1. Ibraawe Kiristtaaneti “kaseegaappe aaruwan” issoy issuwaa minttettanaadan kiitettida PHawuloosi zoridoy aybissee?

MINTTETTANAWU nuuni keehi baaxetana koshshiyoy aybissee? Kiitettida PHawuloosi Ibraawe Kiristtaanetussi xaafido ba dabddaabbiyan gaasuwaa nuussi yootiis. I etayyo hagaadan giis: “Issoi issuwaara waani siiqettanaakkonne qassi lo77o oosuwaa waati oottanaakko, issoi issuwau qoppoos. Issooti issooti shiiquwaa meeze oottidi shiiqiyoogaadan, nuunikka issippe shiiqiyoogaa aggokko; shin Godaa gallassai matattiyoogaa intte be7iyo gishshau, issoi issuwaa [“kaseegaappe aaruwan,” NW] minttettoos.” (Ibr. 10:24, 25) Ichchashu laytta giddon, Yerusalaamen deˈiya Ayhuda Kiristtaaneti “Godaa gallassai” matidoogaa, qassi eti bantta shemppuwaa ashshanawu katamaappe baqatanaadan Yesuusi etawu yootido malaataa akeekana. (Oos. 2:19, 20; Luq. 21:20-22) Roomati Yihoowa pirddaa Yerusalaamen polido wode, he Yihoowa gallassay 70 M.Ln. gakkiis.

2. Nuuni ha wodiyan issoy issuwaa minttettanawu keehi qoppana koshshiyoy aybissee?

² Ha wodiyan, ‘gitanne daroppe yashshiya’ Yihoowa gallassay  matidoogaa nuuni ammananaadan oottiya gaasoy deˈees. (Yuu. 2:11) Hananabaa yootiya Sofonaasi hagaadan giis: “GODAA gita gallassai matiis; matidikka qassi keehippe eesotees.” (Sof. 1:14) He hiraagay ha wodiyawukka hanees. Yihoowa gallassay matidoogaara gayttidaagan PHawuloosi nuuni ‘issoy issuwaara waani siiqettanaakkonne qassi loˈˈo oosuwaa waati oottanaakko, issoy issuwawu qoppanaadan’ yootiis. (Ibr. 10:24) Hegaa gishshawu, nu ishanttussi minttettoy koshshiyo wode ubban eta minttettanaadan nuuni kaseegaappe aaruwan etawu qoppana bessees.

3. Minttettuwaa xeelliyaagan kiitettida PHawuloosi ay yootidee? (Doomettan deˈiya misiliyaa xeella.)

³ “Hirggiyoogee asa ufaissaa diggees; shin shonggaara de7iya haasayai a ufaissees.” (Lee. 12:25) Hegee nuna ubbaa gakkiyaaba. Nuussi ubbawu issi issitoo minttettoy koshshees. Harata minttettiyo aawatettay deˈiyoogeetussikka minttettoy koshshiyoogaa PHawuloosi yootiis. Roomen deˈiya Kiristtaanetussi I hagaadan giis: “Taani inttena minttettanau, inttenaara issippe Ayyaanaa imuwaa shaakkana mala, inttena be7anau laamotais. Taani giyoogee, inttekka taakka issi wode minettana. Intte ta ammanuwan, qassi taanikka intte ammanuwan minettana.” (Roo. 1:11, 12) Ee, PHawuloosi harata loytti minttettiis; qassi issi issitoo ayyookka minttettoy koshshiis.—Roome 15:30-32 nabbaba.

4, 5. Ha wodiyan nuuni oona minttettana danddayiyoo, qassi aybissi?

