1. Yihooway ba asaabaa ay akeekii?

XOOSSAA YIHOOWAY “ba asan ufaittees.” (Maz. 149:4) Hegee nuna keehi ufayssees! Yihooway nu loˈˈo eeshshaa erees; nuuni ay mala loˈˈo asa gidanaakko I akeekees, qassi aara dabbotanaadan nuna maaddees. Nuuni ayyo ammanettidi deˈikko, I merinawu nu dabbo gidana!—Yoh. 6:44.

2. Issoti issoti banttana Yihooway siiqees giidi ammananawu metootiyoy aybissee?

² Issoti issoti hagaadan gaana danddayoosona: ‘Yihooway ba asaa citan siiqiyoogaa erays, shin Yihooway tana siiqiyoogaa aybin ammanettana danddayiyaanaa?’ Issi asi hegaadan oychchanaadan oottana danddayiyaabay aybee? Oksaana * naatettan keehi waayettaasu. A hagaadan gaasu: “Taani xammaqettido wodenne aqinye gidada haggaaziyoogaa doommido wode keehi ufayttaas. SHin 15 layttappe guyyiyan, naatettan tana gakkida iitabaa hassayiyoogaa doommaas. Yihooway tanan ufayttiyoogaa aggiis, qassi taani A siiqoy bessiyo asa gidikke gaada qoppaas.” Yuˈo giyo aqinye michchiyookka naatettan daro metoy gakkiis. A hagaadan gaasu: “Taani Yihoowa ufayssanawu koyido gishshawu, ta deˈuwaa ayyo sheedhdhaas. SHin I tana mule siiqana danddayenna gaada qoppaas.”

3. Nuuni ha huuphe yohuwan ay beˈanee?

³ Ha ammanettida Kiristtaanetuugaadan, neeni Yihoowa wozanappe siiqikkokka, I nena siiqiyoogaa sirana danddayaasa. I neessi tumuppe qoppiyoogaa neeni ammanettana koshshiyoy aybissee? Qassi neeni Yihooway tana siiqenna gaada qoppiyo wode, nena aybi maaddanee? Ha oyshatu zaarota ane beˈoos.

4. Yihooway nuna siiqiyoogaa siriyoogee qohiyaaba gidiyoy aybissee?

⁴ Siiqoy oosuwawu denttettiya wolqqaamaba. Yihooway nuna siiqiyoogaanne maaddiyoogaa ammanettiyoogee, nuuni deˈuwan metoy gakkishinkka ayyo kumetta wozanaappe haggaazanaadan denttettees. SHin Xoossay nuussi qoppiyoogaa nuuni sirikko, nu “wolqqai guutta” gidana. (Lee. 24:10) Qassi nuuni hidootaa qanxxiyo wodenne Xoossay nuna siiqenna giidi qoppiyoogaa doommiyo wode, Seexaanay nuna qohennaadan eqettana danddayokko.—Efi. 6:16.

5. Xoossay banttana siiqenna giidi qoppida issi issi ishatinne michchoti waanidonaa?

⁵ Ha wodiyan, amarida Kiristtaaneti siriyoogaa doommidi, ayyaanaaban shuggidosona. Jemisa giyo gubaaˈe cimay hagaadan giis: “Taani Beeteelen oottaysinne kare biittaa qaalaa goˈettiya gubaaˈiyan ufayssan haggaazays, shin Yihooway ta yarshshuwaa ekkaneeshsha gaada qoppaas. Issi wode, haray attoshin Yihooway ta woosaa siyiyoogaa siraas.” Qassi ubba wode haggaaziya Eva hagaadan gaasu: “Yihooway nuna siiqenna giidi qoppiyoogee keehi qohiyoogaa akeekaas; ayssi giikko, hegee nuuni Yihoowawu haggaazanawu oottiyo ubbabaa qohees. Xoossawu oottanawu koyiyoogaanne Yihoowawu haggaaziyoogan ufayttiyoogaa aggoos.” Ubba wode aqinyeenne gubaaˈe cima gidida Maykili hagaadan giis: “Issi asi baassi Yihooway qoppiyoogaa ammanana xayikko, appe haakki haakki bees.”

