XANNAꞌIYO HUUPHE YOHUWA 41
MAZAMURE 13 Kiristtoosa, Nuussi Leemisuwaa
Yesuusi Saꞌan Deꞌido Wurssetta 40 Gallassatun Oottidobaappe Ay Tamaariyoo?
“Eti 40 gallassa giddon A darotoo beꞌidosona, qassi I Xoossaa Kawotettaabaa etawu yootiis.”—OOS. 1:3.
TAMAARANABAA
Yesuusi saꞌan deꞌido wurssetta 40 gallassatun oottidobaa nuunikka waati oottana danddayiyakko beꞌana.
1-2. Yesuusa kaalliya naaꞌꞌati Emaahuusa biishin hanidabay aybee?
WODEE Niisaana 16, 33 M.L. Yesuusa kaalliyageeti keehi azzanidosonanne yayyidosona. Etappe naaꞌꞌati Yerusalaameppe kiyidi, yaappe 11 kilo meetiriya gidiyagaa haakkiya Emaahuusa giyo qeeri katamaa boosona. Eti kaalliyo Yesuusi hayqqido gishshawu keehi unꞌꞌettidosona. Eti Ayhudatuyyo gitabaa oottana giidi qoppido Masee hayqqiichchiis. Shin eti qoppibeennabay haniis.
2 Issi bitanee etakko yiidi etaara hemettiyogaa doommiis. Yesuusa kaalliyageeti Yesuusa bolli gakkida azzanttiyabata he bitaniyawu yootidosona. Yaatin he bitanee eti mule dogennabaa etayyo yootiyogaa doommiis. I Masee waayettananne hayqqana koshshidoy aybissakko qonccissanawu, “Muuseenne Xoossay erissidobaa yootiyageeti ubbay xafidobaappe doommidi” etawu yootiis. He heezzu asati Emaahuusa gakkido wode he bitanee Xoossay hayquwappe denttido Yesuusa gidiyogaa shaakki eridosona! Masee deꞌuwan deꞌiyogaa eridi eti keehi ufayttidosona!—Luq. 24:13-35.
3-4. Yesuusa kaalliyageeti waanidonaa, qassi nuuni ha huuphe yohuwan ay beꞌanee? (Oosuwa 1:3)
3 Yesuusi saꞌan deꞌido wurssetta 40 gallassatun bana kaalliyageetussi darotoo qoncciis. (Oosuwa 1:3 nabbaba.) He wode Yesuusi A kaalliya azzanidanne yayyidaageeta minttettiis. Hegaa gishshawu eti keehi ufayttidosonanne Xoossaa Kawotettaabaa yootiya mishiraachchuwa sabbakanawunne tamaarissanawu xala gididosona. a
4 He wode Yesuusi oottidobaa xannaꞌiyogee nuna maaddana danddayees. Ha huuphe yohuwan, Yesuusi he wodiya (1) bana kaalliyageeta minttettanawu, (2) eti Geeshsha Maxaafaabaa loytti akeekanaadan maaddanawu, qassi (3) sinttappe oottana oosuwawu eta loohissanawu waati goꞌettidaakko beꞌana. He ubba hanotatunkka nuuni Yesuusa leemisuwa waati kaallana danddayiyakko beꞌana.
HARATA MINTTETTA
5. Yesuusa kaalliyageetussi minttettoy koshshidoy aybissee?
5 Yesuusa kaalliyageetussi minttettoy koshshiis. Aybissi? Amaridaageeti Yesuusa kaallanawu bantta keettaa, bantta so asaanne bantta oosuwa aggidosona. (Mat. 19:27) Harati qassi A kaalliyageeta gidido gishshawu wolqqaama naaqoy eta gakkiis. (Yoh. 9:22) Eti bantta goꞌꞌaa aggibayidoy Yesuusi yaana geetettida Mase gidiyogaa ammanido gishshataassa. (Mat. 16:16) Shin eti asay Yesuusa worido wode aybi hananaakko eribeenna gishshawu keehi azzanidosonanne hidootaa qanxxidosona.
