1. Minttettoy nuussi ubbawu koshshiyoy aybissee?

MINTTETTOY nuussi ubbawu koshshees. Nu deˈoy hirggan, azzanuwaaninne metuwan kumidaagaa gidana danddayees. Ceegatettay, harggee, woy nu siiqiyo ura hayqoy kaalettidoban nuuni keehi azzaniiddi deˈiyaageeta gidana danddayoos. Nuuppe amaridaageeta harati ixxoosona. Nu yuushuwan danobay keehi dariis. Ha “waissiya wodee” nuuni “wurssetta gallassi” deˈiyoogaa bessiyaaba gidiyoogaanne issi gallassay aadhdhiyo wode ooratta alamee matattiyoogaa ammanoos. (2 Xim. 3:1) SHin, nuuni Yihooway qaalaa gelidobay polettanaagaa daro wodiyawu naagiiddi takkennan aggokko, qassi metoy dari dari beennan aggenna. Yaatin, nuuni minttettuwaa awappe demmana danddayiyoo?

2, 3. (a) Nuuni Imbbaaqoomabaa eriyoobay aybee? (b) Nuuni Imbbaaqooma maxaafaa xannaˈanay aybissee?

² He oyshaa zaaranawu, ane Imbbaaqooma maxaafaa pilggoos. Imbbaaqooma deˈuwaabaanne A oosuwaabaa Geeshsha Maxaafay wurssi yootana xayikkonne, A sunttan xeesettiya maxaafay minttettees. A sunttaa birshshettay “siiquwan qoommiyoogaa” giyoogaa gidennan aggenna. Hegee Yihooway nuna  siiquwan qoommiyaabadan minttettiyoogaa woy ayyo goynniyaageeti ammanettidi A mintti oyqqiyoogaa bessiyaaba gidana danddayees. Imbbaaqoomi Xoossaara haasayidi, A issi issi oyshata oychchiis. Imbbaaqoomi he haasayaa xaafanaadan Yihooway denttettido gishshawu, I nu gishshaa oychchiis giyoogaa mala.—Imb. 2:2.

³ Geeshsha Maxaafay Imbbaaqoomabaa nuussi yootiyoobay hananabaa yootiya he unˈˈettidaagee Yihoowaara haasayido he haasayaa xalaala. A maxaafay Xoossaa Qaalaa, Geeshsha Maxaafan “Xoossaa maxaafai nuuyyo immiyo genccaaninne minttettuwan” nuussi hidootay deˈana mala kasetidi ‘xaafettida ubbabaa’ shaaho. (Roo. 15:4) Imbbaaqooma maxaafaappe nuuni waani goˈettana danddayiyoo? He maxaafay Yihoowan ammanettiyoogee woygiyoogaakko akeekanaadan nuna maaddana danddayees. Qassi, Imbbaaqooma hiraagay metoynne paacee deˈishinkka nuuni woppu giidi deˈana danddayiyoogaa ammanettanaadan oottees. Hegaa hassayidi, ane Imbbaaqooma maxaafaa loytti xannaˈoos.

4. Imbbaaqoomi unˈˈettidoy aybissee?

⁴ Imbbaaqooma 1:2, 3 nabbaba. Imbbaaqoomi keehi metiyaanne paacciya wodiyan deˈiis. He wode kobattiya iita asay kumido gishshawu, I keehi azzaniis. Eta iitatettay awude xayanee? Yihooway hegaa giigissennan daro takkidoy aybissee? Imbbaaqoomi beˈiyoobay A biittaa asay pirddaa geellayiyoogaanne naaqqiyoogaa xalla. I aynne oottana danddayennabadan qoppiis. Hegaa gishshawu, I he xuma wodiyan Yihooway ashshanaadan woossiis. Imbbaaqoomi Yihoowa hegee qofissibeenna giidi qoppiyoogaa doommennan aggenna. Yihooway eesuwaara giigissennaba milatiis. Neeyyookka hegaadan siyetti erii?

5. Imbbaaqooma maxaafan deˈiya keehi maaddiya timirttee aybee? (Doomettan deˈiya misiliyaa xeella.)

⁵ Imbbaaqoomi Yihoowan ammanettiyoogaa aggidee? I Xoossay qaalaa gelidobaa ammaniyoogaa aggidee? Mule aggibeenna! I ba metuwaanne bana qofissidabaa asassi gidennan Yihoowawu yootidoogee I hidootaa qanxxibeennaagaa bessees. Xoossay keerido wodiyaa, woy qassi hegaa keena waayee A bolli gakkanaadan Yihooway eeno giidoy aybissakko I akeekana danddayenna gishshawu unˈˈettidoogee qoncce. Yihooway Imbbaaqoomi bana qofissidabaa xaafanaadan denttettiyoogan nuna keehi koshshiyaabaa tamaarissiis. Nuuni nuna qofissiyaabaa woy sirissiyaabaa ayyo yootanawu yayyana bessenna. Nu wozanaabaa woosan ayyo yootanaadan I nuna siiquwan minttettees. (Maz. 50:15; 62:8) Leemiso 3:5y ‘nuuni polo wozanan Yihoowan ammanettanaadaaninne nu akeekan zemppennaadan’ minttettees. Imbbaaqoomi ha qofaa ba deˈuwan oosuwan peeshshiis.

