XANNAˈIYO HUUPHE YOHUWAA 17
Iita Ayyaanata Eqettanawu Yihoowa Maaduwaa Ekka
“Nuuni saluwaa sohuwan de7iya iita ayyaana wolqqatuura . . . olettiyoogaappe attin, asaara baaxetokko.”—EFI. 6:12.
MAZAMURE 55 Etawu Yayyoppite!
HA XINAATIYAN *
1. Efisoona 6:10-13y qonccissiyoogaadan, Yihooway nuussi qoppiyoogaa bessiyo ufayssiya ogetuppe issoy aybee? Qonccissa.
NUUNI Yihoowa ashkkarati nu morkketa eqettanaadan I maaddiyoogee nuussi I qoppiyoogaa bessiyo keehi ufayssiya ogetuppe issuwaa. Seexaanaynne daydanttati nuuyyo waanna morkke. Ha nu morkketuppe naagettanaadan Yihooway nuussi yootees; qassi eta eqettanawu nuussi koshshiyaabaa I immees. (Efisoona 6:10-13 nabbaba.) Nuuni Yihoowa maaduwaa ekkikkonne an wozanappe ammanettikko, Dabloosa eqettidi xoonana danddayoos. Nuuni kiitettida PHawuloosaagaadan ammanettana danddayoos. I, “Xoossai nu bagga gidikko, nuna oonee qohanai?” yaagiis.—Roo. 8:31.
2. Ha huuphe yohuwan nuuni ay xannaˈanee?
2 Nuuni tumu Kiristtaane gidiyo gishshawu, Seexaanaaninne daydanttatun keehi xeelaa wottokko. Nuuni Yihoowabaa tamaariyoogaaninne ayyo haggaaziyoogan keehi xeelaa wottoos. (Maz. 25:5) SHin, Seexaanay oottiyoobaa nuuni erana koshshees. Aybissi? Yaatikko, nuuni A cimuwaa eqettana danddayoos. (2 Qor. 2:11) Seexaanaynne daydanttati asaa cimmanawu baaxetiyo issi waanna ogiyaa ha huuphe yohuwan beˈana. Nuuni eta eqettidi waati xoonana danddayiyaakkokka beˈana.
IITA AYYAANATI ASAA WAATI CIMMIYOONAA?
3-4. (a) Iita ayyaanaa oosoy aybee? (b) Iita ayyaanaa oosuwan ammaniyoogee ay keena aakkidee?
3 Seexaanaynne daydanttati asaa cimmanawu baaxetiyo waanna ogee iita ayyaanaa oosuwaa. Asi erana woy oottana danddayennabaa iita ayyaanaa oosuwaa oottiyaageeti eroos woy oottoos goosona. Leemisuwawu, issoti issoti xoolinttiyaa qoodiyoogan woy shareechchiyoogan sinttanaabaa erana danddayoos goosona. Harati qassi, hayqqidaageeta haasayissiyaabadan hanana danddayoosona. Issoti issoti shareechchoosona woy kaayoosona, qassi eti hara ura bolli bitaa bitana danddayoosona. *
4 Iita ayyaanaa oosuwan ammaniyoogee ay keena aakkidee? Tohossa Amarkkaaninne Karibiyaane haruuruwan 18 biittatun xinaatiyawu oychchido heezzu asaappe issoy kaayuwan woy bitan ammaniyoogaanne hegaa keena asay iita ayyaanatuura haasayana danddayettees giidi ammaniyoogaa bessees. Afirkkan 18 biittatun hara xinaatiyawu asay oyshettiis. He biittatun, oychchido asaappe baggaappe dariyaagee shareechchiyoogan ammanees. Nuuni awan deˈikkonne iita ayyaanaa oosuwaappe naagettana bessiyoogee qoncce. Wonikka, Seexaanay “sa7a ubbaa” balettanawu koyees.—Ajj. 12:9.
