DARO miishshaa demmanawu yelettido biittaappe hara biitti biida daro ishanttinne michchontti haˈˈi bantta yelettido biitti simmidosona. Yihoowa siiqiyoogeenne asaa siiqiyoogee eta denttettin Kawotettaa mishiraachchuwaa aassiyaageeti keehi koshshiyoosaa biidosona. (Maa. 22:37-39) Eti aggi bayidobay aybee, qassi eta Yihooway waati anjjidee? Hegaa eranawu, Arggo Afirkkan Kaameruune biittan hanidabaa ane beˈoos.

Wanssima giyo issi ishay 1998n ba yelettido Kaameruuneppe hara biitti biis. I 14 layttawu kare biittan deˈiis. Issi galla, I gubaaˈe shiiquwan sabbakiyo oosuwaabaa qonccissiya leemisuwaa siyiis. Haasayiyaagee hagaadan giis: “Naaˈˈu laggeti dumma dumma sohuwan moliyaa oyqqiyo wode issoy hinkkuwaappe daro moliyaa oyqqikko, guutta moliyaa oyqqidaagee daro moliyaa oyqqiyoosan deˈiya ba laggiyaakko beennee?”

He leemisoy Geeshsha Maxaafaa xannaˈanawu koyiya daro asay Kaameruunen deˈiyo gishshawu, Wanssimi yan deˈiya aassiyaageeta maaddanawu yaa simmanawu qoppanaadan oottiis. SHin I hirggiis. I he ubba layttaa kare biittan deˈidi, zaarettidi Kaameruunen deˈiyoogaa meezetana danddayii? Wanssimi Kaameruunen deˈiyoogaa meezetana danddayiyaakkonne eranawu usuppun aginaa yan takkiis. Hegaappe simmin, 2012n I yan deˈanawu biis.

Wanssimi hagaadan giis: “Taani hombbiyaanne deˈuwaa hanotaa meezetana koshshiis. Taani SHiiquwaa Addaraashan zaarettada injjetenna zalanggan uttana koshshiis.” I moocu giiddi, “Taani shiiquwaa keehi wudada kaalliyo wode, hara SHiiquwaa Addaraashan uttiyo injjetiya oydeta dogays” yaagiis.

Wanssimi Paransaayen uddufun layttaa deˈada Kaameruune simmida Jeraaldino 2013n machchiis. Eti bantta deˈuwan Yihoowa sheniyaa oottiyoogaa aybippenne aaruwan sinttayido gishshawu I eta waati anjjidee? Wanssimi hagaadan giis: “Nuuni issippe Kawotettaa Mishiraachchuwaa Yootiyaageetu Timirtte Keettan tamaarida; qassi Beeteelen haggaazida. Aadhdhida issi layttaa giddon nu gubaaˈiyan 20 xinaateti xammaqettidosona. Haˈˈi taani ‘asaa oyqqanawu’ injjetiyaasan deˈiyaabadan tawu siyettees” (Mar. 1:17, 18) Jeraaldina, “Taani qoppana danddayiyoogaappe aadhdhiya anjjota demmaas” yaagaasu.

Judita Amarkkaa baasu; shin A Yihoowassi loytta oottanawu keehi koyaasu. A hegaadan gaasu: “Kaameruunen so asaa oychchada simmiyo wode ubban, taani Geeshsha Maxaafaa xannaˈissiyoogaa doomissido darota aggada simmana koshshido gishshawu yeekkays.” Gidoppe attin, Judita Kaameruune simmanawu mammottaasu. Kaameruunen deˈiya ba aawawu akkamuwawu koshshiyaabawukka  gidiya daro miishshaa demissiya oosoy iyyo deˈees. SHin Judita Yihoowan ammanettada Kaameruune guyye simmaasu. Amarkkan deˈido ishalo deˈuwaa laamotiyoogaa yootaasu. Ba qofaa laammanaadan Yihooway bana maaddana mala woossaasu; qassi woradaa xomoosiya ishaynne A machchiyaa O minttettidosona.

