Xoossaakko Woossiyoogaa Xeelliyaagan Asay Woygii?
“Taani woossiyo wode, Xoossay ta miyyiyan deˈiyaakko, hidootaa qanxxiyo wode, I ta kushiyaa oyqqidi tana kaalettana gaada qoppays.”—MAARIYO.
“Ta keettaayiyaa 13 layttawu kansseriyaa hargga simmada hayqqaasu. Taani Xoossaakko ubba galla woossiyoogaa hassayays; qassi taani tuggatada woossiyoogaa I tumuppe siyiyaabadan tawu siyettees. Taani woppaa demmaas.”—RAWULA.
“Woosay Xoossay asawu immido ufayssiya imota.”—ARENA.
Maariyissi, Rawulassi, Arenaassinne hara darotussi woosay dumma imota. Woosaa baggaara eti Xoossaa haasayissana, galatananne maaduwaa A oychchana danddayiyaabadan qoppoosona. Xoossaakko woossiyoogaa xeelliyaagan Geeshsha Maxaafay yootiyoobay tuma gidiyoogaa eti mintti ammanoosona: “Xoossai koyiyoogaadan, ainne nuuni a woossikko, i siyiyoogaa nuuni eriyo gishshau, a sinttan yayyokko.”—1 Yohaannisa 5:14.
Hara baggaara qassi, woosaabaa Geeshsha Maxaafay yootiyoobaa ammananawu daroti metootoosona. Woosaa xeelliyaagan Istivi bawu siyettiyaabaa hagaadan giis: “Tawu layttay 17 gidido wode, ta heezzu laggeti naaˈˈu dumma dumma daafan hayqqidosona. Issoy kaamiyaa daafan hayqqiis; qassi hara naaˈˈati abban mitettidosona.” Istivi waatidee? “He ubbabay aybissi hanidaakko zaaruwaa demmanawu Xoossaa woossaas, shin zaaruwaa demmabeykke. Hegaa gishshawu, ‘Xoossaa woossana koshshiyoy aybissee?’ gaada tana oychchaas.” Daroti bantta woosay zaaruwaa demmibeennabadan qoppiyo gishshawu aggennan woossana koshshiyoy aybissee? giidi oychchoosona.
Amaridaageeti woosay maaddenna giidi qoppiyo hara gaasoykka deˈees. Issoti issoti, Xoossay nuuyyo koshshiyaabaanne nu metuwaa eriyo gishshawu, nuuni hegaabaa awu yootana koshshenna goosona.
Harati qassi, balabaa kase oottido gishshawu, Xoossay bantta woosaa siyanawu koyenna giidi qoppoosona. Jaana hagaadan gaasu: “Tawu deˈiya gita metoy tana pattennabadan xeelliyoogaa. Taani zilˈˈettanaadan oottiyaaba oottido gishshawu, Xoossay ta woosaa siyana bessiyo asa gidikke gaada tawu yootays.”
Woosaa xeelliyaagan neeyyo aybi siyettii? Woosaa xeelliyaagan neenikka hegaadan qoppiyaaba woy siriyaaba gidikko, Geeshsha Maxaafay hegawu suure zaaruwaa yootana danddayiyo gishshawu minettana danddayaasa. Geeshsha Maxaafay woosaa xeelliyaagan yootiyoobaa nuuni ammanettana danddayoos; * Geeshsha Maxaafay kaallidi deˈiyaageetu mala oyshatuyyo neeni zaaruwaa demmanaadan maaddana danddayees:
-
Xoossay tumuppe nu woosaa siyii?
-
Xoossay issi issi woosaa zaarennay aybissee?
-
Xoossay ne woosaa siyiyoogaa neeni waata ammanettana danddayay?
-
Woosay nena waati maaddana danddayii?
^ MENT. 9 Geeshsha Maxaafan Yesuus Kiristtoosa woosaa gujjin, Xoossaa ashkkarati daroti woossido woosay deˈees. Galˈˈa Maachchaa giyo Ibraawetto Geeshsha Maxaafan 150ppe dariya woosati deˈoosona.
Hageeta Beꞌadii?
YELAGATI OYCHCHIYO OYSHAA
Taani Woossana Koshshiyoy Aybissee?
Woosay issi urawu woppay siyettanaadan oottiyoogaappe hara maadoy deꞌii?