5. Iita ayyaanaa oosuwaaban Yihoowawu aybi siyettii?
5 Yihooway ‘tumaa Xoossaa.’ (Maz. 31:5) Yaatin, iita ayyaanaa oosuwaaban ayyo aybi siyettii? I hegaa ixxees! Yihooway Israaˈeelatussi hagaadan giis: “Ba attuma na7a woikko macca na7a yarshshossi giidi, taman xuuggiya ai asinne intte giddon beettoppo. Bitiyaabi, maracce xeelliyaabi, murunniyaabinne qaadaa odiyaabi qassi intte giddon de7oppo. Daggamiyaagee, ayyaanata xeegiyaagee, shareechchiyaageenne haiqqida asaa ayyaanaa xeegiyaagee intte giddon de7oppo. Hegaa malabaa oottiya ai asinne GODAA matan ixettida asa.” (Zaa. 18:10-12) Kiristtaaneti Yihooway Israaˈeelatuyyo immido Higgiyaa garssan deˈokkona. Gidoppe attin, iita ayyaanaa oosuwaa xeelliyaagan Yihoowa xeelay laamettibeennaagaa nuuni eroos.—Mil. 3:6.
6. (a) Seexaanay asaa qohanawu iita ayyaanaa oosuwaa waati goˈettii? (b) Eranchchaa 9:5y yootiyoogaadan, hayqqidaageetu hanotaabay tumay aybee?
6 Seexaanay asaa qohanawu iita ayyaanaa oosuwaa goˈettiyoogaa Yihooway eriyo gishshawu, I nuuni hegaappe naagettanaadan yootees. Hayqqidaageeti harasan paxa deˈoosona giyo wordduwaa mala worddota aassanawu Seexaanay iita ayyaanaa oosuwaa goˈettees. (Eranchchaa 9:5 nabbaba.) Asay yayyanaadan oottanawunne eta Yihoowappe haassanawukka Seexaanay iita ayyaanaa oosuwaa goˈettees. I iita ayyaanaa oosuwaa oottiya asay Yihoowan ammanettiyoogaappe iita ayyaanatun ammanettanaadan oottanawu halchchiis.
NUUNI IITA AYYAANATA WAATI EQETTIYOO?
7. Yihooway nuuyyo ay yootii?
7 Kasetidi beˈidoogaadan, nuuni Seexaanaaninne daydanttatun cimettennaadan naagettanawu erana koshshiyaabaa Yihooway nuuyyo yootees. Nuuni Seexaanaanne daydanttata eqettanawu oottana danddayiyoobaappe amaridaagaa ane pilggoos.
8. (a) Nuuni iita ayyaanata eqettiyo waanna ogee aybee? (b) Mazamure 146:4y hayqqidaageetubaa Seexaanay yootiyo wordduwaa waati qoncciya kessii?
8 Xoossaa Qaalaa nabbabanne hegaa wotta dentta qoppa. Hagee iita ayyaanati aassiyo worddota nuuni eqettiyo waanna oge. Xoossaa Qaalay Seexaanay aassiyo worddota qanxxana danddayiya qara biso mala. (Efi. 6:17) Leemisuwawu, hayqqidaageeti paxa deˈiyaageetuura haasayana danddayoosona giyoogee worddo gidiyoogaa Xoossaa Qaalay qonccissees. (Mazamure 146:4 nabbaba.) Sinttanaabaa xeelliyaagan ammanttiyaabaa kasetidi odana danddayiyay Yihoowa xalla gidiyoogaakka Geeshsha Maxaafay nuna hassayissees. (Isi. 45:21; 46:10) Nuuni Xoossaa Qaalaa ubbatoo nabbabiyaabanne hegaa wotti dentti qoppiyaaba gidikko, iita ayyaanati nuuni ammananaadan koyiyo worddota eqettanawunne ixxanawu giigi uttoos.
9. Nuuni naagettana bessiyo iita ayyaanaa oosoti awugeetee?
9 Iita ayyaanaa oosuwaara gayttida aybanne eqetta. Nuuni tumu Kiristtaane gidiyo gishshawu, iita ayyaanaa ooso mule oottokko. Leemisuwawu, shareechcho oychchanawu bookko woy hayqqidaageeta hara ayba ogiyaaninne haasayissanawu malokko. Hagaappe kasetiya huuphe yohuwan beˈidoogaadan, hayqqidaageeti harasan paxa deˈoosona giyo ammanoy denddo gidido, baliyaara gayttida meezetuppe nuuni naagettoos. Nuuni sinttanaabaa eranawu xoolinttiyaa paydiyoogaa woy qaadaa odiyoogaa goˈettokko. (Isi. 8: 19) Hegaa mala oosoti ubbay keehi qohiyoogaanne eti nuna Seexaanaaranne daydanttatuura gattana danddayiyoogaa eroos.
