1. Yihoowa asaa ayba metoy gakkii?

WOLQQAAMA metoy nena gakkiiddi deˈii? Gubaaˈiyan deˈiya issi uri nena yiilloyana danddayees. (Yaaq. 3:2) Woy qassi nenaara oottiyaageeti woy tamaariyaageeti neeni Yihoowawu haggaaziyo gishshawu ne bolli qilliiccana danddayoosona. (1 PHe. 4:3, 4) Qassi so asay neeni shiiqota shiiqennaadan woy ne ammanuwaabaa haratuyyo yootennaadan digganawu malana danddayees. (Maa. 10:35, 36) Nena wolqqaama metoy gakkikko, hidootaa qanxxana danddayaasa. Nena gakkiya metoy ayba gidikkonne, neeni loˈˈobaa kuuyanaadan Yihooway neessi aadhdhida eratettaanne metuwaa genccanawu wolqqaa immana.

2. Roome 15:4 yootiyoogaadan, Xoossaa Qaalaa nabbabiyoogee nuna waati maaddana danddayii?

² Yihooway nagaranchcha asay metuwaa waani genccidaakko qonccissiya darobay ba Qaalan xaafettanaadan oottiis. Aybissi? Nuuni hegaappe tamaaranaadaana. Kiitettida PHawuloosi hegaa xaafanaadan Yihooway denttettiis. (Roome 15:4 nabbaba.) He taariketa nabbabiyoogee nuuni minettanaadaaninne nuussi hidootay deˈanaadan oottees. SHin nuuni Geeshsha Maxaafaa coo nabbabiyoogaappe aarobaa oottana bessees. Geeshsha Maxaafay nu qofaa laammanaadaaninne nu wozanaa denttettanaadan eeno gaana bessees. Leemisuwawu, nu metuwawu zore koshshikko waatana danddayiyoo? Kaalliya oyddubata oottana danddayoos: (1) Woossa, (2) Sohuwan deˈiyaabadan qoppa, (3) Wotta dentta qoppa, qassi (4) Oosuwan peeshsha. Hegeeta huuphiyan huuphiyan  waati oottana danddayiyaakko ane beˈoos. * Yaatidi, Kawuwaa Daawitanne kiitettida PHawuloosa gakkidabaappe tamaaranawu he oyddubata goˈettana.

3. Geeshsha Maxaafaa nabbabiyoogaa doommanaappe kase, neeni ay oottana bessii, qassi aybissi?

³ (1) Woossa. Geeshsha Maxaafaa nabbabiyoogaa doommanaappe kase, nabbabiyoobaa akeekanaadan maaddana mala Yihoowa woossa. Leemisuwawu, neeni oottanabaa kuuyanawu maaddana danddayiya maarata Geeshsha Maxaafaappe demmanaadan maaddana mala Yihoowa oychcha.—Pili. 4:6, 7; Yaaq. 1:5.

4. Geeshsha Maxaafaa taarikee neeyyo kaseppe aaruwan qonccanaadan aybi maaddana danddayii?

⁴ (2) Sohuwan deˈiyaabadan qoppa. Qoppana danddayiyo maalaalissiya imotaa Yihooway nuussi immiis. Geeshsha Maxaafan deˈiya taarikee neeyyo kaseppe aaruwan qonccanaadan haniiddi deˈiyaabaanne ne nabbabiyoobay nena gakkidabadan qoppa. He taarikee odiyo uri beˈiyoobaa beˈanawu woy awu siyettiyaabay neeyyookka siyettanaadan oottanawu mala.