6. Nuuni Xoossay nuna siiqenna giidi qoppiyoogaa doommiyo wode, ay oottana bessii?

⁶ Yihooway nuna siiqenna giidi qoppiyoogee ayyaanaaban ay keena qohiyaabakko ha hanotati qonccissoosona. SHin Xoossay nuna siiqiyoogaa nuuni siriyoogaa doommikko, ay oottana koshshii? Hegaadan qoppiyoogaa sohuwaara aggana koshshees! He ‘woppaa diggiya qofaa’ aggada ‘ne wozanaanne ne qofaa nagana Xoossaa sarotettaa’ demmanaadan Yihooway maaddana mala oychcha. (Maz. 139:23, NW; tohossa qofaa; Pili. 4:6, 7) Qassi hegaadan qoppiyay ne xalla gidennaagaa hassaya. Ammanettida hara ishatinne michchotikka iita qofaa agganawu baaxetiiddi deˈoosona. Beni wode deˈida Yihoowa ashkkaratikka hegaa mala qofaa agganawu baaxetidosona. Kiitettida PHawuloosa hanotaappe nuuni tamaarana danddayiyoobaa ane beˈoos.

7. PHawuloosa gakkida metoti aybee?

⁷ Neessi keehi daro aawatettay deˈiyo gishshawu, oottana koshshiya ubbabaa oottana danddayennabadan issi issitoo qoppay? Yaatikko, PHawuloosa hanotaa neeni akeekana. I issuwaa xallawu gidennan, “woosa keetta ubbau” hirggiis. (2 Qor. 11:23-28) Ufayssaa diggiya harggee nena sakkii? Issi metoy PHawuloosa keehi wayssiis. Hegee saho gidennan aggenna, qassi hegee agganaadan I keehi koyiis. (2 Qor. 12:7-10) Neeni baliyooban hidootaa qanxxay? PHawuloosikka issi issitoo hegaadan haniis. I suurebaa oottanawu ubbatoo baaxetana koshshido gishshawu, bana ‘ufayssi baynna asa’ yaagiis.—Roo. 7:21-24.

8. Dumma dumma metoti gakkishinkka genccanaadan PHawuloosa aybi maaddidee?

⁸ PHawuloosi ha meto ubbay gakkishin genccana koshshikkonne, I aggennan Yihoowawu oottiis. Yaatanawu I wolqqaa awuppe demmidee? I ba balaa loytti erikkonne, wozuwaa mintti ammanees. Yesuusi “[bana] ammaniya ubbai merinaa de7uwaa [ekkana]” giidi qaalaa gelidoogaa I erees. (Yoh. 3:16; Roo. 6:23) Ee, PHawuloosi wozuwaa ammaniyaageetuppe issuwaa. Gita nagaraa oottidaageetikka bantta nagaraappe simmikko, Yihooway etawu atto gaanawu keehi koyiyoogaa PHawuloosi ammanees.—Maz. 86:5.

9. PHawuloosi Galaatiyaa 2:20n yootidobaappe ay tamaariyoo?

⁹ PHawuloosi ba gishshawu Yesuusi hayqqanaadan Xoossay A kiittidoogaa ammaniyo gishshawu, bana Xoossay keehi siiqiyoogaa erees. (Galaatiyaa 2:20 nabbaba.) He xiqisiyaa wurssettan deˈiya minttettiya qofaa akeeka. PHawuloosi hagaadan giis: ‘Xoossaa naˈay tana siiqidi, ta gishshawu ba huuphiyaa immiis.’ PHawuloosi, ‘Taani keehi iita asa gidiyo gishshawu Xoossay tana siiqana danddayenna’ giidi qoppibeenna. I, ‘Yihooway ta ishantta siiqiyo gaasuwaa akeekays, shin I tana siiqana danddayenna’ giidikka qoppibeenna. PHawuloosi Roomen deˈiya Kiristtaanetussi hagaadan giis: “Nuuni biron nagaranchcha gididi de7ishin, Kiristtoosi nu gishshau haiqqiis.” (Roo. 5:8) Xoossay nuna siiqennaadan diggana danddayiyaabi baawa!

10. Roome 8:38, 39⁠ppe ay tamaariyoo?

¹⁰ Roome 8:38, 39 nabbaba. PHawuloosi Xoossaa siiqoy ay keena wolqqaamakko erees. I, “Xoossaa siiquwaappe nuna shaakkanau” danddayiyaabi mule baynnaagaa xaafiis. Yihooway Israaˈeelata keehi danddayidoogaa  PHawuloosi erees. I bana Yihooway waati maaridaakkokka erees. PHawuloosi qoppidobaa hagaadan gaana danddayoos: ‘Yihooway ba Naˈaa ta gishshawu hayqqanaadan kiittidaashin, I tana siiqiyoogaa siranaadan oottiyaabi aybi deˈii?’—Roo. 8:32.