6. Yesuusi hayquwappe denddi simmidi ay oottidee?
6 Yesuusi bana kaalliyageeti I hayqqido wode keehi azzanidoogee wottin deꞌiyaba gidiyogaa akeekiis. Qassi eti azzanidoy etawu ammanoy paccido gishshawu gidennaagaa I erees. Yaatiyo gishshawu, I hayquwappe denddido gallassi ba laggeta minttettiyogaa doommiis. Leemisuwawu, Yesuusa duufuwa matan yeekkaydda deꞌiya Magddala Mayraamissi I qoncciis. (Yoh. 20:11, 16) Emaahuusa biiddi deꞌiya bana kaalliya naaꞌꞌatussikka I qoncciis. Qassi kiitettida Pheexiroosawu qoncciis. (Luq. 24:34) Yesuusi oottidobaappe nuuni ay tamaarana danddayiyoo? Magddala Mayraamissi I qonccido wode aybi hanidaakko beꞌa.
7. Yohaannisa 20:11-16n odettidaagaadan, Niisaana 16 guuran Mayraama waanishin Yesuusi beꞌidee, qassi I O waatidee? (Misiliyakka xeella.)
7 Yohaannisa 20:11-16 nabbaba. Niisaana 16 guuran, amarida maccaasati Yesuusi moogettido duufuwakko biidosona. (Luq. 24:1, 10) Etappe issinniyo gidida Magddala Mayraamibaa ane beꞌoos. Eti duufuwakko gakkido wode Yesuusa anhaa demmibookkona. Yaaniyo gishshawu A Pheexiroosawunne Yohaannisawu yootanawu woxxaydda baasu. He attumaasati duufuwakko woxxiiddi biidosona; qassi Mayraamakka eta geeduwa kaallaasu. Eti duufuwan Yesuusa anhay baynnaagaa beꞌidi soo simmidosona. Shin Mayraama simmabeykku. A yeekkaydda yan takkaasu. A akeekana xayikkokka Yesuusi yan deꞌees. I ha ammanettida maccaasiya yeekkiyogaa beꞌidi O minttettanawu koyiis. Yaaniyo gishshawu I Mayraamiyyo qonccidi O keehi minttettiyabaa oottiis. Yesuusi O haasayissiisinne I hayquwappe denddidoogaa A ishanttussi yootiyo gita aawatettaa iyyo immiis.—Yoh. 20:17, 18.
Azzanidaageetu hanotaa akeekiyogaaninne etassi qarettiyogan Yesuusa leemisuwa kaalla (Mentto 7 xeella)
8. Nuuni Yesuusa leemisuwa waati kaallana danddayiyoo?
8 Nuuni Yesuusa leemisuwa waati kaallana danddayiyoo? Yesuusaagaadan nuunikka nu ishanttanne michchontta qofissiyabaa loytti akeekikko, qassi eta qaretan haasayisikko eti Yihoowawu haggaaziyogaa aggennaadan loytti maaddana danddayoos. Wolqqaama daafan I michchiya hayqqido Joslano giyo michchee hanotaa ane beꞌoos. A hagaadan gaasu: “Daro aginawu taani keehi kayyottaas.” Gidikkokka issi ishaynne A machchiya bantta soo O shoobbidosona, A haasayiyobaa qaretan ezggidosona, qassi Xoossay O xoqqu ootti xeelliyogaa iyyo yootidosona. Joslana hagaadan gaasu: “Wolqqaama abbaa beetaappe shemppuwa ashshiya wolwoluwakko tana goochchanawu Yihooway eta goꞌettidabadan tawu siyettees. Taani kaseegaadan Yihoowawu haggaazanawu koyanaadan eti tana maaddidosona.” Nuunikka harati banttawu siyettiyabaa yootiyo wode wozanappe ezggiyogaaninne qaretan eta haasayissiyogan eta minttettana danddayoos. Yaatiyogan eti Yihoowawu ubbatoo haggaazanaadan maaddana danddayoos.—Roo. 12:15.
XOOSSAA QAALAA AKEEKANAADAN HARATA MAADDA
9. Yesuusa kaalliyageeta metidabay aybee, qassi Yesuusi eta waati maaddidee?
9 Yesuusa kaalliyageeti Xoossaa Qaalaa ammanidi hegaa bantta deꞌuwan oosuwan peeshshanawu minni baaxetidosona. (Yoh. 17:6) Shin eti Yesuusi danobaa oottida asadan mittan kaqettidi hayqqidoy aybissakko akeekana danddayibookkona. Yesuusi bana kaalliyageetussi ammanoy deꞌiyogaanne eti Yihoowa siiqiyogaa xalaala gidennan, eti Xoossaa Qaalaa loytti akeekana koshshiyogaakka eriis. (Luq. 9:44, 45; Yoh. 20:9) Yaaniyo gishshawu eti Xoossaa Qaalaa loytti akeekanaadan maaddiis. I bana kaalliya naaꞌꞌatussi Emaahuusa efiya ogiyan qonccido wode hegaadan waati oottidaakko ane beꞌoos.
