1-2. Wozoy aybee, qassi hegee nuussi koshshiyoy aybissee?

WOTTIYOOBI BAYNNA asa gidida Addaamee nagaraa oottido wode, merinawu deˈiyo hidootay A xallaappe gidennan, A zariyaappekka haliis. Addaame oottidobawu gaasoyiyoobi baawa. I nagaraa oottanawu dooriis. SHin A zerettay ay balanne oottibeenna; qassi Addaamee nagaraa oottanaadan eti gaaso gidokkona. (Roo. 5:12, 14) Addaamee ba oottido nagaraa gishshawu hayqqana koshshiis. Gidoppe attin, Addaamee naati merinawu deˈanaadan Yihooway oottana danddayiyoobay deˈii? Ee, deˈees! Addaamee nagaraa ootti simmin takkennan, Yihooway miilooniyan qoodettiya Addaame zerettata nagaraappenne hayquwaappe laˈa waati kessanaakko bessiis. (Doo. 3:15) Yihooway ba keerido wodiyan, ba Naˈay ‘darota wozanawu ba shemppuwaa immanaadan’ saluwaappe kiittiis.—Mar. 10:45; Yoh. 6:51.

² Wozoy aybee? Wozoy Addaameppe halidabaa zaaranawu Yesuusi qanxxido waagaa gidiyoogaa Giriikettuwan Xaafettida Geeshsha Maxaafay qonccissees. (1 Qor. 15:22) Nuuyyo wozoy koshshiyoy aybissee? Yihooway suure pirddawu kessido Higgee deˈuwaa gishshaa deˈuwaa immanaadan yootiyo gishshaassa. (Kes. 21:23, 24) Wottiyoobi baynna deˈoy Addaameppe haliis. Xoossaa suure pirddaa polanawu Yesuusi wottiyoobi baynna ba deˈuwaa immiis. (Roo. 5:17) Hegaa gishshawu, wozuwan ammaniya ubbawu I “Merinaa Aawaa” gidees.—Isi. 9:6; Roo. 3:23, 24.

3. Yohaannisa 14:31⁠nne 15:13⁠y yootiyoogaadan, Yesuusi wottiyoobi baynna ba deˈuwaa yarshshanawu eeno giidoy aybissee?

³ Yesuusi saluwan deˈiya ba Aawaanne nuna keehi siiqiyo gishshawu, ba deˈuwaa yarshshanawu eeno giis. (Yohaannisa 14:31; 15:13 nabbaba.) Yesuusi Yihoowanne nuna keehi siiqido gishshawu, ba deˈo laytta ubban ammanettidi deˈanawunne ba Aawaa sheniyaa oottanawu murttiis. Yesuusi  hayqqana gakkanaashin ammanettidi deˈiyoogan hegaadan oottiis. Hegaappe denddidaagan, Yihooway asawunne saˈawu koyro halchchido halchchoy polettana. Yesuusi hayqqanaappe kase keehi barchchetanaadan Xoossay ayssi paqqadidaakko nuuni ha huuphe yohuwan beˈana. Qassi Geeshsha Maxaafaa xaafidaageetuppe wozuwaa loytti nashshida issuwaabaa qanttan beˈana. Wurssettan, wozuwaa gishshawu keehi galatiyoogaa nuuni waati bessana danddayiyaakko, qassi Yihoowaynne Yesuusi nuussi giigissido yarshshuwaa wozanappe nashshiyoogaa waati bessana danddayiyaakkokka beˈana.

4. Yesuusi waani hayqqidaakko qonccissa.

⁴ Yesuusi hayqqanaappe kase gallassi aybi hanidaakko qoppa. I daro kiitanchchati bana naaganaadan eta maaduwaa oychchana danddayees shin oychchibeenna. I Rooma wotaaddarati bana oyqqanaadaaninne shocanaadan eeno giis. (Maa. 26:52-54; Yoh. 18:3; 19:1) Eti A bollaa keehi qohiya lissuwan garafidosona. Guyyeppe, A zokkuwaara suuttay goggishin keehi deexxiya mittaa toossidosona. Yesuusi he mittaa tookkidi eti A woriyo sohuwaa gakkanawu efaanawu daafuriis. SHin sohuwaara Rooma wotaaddarati issi bitanee A maaddanaadan azazidosona. (Maa. 27:32) Yesuusi hayqqana sohuwaa gakkido wode, wotaaddaarati mittan kaqqidi A kushiyaanne tohuwaa misimaariyan xishidosona. Yesuusa kaqqido wode, misimaariyan xishin masunxxida sohuwaa Yesuusa bollaa deexoy duge dafees. A laggeti azzaniyaabanne A aayyiyaa yeekkiyaaba gidikkonne, Ayhuda halaqati Yesuusa bolli qilliccoosona. (Luq. 23:32-38; Yoh. 19:25) Yesuusi unddenna saatiyawu waayettiis. A wozanaynne goofinee keehi daafurido gishshawu, I shemppanawu keehippe metootiis. Yesuusi I ammanettidi deˈidoogaa eriis; qassi I hayqqanaappe guuttaa kasetidi wurssetta woosaa Yihoowa woossiis. I ba huuphiyaa ziqqi oottidi ba deˈuwaa immiis. (Mar. 15:37; Luq. 23:46; Yoh. 10:17, 18; 19:30) I waayettiiddi takkidi kawushsha hayqo hayqqidoogee tuma!