⁴ Bantta goˈˈaa aggi bayidi deˈiyaageeta galatana koshshees. Hegeetuppe amaridaageeti ammanettida aqinyeta. Etappe daroti aqinye gididi haggaazanawu bantta deˈuwan darobaa aggi bayidosona. Misoonaawetu, woradaa xomoosiyaageetunne eta machchotu, qassi macara biirotun woy xuufiyaa birshshiyo biirotun oottiyaageetu hanotaykka hegaa mala. Hegeeti ubbay kaseegaappe aaruwan Yihoowawu haggaazanawu bantta goˈˈaa aggi bayidosona. Yaatiyo gishshawu eta minttettana koshshees. Kumetta wodiyaa haggaazuwan takkanawu koyikkonne, danddayibeenna daroti deˈoosona. Eta minttettiyo wode eti galatoosona.

⁵ Minttettoy koshshiyo harati “Godaa ammaniya asaa” ekkanaadan woy gelanaadan yootiya zoriyaa azazettiyo gishshawu aqo oyqqibeenna ishanttanne michchontta. (1 Qor. 7:39) Machchoti bantta azinati eta siiqiyoogaa yootiyo wodenne eti oottido ubbabaa gishshawu galatiyo wode minettoosona. (Lee. 31:28, 31) Qassi, yedetaa woy sahuwaa genccidi ammanetti deˈiya Kiristtaanetussi minttettoy koshshees. (2 Tas. 1:3-5) Yihoowaynne Kiristtoosi he ammanetti oottiya ubbata minttettoosona.—2 Tasalonqqe 2:16, 17 nabbaba.

6. Isiyaasa 32:1, 2y yootiyoogaadan cimatu aawatettay aybee?

⁶ Isiyaasa 32:1, 2 nabbaba. Nuuni waayissiyaanne sohuwaara azzananaadaaninne hidootaa qanxxanaadan oottiya wodiyan deˈoos. Yesuus Kiristtoosi nuna minttettanawu tiyettida ba ishanttanne ammanettidi ‘haariyaageeta’ gidida hara dorssata goˈettees. He gubaaˈe cimati nu ammanuwawu ‘goda’ gidokkona; shin nu ufayssawu nunaara “issippe oottiyaageeta.” Eti nuuni ufayttanaadaaninne ammanettidi deˈanaadan maaddanawu koyoosona.—2 Qor. 1:24.

7, 8. Minttettiyaabaa haasayiyoogaa gujjin, cimati harata waati minttana danddayiyoonaa?

⁷ Kiitettida PHawuloosi nuuni kaallana bessiya leemiso gidiyaaba oottiis. I yedetay gakkido Tasalonqqen deˈiya Kiristtaanetuyyo hagaadan giis: “Inttena siiqido gishshau,  Xoossaa wonggeliyaa intteyyo immanaagaa xalaala gidennan, nu de7uwaakka intteyyo immanau giigi uttida; aissi giikko, intte nuuyyo daro lo77o.”—1 Tas. 2:8.

⁸ Minttettiyaabaa haasayiyoogaa xallay darotoo gidennaagaa qonccissanawu, PHawuloosi Efisoona cimatuyyo hagaadan giis: ‘Daafuranchchata maaddanaassi Godaa Yesuusi ba huuphen, “Ekkiyaagaappe immiyaagee anjjettidaagaa” giido A qaalaa intte hassayanawu bessees.’ (Oos. 20:35) PHawuloosi ba ishanttuyyo ‘baayyo deˈiyaabaa banaara gattidi ufayssan immiis.’ I etayyo aybanne oottanawu koyiyoogaa I oottidobay bessees. (2 Qor. 12:15) Hegaadan, cimati bantta ishantta qaalan minttettiyoogaa xalla gidennan, etassi wozanappe qoppiyoogaa bessiyoogankka eti minnanaadan oottana koshshees.—1 Qor. 14:3.

