1. Maatiyoosa 24:9 yootiyoogaadan, alamee nuna ixxiyo wode nuuni maalaalettana koshshennay aybissee?

YIHOOWAY nuuni harata siiqanaadaaninne etikka nuna siiqanaadan oottidi medhdhiis. Hegaa gishshawu, issi uri nuna ixxiyo wode, nuuni keehi azzanananne ubba qassi hirggana danddayoos. Leemisuwawu, Awurooppaa biittan deˈiya Jorjino giyo michchiyaa hagaadan gaasu: “Taani Yihoowayyo haggaaziyo gishshawu ta aayyiyaa tana ixxaasu; he wode taassi layttay 14. Taani keehi azzanaasinne tarkka attidabadan taassi siyettiis; qassi taani loˈˈo asa gidikkinaashsha gaada qoppiyoogaa doommaas.” * Danila giyo ishay hagaadan giis: “Taani Yihoowa Markka gidiyo gishshawu wotaaddarati tana shocido wode, cayido wodenne manddido wode, taani yayyaasinne kawuyyidabadan tawu siyettiis.” Harati nuna ixxiyo wode nuuni keehi azzanoos; shin ixxiyoogee maalaalissiyaaba gidenna. Nuna asay ixxanaagaa Yesuusi kasetidi yootiis.—Maatiyoosa 24:9 nabbaba.

2-3. Yesuusi erissiyo ashkkarata asay ixxiyoy aybissee?

² Alamee Yesuusi erissiyo ashkkarata ixxees. Aybissi? Yesuusaagaadan, nuunikka ‘saˈaabaa gidenna’ gishshataassa. (Yoh. 15:17-19) Nuuni asaa kawotettata bonchchiyaaba gidikkonne, etawu woy eti goˈettiyo malaatatussi goynnokko. Nuuni Yihoowa xallawu goynnoos. Xoossawu asaa haariyo maatay deˈiyoogaa nuuni ammanoos; shin Seexaanaynne A ‘zerettay’ Xoossaayyo he maatay deˈiyoogaa kaddoosona. (Doo. 3:1-5, 15) Asaa meto ubbaa qaaranay Xoossaa Kawotetta xalla gidiyoogaanne A eqettiyaageeta ubbaa mata wode xayssanaagaa nuuni sabbakoos. (Dane. 2:44; Ajj. 19:19-21) Nuuni sabbakiyoobay ashkketussi mishiraachcho; shin iitaa oottiyaageetussi azzanttiya odo.—Maz. 37:10, 11.

 ³ Nuuni Xoossaa higgiyawu azazettiyo gishshawukka asay nuna ixxees. Xoossay loˈˈo giyoobaynne iita giyoobay ha alamiyan deˈiya asay loˈˈo giyoobaappenne iita giyoobaappe keehi dummatees. Leemisuwawu, pokkobaa oottido gishshawu Xoossay xayssido Sadoomanne Gamoora asati oottidoogaa mala pokkobaa oottiyoogee bala gidenna giidi daro asay qoppees. (Yih. 7) Hegaara gayttidaagan nuuni Geeshsha Maxaafay yootiyo maaratuyyo azazettiyo gishshawu, daro asay nuna qilliicceesinne asaara maayettenna asa gees.—1 PHe. 4:3, 4.

4. Asay nuna ixxiyo wode nuuni minnanaadan nuna maaddiya eeshshati awugeetee?

⁴ Asay nuna ixxiyo wodenne cayiyo wode genccanawu nuna maaddana danddayiyaabay aybee? Yihooway nuna maaddanaagaa mintti ammanana bessees. Gonddalliyaadan, nu ammanoy “xalahe halaqai dafidi yeddiyo wonddafiyaa tama ubbaa toissanau” danddayees. (Efi. 6:16) SHin nuussi koshshiyay ammano xalla gidenna. Nuussi siiqoykka koshshees. Aybissi? Siiqoy “yiillotenna” gishshataassa. Siiqoy qohiya ubbabaa danddayeesinne genccees. (1 Qor. 13:4-7, 13) Nuuni Yihoowa siiqiyoogee, nu ishantta siiqiyoogeenne ubba qassi nu morkketa siiqiyoogee ixuwaa genccanaadan nuna waati maaddiyaakko ane beˈoos.