Geella iita ayyaanaa oosuwaara gayttidabi aybinne intteyyo deˈikko, hegaa xayssiyoogaaninne iita ayyaanaa oosuwaara gayttidaban allaxxiyoobaappe naagettiyoogan beni wode Kiristtaanetu leemisuwaa kaallite (Mentto 10-12 xeella)
10-11. (a) Koyro xeetu layttan deˈida amarida asati tumaa erido wode ay oottidonaa? (b) Koyro Qoronttoosa 10:21 yootiyoogaadan, nuuni beni wode Kiristtaanetu leemisuwaa kaallana koshshiyoy aybissee, qassi waati kaallana danddayiyoo?
10 Iita ayyaanaa oosuwaara gayttidabata xayssa. Koyro xeetu layttan Efisoonan deˈiyaageetuppe amaridaageeti iita ayyaanaa oosuwaa oottoosona. Eti tumaa erido wode, gitabaa oottidosona. “Bitiyaageetuppe [woy shareechchiyaageetuppe] daroti bantta maxaafata shiishshidi, asaa ubbaa sinttan xuuggidosona.” (Oos. 19:19) He asati iita ayyaanatu oosuwaa eqettanawu danddayiyo ubbabaa oottidosona. SHareechchiyoogaara gayttida eta maxaafatu waagay keehi daro. Gidikkonne, eti he maxaafata haratussi immiyoogaappe woy bayzziyoogaappe eta xayssidosona. Eta keehi qofissiday ha maxaafata bayzzidi demmiyo miishshaa gidennan, Yihoowa ufayssiyoogaa.
11 Koyro xeetu layttan deˈida he Kiristtaanetu leemisuwaa waati kaallana danddayiyoo? Iita ayyaanaa oosuwaara gayttidabay deˈikko xayssiyoogee loˈˈo. Asay bana iita ayyaanatuppe naaganawu qachchiyo kitaafati, yeleelloti woy harabati hegeetuppe amaridaageeta.—1 Qoronttoosa 10:21 nabbaba.
12. Nuuni allaxxiyoobaa xeelliyaagan nuna woygidi oychchana koshshii?
12 Neeni allaxxiyoobaa loyttada qora. Hagaadan nena oychcha: ‘Daggamiyoogaabaa yootiya maxaafata, maxeeteta woy hara xaafettidabaa taani Interneettiyan nabbabiyaanaa? Taani siyiyo yettay, taani beˈiyo pilimetinne televizhiiniyaa prograameti, woy taani kaaˈiyo biiduwaa kaassay shin? Taani allaxxiyo iita ayyaanaa oosuwaara gayttida aybinne deˈii? Hegee vamppayereta woy zombbeta giyoogaa malabata woy asa wolqqappe aadhdhiyaabaa bessiyaabee? Hegee, shareechchiyoogaa, murunniyoogaa woy qanggiyoogaa qohenna kaassadan bessii?’ Miichchawu kaassawu giidi odiyo hayse ubbay iita ayyaanaa oosuwaara gayttidaba giyoogaa gidenna. Neeni allaxxiyoobaa ne qoriyo wode, Yihooway ixxiyoobatuppe haakkada deˈanaadan maaddiyaabaa dooranawu murtta. Nuuni Xoossaa sinttan “pokkoi bainna zoriya wozanai” woy kahay deˈiyoogeeta gidanawu nuussi danddayettida ubbabaa oottanawu koyoos.—Oos. 24:16. *
13. Nuuni ay oottennaadan naagettana koshshii?
13 Daydanttatu taarikiyaa yootennaadan naagetta. Hegaa xeelliyaagan, nuuni Yesuusa leemisuwaa kaallana koshshees. (1 PHe. 2:21) Yesuusi saˈaa yaanaappe kase saluwan deˈido gishshawu, I Seexaanaabaanne daydanttatubaa darobaa erees. SHin I ha iita ayyaanati oottidobaa taarikiyaa yootibeenna. Yesuusi Seexaanaabaa gidennan, Yihoowabaa asaa tamaarissanawu koyiis. Daydanttatubaa taariketa nuuni yootennan aggiyoogan, Yesuusa leemisuwaa kaallana danddayoos. Nu ‘wozanay loˈˈo qofaa,’ hegeekka tumaa pulttiyoogaa nuuni haasayiyoobay bessees.—Maz. 45:1.
