1-3. (a) Ubba yelagata ayba metoy gakkii, qassi hegaa leemisuwan waata qonccissana danddayay? (Doomettan deˈiya misiliyaa xeella.) (b) Kiristtaane yelagati he paaciyaa waati xoonana danddayiyoonaa?

NEENI issi koshshiyaabawu haaho katamaa baanawu halchchidabadan qoppa. He sohuwaa gakkanawu otobisiyan manddarada baana koshshees. Otobisee eqqiyoosan, oge biya keehi daro asaynne daro otobisee deˈiyo gishshawu, neessi koyro kirqqi gaana danddayees. Neeni halchchidobaa, hegeekka ne koyiyoosaa biya otobisiyaa demmanaagaa hassayiyoogee keehi loˈˈoba. Harasaa biya otobisiyan geliyoogee neeni erenna sohuwaa baanaadan oottees.

² Ha wodiyan deˈiya yelagata manddariya asan leemisana danddayettees. Yelagati otobisiyan gidennan, bantta deˈuwan manddarana koshshees. Eti kuuyiyoobaynne eta gakkiyaabay issi issitoo etawu kirqqi gaanaadan oottana danddayees. Yelagatoo, intte intte deˈuwan awu baana koyiyaakko erikko, intte dooranabaa metootennan aggana danddayeeta. Intte awu baggi simmidi baana koshshii?

³ Yelagati bantta deˈuwan Yihoowa ufayssanawu koyanaadan minttettiyoogan ha huuphe yohoy he oyshaa zaarees. Hegaa  giyoogee nuuni ay tamaaranaakko, woy ay oottanaakko, woy aqo oyqqanawu woy oyqqennan agganawu, qassi naata yelanawu woy yelennan agganawu nu deˈuwan kuuyiyo ubbaban Yihoowa zoriyaa kaallana bessees giyoogaa. Qassi hegaa giyoogee ayyaanaaban halchchidobawu baaxetiyoogaa giyoogaa. Yihoowawu ubbatoo haggaaziya yelagati I bantta deˈuwaa anjjanaagaa ammanettana danddayoosona.—Leemiso 16:3 nabbaba.

4. Nuuni ha huuphe yohuwan ay xannaˈanee?

⁴ Naatettan ayyaanaabaa halchchiyoogee akeekanchcha gidiyoogaa bessiyaaba. Aybissi? Nuuni heezzu gaasuwaa pilggana. Koyroogeenne naaˈˈanttoogee ayyaanaaban halchchidobaa gakkanawu baaxetiyoogee Yihoowaara dabbotaa minttiyoogaa qonccissees; heezzanttoogee naatettan ayyaanaabaa halchchiyoogee maaddiyoogaa yootees.

5. Ayyaanaabaa halchchuwaa halchchanaadan oottiya waanna gaasoy aybee?

⁵ Nuuni ayyaanaabaa halchchuwaa halchchiyo waanna gaasoy Yihoowa siiquwaa gishshawunne I nuuyyo oottidobaa gishshawu A keehi galatiyoogaa bessanaassa. Mazamurawee hagaadan giis: “GODAA galatiyoogee lo77o. . . . Aissi giikko, neeni ne wolqqaama oosuwan tana ufaissido gishshau, ne kushiyaa oosuwaa gishshau, taani ufaissau yexxais.” (Maz. 92:1, 4) Yihooway neessi immido ubbabaa qoppa: Ne deˈuwaa, Yihoowanne abaa tumaa eridoogaa, Geeshsha Maxaafaa, gubaaˈiyaanne sinttanaabaa xeelliyaagan hidootan naagiyoobaa. Ayyaanaabaa kaseyiyoogee ha ubbabaa gishshawu Xoossaa galatiyoogaa bessiyo oge, qassi hegee neeni akko shiiqanaadan oottees.

6. (a) Ayyaanaabaa halchchiyoogee Yihoowaara dabbotanawu waati maaddii? (b) Neeni naatettan ay halchchana danddayay?