10. Yesuusi tumuppe I Mase gidiyogaa bana kaalliyageeti ammananaadan waatidee? (Luqaasa 24:18-27)
10 Luqaasa 24:18-27 nabbaba. Yesuusi ba oonatettaa he asatuyyo sohuwara qonccissibeenna. I eta oyshata oychchiis. Aybissi? Geella I eti bantta wozanan deꞌiyabaa yootanaadan koyennan aggenna. Qassi eti hegaadan oottidosona. Yesuusi Israaꞌeelata Rooma haaruwappe laꞌa kessana giidi eti qoppidoogaa awu yootidosona. Eti bantta wozanan qoppiyobaa yooti simmin Yesuusi daro hiraagati polettidoogaa qonccissanawu Geeshsha Maxaafaa goꞌettiis. b He galla omarssi, Yesuusi bana kaalliya haratuura gayttidi he hiraagatu birshshettaa etayyokka qonccissiis. (Luq. 24:33-48) Ha taarikiyappe nuuni ay tamaariyoo?
11-12. (a) Yesuusi Geeshsha Maxaafaa tumaa tamaarissido ogiyappe nuuni ay tamaarana danddayiyoo? (Misiliyakka xeella.) (b) Nortta Geeshsha Maxaafaa xannaꞌissida ishay A waati maaddidee?
11 Nuuni Yesuusa leemisuwa waati kaallana danddayiyoo? Koyruwan, neeni Geeshsha Maxaafaa xannaꞌiyageeta tamaarissiyo wode eti bantta wozanan deꞌiyabaa yootanaadan maaddiya oyshata hiillan oychcha. (Lee. 20:5) Neeni eta wozanan deꞌiyabaa erikko, eta hanotawu maaddiya xiqiseta eti waati demmanaakko bessa. Eti oottanabaa yootoppa. Shin Geeshsha Maxaafaa loytti akeekanaadaaninne Geeshsha Maxaafay yootiyo maarata bantta deꞌuwan waati oosuwan peeshshanaakko eranaadan maadda. Gaanan deꞌiya Nortta giyo ishaa hanotaa beꞌa.
12 Nortti Geeshsha Maxaafaa xannaꞌiyogaa doommiyo wode awu layttay 16. Shin sohuwara so asaappe yedetay A gakkiis. Geeshsha Maxaafaa xannaꞌiyogaa aggennaadan A maaddidabay aybee? A xannaꞌissiya ishay tumu Kiristtaaneta yedetay gakkanaagaa Maatiyosa shemppo 10ppe awu qonccissiis. Nortti hagaadan giis; “Yaaniyo gishshawu yedetay tana gakkiyogaa doommido wode, taani xannaꞌiyobay tuma gidiyogaa ammanettaas.” Qassi xannaꞌissiyagee Nortti haymaanootiyabaa so asaara haasayiyo wode cincca gidanaadaaninne bonchchiyogaa bessiya ogiyan haasayanaadan maaddanawu Maatiyosa 10:16 awu loytti qonccissiis. Nortti haattan muuketti simmidi aqinye gidanawu amottikkokka, A aaway I yuniversttiya baana mala koyiis. Xannaꞌissiyagee Nortti oottana koshshiyabaa awu yootiyogaappe oyshata oychchiyogan I Geeshsha Maxaafay yootiyo maarata loytti akeekanaadan maaddiis. Yaatin Nortti waatidee? Nortti ubba wode haggaazuwa doommanawu kuuyiis. A aaway A sooppe gooddiis. Nortta bolli gakkidabati I waananaadan oottidonaa? I hagaadan giis: “Taani suurebaa dooridoogaa ammanettaas.” Nuuni wodiya bazzidi harati Geeshsha Maxaafaa loytti akeekanaadan maaddikko eti mino Kiristtaane gidanaadan maaddana danddayoos.—Efi. 3:16-19.
