Xoossay Addaamessi, “Neeni [he mittaappe] miido gallassi tumu haiqqana” yaagiis. (Doomettaabaa 2:17) Xoossay Addaamee cimidi hayqqanaadan medhdhikko, he azazuwaa ayyo immana bessenna. Addaamee he mittaa teeraappe meennan aggikko, hayqqennaagaa erees.

Gannatiyan daro mittaa teeray deˈiyo gishshawu, Addaameenne Hewaana hayqqennan deˈanawu he mittaa teeraappe maana koshshenna. (Doomettaabaa 2:9) He azinaynne machchiyaa mittaa teeraappe meennan aggiyoogan, etawu deˈuwaa immida Yihoowawu azazettiyoogaa bessana danddayoosona shin. Eti ay oottanaakko Xoossay eta azazanawu ayyo maatay deˈiyoogaakka hegan bessana danddayoosona shin.

Addaameenne Hewaana hayqqidoy aybissakko akeekanawu, nuna ubbaa qohidabaa nuuni pilggana koshshees. Seexaanaa Dabloosi shooshshan eqqidi pala wordduwaa worddotiis. Geeshsha Maxaafay hagaadan gees: “SHooshshai GODAI Xoossai medhdhido do7a ubbaappe aadhdhida genanchcha. Issi gallassi shooshshai he maccaasiyo, ‘Xoossai tumu inttena, Gannatiyan de7iya mitta teeraa ubbaappekka mooppite giidee?’ yaagidi oichchiis.”—Doomettaabaa 3:1.

Hewaana zaarada, “CHii, Xoossai hagaadan gibeenna; nuuni gannatiyan de7iya mittatu teeraa maanau danddayoos; shin Xoossai nuna, ‘Gannatiyaassi gidduwan de7iya mitta teeraa mooppite; bochchoppite; hinkkoode intte haiqqana’ giis” yaagaasu. Kaallidi SHooshshay maccaasiyo, “CHii, intte ainnekka haiqqekketa; Xoossai hegaa giidoogee, he mittaa teeraa intte miikko, intte aifee dooyettin, lo77uwaanne iitaa Xoossaadan intte eranaagaa i eriyo gishshaassa” yaagiis. Hegaa gishshawu Seexaanay, Yihooway worddobaa yootidi Addaamanne Hewaano loˈˈobaa diggiis yaagiis.—Doomettaabaa 3:2-5.

Hewaana siyidobaa ammanaasu. A he mittaa teeraa beˈaasu. Hegee xeellanawu loˈˈiyaagaanne amoyiyaagaa gidiyoogaa akeekaasu. Yaatada, A mittaa teeraappe amaridaagaa ekkada maasu. Geeshsha Maxaafay, “Banaara de7iya ba azinaayyookka hegaappe immin, ikka miis” yaagees.—Doomettaabaa 3:6.

I siiqiyo A naati eriiddi ayyo azazettennan ixxidoogaa beˈiyoogee Xoossaa ay keena azzanttideeshsha! I waatidee? Yihooway Addaameyyo hagaadan giis: “Neeni biittau simmana . . . neeni  biittaappe ekettadasa; neeni baana; neeni baanau simmana.” (Doomettaabaa 3:17-19) Hegaappe denddidaagan, “Addaamee muleera 930 laittaa de7idi haiqqiis.” (Doomettaabaa 5:5) Addaamee saluwaa woy harasaa biidi deˈibeenna. Yihooway biittaappe A medhdhanaappe kase I deˈenna. Hegaa gishshawu, I hayqqiyo wode, A deˈoy xayiis; qassi A bollay simmidi biitta gidiis. I mule deˈenna. Ayba azzanttiyaabee!

Addaameenne Hewaana eriiddi azazettennan ixxido gishshawu, nagaranchcha gididosona; qassi merinawu deˈiyo hidootay etappe haliis. Eta bollay cimi cimi biis; qassi eti nagaranchcha gididosona. SHin, Addaameenne Hewaana Xoossawu azazettennan ixxidi nagaranchcha gididoogee qohidoy eta xalla gidenna. Eta naati ubbay nagaranchcha gididi yelettoosona. Roome 5:12y hagaadan gees: “Nagarai ha sa7aa issi asa [Addaame] baggaara geliis; he nagarai banaara haiquwaa ehiis; hegaa gaasuwan, asai ubbai nagara oottido gishshau, haiqoi asa zare ubbaa gakkiis.”

Geeshsha Maxaafay nagaraanne hayquwaa “asa ubbaa [k]ammidabaa, kawotetta ubbaa bollankka micettida magalashuwaa” mala giidi qonccissees. (Isiyaasa 25:7) Asa ubbaa kammidabay ooninne appe attana danddayenna marzziyan moorettida gaappo mala. “Asai ubbai Addaameera dabbotido gishshau” hayqqees. (1 Qoronttoosa 15:22) Kiitettida PHawuloosi, “Tana haiquwau efiya ha asatettaappe ashshanai oonee?” yaagidi oychchiis. Ashshana danddayiyay oonee?—Roome 7:24.