5. Yesuusi hayqqido ogiyaappe aaruwan I unˈˈettanaadan oottidabay aybee?

⁵ Yesuusi hayqqido ogee I waayettanaadan oottida harabaappe deexxiyaaba gidenna. Eti A woranawu mootido mootuwawu gaaso oottidoban keehi unˈˈettiis. Xoossaa woy A sunttaa bonchchennaagaanne cayiyaagaa giidi Yesuusa wordduwan mootidosona. (Maa. 26:64-66) Yesuusi Xoossaa bonchchenna giidi asay mootido gishshawu keehi unˈˈettiis; qassi I hagaa mala ogiyan kawuyanaadan ba Aaway paqqadenna giidi qoppiis. (Maa. 26:38, 39, 42) Yihooway ba siiqiyo Naˈay waayettidi hayqqanaadan paqqadidoy aybissee? Heezzu gaasota ane beˈoos.

6. Yesuusi mittaa bolli kaqettidi barchchetana koshshidoy aybissee?

⁶ Koyruwan, Yesuusi Ayhudata qanggettaappe laˈa kessanawu mittan kaqettana koshshiis. (Gal. 3:10, 13) Eti Xoossaa Higgiyawu azazettanawu qaalaa gelidi azazettibeenna gishshawu qanggettidosona. Qassi, eti Addaame zare gidiyo gishshawu hayqqana koshshikkonne, he qanggettaappe laˈa kiyana danddayokkona. (Roo. 5:12) Issi uri hayquwaa pirddissiya nagaraa oottikko hayqqana koshshiyoogaa Xoossay Israaˈeelatussi immido Higgee qonccissees. Hegaappe simmin, A anhay mittan kaqettana danddayees. * (Zaa. 21:22, 23; 27:26) Yesuusi mittan kaqettido gishshawu, Ayhudati he qanggettaappe laˈa kiyana danddayidosona; qassi eti A ixxiyaaba gidikkonne A yarshshoy eta maaddana danddayees.

7. Xoossay ba Naˈay waayettanaadan paqqadido naaˈˈantto gaasoy aybee?

 ⁷ Xoossay ba Naˈay waayettanaadan paqqadido naaˈˈantto gaasuwaa beˈa. I Yesuusi Qeese Ubbatu Halaqaa gidanaadan loohissiis. Wolqqaama paacee gakkishin Xoossawu azazettiyoogee ay keena metiyaabakko Yesuusi beˈiis. I keehippe unˈˈettido gishshawu, Xoossay maaddana mala “keehi yeekkidinne afuxxidi” woossiis. Yesuusi keehi unˈˈetido gishshawu, nuuyyo koshshiyaabaa akeekees; qassi nuuni “paacettiyo” wode “[nuna] maaddanau danddayees.” “Nuuni daafuriyo wode nuuyyo qarettanau” danddayiya maariya Qeese Ubbatu Halaqay nuna haaranaadan Yihooway sunttido gishshawu keehi galatoos!—Ibr. 2:17, 18; 4:14-16; 5:7-10.

8. Xoossay ba Naˈay keehi paacettanaadan paqqadido heezzantto gaasoy aybee?

⁸ Heezzanttuwan, keehi koshshiya oyshaa zaaranawu Yesuusi keehi waayettanaadan Yihooway paqqadiis: Wolqqaama paacee gakkishinkka asi Yihoowawu ammanettidi deˈana danddayii? Seexaanay ay asinne ammanettidi deˈana danddayenna gees! I asay Xoossawu oottiyoy ba goˈˈaassa giidi yootees. Qassi Addaameegaadan etikka Yihoowa siiqokkona giidi qoppees. (Iyy. 1:9-11; 2:4, 5) Yesuusi ammanettidi deˈanaagaa Yihooway eriyo gishshawu ba Naˈay keehi paacettanaadan paqqadiis. Yesuusi ammanettidi deˈiyoogan Seexaanay worddanchcha gidiyoogaa bessiis.