9. Cimati minttettiya ogiyan waati zorana danddayiyoonaa?

⁹ Harati minnanaadan oottiyoogee zoriyoogaa gujjana danddayees; shin minttettiya ogiyan waati zoranaakko Geeshsha Maxaafay yootiyoobaa cimati kaallana koshshees. Hegaa xeelliyaagan, hayquwaappe denddi simmidi Yesuusi leemiso gidiyaaba oottiis. I Qeeri Isiyan deˈiya amarida gubaaˈeta mino zoriyaa zorana koshshido wode, I waatidaakko ane beˈoos. Etayyo zoriyaa immanaappe kase, I Efisoona, PHerggaamoonanne Tiyaaxiroona gubaaˈeta wozanappe galatiis. (Ajj. 2:1-5, 12, 13, 18, 19) I Lodooqiyaa gubaaˈiyawu hagaadan giis: “Taani siiqiyo ubbaa seeraisinne qaxxayais; simmi keehi mishetta; ne nagaraappekka simma.” (Ajj. 3:19) Cimati zoriyaa immana koshshiyo wode Kiristtoosa leemisuwaa kaalliyoogee bessiyaaba.

10. Nuuni ubbay haasayiyooban issoy issuwaa waati minttettana danddayiyoo?

¹⁰ Harata minttettiyoogee cimatu xallawu imettida aawatetta gidenna. PHawuloosi ubba Kiristtaaneti haratuyyo haasayiyo ‘haasayay siyiyaageeta goˈˈana mala koshshiyoogaadan minttettiya loˈˈo qaalaa’ haasayanaadan  minttettiis. (Efi. 4:29) Nuuni ubbay haratuyyo ‘koshshiyaabaa’ eranawu akeekanchcha gidana bessees. PHawuloosi Ibraawe Kiristtaaneta hagaadan zoriis: “Intte arggaacida kushiyaanne intte daafurida gulbbataa minttettite. Wobbiya tohoi paxanaappe attin, burqqenna mala, sitta ogiyan hemettite.” Nuuni haratu kushiyaanne gulbbataa minttettana danddayoos. (Ibr. 12:12, 13) Yelagata gujjin, nuuni ubbay haasayiyooban issoy issuwaa minttettana danddayoos.

11. Marto giyo michchiyaa unˈˈettido wode O aybi maaddidee?

¹¹ Marto * giyo unˈˈettida issi michchiya hagaadan gaasu: “Taani minttettuwaa demmanawu woossido issi gallassi, tana siiqiyaanne tawu qarettiya issi gastta michcheera gayttaas. Qassi A bana taagaa mala metoy gakkidoogaa yootaasu; hegee taani kaseegaadan boorasennaadan maaddiis.” Gastta michchiyaa A haasayidobay Marto maaddidoogaa waaya akeekana.

12, 13. Piliphphisiyuusa 2:1-4n deˈiya zoriyaa nuuni maaddiya ogiyan waati oosuwan peeshshana danddayiyoo?

¹² PHawuloosi Piliphphisiyuusa gubaaˈiyaa yame ubbawu ha zoriyaa zoriis: “Kiristtoosan intte de7iyo de7oi inttena gasttissii? A siiqoi inttena minttettii? Geeshsha Ayyaanaara intteyyo issippetettai de7ii? Intte issoi issuwaayyo keheetiinne qaretteetii? Yaatikko, intte qofan, siiquwan, wozanaaninne qofaa poluwan issuwaa gididi, tana wurssi ufaissite. Inttena siiqiyoogan woikko ceeqettanau koyiyo hada amuwan issibaanne oottoppite; shin issoi issuwaappe gitatais yaagidi qoppennan, issoi issuwaayyo intte huuphiyaa kaushshite. Qassi issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.”—Pili. 2:1-4.

¹³ Nu ishanttinne michchontti minnanaadan eta siiquwan minttettana danddayoos; etawu qoppiyoogaa, qassi eta siiqiyoogaanne etawu qarettiyoogaa bessoos.

14. Nuuni minttettana danddayiyo issi ogee aybee?

¹⁴ Nuuni kase maaddidoogeeti ammanettidi deˈiyoogaa siyiyoogee nuna ufayssees. Kiitettida Yohaannisi hagaadan giis: “Ta naati tumatettan de7iyoogaa siyiyoogaappe aadhdhidi, tana ufaissiyaabi baawa.” (3 Yoh. 4) Daro aqinyeti eti amarida layttappe kase tumaa eranaadan maaddidoogeetuppe amaridaageeti ammanettidi deˈiyoogaa eriyoogaaninne ubba qassi aqinye gididi haggaaziiddi deˈiyoogaa eriyoogan keehi minettana danddayoosona. Azzanida aqinyee kase oottido ufayssiyaaba hassayanaadan oottiyoogee I minttettanaadan oottana danddayees.

