1, 2. (a) Nuuyyo deˈiya ubbabaappe keehi alˈˈobay aybee? (b) Nuuni xoqqu oottidi xeelliyoobati aybee, qassi aybissi? (Doomettan deˈiya misileta xeella.)

NEEYYO deˈiya ubbabaappe keehi alˈˈobay aybee? Appe hiraysiyaabaara hegaa laammuutee? Yihoowassi banttana sheedhdhidi ayyo goynniyaageetussi ha oyshatu zaaroy metenna. Nuuyyo deˈiya ubbabaappe keehi alˈˈobay Yihoowaara dabbotido dabbotaa; qassi hegaa nuuni aybiiranne laammokko. Saluwan deˈiya nu Aawaara dabbotaa minttanaadan maaddida Geeshsha Maxaafaa tumaakka nuuni xoqqu oottidi xeelloos.—Qol. 1:9, 10.

² Gita Asttamaaree ba Qaalaa, Geeshsha Maxaafan nuna tamaarissiyo ubbabaa qoppa! I keehi koshshiya ba sunttaanne ba ufayssiya eeshshata nuussi qonccissees. I ba Naˈaa, Yesuusa baggaara siiquwan giigissido, maalaaliya wozuwaa imotaabaa nuussi yootees. Qassi Mase Kawotettaabaa Yihooway nuussi yootees, hegaa bollikka tiyettidaageeti saluwaa baanawu, ‘hara dorssati’ qassi Gannate gidiya saˈaa laattanawu hidootanaadan oottiis. (Yoh. 10:16) Nuuni waani deˈana bessiyaakko I nuna tamaarissees. Hegeeti nuuni nuna Medhdhidaagaakko shiiqanaadan oottiyo gishshawu, nuuni eta xoqqu oottidi xeelloos. Eti nuuni ufayssiya deˈuwaa deˈanaadan maaddoosona.

3. Tumaa shammiyoogee woygiyoogaa gidennee?

 ³ Yihooway keha Xoossaa. Tumaa koyiyaageeta I loˈˈobaa diggenna. Haray atto, Yihooway ba siiqiyo Naˈaa deˈuwaa nuussi coo immiis. Tumawu nuuni miishshaa qanxxanaadan Xoossay koyennaagee qoncce. Geeshsha ayyaanaa immiyo maataa demmana mala miishshaa immanawu, Simoona giyo bitanee kiitettida PHeexiroosa oychchido wode, PHeexiroosi, “Neeni Xoossaa imuwaa miishshan shammanau qoppido gishshau, ne miishshai nenaara coo xayo” yaagidi A seeriis. (Oos. 8:20) Yaatin, ‘tumaa shammanaadan’ ayyaanaa kaaletuwan azazidoogee woygiyoogee?

4. Nuuni ha huuphe yohuwan tumaabaa ay tamaaranee?

⁴ Leemiso 23:23 nabbaba. Nuuni Xoossaa Qaalan deˈiya tumaa baaxetennan demmokko. Nuuni hegaa demmananawu koshshiya aybanne aggi bayanawu eeno gaana bessees. Leemiso maxaafaa xaafida eranchchay giidoogaadan, nuuni ‘tumaa shammiichchidi’ woy demmiichchidi, hegaa ‘bayzzennaadan’ woy aggennaadan naagettana bessees. Tumaa ‘shammiyoogee’ woygiyoogaakko, qassi nuuni hegawu geella ay qanxxana koshshiyaakko ane beˈoos. Yaatiyoogan, nuuni tumaa wozanappe nashshananne A mule ‘bayzzennaadan’ kaseegaappe aaruwan murttana danddayoos. Nuuni beˈanaagaadan, tumaa shammanawu ay waaganne qanxxiyoogee bessiyaaba.

5, 6. (a) Nuuni miishsha kessennan tumaa waati shammana danddayiyoo? Leemisuwan yoota. (b) Tumay nuna waati maaddii?