9. Kiitettida Yohaannisi nuussi aybin leemiso gidii?

⁹ Wozuwaabaa tamaarissiyoogan daro Kiristtaanetu ammanoy minniis. Yedetay deˈishinkka eti aggennan sabbakidosonanne bantta deˈo laytta ubban daro paaceta genccidosona. Kiitettida Yohaannisa hanotaa qoppa. I geella 60ppe dariya layttawu Kiristtoosabaanne wozuwaabaa ammanettidi sabbakiis. Awu layttay 100 heera gidikkonne, Roomaa kawotettay A keehi iita asa gi qoppidi Paaximo giyo haruuruwan qachchiis. I ay bala oottidee? I “Xoossaa qaalaa yootido gishshaunne Yesuusabaa markkatido gishshau” qashettiis. (Ajj. 1:9) Yohaannisi ammanuwaaninne genccan keehi loˈˈo leemiso.

10. Yohaannisi xaafidobati I wozuwaa gishshawu galatidoogaa waati bessiyoonaa?

¹⁰ Ayyaanay kaalettin Yohaannisi xaafido ba dabddaabbiyan I Yesuusa wozanappe siiqiyoogaanne wozuwaa gishshawu galatiyoogaa qonccissiis. I wozuwaabaa woy wozoy demissana danddayiyo loˈˈobaa 100ppe dariya sohuwan yootiis. Leemisuwawu, Yohaannisi hagaadan giis: “Ooninne nagaraa oottikko, Aawaa matan nuuyyo gaannatiya Yesuus Kiristtoosi, Xilloi, de7ees.” (1 Yoh. 2:1, 2) Yesuusabaa markkattiyoogee keehi koshshiyaaba gidiyoogaakka Yohaannisi xaafidobati qonccissoosona. (Ajj. 19:10) Yohaannisi wozuwaa gishshawu keehi galatidoogee qoncce. Nuunikka hegaadan galatiyoogaa waati bessana danddayiyoo?

11. Paaciyaa eqettanaadan nuna aybi maaddana danddayii?

¹¹ Nagaraa oottanaadan paacciyaaba eqetta. Nuuni wozuwaa gishshawu keehi galatikko, hagaadan qoppokko: ‘Taani paacettiyo wode nagaraa oottennan agganawu baaxetana koshshenna. Taani nagaraa oottada atto gaanaadan oychchana danddayays.’ SHin, nuuni balabaa oottanaadan paacettiyo wode hagaadan gaana danddayoos: ‘CHii! Yihoowaynne Yesuusi taayyo ha ubbabaa oottido gishshawu, taani hagaa mala iitabaa mule oottikke.’ Hegaara maayettiya ogiyan Yihooway nuussi minotettaa immana mala, A hagaadan  woossana danddayoos: ‘Tana paaciyan gelissoppa.’—Maa. 6:13.

12. Koyro Yohaannisa 3:16-18⁠n deˈiya zoriyaa waati oosuwan peeshshana danddayiyoo?

¹² Ne ishanttanne michchontta siiqa. Nuuni siiqiyo wode wozuwaa gishshawu galatiyoogaakka bessoos. Aybissi? Yesuusi ba deˈuwaa nu xallawu gidennan, nu ishanttussinne michchonttussikka immido gishshataassa. Yesuusi etawu hayqqanawu eeno giis. Yaatiyo gishshawu, I eta keehi siiqiyoogee qoncce. (1 Yohaannisa 3:16-18 nabbaba.) Nuuni nu ishanttanne michchontta siiqiyoogaa etawu oottiyooban bessoos. (Efi. 4:29, 31–5:2) Leemisuwawu, eti sahettiyo wode woy meretay gattiyo daafaa gujjin eti wolqqaama metota gencciyo wode eta maaddoos. Gidoppe attin, nu mala Kiristtaanee nuna yilloyiyaabaa oottiyo woy haasayiyo wode waatana koshshii?

13. Nuuni atto gaana koshshiyoy aybissee?

¹³ Neeni issi ishawu woy michcheessi atto gaanawu issi issitoo metoota eray? (Wog. 19:18) Yaatikko, ha zoriyaa oosuwan peeshsha: “Issoi issuwaabaa danddayite; ooninne ba laggiyaa bolli hanqqettidobai de7ikko, issoi issuwau atto yaago. “[Yihooway, NW]” intteyyo atto giidoogaadan, inttekka atto giite.” (Qol. 3:13) Nuuni nu ishawu woy michcheessi atto giyo wode ubban, wozuwaa gishshawu saluwan deˈiya nu Aawaa tumuppe galatiyoogaa bessoos. Nuuni Xoossay immido ha imotaa gishshawu ubbatoo wozanappe A waani galatana danddayiyoo?