Judita kasebaa hassayada, “Heezzu layttaa giddon oyddu asay xammaqettanaadan maaddiyoogan keehi ufayttaas” yaagaasu. Judita dumma aqinye gidada haggaaziyoogaa doommaasu. Ha wodiyan, anne I azinay Sem-Kesteli woradaa oosuwaa oottoosona. SHin Juditi aaway waanidee? Anne eta so asay I aawaa miishshaa qanxxissennan akkamiya hara biittan deˈiya hosppitaaliyaa demmidosona. Akkamoy ufayssiya ogiyan polettiis.

Viktora giyo ishay Kanaada biis. I Wochiyo Keelan xoqqa timirttiyaabaa yootiya issi huuphe yohuwaa nabbabi simmidi ba timirttiyaabaa qoppiis. I yuniversttiyaa timirttiyaa aggidi qantta wodiyan wuriya timirttiyaa tamaariis. I, “Hegee taani daro layttawu yeemottido aqinyetettawu maaddiya oosuwaa sohuwaara demmanaadan oottiis” yaagiis. Guyyeppe, Viktori Karolino ekkiis; qassi eti Kaameruune biidosona. Eti yan deˈiya macara biiruwaa xomoosido wode, Kaameruunen haggaazanawu qoppanaadan amarida ishantti eta minttettidosona. Viktori, “Nuuni hegaa ixxanaadan oottiya aybinne baawa; qassi nuuni sima deˈuwaa deˈiyo gishshawu he shoobiyaa ekkida” yaagiis. Karolina sahettikkonne, yaa baanawu eti qofaa qachchidosona.

Viktorinne Karolina Geeshsha Maxaafaabaa eranawu koyiya banttanaara gayttiya asa ubbaa maaddanawu ubba wode aqinye gididi haggaaziyoogaa doommidosona. Eti qoraphphido miishshaa amarida wodiyawu goˈettidosona. Eti Kaameruune simmidi aqinyetettan oottanawu eta maaddana mala Kanaada guyye simmidi amarida aginawu oottoosona. Eti demmido anjjoti aybee? Kawotettaa Mishiraachchuwaa Yootiyaageetu Timirtte Keettan tamaaridi, dumma aqinye gididi haggaazidosona, qassi haˈˈi keexuwaa oosuwaa oottoosona. Viktori, “Nuuni ishalo deˈuwaa aggido gishshawu Yihoowan ammanettana koshshiis, qassi I nuussi koshshiya ubbabaa kunttiis” yaagiis.

Jarmane yuniversttiyan tamaariya Alaani Yelagatoo—Intte Deˈuwan Ay Oottanau Qoppidetii? giyo trakttiyaa 2002n nabbabiis. Hegan deˈiya qofay I ooratta halchchuwaa kessanaadan A denttettiis. I 2006n Gubaaˈiyan Oottiyaageeti Loohiyo Timirtte Keettan tamaaridi ba yelettido biittaa Kaameruune maddabettiis.

Alaani Kaameruunen amarida gallassa oottiyo oosuwaa demmiis. Guyyeppe, I daro miishshaa demissiya oosuwaa demmikkonne, hegee I kaseegaadan sabbakanawunne tamaarissanawu wodiyaa demmanaadan waayi oottana giidi yayyiis. Hegaa gishshawu, I dumma aqinye gidanaadan shoobettido wode, mammottennan eeno giis. A ootissiyaagee daro damoozaa qanxxanawu koyiis; shin Alaani hegaa ixxidi dumma aqinye gidiis. Guyyeppe, Alaani amarida layttawu Paransaayen deˈida Istefano ekkiis. A Kaameruune ba simmin O gakkida metoy aybee?

