaa I erees. (Maz. 31:10) Nuuni keehi unꞌꞌettikko,  nu deꞌuwaa wottan hidootaa qanxxana danddayoos.—2 Qor. 2:7.

15. Neeni nena ubbatoo mooranchchadan xeellikko aybi maaddana danddayii? (1 Yohaannisa 3:19, 20) (Misiliyaakka xeella.)

¹⁵ He toohuwaa waata wottana danddayay? Nena ubbatoo mooranchchadan xeellikko Xoossay tumuppe ‘atto giyoogaa’ qoppa. (Maz. 130:4) Nagaraappe tumuppe simmiyaageetuyyo I atto giyo wode, “Taani . . . eta nagaraakka naa77antto hassayikke” yaagidi qaalaa geliis. (Erm. 31:34) Hegee Yihooway neeyyo atto giido nagaraa zaarettidi mule qoppennaagaa bessiyaaba. Hegaa gishshawu, ne nagaraa gaasuwan nena gakkiya metoy I neessi atto gibeennaagaa bessiyaaba gaada qoppoppa. Qassi gubaaꞌiyan deꞌiya issi issi aawatettay neeppe halido gishshawu yiillotoppa. Yihooway ubbatoo ne nagaraa qoppenna, qassi neenikka qoppana koshshenna.—1 Yohaannisa 3:19, 20 nabbaba.

16. Nuuni wottanchcha gidiyoogaadan ay hassayana koshshii?

¹⁶ Nuuni deꞌuwaa wottaa woxxiyo wode ‘woytuwaa ekkanawu woxxana’ bessees. (1 Qor. 9:24) Nuuni tookkana koshshiyo toohuwaanne wottana koshshiyo toohuwaa giddon deꞌiya dummatettaa akeekikko, yaatana danddayoos. Nuuni tookkana bessiyaanne wottana bessiya amaridabata ha huuphe yohuwan beꞌida. SHin harabatikka deꞌana danddayoosona. ‘Muussay, ushshaynne aqossi hiriggiyoobay’ nuussi tooho gidana danddayiyoogaa Yesuusi yootiis. (Luq. 21:34) Hageenne hara xiqiseti neeni deꞌuwaa wottaa woxxiyo wode giigissana koshshiyaabaa akeekanaadan nena maaddana danddayoosona.

17. Nuuni deꞌuwaa wottan woytuwaa ekkanaagaa ammanettana danddayiyoy aybissee?

¹⁷ Yihooway nuussi koshshiya wolqqaa immiyo gishshawu, nuuni deꞌuwaa wottan woytuwaa ekkanaagaa ammanettana danddayoos. (Isi. 40:29-31) Hegaa gishshawu, loytta woxxiyoogaa aggoppa. Sinttappe ekkana woytuwaa demmanawu minni woxxida, kiitettida PHawuloosa leemisuwaa kaalla. (Pili. 3:13, 14) Ne gishshaa ooninne woxxana danddayennaba gidikkonne, Yihooway maaddin neeni wottaa wurssana danddayaasa. Yihooway neeni ne toohuwaa tookkanaadaaninne koshshenna toohuwaa wottanaadan maaddana danddayees. (Maz. 68:19) Yihooway nena maaddin, neeni gencca woxxada woytuwaa ekkana danddayaasa!