15. Ammanettidi haggaaziyaageeta nuuni minttettana danddayiyo issi ogee aybee?

¹⁵ Woradaa xomoosiya daroti etinne eta machchoti gubaaˈiyaa xomoosi simmin gubaaˈee galatanawu xaafi kiittidoban keehi minettidoogaa yootoosona. Ammanettidi haggaaziyoogaa gishshawu galatiyo cimatu, misoonaawetu, aqinyetunne Beeteele keettaa asa yaratu hanotaykka hegaara issi mala gidana danddayees.

16. Issi uraa aybi minttettana danddayii?

¹⁶ Nuuni hara asaara darin haasayenna gishshawu harata minttettana danddayokko gi qoppikko hegee bala. Minttettanawu darobaa oottana koshshenna; issi uraa sarotiyo wode pashkki giyoogaa xallay gidana danddayees. He uri neeyyo pashkki gaana xayikko, hegee metoy deˈiyoogaa bessiyaaba gidana danddayees; qassi I yootiyoobaa hara uri siyiyoogaa xallay A minttettana danddayees.—Yaaq. 1:19.

17. Issi yelaga ishaa aybi minttettidee?

 ¹⁷ Oneri giyo issi yelaga ishay, harati bonchchiyo gubaaˈe cima gidida A aawaa gujjin, ayyo mata dabboti tumaa aggido wode I keehi unˈˈettiis. Woradaa xomoosiya issi ishay Onera shaye keettan tukkiyaa shoobbidi I bawu siyettiyaabaa yootanaadan oottin, Oneri minettiis. Oneri bantta soo asay tumaakko simmanaadan I maaddana danddayiyo issi ogee ammanettidi deˈiyoogaa xalla gidiyoogaa akeekiis. I Mazamure 46; Sofonaasa 3:17; qassi Marqqoosa 10:29, 30 nabbabidi keehi minettiis.

18. (a) Minttettiyoogaa xeelliyaagan Kawuwaa Solomoni ay yootidee? (b) Kiitettida PHawuloosi yootido qofay aybee?

¹⁸ Martinne Onera hanotay minttettoy koshshiyo ishanttanne michchontta nuuni minttettana danddayiyoogaa bessees. Kawuwaa Solomoni hagaadan giis: “Haasayaa likke wodiyan haasayiyoogee aiba lo77obee! Pashkkidi xeelliyo xeelai wozanaa ufaissees; mishiraachcho odoikka bollaa pattees.” (Lee. 15:23, 30) Hegaa bollikka, Wochiyo Keelaappe woy nu weybsaytiyaappe nabbabiyoogee azzanida uraa minttettana danddayees. Kawotettaa mazamuriyaa issippe yexxiyoogee minttettana danddayiyoogaa PHawuloosi yootiis. I hagaadan giis: “Issoi issuwaa tamaarissitenne zorite *; intte wozanan Xoossaa galatiiddi, xalotiyaanne mazamuriyaa, Xoossaa sunttaa xoqqu oottiya yettaa yexxite.”—Qol. 3:16; Oos. 16:25.

19. Matan kaseegaappe aaruwan nuuni issoy issuwaa minttettana koshshiyoy aybissee, qassi nuuni ay oottana bessii?

¹⁹ Yihoowa gallassay keehi matatti matatti biyo wode, nuuni kaseegaappe aaruwan issoy issuwaa minttettana koshshees. (Ibr. 10:25) PHawuloosi ba wode deˈiya ba mala Kiristtaanetuyyo hagaadan giis: “Intte qassi ha77i oottiyoogaadan, issoi issuwaa minttettitenne maaddite.”—1 Tas. 5:11.