11. PHawuloosi 1 Ximootiyoosa 1:12-15n odettidaagaa mala nagaraa oottikkonne, I bana Xoossay siiqiyoogaa ammanettidoy aybissee?

¹¹ Koyro Ximootiyoosa 1:12-15 nabbaba. PHawuloosi I Kiristtaane gidanaappe kase oottidobaa qoppiyo wode, keehi zilˈˈettennan waayi aggana. I bana “ubbaappe aadhdhiya” nagaranchcha giidoogee garamiyaaba gidenna! PHawuloosi tumaa eranaappe kase, katama ubban Kiristtaaneta yedettidi, amaridaageeta qashissiis, harata qassi woranaadan maayiis. (Oos. 26:10, 11) PHawuloosa gaasuwan A aawaanne aayyiyo worido issi yelaga Kiristtaaniyaara I gayttiyaakko, keehi zilˈˈettanaagee qoncce. PHawuloosi ba mooruwan zilˈˈettikkonne, aadhdhidabaa giigissana danddayennaagaa I erees. I ba gishshawu Kiristtoosi hayqqidoogaa eriyo gishshawu ammanettidi hagaadan giis: “Xoossaa aaro kehatettan taani tanakka.” (1 Qor. 15:3, 10) Nuuni hegaappe tamaariyoobay aybee? Kiristtoosi ne gishshawu hayqqidoogaanne neeni Yihoowaara dabbotaa minttanaadan oottidoogaa ammana. (Oos. 3:19) Xoossay xoqqu oottidi xeelliyoobay nuuni haˈˈi oottiyoobaanne sinttappe oottanabaappe attin, nuuni he wode Yihoowa Markka gidin aggin, kase oottidobaa gidenna.—Isi. 1:18.

12. Nuuni siiqoy bessenna pattenna asa giidi qoppikko, 1 Yohaannisa 3:19, 20y nuna waati maaddii?

¹² Yesuusi ne nagaraa kammanawu hayqqidoogaa neeni qoppiyo wode, ‘Taani he alˈˈo imotay bessiyoogaa keena loˈˈo asa gidikke’ geennan aggakka. Neeni hegaadan qoppana danddayiyoy aybissee? Nu nagaranchcha  wozanay nuuni siiqoy bessenna pattenna asa giidi nubaa qoppanaadan oottidi nuna cimmana danddayees. (1 Yohaannisa 3:19, 20 nabbaba.) Nuuni hegaadan qoppiyo wode, “Xoossai nu wozanaappe gita” gidiyoogaa hassayana koshshees. Yihooway nuna siiqenna woy nuussi atto geenna giidi nu qoppikkonne, Saluwan deˈiya nu Aaway nuna siiqees, qassi I nuussi atto gaana. Yihooway nuna siiqiyoogaa nuuni ammanana koshshees. Yaatanawu, nuuni A Qaalaa darotoo xannaˈana, ubbatoo A woossananne ayyo goynniya asaara wodiyaa aattana koshshees. Hageeta oottiyoogee keehi koshshiyoy aybissee?

13. Xoossaa Qaalaa xannaˈiyoogee nuna waati maaddana danddayii? (“ Xoossaa Qaalay Eta Waati Maaddidee?” giya saaxiniyaakka xeella.)

¹³ Xoossaa Qaalaa ubba galla xannaˈa, yaatikko ufayssiya Yihoowa eeshshatubaa neeni loytta akeekana. I nena siiqiyoogaa neeni akeekana. Neeni Geeshsha Maxaafaabaa ubba galla wotta denttada qoppiyo wode, ne qofaaninne ne wozanan deˈiya ‘mooruwaa suurissada,’ geeshshabaa qoppanaadan hegee nena maaddana danddayees. (2 Xim. 3:16) Bana pattenna asadan xeelliya Kevena giyo gubaaˈe cimay hagaadan giis: “Taani Mazamure 103 nabbabada wotta dentta qoppidoogee, Yihooway tabaa tumuppe ay qoppiyaakko akeekada ta qofaa laammanaadan maaddiis.” Qommoora ibaa denttido Eva hagaadan gaasu: “Ubba galla wurssettan asi baynnasan Yihoowa qofaa wotta denttada qoppays. Hegee taani woppu gaanaadan ootteesinne ta ammanuwaa minttees.”