⁵ Coo ekkiyoobikka waaga malabaa qanxxissana danddayees. Leemiso 23:23n ‘shamma’ geetettida Ibraawetto qaalay “demma” geetettanakka danddayees. Ha naaˈˈu qaalatikka baaxetiyoogaa woy goˈˈiya issibaa haraban laammiyoogaa bessoosona. Tumaa shammiyoogaa ha leemisuwan qonccissana danddayoos. “Coo Ekkiyo Muuziyaa” giyo erissoy giyan odettiis giidi qoppoos. He muuzee maalaaliya hanotan nu soo yaanee? Akkay, yeenna. Nuuni giyaa biidi he muuziyaa soo ehaana bessees. He muuzee coo ehiidobee? Ee, shin giyaa baanawu baaxenne wode koshshees. Hegaadan, tumaa shammanawu nuussi miishshi koshshenna. SHin, nuuni hegaa demmanawu baaxetana bessees.

⁶ Isiyaasa 55:1-3 nabbaba. Ha sohuwan, ‘tumaa shammiyoogaa’ giyoogee woygiyoogaakko akeekanaadan nuna Yihooway maaddees. Ha xiqisetun, Yihooway ba qaalaa haattan, maattaaninne woyne eessan leemisees. Irxxa, xillo haattaa uyiyoogaadan, Xoossaa qaalaa tumay gazddissees. Qassi maattay nuna minttiyoogaadaaninne naati diccanaadan maaddiyoogaadan, Yihoowa qaalay nuna mintteesinne nuuni ayyaanaaban diccanaadan maaddees. Hegaa bollikka, Yihoowa qaalay woyne eessaa mala. Ayba ogiyan? Geeshsha Maxaafay woyne eessay asaa ufayssiyoogaa yootees. (Maz. 104:15) Yaatiyo gishshawu, Yihooway ba asay ‘woyne eessaa shammanaadan’ yootiyoogan, I zoriyoogaadan deˈiyoogee ufayssiyoogaa nuuni ammanettanaadan oottees. (Maz. 19:8) Xoossaa qaalaa tumaa tamaariyoogeenne oosuwan peeshshiyoogee goˈˈiyoogaa bessiya ayba loˈˈo leemisoo! Qanxxiyooban he baaxiyaa leemisana danddayoos. Hegaa gishshawu, nuuni tumaa shammana mala qanxxanawu koshshana danddayiya ichchashubaa ane beˈoos.

7, 8. (a) Tumaa shammanawu nuussi wodiyaa koshshiyoy aybissee? (b) Issi tamaariyaa agga bayidobay aybee, qassi ay demmadee?

⁷ Wodiyaa. Hegee miishsha qanxxiyoogaadan, tumaa shammiya ooninne qanxxana  bessiyaaba. Kawotettaa mishiraachchuwaa siyanawu, Geeshsha Maxaafaanne Geeshsha Maxaafaa qofay deˈiyo xuufeta nabbabanawu, Geeshsha Maxaafaa xannaˈanawunne gubaaˈe shiiquwawu giigettidi shiiqanawu wode koshshees. Nuuni keehi koshshenna harabawu goˈettana danddayiyo wodiyaa hegawu goˈettana koshshees. (Efisoona 5:15, 16 nabbaba.) Geeshsha Maxaafan koyro erana koshshiyo timirttiyaa eranawu nuussi ay keena wodiyaa koshshii? Hegee nu hanotaadaana. Yihoowa aadhdhida eratettaabaa, A ogiyaabaanne A oosuwaabaa nuuni erana danddayiyoobawu zaway baawa. (Roo. 11:33) Koyro kiyida Wochiyo Keelay tumaa “guutta ciishshan” leemisidi hagaadan giis: “Tumaa ciishshaa issuwaa xallaa demmada gidees gooppa. Issuwaa xallay gidiyaakko, haray daana koshshenna. SHiishshiyoogaa aggoppa; qassi haraakka gujjada koya.” Nuna hagaadan oychchana danddayoos: ‘Taani Yihoowabaa ay keena eridanaa?’ Nuuni merinawu deˈiyo wodekka, Yihoowabaa ubbatoo gujji gujji tamaarana danddayoos. Ha wodiyan keehi koshshiyaabay, nu hanotaadan, shammana danddayiyo tuma ubbaa shammanawu nu wodiyaa loytti goˈettiyoogaa. Tumaa keehi koyida issi maccaaseebaa qoppa.

