1, 2. Yihooway nuuyyo waati kehii?

YIHOOWAY keha Xoossa. Nuuyyo deˈiya ubbabaa I immiis. Saˈan deˈiya alˈˈoba ubbay aagaa; qassi I hegaa deˈuwawu koshshiyaabaa kunttanawu goˈettees. (Maz. 104:13-15; Hag. 2:8) Yihooway he alˈˈobata ba asawu koshshiyaabaa kunttanawu maalaaliya ogiyan waati goˈettidaakko bessiya darobaa Geeshsha Maxaafay yootees.

² Israaˈeelati bazzuwan deˈiyo wode Yihooway etawu 40 layttawu mannaanne haattaa immiis. (Kes. 16:35) Hegaappe denddidaagan, ‘etawu koshshiyaabaappe issibaynne xayibeenna.’ (Nah. 9:20, 21) Yihooway hananabaa yootiya Elssaaˈa baggaara, ammanettida amˈˈee zaytee maalaaliya hanotan daranaadan oottiis. Xoossay immido imotan A ba acuwaa qanxxada, baayyoonne ba attuma naatuyyo gidiya miishshaa demmaasu. (2 Kaw. 4:1-7) Yihooway maaddin, Yesuusi maalaalissiya ogiyan asaa qumaa miziis; ubba qassi koshshiyo wode miishshaa demmanaadan oottiis.—Maa. 15:35-38; 17:27.

3. Ha huuphe yohuwan ay xannaˈanee?

³ Saˈan deˈiya meretatussi koshshiyaabaa kunttana danddayiyo  zawi baynna aqoy Yihoowayyo deˈees. SHin, I ba ashkkarati banttawu deˈiya aquwaa ba dirijjitiyaa maaddanawu goˈettanaadan shoobbees. (Kes. 36:3-7; Leemiso 3:9 nabbaba.) Yihooway nuuni nuussi deˈiya alˈˈobaa zaarettidi ayyo immanaadan koyiyoy aybissee? Yihoowa ashkkarati beni wode A oosuwaa waati maaddidonaa? Ha wodiyan immiyo miishshaa dirijjitee waati goˈettii? Ha oyshatu zaaruwaa ha huuphe yohuwan pilggana.

4. Nuuni Yihoowa oosuwaa kaafiyo wode waatiyoogaa bessiyoo?

⁴ Nuuni Yihoowa siiqiyoonne nashshiyo gishshawu ayyo immoos. Yihooway nuuyyo oottido ubbabaa qoppiyo wode keehi ufayttoos. Kawuwaa Daawiti beeta maqidasiyaa keexxanawu aybi koshshiyaakko yootidobaa nuunikka maayoos. Nuussi deˈiya ubbabay Yihoowappe ekkidobanne nuuni assi immiyo aybinne I nuussi immidoba gidiyoogaa Daawiti yootiis.—1 Hanidabaa Odiya 29:11-14 nabbaba.

5. Uuzettennan immiyoogee nu goynuwawu keehi koshshiyoogaa Geeshsha Maxaafay waati qonccissii?

⁵ Immiyoogee Yihoowawu goynniyoogaakka erissiyaaba. Ajjuutan, kiitettida Yohaannisi Yihoowa ashkkarati saluwan hagaadan giyoogaa siyiis: “Nu Godau Xoossau, neeni bonchchuwaa, sabaanne wolqqaa ekkanau bessaasa. Aissi giikko, ubbabaa neeni medhdhadasa; qassi ubbabaikka neeni koyidoogaadan haniisinne de7iis.” (Ajj. 4:11) Nuussi deˈiyaabaappe aaro loˈˈobaa Yihoowayyo immiyoogan bonchchuwaanne sabaa ubbaa I ekkanawu bessees giyoogan maayikkii? Israaˈeelati layttan layttan heezzutoo baalaa bonchchanawu Yihoowa sinttan beettanaadan Yihooway Muuse baggaara azaziis. He baalatun eti goynniyo wode, Israaˈeelati “GODAA sintti yiiddi, mela kushe” yookkona. (Zaa. 16:16) Hegaadan ha wodiyan, nuuni uuzettennan immiyoogan nashshiyoogeenne Yihoowa dirijjitiyawu saˈaa baggay oottiyo oosuwaa maaddiyoogee nu goynuwawu keehi koshshiyaaba.