14. Woosay nuna waatidi maaddana danddayii?

¹⁴ Ubba wode woossa. (1 Tas. 5:17) Neeni issi uraara laggetanawu koyiyo wode, aara darotoo haasayananne ne qofaa ayyo yootana koshshees. Nuuni Yihoowaara dabbotiyoykka hegaadaana. Nuuni nuuyyo siyettiyaabaa, nu qoppiyoobaanne nuna qofissiyaabaa ayyo woosan yootiyo wode, an ammanettiyoogaanne I nuna siiqiyoogaa eriyoogaa bessoos. (Maz. 94:17-19; 1 Yoh. 5:14, 15) Qommoora ibaa denttido Yuˈa hagaadan gaasu: “Taani woossiyo wode, he galla taani oottidobaa xallaa yootikke. Ta wozanaabaanne taani qoppiyoobaa Yihoowayyo yootays. Loddan loddan, taani Yihoowa issi gita ooso keettaa alaafedan gidennan, ba naata wozanappe siiqiya Aawadan xeelliyoogaa doommaas.”—“ Hagaa Nabbabadii?” giya saaxiniyaa xeella.

15. Yihooway nuussi qoppiyoogaa waatidi bessii?

¹⁵ Ammanettida laggetuura wodiyaa aatta; eti Yihooway nuussi immido imota. (Yaaq. 1:17) Saluwan deˈiya nu Aaway nuna ‘mule wodekka siiqiya’ ishanttanne michchontta nuussi gubaaˈiyan immiyoogan, nuussi qoppiyoogaa  bessees. (Lee. 17:17) PHawuloosi Qolasiyaasa Kiristtaanetussi xaafido dabddaabbiyan, bana maaddida amarida Kiristtaaneta yootiis; I eta tana ‘daro maaddidaageeta’ woy minttettidaageeta yaagiis. (Qol. 4:10, 11) Haray atto, Kiristtoos Yesuusawukka kiitanchchatu maadoynne asaa maadoy koshshiis, qassi eta maaduwaa gishshawu, I galatiis.—Luq. 22:28, 43.

16. Ammanettiya laggeti nuuni Yihoowaara dabbotaa minttanaadan waatidi maaddana danddayiyoonaa?

¹⁶ Gubaaˈiyan deˈiya ne laggeta maaduwaa oychchada hegan goˈettay? Nuna qofissidabaa kayma laggiyawu yootiyoogee laafatetta gidenna; hegee qohiyaabaappe naagana danddayees. Qommoora abaa denttido Jemisi woygidaakko beˈa: “Kayma Kiristtaanetuura loˈˈo lagge gididoogee tana keehi maaddiis. Taani iita qofaa qoppiyo wode, ha loˈˈo laggeti ta qofaa danddayan siyoosonanne tana siiqiyoogaa yootoosona. Eti yaatiyo wode, Yihooway tana siiqiyoogaanne taayyo qoppiyoogaa akeekays.” Nu ishanttuuranne michchonttuura dabbotaa minttiyoogee keehi koshshiyaaba!

17-18. Nuuni ooni yootiyoobaa siyana koshshii, qassi aybissi?

¹⁷ Seexaanay nuuni suurebaa oottanawu baaxetiyoogaa agganaadan koyees. I nuuni Yihooway nuna siiqenna, qassi I ashshana bessiyo loˈˈo asa gidokko giidi ammananaadan koyees. SHin nuuni beˈidoogaadan, hegee tuma gidenna.

¹⁸ Yihooway nena siiqees. A sinttan neeni keehi alˈˈo. Neeni ayyo azazettikko, Yesuusaagaadan neeni merinawu ‘A siiquwan deˈana.’ (Yoh. 15:10) Yaatiyo gishshawu, Seexaanay yootiyoobaa woy neeni Yihooway tana siiqenna gaada qoppiyoobaa ammanoppa. Qassi nu ubban deˈiya loˈˈobaa xeelliya Yihooway yootiyoobaa siya. Nena gujjin, I ‘ba asan ufayttiyoogaa’ ammanetta.