⁶ Naaˈˈantto gaasoy ayyaanaaban halchchidobaa gakkanawu baaxetiyoogaa neeni doommikko, Yihoowa sinttan loˈˈobaa oottiyoogaa doommaasa. Hegee neeni kaseegaappe aaruwan akko shiiqanaadan oottees. Kiitettida PHawuloosi hagaadan giis: “Intte oottido oosuwaanne . . . Xoossaa siiqido siiquwaa Xoossai doganau worddanchcha gidenna.” (Ibr. 6:10) Neeni ayyaanaabaa halchchanawu taani biron naˈa gaada mule qoppoppa. Kiristina ammanettida Yihoowa markkatu deˈuwan hanidabaa ubbatoo nabbabanawu qofaa qachchido wode iyyo layttay tamma. Toobi xammaqettanaappe kase kumetta Geeshsha Maxaafaa nabbabanawu halchchido wode ayyo layttay 12. Eti xammaqettiyo wode Maksimayyo layttay 11, qassi A michchee Noˈemiyyo layttay 10. Eti naaˈˈaykka Beeteelen oottanawu halchchidi he halchchuwaa gakkanawu baaxetiyoogaa doommidosona. Ubbatoo hassayanaadan eta maaddana mala, Beeteele gelanawu kunttiyo qitsiyaa bantta son godaa bolli kaqqidosona. Neeni halchchana danddayiyo halchchota qoppada hegeeta gakkanawu baaxetiyoogee bessiyaaba.—Piliphphisiyuusa 1:10, 11 nabbaba.

7, 8. (a) Halchchiyoogee issibaa kuuyanawu metootennaadan waati oottana danddayii? (b) Issi yelagiyaa yuniversttiyaa gelennan aggidoy aybissee?

⁷ Naatettan ayyaanaabaa halchchiyo heezzantto gaasoy kuuyiyoobaara gayttidaba. Yelagatettan timirttiyaabaa, oosuwaabaanne harabaa kuuyana koshshees. Issibaa kuuyiyoogee ogee danttettiyoosaa gakkiyo wode likke ogiyaa dooriyoogaa mala. Neeni biyoosaa efiya ogiyaa eriyo gishshawu, likke ogiyaa dooranawu metootakka. Hegaadan, neeni ne halchchuwaa erikko, loˈˈobaa kuuyiyoogee nena metenna. Leemiso 21:5y, “Mino oosanchchaa halchchoi dureyees” yaagees. Neeni naatettan loˈˈobaa halchchikko, sohuwaara maadettana. Demaarisa keehi gitabaa yelagatettan  kuuyana koshshido wode hegaa akeekaasu.

⁸ Demaarisa naaˈˈantto xekka timirttiyaa wurssiyo wode gooba tamaare. A yuniversttiyan higgiyaa miishsha qanxxennan tamaarana danddayawusu; shin A guutta miishshaa demissiya oosuwaa oottanawu dooraasu. Aybissi? “Taani aqinye gidanawu naatettan qofaa qachchaas. Yaatanawu, saaminttaappe amarida gallassaa oottana koshshees. Taani yuniversttiyaa digiriyaa higgiyan demmiyaakko, daro miishshaa demmana danddayays, shin amarida gallassawu oottiyo oosuwaa demmanawu metootana.” Demaarisa aqinye gidoosappe haˈˈi 20 laytta. A yelagatettan likkebaa halchchidabadaaninne likkebaa kuuyidabadan iyyo siyettii? A hagaadan gaasu: “Taani oottiyo bankke keettan, abukaatotuura darotoo gayttays. Taani higgiyaa xannaˈiyaakko, eti oottiyo oosuwaa oottana. SHin, daroti bantta oosuwan ufayttokkona. Taani aqinye gidanawu kuuyidobay oosuwan hidootaa qaaxxiyoogaappe Yihoowawu haggaaziyoogan daro layttawu ufayttanaadan maaddiis.”