6. Immiyoogee nuussi loˈˈo gidiyoy aybissee? (Doomettan deˈiya misiliyaa xeella.)

⁶ Immiyoogee nuussi loˈˈo. Coo ekkiyoogaappe kehatettan immiyoogee nu payyatettawu loˈˈo. (Leemiso 29:21 nabbaba.) Aawaynne aayyiyaa awu immido guutta miishshaappe etassi imotaa immiya issi naˈaa qoppana danddayoos. Aawaynne aayyiyaa he imotaa keehi nashshoosona! Bantta son deˈiya issi yelaga aqinyee son koshshiyaaban maaddanawu amarida miishshaa ba aawaassinne aayeessi immana danddayees. Aawaynne aayyiyaa naˈi immees giidi naagana xayikkonne, keha gidiyoogee eti awu oottido ubbabaa nashshiyoogaa bessiyaaba gidiyo gishshawu he imotaa ekkana danddayoosona. Hegaadankka, nuuni nuuyyo deˈiya alˈˈobaappe immiyoogee nuussi loˈˈo gidiyoogaa Yihooway erees.

7, 8. (a) Yihoowa asay beni wode keexxanawu immiyoogan waani leemiso gidii? (b) Yihoowa asay beni wode A oosuwaa maaddanawu immiyoogan waani leemiso gidii?

⁷ Issi uri ba aquwaappe immiyoogee Geeshsha Maxaafay loytti yootiyooba. Issi issi hanotan, Yihoowa asay keexxiyoobawu immiis. Leemisuwawu, Xoossaa dunkkaaniyaa giigissanawu Israaˈeelati immanaadan Muusee minttettiis. Guyyeppe, beeta maqidasiyaa keexxanawu Kawuwaa Daawiti asay immanaadan minttettiis. (Kes. 35:5; 1 Odi. 29:5-9) Kawuwaa Yoˈaasha wode, shiiqida miishshaa Yihoowa beeta maqidasiyaa giigissanawu qeeseti goˈettidosona. (2 Kaw. 12:4, 5) Namisaa gaasuwan maadoy koshshiyo  ishantti deˈiyoogaa koyro xeetu layttaa Kiristtaane gubaaˈee akeekidi, eti “huuphiyan huuphiyan bantta wolqqaa keenaa miishshaa peeridi, Yihudan de7iya bantta ishanttussi maaduwaa yeddanau qofaa qachchidosona.”—Oos. 11:27-30.

⁸ Hara hanotan, Yihoowa asay oosuwan aawatettay deˈiyoogeeta maaddanawu miishshaa immees. Muuse Higgiyan, hara zaretuugaadan Leewatussi laatay imettenna. Israaˈeelati etayyo asirataa immoosona, hegee Leewati Xoossaa dunkkaaniyaa oosuwan xeelaa wottanaadan maaddees. (Qoo. 18:21) Hegaadan, guyyeppe Yesuusinne I kiittidoogeeti maccaasati “banttassi de7iyaagaappe” kehatettan immidoban goˈettidosona.—Luq. 8:1-3.

9. Beni wode imotay awuppe beettidee?

⁹ He imotay dumma dumma sohuwaappe beettidoogee qoncce. Israaˈeelati bazzuwan Xoossaa dunkkaaniyaa giigissanawu immiyo wode, eti Gibxxeppe ehiidobaa immennan aggokkona. (Kes. 3:21, 22; 35:22-24) Koyro xeetu layttan, issi issi Kiristtaaneti bantta aquwaa, hegeekka gadiyaa woy keettaa bayzzidi miishshaa kiitettidaageetuyyo ehiidosona. Kiitettidaageeti he miishshaa maadoy koshshiyoogeetuyyo immidosona. (Oos. 4:34, 35) Harati qassi miishshaa dagayidi oosuwaa maaddanawu ubbatoo immoosona. (1 Qor. 16:2) Hegaa gishshawu, dureekka hiyyeesaykka ubbay immiis.—Luq. 21:1-4.

10, 11. (a) Beni wode deˈida keha gididi Yihoowawu oottidaageetuppe ay tamaarana danddayiyoo? (b) Kawotettaabaa oosuwaa maaddiyo ne maataa xeelliyaagan neeyyo aybi siyettii?