Nuuni iita ayyaanata mulekka yayyokko. Yihooway, Yesuusinne kiitanchchati etappe wolqqan keehi aadhdhoosona (Mentto 14-15 xeella) *
14-15. (a) Nuuni iita ayyaanata yayyana koshshennay aybissee? (b) Yihooway ha wodiyan ba asaa naagiyoogaa bessiya ayba naqaashay deˈii?
14 Iita ayyaanata yayyoppa. Ha iita alamiyan, iitabay nu bolli gakkana danddayees. Qoppennan daafabay gakkana, harggee oyqqana woy hayqoy worana danddayees. SHin hegawu gaaso gidiyay ayyaana meretata giidi nu qoppana koshshenna. Geeshsha Maxaafay O bollinne ‘qaadaynne wodee oottiyoobay hanana’ danddayiyoogaa yootees. (Era. 9:11) Yihooway daydanttatuppe aadhdhiya wolqqay baayyo deˈiyoogaa bessiis. Leemisuwawu, Seexaanay Iyyooba woranaadan Xoossay eeno gibeenna. (Iyy. 2:6) Muuse wode, Yihooway baayyo Gibxxe shareechchotuppe aadhdhiya wolqqay deˈiyoogaa bessiis. (Kes. 8:18; 9:11) Guyyeppe, Yihooway saluwan Yesuusayyo Seexaanaanne daydanttatu bolli maataa immido gishshawu, Yesuusi eta saluwaappe saˈawu duge oliis. Mata wode qassi, Seexaanaynne daydanttati ciimma ollan olettana, yan eti oonanne qohana danddayokkona.—Ajj. 12:9; 20:2, 3.
15 Yihooway ba asaa ha wodiyan naagiyoogaa bessiya daro naqaashaa nuuni beˈoos. Hagaa qoppa: Nuuni kumetta saˈan tumaa sabbakoosinne tamaarissoos. (Maa. 28:19, 20) Hegaappe denddidaagan, Dabloosa iita oosoy qoncciya kiyanaadan oottoos. Danddayiyaaba gidiyaakko, Seexaanay nu oosuwaa diggana; shin I danddayenna. Yaatiyo gishshawu, nuuni iita ayyaanata yayyana koshshenna. ‘Ba kumetta wozanaappe Yihoowan ammanettiya asa minttettanawu Yihoowa ayfee saˈaa bollan ubbasaa xeelliyoogaa’ nuuni eroos. (2 Odi. 16:9) Nuuni Yihoowawu ammanettikko, daydanttati nuna merinawu qohana danddayokkona.
YIHOOWAPPE MAADUWAA EKKIYAAGEETI DEMMIYO ANJJOTA
16-17. Iita ayyaanata eqettanawu Xalana koshshiyoogaa bessiya leemisuwaa yoota.
16 Laggeti woy dabboti nuussi loˈˈobaa qoppidi nuna eqettiyo wode, nuuni iita ayyaanata teqqanawu xalana koshshees. SHin hegaadan xaliyaageeta Yihooway anjjees. Gaana biittan deˈiya Eriiko giyo michchee hanotaa qoppa. Eriika Geeshsha Maxaafaa xinaatiyaa doommiyo wode iyyo layttay 21. I aaway shareechcho gidiyo gishshawu, A ba aawaa xoossatussi yarshshido ashuwaa miyoogaa mala meeziyaa kaallana mala asay naagees. Eriika eeno geennan ixxin, eta soo asay hegaa xoossata cayiyoobadan qoppiis. Eta soo asati asatettaanne kahaa harggiyan bantta xoossati banttana qaxxayana giidi qoppidosona.