5. Yesuusi ba Aawaa siiqiyo gishshawu ay oottidee?

⁵ A morkketi A woranaappe kase qammi Yesuusi ammanettida ba erissiyo ashkkaratussi hagaadan giis: ‘Taani Aawaa siiqiyo gishshawu, Aaway tana azazidoogaadan oottays.’ (Yoh. 14:31) Yesuusi Yihoowa siiqiyo gishshawu, wolqqaama metuwaa gencciis. Nuunikka Yihoowa siiqiyoogee hegaadan genccanaadan maaddana danddayees.

6. Roome 5:3-5y yootiyoogaadan, Yihoowa ashkkarati alamee eta ixxiyo wode gencciyoogaa xeelliyaagan etassi aybi siyettii?

⁶ Xoossaa siiqiyoogee Yihoowa ashkkarati ubbatoo yedetaa genccanaadan maaddiis. Leemisuwawu, kiitettidaageeti sabbakiyoogaa agganaadan gita maatay deˈiyo Ayhuda xoqqa pirdda keettay azazido wode eti Xoossaa siiqiyoogee ‘asawu azazettanaappe Xoossawu azazettanaadan’ oottiis. (Oos. 5:29; 1 Yoh. 5:3) Hegaadan Xoossaa mintti siiqiyoogee meqettaa iitanne wolqqaama kawotettati yedettiyo nu ishantti ammanettidi deˈanaadankka maaddees. Alamee nuna ixxiyo wode, nuuni ufayttoosippe attin, hidootaa qanxxokko.—Oos. 5:41; Roome 5:3-5 nabbaba.

7. Nu soo asay nuna eqettiyo wode nuuni waatana koshshii?

⁷ Nu soo asay nuna eqettiyoogee genccanawu keehi deexxiyaabatuppe issuwaa gidana danddayees. Nuuni Yihoowabaa tamaaranawu koyiyoogaa eti eriyo wode, nu soo asaappe issoti issoti nuuni cimettidabadan qoppana danddayoosona. Harati nuna gooyidosona giidi qoppana danddayoosona. (Marqqoosa 3:21⁠ra gatta xeella.) Eti ubba nuna qohiya hanotan eqettana danddayoosona. Ha yedetan nuuni maalaalettana koshshenna. Yesuusi hagaadan giis: “Asassi morkketi a so asata gidana.” (Maa. 10:36) Nu dabbotu xeelay ayba gidikkonne, nuuni eta ixxennaagee qoncce. Qassi nuuni Yihoowa siiqiyo siiqoy gujji gujji biyo wode, asaa siiqiyo siiqoykka gujji gujji bees. (Maa. 22:37-39) SHin nuuni Geeshsha Maxaafaa higgetanne maarata azazettiyoogaa asa ufayssanawu giidi aggokko.

8-9. Wolqqaama yedetay deˈishinkka minna eqqanaadan issi michchiyo maaddidabay aybee?

⁸ Doomettan ibaa yootido Jorjina, I aayyiyaa keehi eqettishinkka genccaasu. Jorjina hagaadan gaasu: “Ta aayyiyaanne taani Yihoowa Markkatuura Geeshsha Maxaafaa  xannaˈiyoogaa doommida. SHin usuppun aginappe guyyiyan taani shiiqota shiiqanawu koyido wode, ta aayyiyaa tana keehi eqettaasu. A kaddidaageetuura gayttiyoogaa taani akeekaas; qassi A tanaara haasayiyo wode, eta worddo mootota zaarettada tawu yootawusu. Qassi A tana cayawusu, ta huuphiyaa dafawusu, tana cuullawusunne ta xuufiyaa wora olawusu. Layttay tawu 15 gidin, taani xammaqettaas. Ta aayyiyaa jallissiyaabaa goˈettiyaanne danobaa oottiya macca naati deˈiyo keettan taani deˈanaadan oottiyoogan Yihoowawu haggaaziyoogaa tana digganawu malaasu. Nena siiqananne neessi qoppana koshshiya uri eqettiyoogaa gencciyoogee keehi metiyaaba.”

