Yesuusi hayqqanaappe guuttaa kasetidi Mazamure 22:1n deˈiya Daawiti haasayidobaa yootidoy aybissee?

Yesuusi hayqqanaappe guuttaa kasetidi Maatiyoosa 27:46n hagaadan giis: “Ta Xoossau, ta Xoossau, tana aissi aggadii?” Yesuusi hegaadan giido wode, Daawiti yootido Mazamure 22:1n odettidabaa poliis. (Mar. 15:34) Yesuusi hegaa yootidoy hidootaa qanxxido gishshaassa woy guutta wodiyawu awu ammanoy shuggido gishshaassa giidi kuuyiyoogee bala. Yesuusi I hayqqana koshshidoy aybissakko loytti akeekido gishshawu I hayqqanawu eeno giis. (Maa. 16:21; 20:28) I hayqqiyo wode, Yihooway A naagiyoogaa aggana koshshiyoogaakka eriis. (Iyy. 1:10) Hegaappe denddidaagan, Yesuusi keehi waayettidi hayqqikkonne ubbatoo ammanettidi deˈiyoogaa bessanaadan, Yihooway A naagiyoogaa aggiis.—Mar. 14:35, 36.

Yaatin, Yesuusi ha mazamuriyaa yootidoy aybissee? Nuuni hegaa wurssi erana xayikkonne, gaaso gidana danddayiya amaridabaa ane beˈoos. *

Yesuusi hegaa yootiyoogan Yihooway A hayquwan kelttiyaa gelennaagaa qonccissennan waayi aggana. Yesuusi Yihoowa maadoy baynnan wozuwaa qanxxana koshshiis. I asa gidiyo gishshawu “asa ubbau haiqqana” koshshiis.—Ibr. 2:9.

Yesuusi he mazamuriyaappe amaridabaa yootiyoogan harati kumetta mazamuriyaa qoppanaadan koyidee? He wode Ayhuda asay mazamuretuppe daruwaa hassayiyoogee erettidaba.  Eti mazamuriyaa danttuwaappe issuwaa siyiyo wode, kumetta mazamuriyaa sohuwaara hassayoosona. Yesuusi qoppidoy hegaa gidiyaakko, I hayqqiyo wode hananabata yootiya ha mazamuriyan deˈiya daro hiraagata bana kaalliya Ayhudati hassayanaadan maaddana. (Maz. 22:7, 8, 15, 16, 18, 24) Qassi he mazamuriyaa wurssetta danttoti Yihoowa sabboosona, qassi I saˈa ubbaa Haariyoogaa yootoosona.—Maz. 22:27-31.

Yesuusi Daawiti giidobaa yootidoogee, I geeshsha gidiyoogaa qonccissii? Yesuusi hayqqanaappe kase, Sanhediriine shilootay wordduwan A mootiis; yaatidi I Xoossaa cayiis giidi mooranchchadan A bolli pirddiis. (Maa. 26:65, 66) Sanhediriine shilootay qammi eesuwan shiiqidi he wode deˈiya higgiyawu azazettennaagaa bessiya ogiyan pirddiis. (Maa. 26:59; Mar. 14:56-59) “Ta Xoossau, ta Xoossau, tana aissi aggadii?” giidi Yesuusi oychchido wode, I hayqqanaadan oottiya moorobaa aybanne oottibeennaagaa qonccissanawu gidennan aggenna.

Ha mazamuriyaa xaafida Daawiti waayettanaadan Yihooway paqqadidoogee, I Daawita nashshiyoogaa aggidoogaa bessiyaaba gidennaagaa harata hassayissanawu Yesuusi yootidee? Daawita oyshay I Xoossaa ammaniyo ammanoy shuggidoogaa bessiyaaba gidenna. I he oyshaa oychchi simmidi, Yihooway ba asaa ashshana danddayiyoogaanne A ubbatoo anjjanaagaa ammanettiyoogaa yootiis. (Maz. 22:23, 24, 27) Qassi, “Daawita na7ai” Yesuusi mittaa bolli barchchetikkonne, hegee Yihooway an ufayttiyoogaa aggidoogaa bessiyaaba gidenna.—Maa. 21:9.

Yesuusi I ammanettidaagaa gidiyoogaa bessana mala Yihooway A naagiyoogaa aggidoogan keehi azzanidoogaa yootidee? Yihooway ba Naˈay waayettanaadaaninne hayqqanaadan koyro halchchibeenna. Addameenne Hewaana makkali simmin hegaadan oottana koshshiis. Yesuusi aynne mooribeennaba gidikkonne, Seexaanay denttido oyshaa zaaranawunne asaappe halidabaa zaaridi asay demmana mala wozuwaa waagaa qanxxanawu waayettananne hayqqana koshshiis. (Mar. 8:31; 1 PHe. 2:21-24) Hegee hanana danddayiyoy Yihooway Yesuusa deˈuwaa naagiyoogaa guutta wodiyawu aggiyoogaa xallaana.

Yesuusi I mittaa bolli barchchetidi hayqqanaadan Yihooway paqqadido gaasuwaa bana kaalliyaageeti yuushshi qoppanaadan oottanawu koyidee? * Yesuusi danobaa oottida uradan mittaa bolli barchchetidi hayqqiyoogee darotussi xube gidanaagaa erees. (1 Qor. 1:23) Yesuusa kaalliyaageeti I hayqqiyo waanna gaasuwaa loytti qoppikko, hegaa birshshettaa eti akeekana. (Gal. 3:13, 14) Yaatikko, eti I makkalanchcha gidennaagaanne eta Ashshiyaagaa gidiyoogaa erana.

Yesuusi hegaa yootido gaasoy ayba gidikkonne, I mittaa bolli barchchetidi hayqqiyoogan Yihoowa sheniyaa polidoogaa erees. Yesuusi he mazamuriyaa yootidi guuttaa takkidi hagaadan giis: “Polettiis.” (Yoh. 19:30; Luq. 22:37) Ee, Yihooway Yesuusa maaddiyoogaa guutta wodiyawu aggidoogee, Yesuusi saˈan oottanaadan kiitettidobaa muleera polanaadan oottiis. Hegee “Muuse higgiyan, hananabaa yootiyaageetu maxaafaaninne Daawita mazamuriyaa maxaafan” A xeelliyaagan xaafettida ubbabaa I polanaadankka oottiis.—Luq. 24:44.