5. Wotti dentti qoppiyoogaa giyoogee woygiyoogee, qassi neeni hegaadan waata oottana danddayay?

⁵ (3) Wotta dentta qoppa. Wotti dentti qoppiyoogaa giyoogee neeni nabbabiyoobaa loytta qoppiyoogaa, qassi hegee ne deˈuwaara waani gayttiyaakko akeekiyoogaa giyoogaa. Yaatiyoogee ne nabbabiyo qofaa haraara gattanawunne loytta akeekanawu maaddees. Geeshsha Maxaafaa nabbabidi wotti dentti qoppennan aggiyoogee carqqiyaa sikkennan coo qanxxerettidi xaraphpheezan wottidi xeelliyoogaa mala. Wotti dentti qoppiyoogee qassi he carqqee kumetta maayo gidanaadan issippe gatti sikkiyoogaa mala. Kaallidi deˈiyaageetu mala oyshata nena oychchiyoogeenne zaariyoogee wotta dentta qoppanaadan maaddana danddayees: ‘He taarikiyan odettida izaawu bana gakkida metuwaa giigissanawu ay oottidee? Yihooway A waati maaddidee? Hegaappe taani tamaaridobaa ta metuwaa genccanawu waata goˈettana danddayiyaanaa?’

6. Nu tamaaridobaa oosuwan peeshshana koshshiyoy aybissee?

⁶ (4) Oosuwan peeshsha. Nuuni tamaaridobaa oosuwan peeshshennaba gidikko, ba keettaa shafiyan keexxiya uraa mala gidanaagaa Yesuusi yootiis. I minnidi oottikkonne, A daafuray mela. Aybissi? Carkkoynne diˈoy sugikko he keettay kunddiyo gishshataassa. (Maa. 7:24-27) Hegaadan, nuuni woossiyaaba, he sohuwan deˈiyaabadan qoppiyaabanne, wotti dentti qoppiyaaba gidikkonne oosuwan peeshshana xayikko nuuni mela daafuroos. Nu ammanuwaa paacciya metoy woy yedetay gakkiyo wode, nu ammanoy mino gidenna. SHin, nuuni xannaˈiyaabanne hegaa oosuwan peeshshiyaaba gidikko, loˈˈobaa kuuyana, aaro sarotettaa demmana, qassi nu ammanoy minnana. (Isi. 48:17, 18) Nuuni beˈido oyddubata goˈettidi, Kawuwaa Daawita deˈuwan hanidabaappe ay tamaarana danddayiyaakko ane beˈoos.

7. Nuuni haˈˈi beˈana Geeshsha Maxaafaa taarikee awugee?

⁷ Ne laggee woy so asay nena qohidee? Yaanikko, A naˈay Abeseloomi A qohido wodenne kawo gidanawu malido wode, Kawuwaa Daawiti oottidobaa xannaˈiyoogee nena maaddana danddayees.—2 Sam. 15:5-14, 31; 18:6-14.

8. Yihooway nena maaddanaadan waatana danddayay?

⁸ (1) Woossa. He taarikiyaa qoppada, nena gakkida metuwaa xeelliyaagan neeyyo siyettiyaabaa Yihoowayyo woosan yoota. (Maz. 6:6-9) Geeshshada yoota. Yaatada, nena gakkiya metuwaa gencciyo wode goˈˈiya maarata  neeni akeekanaadan Yihooway maaddana mala oychcha.

9. Daawitanne Abeselooma giddon hanidabay aybee?

⁹ (2) Sohuwan deˈiyaabadan qoppa. Ha taarikiyan hanidabaanne Kawuwaa Daawiti ay keena qohettidaakko qoppa. Daawita naˈay Abeseloomi asay A siiqanaadan oottiyaabaa daro layttawu oottiis. (2 Sam. 15:7) Abeseloomi likke wode giidi qoppido wode, asay A kawo giidi ekkanawu giigettana mala qosan kiitaa Israaˈeela biitta ubbaa kiittiis. I haray atto Daawitawu mata laggetuppenne A zoriyaageetuppe issoy, Akixoofeeli banaara issippe makkalanaadan ammanttiis. Abeseloomi bana kawo giidi awaajjiis; qassi yaatidi I Daawita oyqqanawunne woranawu maliis; he wode Daawiti keehi harggennan waayi aggana. (Maz. 41:1-9) Daawiti Abeseloomi oottiyoobaa akeekidi Yerusalaameppe baqatiis. Wurssettan, Abeselooma olanchchati Daawita olanchchatuura olettidosona. Makkalida olanchchati xoonettidosona; qassi Daawita naˈay Abeseloomi hayqqiis.