⁹ Genccanaadan Jorjino maaddidabay aybee? A hagaadan gaasu: “Taani kumetta Geeshsha Maxaafaa nabbabada wurssido gallassi ta aayyiyaa tana eqettiyoogaa doommaasu. Taani tumaa demmidoogaa wozanappe ammanaas; qassi Yihoowakko keehi shiiqidabadan tawu siyettees. Taani darotoo A woossays; qassi I ta woosaa siyiis. Taani he keettan deˈiyo wode, issi michchiyaa tana ba so shoobbin, taani iira Geeshsha Maxaafaa xannaˈaas. He wode, SHiiquwaa Addaraashan ishanttinne michchontti tana minttettidosona. Eta soo asadan tawu siyettanaadan oottidosona. Tana yedettiya ooppenne Yihooway wolqqaama gidiyoogee tawu qoncce.”

10. Nu Xoossay Yihooway ubbatoo ay oottanaagaa ammanettana danddayiyoo?

¹⁰ Aybinne “Kiristtoos Yesuusan de7iya Xoossaa siiquwaappe nuna shaakkanau danddayennaagaa” kiitettida PHawuloosi yootiis. (Roo. 8:38, 39) Nuuni guutta wodiyawu waayettikkokka, Yihooway nuna minttettanawu ubbatoo nu miyyiyan deˈees. Jorjini hanotay bessiyoogaadan, Yihooway gubaaˈiyan deˈiya nu ishanttunne michchonttu baggaarakka nuna ubbatoo maaddees.

11. Yesuusi Yohaannisa 15:12, 13n yootido siiqoy I erissiyo ashkkarata waati maaddidee? Leemisuwaa yoota.

¹¹ Yesuusi hayqqanaappe kase qammi, ba erissiyo ashkkarati issoy issuwaara siiqettanaadan hassayissiis. (Yohaannisa 15:12, 13 nabbaba.) Bantta goˈˈaa aggi bayiyo siiqoy eti issippetettan deˈanaadaaninne alamiyaa ixuwaa genccanaadan maaddanaagaa I erees. Tasalonqqe gubaaˈiyaa hanotaa qoppa. He gubaaˈee eqqido wodiyaappe doommidi, yedetay eta gakkiis. Gidikkokka, he gubaaˈiyaa ishanttinne michchontti ammanettidi gencciyoogaaninne siiquwan  leemiso gididosona. (1 Tas. 1:3, 6, 7) PHawuloosi eti “gujji gujjidi” siiqettanaadan eta minttettiis. (1 Tas. 4:9, 10) Unˈˈettidaageetanne shuggidaageeta minttettanaadan siiqoy eta denttettees. (1 Tas. 5:14) Issi layttaa gidiya wodiyaappe simmin, PHawuloosi etawu xaafido naaˈˈantto dabddaabbiyan ‘intte issoy issuwaa siiqiyo siiqoy dariis’ giidi yootidobay, eti PHawuloosa azazuwaa azazettidoogaa bessees. (2 Tas. 1:3-5) Eti issoy issuwaa siiqiyoogee metuwaanne yedetaa genccanaadan eta maaddiis.