9. Yelagata wozanappe galatana bessiyoy aybissee?

⁹ Kumetta saˈan gubaaˈetun deˈiya shaˈan qoodettiya yelagata wozanappe galatiyoogee bessiyaaba. Eti bantta huuphiyaa Yihoowawu hadaraa immidi, bantta deˈuwan ayyaanaabaa halchchuwaa kaseyoosona. Hegaa mala yelagati ubbaban Yihoowa kaaletuwaa kaalliyoogaa tamaariyo wode bantta deˈuwan keehi ufayttoosona. Eti timirttiyaara, oosuwaaraanne so asaa deˈuwaara gayttidaagan Yihoowa kaaletuwaa kaalloosona. Solomoni hagaadan giis: “Ne polo wozanan GODAA ammanetta; . . . Neeni oottiyo ooso ubban a sinttaya; i nena likke ogiyaa kaalettana.” (Lee. 3:5, 6) Yelagatoo, inttena Yihooway keehippe siiqees! Intte ayyo alˈˈo, qassi I inttena naagana, kaalettananne anjjana.

10. (a) Haggaazuwaa aybippenne kaseyana koshshiyoy aybissee? (b) Haggaaziyoogan nuuni waani qara gidana danddayiyoo?

¹⁰ Neeni ne deˈuwan Yihoowa ufayssanawu ubbatoo qoppiyo wode, abaa haratuyyo yootanawu koyana. Yesuus Kiristtoosi, “Wonggeliyaa mishiraachchoi koiroora . . . odettiichchanau bessees” yaagiis. (Mar. 13:10) Sabbakiyo oosoy keehi eesoyiyaaba gidiyo gishshawu, nuuni hegaa aybippenne kaseyana koshshees. Neeni ubbatoo haggaazanawu halchchana danddayay? Neeni aqinye gidana danddayay? Neeni haggaazuwan darin ufayttennaba gidikko shin? Qassi markkattiyoogan neeni kaseegaappe aaruwan waana qara gidana danddayay? Hegawu naaˈˈubay maaddana: Loytta giigetta, qassi neeni eriyoobaa haratuyyo yootanawu mammottoppa. Neeni yaatiyoogee sabbakiyo wode keehi ufayttanaadan oottiyoogan garamettana danddayaasa.

11, 12. (a) Yelagati markkattanawu waani giigettana danddayiyoonaa? (b) Issi yelagay timirtte keettan waati markkattidee?

¹¹ Nenaara tamaariyaageeti darotoo oychchiyo oyshaa zaaranawu giigettiyoogan doommana danddayaasa. Yelagati asay darotoo oychchiyo oyshaa zaaranawu giigettana mala maaddiya huuphe yohoti jw.org giyo nu weybsaytiyaaninne hara xuufetun deˈoosona. Leemisuwawu, “Neeni lagge ayssi oyqqikkii?” giya oyshawu, 10 Oyshatu Zaaruwaa Yelagatu Oyshaa giyo brooshuriyan “Laggeti Asho Gaytotettawu Denttettiyo Wode Waata Eqettoo?” giya huuphe yohoy neeni zaaruwaa giigettanawu maaddana.—1 PHeexiroosa 3:15 nabbaba.

¹² Nenaara tamaariyaageeti jw.org saytiyaa xomoosana danddayiyoogaa etawu yoota. Luki hegaadan oottiis. Kifiliyan dumma dumma haymaanootiyaabaa I tamaariis; qassi timirtte keettaa maxaafay Yihoowa Markkatubaa issi issi bala qofaa yootiyoogaa  Luki akeekiis. I koyro mammottikkonne, he bala qofata giigissanawu oychchin asttamaariyaa maayaasu. Luki kifiliyan deˈiya ubbawu ba ammanuwaa qonccissiyoogaa xalla gidennan, nu weybsaytiyaakka bessiis. Asttamaariyaa naati ubbay, Yashissiya Ura Bubbuxennan Xoona giya bootta saleedaa misiliyaa beˈanaadan so oosuwaa immaasu. Luki loytti markkattana danddayido gishshawu keehi ufayttiis.

