Akkay, hegaa malabay deˈiyoogaa Geeshsha Maxaafaykka taarikeekka yootenna.

Daro Geeshsha Maxaafaa birshettatun ha xiqisee birishshettido ogee, PHawuloosa wode, hayqqidaageetussi xammaqettiyo xinqqatee deˈees giidi issi issi asay qoppanaadan oottees. Leemisuwawu, Wolayttatto Geeshsha Maxaafay, “Haiqqidaageeti mulekka denddennabaa gidikko, asai haiqqidaageetussi aissi xammaqettii?” yaagees.

SHin Geeshsha Maxaafaa eranchcha gidida naaˈˈu asati giidobaa akeeka. Grigory Lokwud giyo Dottoree “hayqqida urawu” xammaqettiyooba giyoobi “taarikee woy geeshsha maxaafi yootiyo xinqqate qommoppe keehi dumma gididaba” gidiyoogaa yootiis. Hegaadankka, Gordon Donald Fi giyo profeseree hagaadan giis: “Hegaa mala xinqqatee deˈiyoogaa bessiyaabi taarikiyan woy geeshsha maxaafan qonccibeenna. Ooratta Maachchan hegaabay odettibeenna; hegaappe simmin deˈiya wodetun, hara ay woosa keettankka gidin, orttodokise Kiristtaanetunkka gidin he meezee deˈenna.”

Geeshsha Maxaafay, Yesuusa ashkkarati ‘asa ubbaa Yesuusa kaalliyaagaa oottidi, xammaqananne I eta azazidobaa ubbaa naagana mala tamaarissana’ koshshiyoogaa yootees. (Maa. 28:19, 20) Issi uri xammaqettidi erissiyo ashkkara gidanaappe kase, Yihoowabaanne Yesuusabaa tamaarana, eta ammanana, qassi etawu azazettana bessees. Hayqqidi duufuwan deˈiya asi hegaadan oottana danddayenna; paxa deˈiya Kiristtaaneekka hegaa awu oottana danddayenna.—Era. 9:5, 10; Yoh. 4:1; 1 Qor. 1:14-16.

Yaatin, PHawuloosi gaana koyidobay aybee?

Issi issi Kiristtaaneti hayqqidaageeti denddanaagaa siridosona. (1 Qor. 15:12) Hegee bala gidiyoogaa PHawuloosi etawu qonccissiis. I ‘wonttin wonttin hayqqiyoogaa’ yootiis. He wode I paxa deˈiyoogee qoncce. SHin I gita metoy gakkishinkka, hayquwaappe simmin, Yesuusaagaadan wolqqaama ayyaana mereta gididi denddanaagaa ammanettiis.—1 Qor. 15:30-32, 42-44.

Ayyaanan tiyettida Kiristtaaneti hayquwaappe denddanaappe kase, galla galla banttana gakkiya metuwaanne hayquwaa genccana bessiyoogaa Qoronttoosan deˈiya Kiristtaaneti akeekana koshshiis. ‘Kiristtoos Yesuusaara gidanawu xammaqettiyoogee hayquwankka aara gidanawu xammaqettiyoogaa.’ (Roo. 6:3) Eti xammaqettiyo leemiso xinqqatee hayqquwaa kaalettiyaabanne eti saluwaa deˈuwawu denddanaadan oottiyaaba.

Haattan xammaqettoosappe naaˈˈu layttappe dariya wodee aadhdhi simmin, Yesuusi ba kiittido naaˈˈata, “Taani xammaqettanau bessiyo xinqqatiyaakka intte xammaqettana” yaagiis. (Mar. 10:38, 39) He wode Yesuusi haattan xammaqettiyoogaabaa gidennan, I ammanettidi deˈiyoogee hayquwaa kaalettanaagaa yootana koyiis. PHawuloosi ayyaanan tiyettida Kiristtaaneti “waayiyaa aara shaakkikko, a bonchchuwaakka aara [shaakkanaagaa]” yootiis. (Roo. 8:16, 17; 2 Qor. 4:17) Yaatiyo gishshawu, etikka saluwaa deˈuwawu denddanawu hayqqana bessees.

Hegaappe denddidaagan, PHawuloosi giidobay kaallidi deˈiyaagaadan suure birshshettana danddayees: “Hegaa gidana xaykko, hayquwawu xammaqettiyoogeeti ayba goˈˈa demmanee? Hayqqidaageeti mulekka denddennaba gidikko, etikka hayquwawu xammaqettiyo gaasoy aybee?”