12. Olaa wode, issi biittan deˈiya ishanttinne michchontti issoy issuwaa siiqiyoogaa waati bessidonaa?

¹² Doomettan abaa yootido Danila giyo ishaanne A machchee hanotaa qoppa. Eta biittan denddida olay eta katamaa gakkido wode, eti shiiqota aggennan shiiqoosona; sabbakanawu banttawu danddayettida ubbabaa oottoosona; qassi banttawu deˈiya qumaappe hara ishanttussinne michchonttussi immoosona. He wode issi gallassi, zayyiya oyqqida wotaaddarati Danila soo biidosona. Danili hagaadan giis: “Taani Yihoowa Markka gidiyoogaa agganaadan eti oychchidosona. Taani ixxis gin, eti tana bukkidosonanne ta bolli tokkosiyaaba milatidosona; qassi ta haytta kariyaara tokkosidosona. Eti baanaappe kase, simmidi ne machcheera mattumaa wolqqan gayttana giidi yashissidosona. SHin nu ishantti nuna sohuwaara baaburiyan hara katamaa efiidosona. He ishanttu siiquwaa taani mule dogikke. Qassi nuuni he ooratta katamaa gakkido wode, yan deˈiya ishantti nuussi qumaa immidosona; qassi nuuni oosuwaanne deˈiyo keettaa demmanaadan maaddidosona. Yaatiyo gishshawu, guyyeppe olaa heeraappe baqatidi yiya hara Yihoowa Markkati deˈiyo sohuwaa giigissida.” Hegaa mala taariketi bessiyoogaadan, nuuni issoy issuwaa siiqiyoogee ixuwaa genccanaadan nuna maaddana danddayees.

13. Hara asay nuna ixxiyo wodekka nuuni Yihoowawu haggaaziyoogan genccanaadan geeshsha ayyaanay nuna waati maaddii?

¹³ Yesuusi ba erissiyo ashkkarati bantta morkketa siiqanaadan yootiis. (Maa. 5:44, 45) Yaatiyoogee metennabee? Akkay, hegee metiyaaba! SHin Xoossaa geeshsha ayyaanaa maaduwan hegee danddayettiyaaba. Xoossaa ayyaanaa ayfee siiquwaa, danddayaa, kehatettaa, loˈˈotettaanne ba huuphiyaa naagiyoogaa xaaxi waaxees. (Gal. 5:22, 23) Ha eeshshati nuuni ixuwaa genccanaadan maaddoosona. Eta azinati, machchoti, naati, woy shooroti ha eeshshata  bessido gishshawu, eqettiyoogaa daro asay aggiis. Eqettiyaageetuppe daroti nu ishanttanne michchontta gididosona. Neeni Yihoowawu haggaaziyoogaa gaasuwan, nena ixxiyaageeta siiqanawu neeni metootikko, geeshsha ayyaanaa demmanawu woossa. (Luq. 11:13) Qassi Xoossawu azazettiyoogee aybippenne aaruwan ubbatoo loˈˈo gidiyoogaa ammanetta.—Lee. 3:5-7.

14-15. Yasmino I azinay keehi eqettishinkka A ba azinaa siiqanaadan Roome 12:17-21 O waati maaddidee?

¹⁴ Giddo Arshsho biittan deˈiya Yasmin giyo michcheebaa qoppa. A Yihoowa Markka gidido wode, I azinay A cimettidabadan qoppiis; qassi A Xoossawu haggaaziyoogaa digganawu maliis. I O cayiis; qassi dabboti, haymaanootiyaa kaalettiyaageenne shareechchoy O yashissanaadan oottiis; ubba qassi A ba soo asay shaahettanaadan oottaasu giidi mootiis. I azinay ishantti gubaaˈiyan shiiquwan deˈishin eta cayiis! Yasmino meqetti baynna hanotan I oyqqiyo gishshawu, A ubbatoo yeekkawusu.

¹⁵ Ishanttinne michchontti Yasmino SHiiquwaa Addaraashan minttettidosona. Roome 12:17-21n deˈiya qofaa A oosuwan peeshshanaadan cimati minttettidosona. (Nabbaba.) Yasmina hagaadan gaasu: “Hegee metiyaaba. SHin, taani Yihooway tana maaddanaadan oychchaas, yaatada, tawu danddayettida ubban Geeshsha Maxaafay yootiyoobaa oosuwan peeshshaas. Ta azinay tana yiilloyanawu qumaa kattiyoosan moorettidabaa oliyo wode, taani hegaa geeshshays. I tana cayiyo wode, taani ashkketettan zaarays. Qassi I sahettiyo wode, assi koshshiyaabaa kunttays.”

16-17. Yasmini hanotaappe neeni ay tamaarana danddayay?