⁸ Mariko * giyo Jaappaane biittaa yelagiya tamaaranawu Amarkkan, Niwu York Siti katamaa yaasu. He wode, A 1959n Jaappaanen doommida haymaanootiyaa kaallawusu. Issi aqinye michchiyaa sooppe soo haggaazaydda Marikiira gayttaasu. Marika Geeshsha Maxaafaa tumaa tamaariyoogaa doommido wode keehi ufayttido gishshawu, saaminttan naaˈˈutoo xannaˈanawu aqinyiyo oychchaasu. Marika daro saatiyaa tamaariyaabanne amarida saatiyaa oottiyaaba gidikkonne, gubaaˈe shiiquwaa shiiqiyoogaa sohuwaara doommaasu. A tumaa tamaaranawu wodiyaa demmana mala, allaxxiyo amaridabaa aggaasu. A hegaadan ba goˈˈaa aggidoogee ayyaanaaban eesuwan diccanaadan O maaddiis. Issi laytta giddon A xammaqettaasu. Usuppun aginappe guyyiyan, 2006n, A aqinye gidaasu, qassi hanno gakkanawu aqinye gidada haggaazawusu.

9, 10. (a) Tumaa shammiyoogee nuuni aquwaabaa xeelliyo xeelaa waati laammii? (b) Issi yelagiyaa ay aggadee, qassi hegan iyyo aybi siyettii?

⁹ Aquwawu maaddiyaabaa. Nuuni tumaa shammanawu loˈˈo oosuwaa aggiyoogee koshshana danddayees. Moliyaa oyqqiya PHeexiroosinne Inddiraasi ‘asa oyqqiyaageeta’ gidanaadan Yesuusi eta shoobbido wode, eti ‘bantta gitiyaa yeggi bayidoosona.’ (Maa. 4:18-20) Ha wodiyan tumaa tamaariya daroti bantta oosuwaa aggi bayana danddayennaagee tuma. Issi uri oottananne ba soo asawu koshshiyaabaa kunttana koshshees. (1 Xim. 5:8) SHin, tumaa tamaariyaageeti eti aquwaabaa xeelliyo ogiyaanne eti kaseyiyoobaa issi issitoo laammana bessees. Yesuusi, “Sa7an intte huuphessi miishsha dagayoppite. SHin . . . intte huuphessi saluwan miishsha dagayite” yaagidi hegaa loytti qonccissiis. (Maa. 6:19, 20) Mariyo giyo yelagiyaa hegaadan oottaasu.

¹⁰ Mariya timirttiyaa doommanaappe kasekka golf giyo kaassaa kaaˈawusu. A naaˈˈantto xekka timirttiyaa tamaariyo wode golfiyaa kaassan yaa goobaasu; qassi guyyeppe miishsha qanxxennan yuniversttiyan tamaaranaadan shoobettaasu. Mariya golfiyaa kaaˈiyoogan keehi erettidaaro gidada daro miishshaa demmanawu halchchaasu. He wode Mariya Geeshsha Maxaafaa xannaˈiyoogaa doommaasu, qassi ba tamaariyo tumaa dosaasu. Tumay maaddin ba deˈuwan laamettidoban A ufayttaasu. A, “Taani ta xeelaanne ta deˈuwaa Geeshsha Maxaafaa maaraadan laamma laamma biyo wode, keehi ufayttaas” yaagaasu. Ayyaanaabaanne  aquwan duretiyoogaa ubbatoo issippe qoppiyoogee O metanaagaa Mariya akeekaasu. (Maa. 6:24) A ba deˈuwan ubbatoo golfiyaa kaassan erettanawu, duretanawunne hayttatanawu halchchidoogaa aggiyoogan, waaga malabaa qanxxaasu. SHin tumaa shammidoogaappe denddidaagan, A haˈˈi aqinye gidada haggaazawusunne “aybippenne aaruwan ufayssiya, loˈˈo deˈo” gaada A yootiyo deˈuwaa deˈawusu.