10. Kawuwaa Daawiti waatana danddayii?

¹⁰ Ha ubbabay Daawita gakkiyo wode awu aybi siyettidaakko qoppa. I Abeselooma siiqeesinne Akixoofeelan ammanettees. Gidikkokka, eti naaˈˈaykka A kaddidosona. Eti Daawiti keehi azzananaadan oottidosona; ubba qassi A woranawu malidosona. Ammanettida A laggeti haratikka Abeseloomaara hashetidosona giidi Daawiti qoppananne etan ammanettiyoogaa aggana danddayees. I barkka attidabadan qoppananne biittaappe barkka baqatana danddayees. Woy I hidootaa keehi qanxxana danddayees. SHin Daawiti hegaadan mule oottibeenna. I bana gakkida wolqqaama metuwaa gencciis. I hegaadan oottidoy aybissee?

11. Metoy bana gakkido wode Daawiti ay oottidee?

¹¹ (3) Wotta dentta qoppa. Ha taarikiyaappe neeni tamaarana danddayiyo maarati awugeetee? “Daawiti naagettanawu ay oottidee?” giya oyshaa zaaruwaa qoppa. Daawiti keehi hirggibeenna; qassi eesotidi likke gidennabaa kuuyibeenna. Yashshan maashidi kuuyana bessiyaabaa aggiigibeenna. I Yihooway maaddanaadan woossiis. Ba laggetikka bana maaddanaadan oychchiis. Qassi I oottanawu kuuyidobaa eesuwan oottiis. Daawiti keehi azzanidaba gidikkonne, haratun ammanettiyoogaa aggibeenna; qassi kiyidi gelidi ixxiya asa gidibeenna. I Yihoowanne ba laggetun ammanettiyoogaa aggibeenna.

12. Yihooway Daawita maaddanawu ay oottidee?

¹² Yihooway Daawita waati maaddidee? Neeni amaridabaa pilggiyoogan, Daawiti bana gakkida metuwaa genccanaadan Yihooway A maaddidoogaa akeekana. (Maz. 3:1-8; huuphessa qofaa) Yihooway Daawiti kuuyidobaa anjjiis. Qassi Daawitawu ammanettida laggeti bantta kawuwaa naaganawu olettido wode Yihooway eta maaddiis.

13. Issi uri neeni keehi hanqqettanaadan oottikko, Daawita leemisuwaa waata kaallana danddayay? (Maatiyoosa 18:15-17)

¹³ (4) Oosuwan peeshsha. ‘Taani Daawita leemisuwaa waata kaallana danddayiyaanaa?’ gaada nena oychcha. Metuwaa giigissanawu koshshiyaabaa sohuwaara ootta. Hanotaadan, Yesuusi Maatiyoosa shemppo 18n yootidobaa sittan woy maaraadan oosuwan peeshshana danddayaasa. (Maatiyoosa 18:15-17 nabbaba.) SHin neeni hanqqetta uttada kuuyanawu eesotana koshshenna. Neeni woppu gaanaadaaninne oottana bessiyaabay aybakko eranaadan maaddana mala Yihoowa woossana bessees. Ne laggetun ammanettiyoogaa aggoppa. Qassi eta maaduwaa eeno gaada ekka. (Lee. 17:17) Ubbaappe aaruwan, Yihooway ba Qaalaa baggaara neeyyo immiyo zoriyaa siya.—Lee. 3:5, 6.

