GEESHSHA MAXAAFAA boriyaageeti, daro layttawu, Daaneela maxaafan odettida Kawuwaa Belshshaaxaari mule deˈibeenna giiddi takkidosona. (Dane. 5:1) Eti hegaadan qoppidoy biittaa bookkidi xannaˈiyaageeti I deˈidoogaa bessiya naqaashaa demmibeenna gishshataassa. SHin, hegee 1854 M.Ln laamettiis. Aybissi?

He laytti, J. J. Teyler geetettiya, Britishe kawunssilee ha wodiyan tohossa Iraaqen deˈiya beni wode Ura katamay laalettido sohuwaa xannaˈiis. Hegan, gita keelaa giddon urqqaappe oosettida koottaa milatiya corabata demmiis. Hegeetu geesay tammu santti meetire keena aduqqees, qassi eta bolli xaafettidabay deˈees. He koottaa milatiyaabatuppe issuwaa bolli xaafettidabatuppe issoy Baabiloone Kawuwaa Naabooniidesinne A bayra naˈaa Belshshaaxaari adussa layttaa deˈanaadan shiiqida woosa. Hegaappe denddidaagan, Belshshaaxaari deˈuwan deˈida asa gididoogaa boriyaageetikka maayettidosona.

SHin, Geeshsha Maxaafay Belshshaaxaari deˈuwan deˈida asa xalla gidennan kawo gidiyoogaa yootees. Boriyaageeti hegee deˈishinkka siroosona. Leemisuwawu, 19tta xeetu layttan deˈida Wiliyam Talbot geetettiya Inggilize saynttisttee issoti issoti “Belshshaaxaari ba aawaa Naaboonidesaara issippe haaridoogaa yootiyoobaa gidikkonne, hegaa bessiya guutta naqaashaykka” baynnaagaa yootiis.

Urqqaappe merettida koottaa milatiya haratun xaafettidabay Belshshaaxaara aawaa Naabonidesi adussa layttawu Baabilooneppe gaxaara takkidoogaa qonccissido wode he palamay shatimettiis. I baynna wode aybi hanidee? Insaykiloppidiyaa Britaanika giyo maxaafay yootiyoogaadan “Naabonidesi baqatidi biido wode, Belshshaaxaari ba araatan uttanaadaaninne olanchchatuppe dariya baggaa azazanaadan sunttiis.” Hegaa gishshawu, Belshshaaxaari he wode Baabiloonen kawodan oottiis. Biittaa bookkidi xannaˈiyaagaanne qaalaa eranchchaa gidida Alen Milardi “Daaneela Maxaafay Belshshaaxaara Baabiloone kawo giidi xaafidoogee” bessiyaaba yaagiis.

Xoossaa ashkkaratussi Daaneela maxaafay ammanttiyaagaanne Xoossaa ayyaanan xaafettidaagaa gidiyoogawu ubbaappe aadhdhiya markkay Geeshsha Maxaafan deˈiya naqaashaa gidiyoogee tuma.—2 Xim. 3:16.