11. Nuuni tumaa shammiyo wode, nu dabbotuppe amaridaageeti waanana danddayiyoonaa?

¹¹ Dabbotaa. Geeshsha Maxaafaa tumaadan deˈanawu nuuni kuuyiyo wode, nu laggetuuranne nu dabbotuura nu issippetettay kaseegaa keena mino gidennan aggana danddayees. Aybissi? Yesuusi bana kaalliyaageeta xeelliyaagan, “Neeni tumatettan eta nebaa ootta; ne qaalaikka tumatettaa” yaagidi woossiis. (Yoh. 17:17) “Eta nebaa ootta” geetettidaagee eta dummaya geetettanakka danddayees. Nuuni tumaa ekkiyo wode, alamiyaa milatiyoogaa aggiyo gishshawu appe dummatoos. Nuuni xoqqu ootti xeelliyoobay laamettido gishshawu asay nuna kaseegaadan xeellenna. Nuuni Geeshsha Maxaafan deˈiya tumaadan deˈoos. Nuuni nu laggetuuranne nu dabbotuura ubbatoo sarotettan deˈanawu baaxetikkonne, issoti issoti nuna kaseegaa keena dosennan aggananne haray atto nu ooratta ammanuwaa eqettana danddayoosona. Nuuni hegan garamettokko. Yesuusi, “Asassi morkketi a so asata gidana” yaagiis. (Maa. 10:36) SHin, nuuni ay keena darobaa aggikkonne, hegaappe keehi aadhdhiyaabaa demmanaagaa Yesuusi yootiis!—Marqqoosa 10:28-30 nabbaba.

12. Issi Ayhuda bitanee tumaa gishshawu ay aggidee?

¹² Ayhuda asa gidida Aaroona giyo zalˈˈanchchay Xoossaa sunttaa xeesana bessennaagaa naatettaappe doommidi tamaariis. Gidikkonne, Aarooni tumaa saamettiis. Ibraawetto oyddu guttuma pitaletun ustta pitaletu malaataa gujjin Xoossaa sunttay “Yihoowa” geetettana danddayiyoogaa issi Yihoowa Markkay bessin, I keehi ufayttiis. I keehi ufayttidi, tamaarissiyaageetuyyo ba eridobaa yootanawu Ayhudatu woosa keetti biis. Eta hanotay Aarooni qoppidoogaa mala gidenna. I Xoossaa sunttaabaa tumaa eridi ufayttidoogaadan ufayttiyoogaappe, eti A bolli cuchchidosonanne A bohidosona. A soo asaykka aban ufayttibeenna. I hegan yayyennan, aggennan tumaa shammiis; qassi I ba deˈuwan xala Yihoowa Markka gididi oottiis. Nuuni tumaa tamaariyo wode haratuura kaseegaadan dabbotennan aggana danddayiyoogaa nuunikka naagana koshshees.

13, 14. Tumaa shammanawu nuuni qoppiyoobaaninne oottiyooban laamettana koshshiyoobay aybee? Leemisuwaa yoota.

¹³ Qoppiyoonne oottiyo geeshsha gidennabaa. Tumaa ekkanawunne Geeshsha Maxaafay yootiyo kandduwaa maaraadan deˈanawu nuuni qoppiyoobaaninne oottiyooban laamettanawu eeno gaana bessees. He laamettiyoobaa xeelliyaagan PHeexiroosi woygidaakko akeeka. I, “Xoossau azazettite; intte kase erennan amottido amuwaa kaalloppite. SHin . . . intte ooso ubban geeshsha gidite” yaagiis. (1 PHe. 1:14-16) Daro asay pokkobaa haniyo Qoronttoosa katamaa asati tumaa shammanawu bantta deˈuwan keehi laamettidosona. (1 Qor. 6:9-11) Ha wodiyan, tumaa tamaariyo wode daroti hegaadan laamettoosona. PHeexiroosi hagaadan giidi hegaa qonccissiis: “Aihuda gidenna asai oottanau dosiyoogaa intte oottiiddi, shaaramuxanau qaaqqatiyoogan, amuwan, mattuwan, yettan, ushshan, pokkiya eeqau goinniyoogan, de7ido kase aadhdhida wodee intteyyo gidana.”—1 PHe. 4:3.