14. Naaˈˈantto Ximootiyoosa 1:12-16; 4:6-11, 17-22⁠y neeni ay mala hanotan deˈiyo wode nena minttettanee?

¹⁴ Neeni Yihoowawu haggaaziyo gishshawu so asay nena eqettii? Woy neeni deˈiyoy Yihoowa  Markkatu oosoy muleera woy amaridaagee teqettido biittaanee? Yaatikko, 2 Ximootiyoosa 1:12-16; qassi 4:6-11, 17-22 nabbabiyoogan neeni minettana danddayaasa. * PHawuloosi ha qofaa xaafidoy I qashettido wode.

15. Yihoowa ay oychchana danddayay?

¹⁵ (1) Woossa. He taarikiyaa nabbabanaappe kase, ne metuwaabaanne hegaa xeelliyaagan neeyyo siyettiyaabaa Yihoowayyo geeshshada yoota. Yaatada, PHawuloosa gakkidabaa yootiya taarikiyaappe neeni oottana bessiyaabaa akeekanaadan maaddiya maarata eranaadan Yihooway nena maaddana mala oychcha.

16. PHawuloosa gakkidabay aybee?

¹⁶ (2) Sohuwan deˈiyaabadan qoppa. Nena PHawuloosa gaada qoppa. I Roomen qashetti uttiis. I kasekka qashetti eriyaaba gidikkonne, haˈˈiigan I hayqqanaagaa erees. A laggetuppe amaridaageeti A aggibayidosona; qassi I keehi daafuriis.—2 Xim. 1:15.

17. PHawuloosi waatana danddayii?

¹⁷ PHawuloosi kasebaa hassayidi taani mino Kiristtaane gidennaakko, qashettikke shin giidi qoppana danddayees. Isiyaa awuraajjan A yeggi bayidi biida asatun I yiillotana danddayees; qassi hara ba laggetun ammanettiyoogaa aggana danddayees. SHin PHawuloosi mule hegaadan oottibeenna. Ba laggeti baassi ammanettidi deˈanaagaanne Yihooway bana woytanaagaa I aybin eridee?

18. Meto wodiyan PHawuloosi waatidee?

¹⁸ (3) Wotta dentta qoppa. “PHawuloosi bana waati naagidee?” giya oyshaa zaaruwaa qoppa. PHawuloosi I mata wode hayqqanaagaa erikkokka, Yihooway bonchchettanaadan oottiyoogee keehi koshshiyaabaa gidiyoogaa dogibeenna. Qassi I harata waati minttettanaakko ubbatoo qoppiis. I ubbatoo woossiyoogan Yihoowan ammanettiis. (2 Xim. 1:3) PHawuloosi bana aggi bayidi biida ishanttubaa ubbatoo qoppibeenna. Ba laggeti bana siiquwan maaddido gishshawu eta keehi galatiyoogaa yootiis. Hegaa bollikka, PHawuloosi Xoossaa Qaalaa aggennan xannaˈiis. (2 Xim. 3:16, 17; 4:13) Ubbaappe aaruwan, Yihoowaynne Yesuusi A siiqiyoogaa wozanappe ammanettiis. Eti A aggibookkona; qassi I ammanettidi oottidobawu eti A woytanaagaa ammanettiis.

19. Yihooway PHawuloosa waati maaddidee?

¹⁹ PHawuloosi Kiristtaane gidiyo gishshawu A gakkiya yedetaa genccanaadan Yihooway awu yootiis. (Oos. 21:11-13) Yihooway PHawuloosa waati maaddidee? I PHawuloosa woosaa zaariis; qassi ayyo wolqqaa immiis. (2 Xim. 4:17) PHawuloosi minnidi oottidobawu I woytuwaa demmanaagee ayyo odettiis. Ammanettida A laggeti PHawuloosa maaddanaadankka Yihooway eta goˈettiis.