6. Woosay keehi koshshiyoy aybissee?

⁶ Imbbaaqoomi ba ammanettiyo Dabbonne Aawa gidida Yihoowakko shiiqiis. Imbbaaqoomi ba akeekan zemppiyoogan ba hanotan unˈˈettibeenna. SHin I bawu siyettiyaabaanne bana hirggissiyaabaa xeelliyaagan Yihoowa woossiyoogan nuussi leemiso gidees. Qassi woosaa siyiya Yihooway nuna qofissiyaabaa woosan ayyo yootiyoogan an ammanettiyoogaa bessanaadan nuna shoobbees. (Maz. 65:2) Yaatiyo wode nuuni Yihooway nu woosaa waati zaariyaakko akeekoos. I nuna minttettiyoonne kaalettiyo wode, siiquwan qoommiyoobadan nuuyyo siyettana. (Maz. 73:23, 24) Nu metoy ayba gidikkonne, nuuni A qofaa eranaadan I maaddana. Nuuni wozanappe woossiyoogee Xoossan ammanettiyoogaa bessiyo issi oge.

7. Imbbaaqoomi hirggidobawu Yihooway waati zaaridee?

⁷ Imbbaaqooma 1:5-7 nabbaba. Imbbaaqoomi bana hirggissiyaabaanne qofissiyaabaa Yihoowawu yooti simmidi, Yihooway woyganaakko qoppennan aggenna. Yihooway qarettiyaanne qoppiya Aawa gidiyo gishshawu, I wozanappe magannidobawu A seeribeenna. Imbbaaqoomi waayettidoogaanne maaduwawu woossidoogaa I eriis. Makkalanchcha Ayhudatuyyo odidoban, mati hananabaa Yihooway Imbbaaqoomawu yootiis. He iita wodiyaa wurssettay matattidoogaa Yihooway koyro odidoy Imbbaaqoomassa gidennan aggenna.

8. Yihoowa zaaroy Imbbaaqoomi qoppibeennaba gididoy aybissee?

⁸ Yihooway giigissana haniyoogaa Imbbaaqoomawu yootiis. He makkalanchchanne iita yeletay qaxxayettana wodee keehi matiis. Yihooway “intte wodiyan” giyoogan, hananabaa yootiyaagee paxa deˈishin woy A wode deˈiya asay paxa deˈishin he pirddaa ehaanaagaa yootiis. Yihooway zaaridobay Imbbaaqoomi mule qoppibeennaba. Ayyo danddayettennan ixxin woossidoogawu hagee zaaroo? Yihooway ayyo yootidobay Yihudan waayee yaa gujjanaagaa bessees. Kaladaaweti (Baabilooneti) meqettaa iita. Eti Yihooway kessido maaraa eriya Israaˈeelatuppe aaruwan kobattiya asa. Yaatin, Yihooway ha meqettaa iita allaga biittaa asay ba asaa xayssanaadan aybissi oottanee? Neeni Imbbaaqooma gidiyaakko neessi aybi siyettanee?

9. Imbbaaqoomi geella bana woygidi oychchidee?

⁹ Imbbaaqooma 1:12, NW, 13, 14, 17 nabbaba. * Imbbaaqoomi ba yuushuwan deˈiya, iitabaa oottiyaageeta pirddanawunne qaxxayanawu Yihooway Baabilooneta goˈettanaagaa erikkonne, ayyo kirqqi giis. SHin, I bana ziqqi oottidi baayyo Yihooway awudenne ‘Zaalla’ gidiyoogaa yootiis. (Zaa. 32:4; Isi. 26:4) Imbbaaqoomi Xoossaa siiquwaaninne A kehatettan ammanettiyoogaa aggibeenna. Hananabaa yootiyaagee murttidoogee I zaarettidi Yihoowa woossanawu yayyennaadan oottiis. Yihudan hanotay yaa iitanaadan Xoossay aybissi oottanee? I ayssi sohuwaara giigissennee? Ubbaa Danddayiya Xoossay asay keehi metootiyo wode aybissi coˈˈu gi xeellanee? Iitabay ciiyyiyo wode I ‘coˈˈu gaanay’ aybissee? I ‘Geeshshaa’; A “aifeti daro geeshsha gidiyo gishshau, iitabaa xeellanau dosokkona.”