17 Eriika bantta soo asay bana sooppe kessikkokka, eti he meeziyaa kaallanaadan O wolqqanttanawu malikkonne, A kaallabeykku. Amarida Yihoowa Markkati A banttanaara deˈanaadan oottidosona. Yaatiyoogan, Yihooway Eriikiyyo ishatunne michchotu mala gidida I mala Kiristtaaneta, iyyo ooratta so asa ootti immidi, O anjjiis. (Mar. 10:29, 30) I dabboti O bohidabanne iyyo deˈiyaaba ubbaa xuuggidaba gidikkonne, Eriika Yihoowassi ammanettada deˈaasu; qassi A xammaqettaasunne haˈˈi ubba wode aqinye. Eriika daydanttatussi yayyabeykku. Eriika bantta soo asaa xeelliyaagan hagaadan gaasu: “Taani nu soo asay Yihoowa eridinne siiqiya nu Xoossawu haggaaziyoogan laˈatettaa demmidi ufayttanaadan, ubba galla woossays.”
18. Nuuni Yihoowan ammanettiyoogan demmiyo anjjoti aybee?
18 Ammanuwaa hegaadan paacciyaabay nuna ubbaa waayi gakkana. Gidikkokka, nuuni ubbay iita ayyaanata eqettananne Yihoowan ammanettana koshshees. Hegaadan oottikko, nuuni daro anjjota demmana, qassi Seexaanaa worddotun cimettennaadan naagettana. Hegaa bollikka, daydanttata yayyiyoogan Yihoowassi haggaaziyoogaa aggokko. Ubbaappe aaruwan, nuuni Yihoowaara dabbotido dabbotaa minttoos. Kiitettida Yaaqoobi, “Intte Xoossau haarettite. Yaatidi xalahe halaqaa teqqite; i intteppe baqatana. Xoossaakko shiiqite; ikka inttekko shiiqana” yaagiis.—Yaaq. 4:7, 8.
MAZAMURE 150 Attanawu Xoossaa Koyite
^ MENT. 5 Iita ayyaanatubaanne eti nu bolli gattana danddayiyo qohuwaabaa Yihooway siiquwan nuuyyo yootiis. Iita ayyaanati asaa waati cimmanawu baaxetiyoonaa? Iita ayyaanata eqettanawu ay oottana danddayiyoo? Nuuni etan cimettennaadan Yihooway nuna waati maaddiyaakko ha huuphe yohuwan beˈana.
^ MENT. 3 QONCCISSIDO QAALAA: Iita ayyaanaa oosoy daydanttatuura gayttida ammanotanne meezeta qonccissiyaaba. Asay hayqqiyo wode eta ayyaanay paxa attidi issi ura (shareechchuwaa) baggaara paxa deˈiyaageetuura haasayiyoobadan ammaniyoogee he oosotuppe issuwaa. Kaayiyoogeenne shareechchiyoogeekka iita ayyaanaa ooso. SHareechchiyoogaa giyo qaalay ha huuphe yohuwan asa wolqqaappe aadhdhiya oosuwaara gayttidabaa qonccissees. Qanggiyoogeenne murunniyoogeekka he ooso gidana danddayees. Issi issi asay asaa miichchanawu kaassawu kushiyaa eesuwan qaattiyoogan oottiyo cimobay hegaa bessiyaaba gidenna.
^ MENT. 12 Allaxxiyoobaa xeelliyaagan higgiyaa kessiyo maati cimatussi baawa. Issi Kiristtaanee ay nabbabanaakko, ay beˈanaakko, woy ay kaaˈanaakko dooriyo wode, Geeshsha Maxaafan loohida ba kahaa goˈettana bessees. So asawu huuphe gidida aadhdhida eranchcha uri ba soo asay allaxxiyoobaa dooriyo wode, hegee Geeshsha Maxaafay yootiyo maaratuura maayiyaakkonne akeekees.—Jw.org® NUBAA > ASAY DAROTOO OYCHCHIYO OYSHAA giyaagaa giddon, “Yihoowa Markkati Issi Issi Pilimeta, Maxaafata, woy Yettata Diggiyoonaa?” giya huuphe yohuwaa xeella.
^ MENT. 54 MISILIYAA QONCCISSUWAA: Nu wolqqaama Kawoy Yesuusi daro kiitanchchata kaalettiyoogaa bessiya misiliyaa. Yihoowa araatay etappe bollaara deˈees.