 ¹⁴ Daro layttawu, Devininne Jazmena mattottiiddi deˈidosona. Devini miishshaara gayttidabaa oottikkonne, ushshaa likkiyaappe aattidi uyiyo gishshawu, oottiyo oosuwan daro takkenna. Jazmena hanqqettiyoogaaninne warettiyoogan erettawusu. Issi galla Jazmena mattottada ogiyan hemettishin, naaˈˈu misoonaawe Yihoowa Markkati iira gayttidosona. Misoonaaweti Geeshsha Maxaafaa xannaˈissanawu keeridosona; shin kaalliya saaminttan eti Devina soo biyo wode Jazmenakka Devinikka mattotti uttidosona. Eti misoonaaweti etassi qoppidi eta soo yaana giidi qoppibookkona. Haroode misoonaaweti biyo wode hanotay kaseegaa mala gidenna. Jazmenanne Devini koyro gallassappe doommidi Geeshsha Maxaafaa minnidi xannaˈidosonanne tamaaridobaa oosuwan peeshshiyoogaa doommidosona. Heezzu agina giddon eti ushshaa agganawu kuuyidosona; qassi guyyeppe higgiyan koyettiyaagaadan azinanne machcho gididosona. Eti laamettidoogee keehi erettiis; qassi hegee eta heeran deˈiya hara daroti Geeshsha Maxaafaa xannaˈanaadan denttettiis.

15. Miishsha qanxxiyoogaadan tumawu giidi qanxxiyo keehi metiyaabaappe issoy aybee, qassi aybissi?

¹⁵ Xoossaa ufayssenna meeziyaanne oosuwaa. Miishsha qanxxiyoogaadan tumawu giidi qanxxiyo keehi metiyaabaappe issoy Xoossaa ufayssenna meeziyaanne oosuwaa aggiyoogaa. Issoti issoti he meeziyaa agganaadan Geeshsha Maxaafay yootiyoobaa ekkanawu metootana xayikkonne, harata eta soo asay, etaara oottiyaageetinne eta mata laggeti wayssiyo gishshawu, eta hegee metana danddayees. Issi meezee hayqqida dabbota bonchchiyoogaara gayttidaba gidikko, hanotay keehi yiilloyana danddayees. (Zaa. 14:1) Harati xalidi oottido loˈˈobay laamettana bessiyaaban laamettanaadan nuna maaddana danddayees. Koyro xeetu layttan Efisoonan deˈiya amaridaageeti xalidi oottidobaa beˈa.

16. Efisoonan deˈiya amaridaageeti tumaa shammanawu ay oottidonaa?

¹⁶ Efisoona katamay bitan keehi erettees. Bitiyoogaa aggidi mati Kiristtaane gididaageeti Xoossaa ufayssenna he oosuwaa aggidi tumaa shammanawu ay oottidonaa? Geeshsha Maxaafay hagaadan gees: “Bitiyaageetuppe daroti bantta maxaafata shiishshidi, asaa ubbaa sinttan xuuggidosona; he maxaafatu waagaa qoodiyo wode, ishatamu sha7u bira gidiis. Hegaa mala wolqqaama ogiyan Xoossaa qaalai dicceesinne aakkees.” (Oos. 19:19, 20) Ha ammanettida Kiristtaaneti hegaa keena alˈˈobaa aggibayidi daro anjjuwaa demmidosona.

17. (a) Tumaa gishshawu nuuni aggibayana danddayiyo issi issibay aybee? (b) Kaalliya huuphe yohuwan nuuni pilggana oyshati awugeetee?

¹⁷ Neeni tumaa tamaaranawu ay aggabayadii? Tumaa ciishshaa shiishshanawu nuussi ubbawu wodiyaa koshshees. Issoti issoti qassi aquwawu maaddiyaabaa aggibayiyoogaaninne haratuura dabbotay kaseegaa mala gidana xayikkonne gencciyoogan, waaga malabaa tumawu qanxxoosona. Daroti qoppiyoobaaninne oottiyooban laamettananne Xoossaa ufayssenna meeziyaanne oosuwaa aggana koshshees. Ay aggi bayikkonne, Geeshsha Maxaafaa tumawu nuuni ay keena waagaa qanxxiyoogeekka bessiyaaba gidiyoogaa ammanoos. Hegee Yihoowayyo mata dabbo gidiyo, nuuyyo deˈiya aybippenne alˈˈobaa demmanaadan oottiis. Nuuni tumaa eridoogan demmido anjjuwaa wotti denttidi qoppiyo wode, ooninne hegaa bayzzanawu koyees giidi qoppiyoogee metiyaaba. Hegee waani hanana danddayii, qassi nuuni hegaa mala gita mooro moorennaadan waani naagettana danddayiyoo? Kaalliya huuphe yohuwan nuuni ha oyshata pilggana.