Waayee gakkanaadan oottiyay Xoossaa gidana xayikko, koshay darota qohanaadan, hiyyeesatettay caddi oyqqanaadan, olaynne harggee keehi qohanaadan, qassi meretay daafabaa gattanaadan oottiyay aybee? Xoossaa Qaalay, Geeshsha Maxaafay asaa waayee gakkiyo heezzu waanna gaasuwaa qonccissees:

1. Ba Xallaa Siiqiyoogaa, Yaaretiyoogaanne Ixxiyoogaa. “Issi asi bau de7iya haariyo maataa hara asa qohanau” goˈettees. (Eranchchaa 8:9) Nagaranchcha, ba xallaa siiqiya, woy meqettaa iita asati qohiyo gishshawu, asay darotoo waayettees.

2. Qaadaynne Wodee Oottoogaadan Haniyaabaa. ‘Qaadaynne wodee oottoogaadan haniyaabaa’ gaasuwan asay darotoo waayettees. (Eranchchaa 9:11) Hegaa giyoogee asay bessenna wodiyan bessennasan deˈees, daafabay gakkees, woy asay naagettenna woy balees giyoogaa.

3. Alamiyaa Haariya Iitaa. Asay waayettiyo waanna gaasuwaa Geeshsha Maxaafay geeshshi yootees. Geeshsha Maxaafay “ha mule sa7aikka xalahe halaqan haarettidoogaa” yootees. (1 Yohaannisa 5:19) Xalahe halaqay koyro Xoossaa kiittanchcha; I wolqqaamaa ayyaana mereta; shin I “tuman” minni eqqibeenna. (Yohaannisa 8:44) Hara ayyaana meretati bantta amuwaa polanawu Seexaanaara issippe Xoossaa bolli makkalidi daydantta gididosona. (Doomettaabaa 6:1-5) Seexaanaynne daydanttati makkaloosappe doommidi, eti ha alamiyaaban wolqqaama iitabaa gattidosona. He hanotay ha wodiyan yaa iitiis. Haˈˈi Dabloosi wolqqaama hanqquwaa hanqqetti uttiisinne ‘saˈa ubbaa balettees’; hegee ‘saˈawu aayyeˈana’ giissiyaabaa ehiis. (Ajjuutaa 12:9, 12) Seexaanay naaqqi haariyaagaa. Asay waayettiyoogan I ufayttees. Asay waayettanaadan oottiyay Xoossaa gidennan, Seexaanaa.

HAGAA QOPPA: Aynne mooribeenna asay waayettanaadan oottiyay keehi iitabaa oottiya qareti baynna ura xalla. SHin Geeshsha Maxaafay, “Xoossai siiqo” yaagees. (1 Yohaannisa 4:8) “Ubbaa Danddayiya Xoossai iitabaa mulekka oottenna”; I siiqiyo gishshawu ba eeshshaara maayiyaabaa oottees.—Iyyooba 34:10.

Gidoppe attin, ‘Seexaanay iita haaruwaa awude gakkanaashin haaranaadan Ubbaa Danddayiya Xoossay coˈˈu gi xeellanee?’ gaada neeni qoppana danddayaasa. Nuuni beˈidoogaadan, Xoossay iitabaa ixxees; qassi nuuni waayettiyoogee I keehi azzananaadan oottees. Hegaa bollikka, A Qaalay hagaadan gees: “I intteyyo qoppiyo gishshau, inttena hirggissiya ubbabaa a bolli olite.” (1 PHeexiroosa 5:7) Xoossay nuna siiqees; qassi, kaalliya huuphe yohoy qonccissiyoogaadan waaye ubbaanne naaqo ubbaa xayssanawu ayyo wolqqay deˈees. *