Away baynnaakko saˈan deˈoy deˈenna. Away mittay bonccuwaa kessanaadan, ciiyyanaadaaninne dumma dumma ayfiyaa ayfanaadan wolqqaa immees. Mittay ba xaphuwaa gidduwaara biittaappe haattaa xuuxidi bonccuwaa gattin, hegaappe haattay penttuwan carkkuwan walahettanaadankka away oottees.

Maanawu kattay biittan mokkanaadan Xoossay nuussi iraa immiis. Xoossay iraa saluwaappe bukissees; kattaakka I wodiyan immees; qassi qumaa immidi, nuna daro ufayssees.

Daro aawati bantta so asawu gidiya qumanne maayuwaa demmanawu hirggoosona. Xoossaa Qaalay hagaadan giyoogaa akeeka: “Paalliya kafota xeellite; eti zerokkona; cakkokkona; gootarankka qolokkona; shin saluwan de7iya intte Aawai eta mizees; intte etappe keehi aadhdhekketii?”—Maatiyoosa 6:25, 26.

“Dembban de7iya ciishshati waani dicciyaakko, akeeki xeellite; . . . SHin taani intteyyo odais; harai atto, [Kawuwaa] Solomoni hegaa keena bonchchettidaagaa gidiiddi, he ciishshatuppe issuwaagaa malaa maayibeenna. . . .  Dembbaa maataa maizziyaagee, inttena etaagaappe aattidi waati maizzennee?”—Maatiyoosa 6:28-30.

Xoossay nuussi qumaanne maayuwaa immana danddayiyo gishshawu, I deˈuwawu nuussi koshshiya harabata nu demmanaadan maaddana danddayiyoogaa ammanettoos. Nuuni Xoossaa sheniyaa oottanawu koyikko, nuuni kattaa mokissanawu daafuriyo daafuraa anjjanawu woy nuussi koshshiyaabaa shammanawu oosuwaa nu demmana mala maaddana danddayees.—Maatiyoosa 6:32, 33.

Nuuni awaabaa, iraabaa, kafotubaanne ciishshatubaa loytti qoppiyo wode, Xoossaa siiqiyo loˈˈo gaasoy deˈees. Nuna Medhdhidaagee asaara waani haasayiyaakko kaalliya huuphe yohoy qonccissana.