13. Metiyaabay merettiyo wode nuuni hidootaa qanxxana bessennay aybissee?

¹³ Neeni biyo ogee issi issitoo injjettana xayikkokka, hidootaa qanxxoppa. (2 Xim. 4:2) Metiyaabay merettiyo wode, ne halchchuwaa aggoppa. Katarina banaara oottiyaageetuyyo markkattanawu halchchido wode iyyo layttay 17. Issi bitanee O darotoo cayiis; shin A yayyabeykku. Metiyaabay gakkishinkka A loˈˈo eeshshaa bessidoogee iira oottiya Hans giyo bitaniyaa maalaalissiis. Hegaappe denddidaagan, I nu xuufeta nabbabiis, qassi Geeshsha Maxaafaa xannaˈidi xammaqettiis. Katarina hara heeri biido gishshawu, he ubbabaa erukku. Tammanne heezzu layttappe guyyiyan A SHiiquwaa Addaraashan ba soo asaara uttidaashin dere haasayaa haasayiyaagee Hansa gidiyoogaa erada A keehi ufayttidoogaa qoppa! Katarina banaara oottiyaageetuyyo hidootaa qanxxennan markkattidoogan keehi ufayttaasu!

14, 15. (a) Harati eti oottiyoobaa neeni oottanaadan nena denttettiyo wode neeni ay hassayana bessii? (b) Harati denttettiyo wode neeni waatada eqettana danddayay?

¹⁴ Neeni Yihoowawu haggaazanawu kuuyanaadan hanno gakkanaashin ha huuphe yohoy nena minttettiis. Hegaa giyoogee neeni ne deˈuwan ayyaanaabaa halchchaasa giyoogaa. Ne lagge yelagati bantta deˈuwan loˈˈo wodiyaa aattiyoogaa xallaa halchchana danddayoosona; qassi neeni etaara wodiyaa aattanaadan eti shoobbana danddayoosona. Neeni halchchidobaa polanawu murttidoogaa issi wode bessana koshshees. Neeni ne halchchuwaa doganaadan harati oottana mala paqqadoppa. Otobisiyaa leemisuwaa zaarettada qoppa, neeni he otobisiyan deˈiya asay loˈˈo wodiyaa aattiyo gishsha xallawu harasaa biya otobisiyan gelennaagee qoncce.

 ¹⁵ Neeni harati koyiyoobaa oottanaadan eti denttettiyoogaa eqettana danddayiyo daro ogee deˈees. Leemisuwawu, neeni paacettanaadan oottiya hanotaappe haakka. (Lee. 22:3) Bala gididabaa oottiyoogee kaalettiyo azzanttiyaabaa qoppa. (Gal. 6:7) Neessi zoriyaa koshshiyoogaa ne huuphiyaa kawushshada ammana. Ne aawaynne aayyiyaa, qassi ne gubaaˈiyan deˈiya kayma ishanttinne michchontti neeyyo yootiyoobaa siya.—1 PHeexiroosa 5:5, 6 nabbaba.