Istefana, “Tana ubbatoo guuttaa sakkees, shin xaliyaa demmiyo gishshawu paxays” yaagaasu. Eti genccido gishshawu, anjjettidosona. Alaani hagaadan giis: “Nuuni Kate giyo guutta katamaa sabbakanawu biido wode, Geeshsha Maxaafaa xannaˈanawu koyiya daro asaa demmida. Guyyeppe, nuuni silkkiyan eta xannaˈissida. Etappe  naaˈˈati xammaqettidosona; guyyeppe yan issi citay eqqiis.” Istefana gujjada hagaadan gaasu: “Asay bana Yihoowawu sheedhdhanaadan maaddiyoogan demmiyo ufayssaappe aadhdhiyaabi baawa. Nuuni hagan haggaaziyoogan darotoo ufayttida.” Haˈˈi Alaaninne Istefana woradaa oosuwaa oottoosona.

ZHizela akkamuwaa timirttiyaa Xaaliyaa biittan tamaariyo wode xammaqettaasu. A bana xannaˈissida aqinye gidida azinaynne machchiyaa deˈiyo sima deˈuwan maalaalettaasu, qassi kaseegaappe aaruwan haggaazanawu koyaasu. Hegaa gishshawu, ZHizela ba timirttiyaa wurssana hanaydda ubba wode aqinye gidada haggaaziyoogaa doommaasu.

ZHizela Yihoowayyo loytta haggaazanawu Kaameruune simmanawu koyaasu, shin A hirggaasu. A, “Taani Xaaliyan deˈanaadan kawoy immido maataa aggana koshshiis; qassi Xaaliyan deˈiya ta laggetuppenne soo asaappe shaahettana koshshiis” yaagaasu. Gidikkonne, ZHizela Uddufune 2016n, Kaameruune simmaasu. Amarida layttaappe guyyiyan, A Liyoonsa gelaasu; qassi Kaameruunen deˈiya macara biiroy eti Kawotettaabaa sabbakiyaageeti keehi koshshiyo Ayosa katamaa baanaadan minttettiis.

Ayosan deˈoy ay malee? ZHizela hagaadan gaasu: “Darotoo unddenna saaminttawu xomppee baynna gishshawu, nu moobayliyaa charjjana danddayokko. Elektirikee darotoo oottenna. Mittan qumaa kattiyoogaa tamaaraas; qassi asay darenna wode qammi baatiriyaa xomppiiddi pulttuwaappe haattaa duuqqanawu gaariyaa ekkidi boos.” Eti hegaa genccanaadan maaddidabay aybee? ZHizela hagaadan gaasu: “Genccanaadan Yihoowa ayyaanay nuna maaddiis. Qassi nuuni issoy issuwaa maaddoos. So asaynne laggeti nuna minttettidosona; qassi issi issitoo miishshan maaddidosona.”

ZHizela ba yelettido biittaa simmidoogan ufayttadee? A hagaadan gaasu: “Taani keehi ufayttaas! Koyro heeran metiyaabaynne hirggissiyaabay deˈikkonne, nuuni hegaa xooniyo wode, nu oottana koshshiyaabaa oottidobadan taayyoonne ta azinaayyo siyettees. Nuuni Yihoowan ammanettoos; qassi kaseegaappe aaruwan akko shiiqida.” Liyoonsinne ZHizela Kawotettaa Mishiraachchuwaa Yootiyaageetu Timirtte Keettan tamaaridosona; qassi eti haˈˈi guutta wodiyawu dumma aqinye gididi haggaazoosona.

Daro moliyaa oyqqanawu giidi, metiyaabay deˈishinkka xalidi moliyaa oyqqiyaagaadan, Kawotettaabaa mishiraachchuwaa siyanawu koyiyaageeta maaddanawu bantta yelettido biittaa simmiyaageeti bantta goˈˈaa aggi bayanawu eeno goosona. Ha minni oottiya aassiyaageeti Yihoowa sunttaa siiqiyo mino siiquwaa I dogennaagee qoncce. (Nah. 5:19; Ibr. 6:10) Neeni kare biittan deˈiyaabaanne ne yelettido biittan Kawotettaabaa aassiyaageeti keehi koshshiyaaba gidikko, yaa simmana danddayay? Neeni hegaadan oottikko, Yihooway nena anjjana.—Lee. 10:22.