20. Roome 8:38, 39n qonccida PHawuloosa ammanuwaa leemisuwaa waati kaallana danddayiyoo?

²⁰ (4) Oosuwan peeshsha. ‘Taani PHawuloosa leemisuwaa waata kaallana danddayiyaanaa?’ gaada nena oychcha. PHawuloosaagaadan, nu ammanuwaa gaasuwan yedetay nuna gakkanaagaa nuuni naagana koshshees. (Mar. 10:29, 30) Metoy nuna gakkiyo wode Yihoowayyo ammanettidi deˈanawu, nuuni aggennan woossananne A Qaalaa ubbatoo xannaˈana koshshees. Qassi nuuni oottana danddayiyo keehi koshshiyaabaappe issoy Yihooway bonchchettanaadan oottiyoogaa gidiyoogaa muletoo hassayana koshshees. Yihooway nuna mule aggennaagaanne I nuna siiqennaadan aybinne diggana danddayennaagaa ammanettana danddayoos.—Roome 8:38, 39 nabbaba; Ibr. 13:5, 6.

21. Ayanne Hektari banttana gakkida metuwaa waati xoonidonaa?

²¹ Geeshsha Maxaafan etabay odettidoogeetu taarikee nuuni ay metonne genccanaadan wolqqaa demmana mala maaddana danddayees.  Leemisuwawu, Jaappaane biittan deˈiya Ayo giyo aqinyiyaa, dabaaban markkattiyoogaa yayyiyoogaa agganaadan Yoonaasaa taarikee O maaddidoogaa yootaasu. A Yelidaageeti Yihoowa Markka gidenna, Indonezhiyaa giyo biittan deˈiya Hektara giyo yelagay Yihoowabaa tamaaranawunne awu haggaazanawu Uruti leemisoy A maaddidoogaa yootiis.

22. Neeni Geeshsha Maxaafaa diraamatuppe woy “Etaagaadan Ammanite” giya huuphe yohuwan kaalli kaalli kiyiyaabaappe loytta goˈettanaadan nena aybi maaddana danddayii?

²² Neeni minettanaadan maaddana danddayiya Geeshsha Maxaafan etabay odettidoogeetu taarikiyaa awuppe demmana danddayay? Nu biidotinne cenggurssan giigiya diraamati, qassi “Etaagaadan Ammanite” giya kaalli kaalli kiya huuphe yohoti Geeshsha Maxaafan deˈiya taarikee neeyyo kaseppe aaruwan qonccanaadan maaddana. * He loytti pilggidobata beˈanaappe, siyanaappe woy nabbabanaappe kase, neeni oosuwan peeshshana danddayiyo timirttiyaa demmanaadan Yihooway nena maaddana mala woossa. He taarikee nebaa gaada qoppa. Yihoowawu ammanettida ha ashkkarati oottidobaanne eti metuwaa genccanaadan I waati maaddidaakko wotta dentta qoppa. Yaatada, hegaappe tamaaridobaa ne deˈuwan oosuwan peeshsha. Yihooway nena maaddiyo gishshawu A galata. Qassi harata minttettiyoonne maaddiyo ogiyaa koyiyoogan galatiyoogaa bessa.

23. Isiyaasa 41:10, 13y yootiyoogaadan, Yihooway nuuyyo waatanawu qaalaa gelidee?

²³ Seexaanay haariyo ha alamiyan deˈoy keehi metana danddayees; qassi nuuni issi issitoo waatanaakko erokko. (2 Xim. 3:1) SHin nuuni unˈˈettana woy yayyana koshshenna. Yihooway nuna gakkiya metuwaa erees. Nuussi maadoy koshshiyo wode, I ba ushachcha kushiyan nuna oyqqanawu qaalaa geliis. (Isiyaasa 41:10, 13 nabbaba.) Yihooway maaddanaagaanne nu metuwaa genccanawu koshshiya wolqqaa Geeshsha Maxaafaappe demmanaagaa ammanettoos.