16. Huuphiyaa kawushshiyoogee demissiyo loˈˈobaa bessiya deˈuwan hanidabaa yoota.

¹⁶ Ba huuphiyaa kawushshiyoogee Kristofi zoriyaa ekkanaadan oottiis. I xammaqetti simmidi sohuwaara, bollaa minttiyo keettan ubbatoo loohiyoogaa doommiis. Yan aara gayttida yelagati I bantta ispporttiyaa citan gelanaadan zoridosona. I hegaabaa issi cimaara haasayiis; qassi cimay he ispporttee keehi annaacettanaadan oottiyo gishshawu, gattiyo qohuwaa Kristofi qoppanaadan yootiis. SHin Kristofi he citan geliis. Gidoppe attin, he ispporttiyan makkalabay deˈiyoogaa, ubba qassi qohiyoogaa I guyyeppe akeekiis. I zaarettidi amarida cimatuura haasayiis; ubbaykka Geeshsha Maxaafaappe A zoridosona. Kristofi, “Yihooway loˈˈo zoriyaa zoriyaageeta tawu kiittiis; qassi taani siyanawu takkikkokka, Yihooway yootiyoobaa siyaas” yaagiis. Neeni loˈˈo zoriyaa ekkanawu ne huuphiyaa kawushshay?

17, 18. (a) Yihooway ha wodiyan deˈiya yelagatuyyo amottiyoobay aybee? (b) Neeni dooridoban gastta gidiyo wode zilˈˈettennaadan aybi maaddana danddayii? Leemisuwaa yoota.

¹⁷ “Nenoo yelagau, yelagatettai keehi lo77obaa gidiyo gishshau, ne yelagatettaa laittan ufaitta; ne wozanaikka ufaitto.” (Era. 11:9) Ee, yelagatettan neeni ufayttanaadan Yihooway koyees. Hegaadan oottana danddayiyo issi ogiyaa ha huuphe yohoy qonccissiis. Neeni kuuyiyo wodenne ayyaanaabaa halchchiyo wode Yihoowa zoriyaa kaalla. Neeni naatettan hegaadan oottiyoogaa doommikko, Yihooway nena kaalettanaagaa, naaganaagaanne anjjanaagaa sohuwaara neeni akeekana. Xoossaa Qaalaappe neeni demmiyo maaddiya zore ubbaa qoppa; “Ne yelagatettaa laittan nena Medhdhidaagaa qoppa” giya zoriyaa oosuwan peeshsha.—Era. 12:1.

¹⁸ Yelagati eesuwaara diccidi gastta asa gidoosona. Etappe daroti yelagatettan balabaa halchchido gishshawu woy aynne halchchibeenna gishshawu gasttiyo wode zilˈˈettiyoogee azzanttiyaaba. SHin, neeni ayyaanaabaa halchchikko, neeni dooridoban, gastta asa gidiyo wode ufayttana. Yelagatettan ispporttiyan keehi gooba gidida Miryaani hanotaykka hegaa mala. Miryaana Winter Olempik Gemis giyo annaaciyaa annaacettanaadan shoobettikkone, A kumetta wodiyaa haggaazanawu dooraasu. Miryaana kumetta wodiyaa haggaazuwaa doommoosappe 30⁠ppe dariya laytta gidikkonne, A haˈˈikka ba azinaara haggaazawusu. A hagaadan gaasu: “Hayttatiyoogee, bonchchettiyoogee, maataynne duretettay aattiyaabanne xoqqu oottidi xeellana bessenna halchcho. Xoossawu haggaaziyoogeenne ayyaanaaban asaa guutta ogiyankka maaddiyoogee merinawu goˈˈiya loˈˈo halchcho.”

19. Naatettan ayyaanaabaa halchchiyoogee demissiyo goˈˈaa qanttan yoota.

¹⁹ Gubaaˈiyan deˈiya yelagati banttana gakkiya metuwaa xooniyo gishshawunne bantta deˈuwan Yihoowawu haggaazanawu murttido gishshawu wozanappe galatana bessees. Yelagati hegaadan oottiyoy ayyaanaaban halchchidobawu baaxetiyoogaananne sabbakiyo oosuwaa aybippenne kaseyiyoogaana. Hegaa bollikka, ha alamee eta qofay shaahettanaadan oottenna mala eti qofaa qachchidosona. Yelagati minnidi oottidobay hada gidennaagaa ammanettana danddayoosona. Eta ishanttinne michchontti eta siiquwan maaddoosona; qassi eti bantta huuphiyaa Yihoowawu hadaraa immiyo wode, eti deˈuwan halchchidobay polettana.