¹⁶ Yasmina ba azinaa siiqido gishshawu anjjettaasu. A hagaadan gaasu: “Taani ubbatoo tumaa haasayiyoogaa ta azinay akeekido gishshawu, kaseppe aaruwan tanan ammanettiyoogaa doommiis. Nuuni haymaanootiyaabaa haasayiyo wode I bonchchuwan ezggiyoogaanne son sigan deˈiyoogaa doommiis. Taani haˈˈi shiiquwaa baanaadan I tana minttettees. Taani ta azinaara kaseegaappe loˈˈo hanotan deˈays; qassi nu keettay saroy deˈiyoogaa gidiis. Ta azinay tumaa ekkidi tanaara Yihoowawu haggaazana gaada hidootan naagays.”

¹⁷ ‘Siiqoy ubbabaa danddayiyoogaa, ubbabaykka hanana giidi ufayssan naagiyoogaanne ubbabaa gencciyoogaa’ Yasmini hanotay bessees. (1 Qor. 13:4, 7) Ixoy wolqqaamanne qohiyaaba gidana danddayikkonne, siiqoy hegaappe aaruwan wolqqaama. Nuuni siiquwaa bessikko, eti nuna eqettiyoogaa aggana danddayoosona. Qassi nuuni ubbatoo siiquwaa  bessiyoogee Yihoowa ufayssees. Eqettiyaageeti nuna ixxiyoogaa aggana xayikkonne, nuuni ufayttana danddayoos. Waanidi?

18. Asay nuna ixxiyo wode, nuuni ufayttiyoy aybissee?

¹⁸ Yesuusi hagaadan giis: “Asi inttena ixxiyo wode . . . intte [ufayttiyaageeta].” (Luq. 6:22) Nuuni nuna asay ixxanaadan koyokko. Nu ammanuwaa gaasuwan asay yedettiyoogee nuna ufayssenna. Yaatin asay ixxiyo wode nuuni ufayttiyoy aybissee? Heezzu gaasota beˈa. Koyroogee, nuuni gencciyo wode, Xoossay nunan ufayttees. (1 PHe. 4:13, 14) Naaˈˈanttoogee, nu ammanoy geeyeesinne minnees. (1 PHe. 1:7) Heezzanttoogee, nuuni keehi alˈˈo woytuwaa, hegeekka merinaa deˈuwaa demmana.—Roo. 2:6, 7.

19. Kiitettidaageeti garafetidikka ufayttidoy aybissee?

¹⁹ Yesuusi hayquwaappe denddi simmin takkennan, I yootidoogaadan kiitettidaageeti ufayttidosona. Eta garafidi sabbakiyoogaa eti agganaadan azazikkonne, ufayttidosona. Aybissi? ‘Yesuusa sunttaa gishshawu, eti kawuyyana bessiyo gishshataassa.’ (Oos. 5:40-42) Eti banttana ixxiya morkketa yayyiyoogaappe bantta Godaa siiqiyo siiqoy aadhdhees. Qassi eti aggennan mishiraachchuwaa sabbakiyoogan bantta siiquwaa bessidosona. Nu ishanttuppe daroti metiyaabay deˈishinkka ha wodiyan ammanettidi haggaaziyoogaa aggibookkona. Eti oottido oosuwaanne A sunttaa gishshawu bessido siiquwaa Yihooway dogennaagaa eroosona.—Ibr. 6:10

20. Kaalliya huuphe yohuwan nuuni ay beˈanee?

²⁰ Alamee deˈido wode ubban nuna ixxees. (Yoh. 15:19) SHin nuuni yayyana koshshenna. Kaalliya huuphe yohuwan nuuni beˈanaagaadan, Yihooway baassi ammanettiyaageeta “minttettananne . . . naagana.” (2 Tas. 3:3) Hegaa gishshawu, nuuni Yihoowa, nu ishanttanne michchontta, ubba qassi nuna ixxiyaageetakka ubbatoo siiqoos. Nuuni ha zoriyaa oosuwan peeshshiyo wode, issippetettan deˈananne nu ammanoy minnana, qassi Yihoowa bonchchissananne siiqoy ixuwaappe wolqqaama gidiyoogaa qonccissana.