14. Nuuni wozuwaa kaseppe aaruwan xoqqu oottidi xeellana danddayiyo issi ogee aybee?

¹⁴ Wozuwaa gishshawu Yihoowa galata. Layttay 83 gidido, Hindden deˈiya Joˈaano giyo cima michchiyaa hagaadan gaasu: “Ta woosan ubba galla wozuwaabaa qonccissiyoogeenne hegaa gishshawu Yihoowa galatiyoogee keehi koshshiyaaba gaada qoppays.” Ubba galla neeni woossiyo wode, ne mooridobaa Yihoowayyo yootada I atto gaanaadan oychcha. Neeni gita nagaraa oottikko, cimatu maadoy neessi koshshees. Eti neeni yootiyoobaa ezggidi Xoossaa Qaalaappe siiquwan nena zorana. Eti nenaara woossana, qassi neeni Yihoowaara zaarettada dabbotana mala Yihooway neessi atto gaanaadan oychchana.—Yaaq. 5:14-16.

15. Nuuni wozuwaabaa takki giidi nabbabananne wotti dentti qoppana koshshiyoy aybissee?

¹⁵ Wozuwaabaa wotta dentta qoppa. Layttay 73 gidido Rajamano giyo cima michchiyaa hagaadan  gaasu: “Taani Yesuusi waayettidoogaa nabbabiyo wode ubban, ta ayfiyan afuttay yooliyoolees.” Xoossaa Naˈay keehi waayettidoogaa qoppiyo wode neenikka azzanennan waaya aggana. SHin neeni Yesuusa yarshshuwaabaa loyttada wotta dentta qoppikko, anne A Aawaa kaseppe aaruwan siiqana. Wozuwaabaa wotta dentta qoppanaadan nena maaddana mala, ha huuphe yohuwaa loytta xannaˈiyoogee loˈˈo.

16. Wozuwaabaa harata tamaarissiyoogee nuna waati maaddana danddayii? (Koyro sinttan deˈiya misiliyaa xeella.)

¹⁶ Wozuwaabaa harata tamaarissa. Nuuni wozuwaabaa haraatuyyo yootiyo wode ubban, kaseegaappe aaruwan wozuwaa nashshana. Yesuusi nuussi hayqqidoy aybissakko haratussi yootanawu nuna maaddiya keehi loˈˈo xuufetinne biidoti deˈoosona. Leemisuwawu, Xoossaappe Yiya Mishiraachuwaa! giya brooshuriyaa timirtte 4 goˈettana danddayoos. He timirttiyaa huuphe yohoy, “Yesuusi Kiristtoosi Oonee?” yaagees. Woy Geeshsha Maxaafay Nuna Ay Tamaarissii? giya maxaafan shemppo 5 goˈettana danddayoos. He shemppuwaa huuphe yohoy, “Wozoy Xoossay Immido Ubbabaappe Aadhdhiyaagaa” yaagees. Qassi layttan layttan Yesuusa Hayquwaa Hassayiyo Baalaa bonchchanawu shiiqiyoogaaninne haratikka nunaara shiiqanaadan loytti shoobbiyoogan nuuni wozuwaa kaseegaappe aaruwan nashshana danddayoos. Yihooway nuuni A Naˈaabaa harata tamaarissiyo gita aawatettaa nuussi immiis!

17. Wozoy Xoossay asawu immido imota ubbaappe aadhdhiya imota gidiyoy aybissee?

¹⁷ Nuuni wozuwaa gishshawu Yihoowa ubbatoo wozanappe galatanaadan oottiya gaasoy deˈiyoogee qoncce. Nuuni nagaranchcha gidikkonne, wozuwaa gaasuwan Yihoowaara dabbotaa minttana danddayoos. Wozoy Dabloosa oosoy muleera xayanaadan oottana. (1 Yoh. 3:8) Wozuwaa gaasuwan, saˈawu Yihooway koyro halchchidobay polettana. Kumetta saˈay gannate gidana. Nenaara gayttiya ubbay Yihoowa siiqiyaanne ayyo haggaaziyaagaa gidana. Xoossay asawu immido ay imotappenne aadhdhiya imota gidida wozuwaa gishshawu ubbatoo Yihoowaa galatiyaageeta gidoos!