10. Nuussi Imbbaaqoomaagaadan issi issitoo waani siyettana danddayii?

¹⁰ Nuussi Imbbaaqoomaagaadan issi issitoo siyettana danddayees. Nuuni Yihooway yootiyoobaa siyoos. Nuuni ammanettidi A Qaalaa nabbaboosinne xannaˈoos; qassi hegee nuuni kaseegaappe aaruwan hidootanaadan oottees. Nuuni A dirijjitee immiyo kaaletuwaa baggaara I gelido qaalaabaa siyoos. SHin nuuni, ‘Nu metoy awude xayanee?’ giidi oychchana danddayoos. Imbbaaqoomi kaallidi oottidobaappe nuuni ay tamaariyoo?

11. Yihooway yootiyoobaa siyi simmidi Imbbaaqoomi ay oottanawu murttidee?

¹¹ Imbbaaqooma 2:1, NW, nabbaba. * Imbbaaqoomi Yihoowaara haasayidoogee A wozanaa woppissiis. Yaatiyo gishshawu, Yihooway giigissanaagaa ammanettidi I danddayan naaganawu murttiis. I guyyeppe, “Metuwaa gallassaa taani danddayan  naagana” yaagidi, murttidoogaa zaaretti yootiis. (Imb. 3:16) Xoossawu ammanettidi oottida haratikka hegaadan ammanettidi danddayidosona; hegee Yihooway giigissanaagaa nuuni danddayan naagiyoogaa aggennaadan minttettees.—Mik. 7:7; Yaaq. 5:7, 8. 

12. Nuuni Imbbaaqoomappe tamaariyo amaridabay aybee?

¹² Imbbaaqoomi murttidobaappe nuuni ay tamaariyoo? Koyruwan, nuna ayba metoy gakkikkonne, nuuni Yihoowa woossiyoogaa mule aggana bessenna. Naaˈˈanttuwan, nuuni Yihooway ba Qaalaa baggaaranne ba dirijjitiyaa baggaara nuussi yootiyoobaa siyana koshshees. Heezzanttuwan, I ba keerido wodiyan metuwaappe nuna shemppissanaagaa wozanappe ammanettidi, nuuni danddayan Yihoowa naagishshana koshshees. Imbbaaqoomaagaadan, nuuni wozanappe Yihoowaara haasayikko, qassi A danddayan naagiiddi I yootiyoobaa siyikko, nu wozanaykka woppu gaana; hegee nuuni genccanaadan maaddana. Nu hidootay nuuni kaseegaappe aaruwan danddayanaadan oottana; hegee nuna gakkana danddayiya meto ubbay deˈishinkka nuuni ufayttanaadan maaddana. Saluwan deˈiya nu Aaway giigissanaagaa nuuni ammanettanaadan hidootay oottees.—Roo. 12:12.

13. Yihooway Imbbaaqooma waati minttettidee?

¹³ Imbbaaqooma 2:3 nabbaba. Imbbaaqoomi naagishshanawu kuuyidoogan Yihooway ufayttidoogee qoncce. Imbbaaqoomi waayettiyoobaa Ubbaa Danddayiya Xoossay loytti erees. Hegaa gishshawu, hananabaa yootiyaagee wozanappe oychchidobawu zaaruwaa demmanaagaa yootiyoogan, Xoossay A siiquwaaninne kehatettan minttettiis. I bana hirggissiya ubbabaappe mati woppu gaana. Xoossay Imbbaaqoomawu, “Danddaya, tanan ammanetta. Gamˈˈiyaaba milatikkokka, taani zaarana!” yaagiis giyoogaa mala. Yihooway ba gelido qaalaa polanawu wodiyaa keeridoogaa Imbbaaqooma hassayissiis. I ba halchchoy polettanaashin Imbbaaqoomi naaganaadan zoriis. Wurssettan, hananabaa yootiyaagee naagidobay polettennan attin azzanenna.

14. Nuuni metiya wodiyan murttana koshshiyaabay aybee?

¹⁴ Danddayan Yihoowa naagiyoogeenne I nuussi yootiyoobaa mintti kaalliyoogee nuuni yayyennaadan oottananne metoynne waayee deˈishinkka nu wozanay woppu gaanaadan maaddana. Nuuni Xoossay biron qonccissibeenna “aginaanne wodiyaa” qoppiyoogaa aggidi Yihooway likke ba keerido wodiyan polanaagaa nuuni ammanettana danddayiyoogaa Yesuusi yootiis. (Oos. 1:7) Hegaa gishshawu, nuussi danddayettida ubbabaa Yihoowawu oottanawu nuuyyo deˈiya wodiyaa loytti goˈettiyoogan, hidootaa qanxxennan, nu huuphiyaa ziqqi oottidi, ammanuwaaninne danddayan naagoos.—Mar. 13:35-37; Gal. 6:9.