Geeshsha Maxaafaa loytti akeekanaadan harata maaddiyogan Yesuusa leemisuwa kaalla (Mentto 11 xeella) e
ISHANTTI ‘IMOTA GIDIDA ASATA’ GIDANAADAN LOOHISSA
13. Yesuusi I saluwa bi simmin sabbakuwa oosoy eqqenna mala waatidee? (Efisoona 4:8, 11)
13 Yesuusi saꞌan deꞌiyo wode A Aaway awu immido oosuwa wottiyobi baynna ogiyan poliis. (Yoh. 17:4) Shin Yesuusi ‘Yihooway koyiyobaa oottana danddayiyay ta xalaala’ giidi qoppibeenna. Qassi Yesuusi ha saꞌan sabbakido heezzu layttanne bagga gidiya wodiyan harata loohissiis. Yesuusi bana kaalliyageetun ammanettido gishshawu mishiraachchuwa sabbakanaadaaninne tamaarissanaadan, qassi Yihoowa asaa heemmanaadan aawatettaa etawu immiis. Ha aawatettaa ekkida amaridaageetussi layttay 30 waayi gakkana. (Efisoona 4:8, 11 nabbaba.) He attumaageeti Yesuusaara minni oottidosonanne awu ammanettidosona; shin I saluwa baanaappe kase eti ‘imota gidida asata’ gidana mala gujjidi loohissiis.—Efi. 4:8.
14. Yesuusi saꞌan deꞌido wurssetta 40 gallassatun bana kaalliyageeti ayyaanaaban minnanaadan waatidee? (Misiliyakka xeella.)
14 Yesuusi bana kaalliyageetussi koshshiya zoriya siiquwan yootiis. Leemisuwawu, etappe amaridaageeti I hayquwappe denddidoogaa tumuppe ammanibeennaagaa I akeekido gishshawu, eti tumaa eranaadan maaddiya ogiyan zoriis. (Luq. 24:25-27; Yoh. 20:27) Qassi I eti miishshaa demmanawu baaxetiyogan gidennan, Yihoowa asaa heemmiyogan xeelaa wottanaadan yootiis. (Yoh. 21:15) Hegaa bollikka, eti Yihoowa haggaazuwan oottiyobaa haratuugaara geeddarssennaadan eta hassayissiis. (Yoh. 21:20-22) Qassi amaridaageeti Xoossaa Kawotettaa xeelliyagan qoppiyo bala qofaa suurissiisinne eti mishiraachchuwa yootiyogan xeelaa wottanaadan maaddiis. (Oos. 1:6-8) Cimati Yesuusappe ay tamaarana danddayiyonaa?
Attumaageeti gujo aawatettata polanaadan loohissiyogan Yesuusa leemisuwa kaalla (Mentto 14 xeella)
15-16. (a) Cimati Yesuusa leemisuwa ayba ogetun kaallana danddayiyonaa? Qonccissa. (b) Patriki zoriya siyidi waani goꞌettidee?
15 Cimati Yesuusa leemisuwa waati kaallana danddayiyonaa? Galchchan gujo aawatettata polana mala eti yelagata gujjin, ishantta loohissana bessees. c He ishantti darobaa tamaarana koshshiyogaa cimati akeekoosona. Yelaga ishantti banttana ziqqi oottiyageeta, ammanettiyageetanne bantta dosan harata maaddiyageeta gidana mala cimati eta siiquwan loohissana koshshees.—1 Xim. 3:1; 2 Xim. 2:2; 1 PHe. 5:5.
16 Zoriya siyidi goꞌettida Patrika giyo ishaa hanotaa ane beꞌoos. I yelagatettan deꞌiyo wode, haray atto michchontta qohiyabaakka haasayeesinne eta naaqqees. Kayma gidida issi cimay Patrika shugo miyyiya akeekidi kehatettan qoncce zoriya zoriis. Patriki hagaadan giis: “I yaatidoogan taani keehi ufayttaas. Hara ishantti ta koyiyo aawatettata ekkidoogaa taani beꞌiyo wode hidootaa qanxxays. Shin he cimay zoridobay galchchan aawatettaa demmiyogan xeelaa wottiyogaappe tana ziqqi oottananne ta ishanttanne michchontta siiqana koshshiyogaa taani akeekanaadan maaddiis.” Hegaappe denddidaagan Patriki bawu layttay 23 gidido wode galchchaa cima gididi sunttettiis.—Lee. 27:9.