15, 16. (a) Imbbaaqooma maxaafan Xoossay qaalaa gelidobaa ay akeekana danddayiyoo? (b) He gelido qaalaappe nuuni ay tamaariyoo?

¹⁵ Yihooway banan ammanettiya xillo urassi hagaadan giis: “Xilloi ba ammanuwan de7ana,” qassi Yihoowa “bonchchuwaa eratettai sa7aa kumana.” (Imb. 2:4, 14) Ee, Xoossan ammanettidi danddayiyaageeti deˈuwaa demmana.

¹⁶ Imbbaaqooma 2:4n deˈiya qofay koyro xeelliyo wode, xaaxi waaxidi odidobaa milatana danddayees. Gidoppe attin, kiitettida PHawuloosi Yihooway yootidobay keehi koshshiyoogaa akeekido gishshawu, he xiqisiyaa heezzutoo yootiis! (Roo. 1:17; Gal. 3:11; Ibr. 10:38) Xillo asi ay keena metootana danddayikkokka, I ammanettidinne ammanuwan  deˈidi Xoossaa halchchoy polettiyoogaa beˈana. Nuuni hidootan naagiyoobaa tishshi ootti xeellanaadan Yihooway koyees.

17. Imbbaaqooma maxaafay nuna minttettiyaabaa ay yootii?

¹⁷ Ha wurssetta wodiyan deˈiya nuuni ubbay Imbbaaqooma maxaafaappe loˈˈobaa tamaaroos. Yihooway A ammaniyaanne an ammanettiya xillo urassi oossinne deˈuwaa immanawu qaalaa geliis. Nuna metiyaabaynne hirggissiyaabay ayba gidikkonne, simi yaakko ubbatoo nu ammanuwaa kaseegaappe aaruwan minttoosinne Xoossan ammanettoos. Yihooway nuna maaddanaagaanne ashshanaagaa Imbbaaqooma baggaara nuussi yootiis. Nuuni an ammanettanaadaaninne Xoossaa Kawotettan kumetta saˈay ayyo goynniya ufayttiyaageetuuninne ashkketun kumiyo, I keerido wodiyaa danddayan naaganaadan I nuna kehatettan shoobbees.—Maa. 5:5; Ibr. 10:36-39.

18. Yihooway yootidobay Imbbaaqooma waati maaddidee?

¹⁸ Imbbaaqooma 3:16-19 nabbaba. Yihooway yootidobay Imbbaaqooma maaddiis. I Yihooway ba asawu kase oottido maalaalissiyaabaa wotti dentti qoppiis. He wode I kaseegaappe aaruwan Yihoowan ammanettiis. Yihooway mata wode giigissanaagaa I eriis! Imbbaaqoomi waayettiyoogee attennaagaa erikkonne, Yihooway giigissanaagaa eriyoogee A minttettiis. I siriyoogaa aggidi, Yihooway ashshanaagaa wozanappe ammanettiis. Ay asinne yootidobaappe aaruwan hassayettiyaaba gidana danddayiya, ammanettiyoogaa bessiyaabaa I yootiis. Amarida eranchchati paydo 18y, “Taani Godan ufayttada guppana; taani Xoossan ufayttada hinddiriitaadan yuuyana” giyoogaa giidi qoppoosona. Hagee nuussi ubbaassi keehi loˈˈo timirtte! Yihooway nuussi sinttappe maalaaliyaabaa immanawu qaalaa geliyoogaa xalla gidennan, I hegaa polanawu oottiiddi deˈiyoogaakka nuussi yootiis.

19. Imbbaaqoomaagaadan nuuni minttettuwaa waati demmana danddayiyoo?

¹⁹ Imbbaaqooma maxaafaappe nu tamaariyo keehi koshshiyaabay Yihoowan ammanettiyoogaa. (Imb. 2:4) Nuuni (1) nuna hirggissiyaanne qofissiya ubbabaa Yihoowawu yootiiddi, woosan gencciyoogan; (2) Yihoowa Qaalaanne A dirijjitee immiyo ay kaaletokka mintti kaalliyoogan; qassi (3) ammanettidinne danddayan Yihoowa naagiyoogan Yihoowaara dabbotaa minttikko, hegaadan ammanettidi deˈana danddayoos. Imbbaaqoomi oottidoykka hegaa. I ba maxaafaa azzanuwan doommikkonne, minettidinne ufayttidi wurssiis. Simi yaakko, Yihooway aawadan qoommiyoogee nuussikka siyettana mala, Imbbaaqooma leemisuwaa kaalloos! Ha xuma alamiyan hegaappe aaruwan minttettiyaabaa ay demmana danddayiyoo?