17. Yesuusi bana kaalliyageetun ammanettiyogaa waati bessidee?
17 Yesuusi sabbakiyo aawatettaa xalaala gidennan, tamaarissiyo aawatettaakka bana kaalliyageetussi immiis. (Mat. 28:20) Yesuusa kaalliyageeti I azazidobaa oottana danddayennabadan qoppennan waayi aggana. Shin Yesuusi eti he oosuwa oottana danddayiyogaa ammanettiis. Qassi I keehi ammanettido gishshawu etawu hagaadan giis: “Aaway tana kiittidoogaadan, taanikka inttena kiittays.”—Yoh. 20:21.
18. Cimati Yesuusa leemisuwa waati kaallana danddayiyonaa?
18 Cimati Yesuusa leemisuwa waati kaallana danddayiyonaa? Meezee deꞌiyo cimati haratuyyo aawatettaa immoosona. (Pili. 2:19-22) Leemisuwawu, cimati Shiiquwa Addaraashaa geeshshiyogaaninne bottokoniyogan maaddanaadan yelagata shoobbana danddayoosona. Cimati ishanttussi issi oosuwa immidi, hegaa waati oottanaakko eta loohissidoogaappe guyyiyan hegaa eti suure polanaagaa ammanettana danddayoosona. Mata wode cima gidida Maatiwi galchchan dumma dumma aawatettaa polanaadan meezee deꞌiyo cimati A loohissidoogaanne I hegeeta suure polanaagaa cimati an ammanettidoogaa I wozanappe nashshiyogaa yootiis. I hagaadan giis, “Taani balabaa oottiyo wode ta balaappe tamaarada haroodessi giigissana danddayiyo ogiya akeekanaadan eti tana maaddidosona.” d
19. Nuuni ay oottanawu murttana koshshii?
19 Yesuusi saꞌan deꞌido wurssetta 40 gallassatun harata minttettiis, tamaarissiisinne loohissiis. Nuuni A leemisuwa mintti kaallanawu murttidaageeta gidoos. (1 PHe. 2:21) Nu yaatanaadan I nuna maaddana. Qassi I hagaadan giidi qaalaa geliis: “Wodiya wurssettay gakkanaashin, taani ubbatoo inttenaara deꞌiyogaa hassayite.”—Mat. 28:20.
MAZAMURE 15 Yihoowa Bayra Naꞌaa Sabbite!
a Wonggeletinne Geeshsha Maxaafan deꞌiya hara maxaafati Yesuusi hayquwappe denddidi bana kaalliyageetussi darotoo qonccidoogaa yootoosona. Magddala Mayraamiyyo (Yoh. 20:11-18); hara maccaasatuyyo (Mat. 28:8-10; Luq. 24:8-11); bana kaalliya 2tuyyo (Luq. 24:13-15); Pheexiroosayyo (Luq. 24:34); Toomaasi baynnasan ba kiittidoogeetuyyo (Yoh. 20:19-24); Toomaasi deꞌiyosan ba kiittidoogeetuyyo (Yoh. 20:26); bana kaalliya 7tuyyo (Yoh. 21:1, 2); bana kaalliya 500ppe dariya asatuyyo (Mat. 28:16; 1 Qor. 15:6); ba ishaa Yaaqoobayyo (1 Qor. 15:7); ba kiittidoogeetu ubbaayyo (Oos. 1:4); qassi Biitaaniya matan ba kiittidoogeetuyyo qoncciis. (Luq. 24:50-52) I bana kaalliyageetussi hara wodetunkka qonccennan aggenna; shin hegee Geeshsha Maxaafan odettibeenna.—Yoh. 21:25.
b Masiyabaa yootiya hiraagata demmanawu “Masiyaabaa Yootiya Hiraagati Yesuusi Mase Gidiyoogaa Bessiyoonaa?” giya huuphe yohuwa jw.org saytiyan xeella.
c Cima gidida amarida yelagati etawu layttay 25-30 gakkanaashin deꞌiyagaa gidikkonne, woradaa xomoosiyageeta gidana danddayoosona. Gidikkokka, eti kasetidi meezee deꞌiyo cimata gidana koshshees.
d Yelaga ishantti aawatettaa ekkanawu giigidaageeta gidanaadan waati maaddanaakko yootiya qofata demmanawu, Naase 2018 Wochchiyo Keelan sinttaa 11-12n, mentto 15-17nne Hosppune 15, 2015 Wochchiyo Keelan sinttaa 3-13 xeella.
e MISILIYA QONCCISSUWA: Geeshsha Maxaafaa xannaꞌiya bitanee Xoossaa Qaalay yootiyobaa loytti qoppanaadaaninne Yihoowa waati ufayssanaakko akeekanaadan issi ishay maaddees.