¹⁰ Ha wodiyan, nuunikka halchchido issibawu miishshaa immanaadan oyshettana danddayoos. Leemisuwawu, intte gubaaˈee oorattaa SHiiquwaa Addaraashaa keexxanawu halchchidee? Woy qassi intte SHiiquwaa Addaraashaa bottokonana koshshii? Nu macara biiruwaanne gita shiiquwaa shiiqiyo sohuwaa bottokonanawu, woy meretay gattido daafabaa gaasuwan qohettida ishantta maaddanawu miishshaa koshshiyoogaa akeekana danddayoos. Waanna biiruwaaninne kumetta saˈan deˈiya macara biirotun oottiyaageeta maaddanawukka miishshaa immoos. Nu immiyo miishshay misoonaaweta, dumma aqinyetanne woradaa oosuwaa oottiyaageeta maaddees. Intte gubaaˈee kumetta saˈan deˈiya ishantta maaddiya, Gita SHiiquwaa Addaraashaanne SHiiquwaa Addaraashaa keexxiyoogawu miishshaa immanawukka qaalaa gelidoogee qoncce.

¹¹ Yihooway ha wurssetta wodiyan oottiiddi deˈiyo oosuwaa nuuni ubbay maaddana danddayoos. Imettiya imotaappe dariya baggay odettenna. Nuuni miishshaa SHiiquwaa Addaraashan deˈiya saaxiniyan yeggana woy Interneettiyan jw.org saytiyaa baggaara immana danddayoos. Nuuni immiyo guutta miishshay aynne maaddenna giidi qoppana danddayoos. SHin, ha wodiyan nuuyyo deˈiya miishshaappe dariya baggay amaridaageeti immido daro miishshaa gidennan, daroti immido guutta miishshaa. Nu ishantti, keehi guutta miishshay deˈiyoogeetikka gidin, beni Maqidooniyan deˈiya Kiristtaanetu leemisuwaa kaalloosona. Eti “hiyyeesa,” shin immanawu woossidi, kehatettan immidosona.—2 Qor. 8:1-4.

12. Dirijjitee imettida miishshaa maara goˈettanawu ay keena baaxetii?

¹² Bolla Gididi Heemmiyaagee dirijjitiyaa miishshaa goˈettiyoogan ammanettidaagaanne wozannaama. (Maa. 24:45) Bolla Gididi Heemmiyaagaa yarati loˈˈobaa kuuyanawu woossoosona, qassi eti miishshaa waati goˈettanaakko loyttidi halchchoosona. (Luq. 14:28) Beni wode, imettiya miishshaa  kaalliya ammanettiyaageeti he miishshaa Yihoowa goyno xallawu goˈettanaadan kaalloosona. Leemisuwawu, Iziri Parsse kawoy immidobaa ekkidi Yerusalaame simmiis; I efiido worqqay, biraynne harabay ha wodiyan 100 miiloone Amarkka doolaariyaappe darees. Iziri he miishshay Yihoowawu imettidabadan xeelliis. Hegaa gishshawu, eti iita biittaa kanttidi biyo wode he miishshaa naaganaadan etawu qoncce kaaletuwaa immiis. (Izi. 8:24-34) Kiitettida PHawuloosi Yihudan deˈiya qohettida ishantta maaddanawu miishshaa shiishshiis. I he miishshaa efiyaageetussi ‘Godaa sintta xalaalan loˈˈobaa oottiyaageeta gidennan, asa sinttankka loˈˈobaa oottanaadan’ yootiis. (2 Qoronttoosa 8:18-21 nabbaba.) Ha wodiyan, nu dirijjitee Iziranne PHawuloosa leemisuwaa kaallees; qassi imettida miishshaa maara goˈettees.

13. Dirijjitee mata wode issi issibaa laammidoy aybissee?

¹³ Issi keettaa asay demmiyo miishshaappe koshshiyaabawu kessiyo miishshay darennaadan issi issibaa laammana danddayees; woy qassi eti Yihoowa oosuwaa kaseegaappe aaruwan oottanawu waatidi sima deˈo deˈanaakkonne kaseegaappe guutta miishshaa kessanaakko qoppana danddayoosona. Yihoowa dirijjitiyaa hanotaykka hegaadaana. Mata wodeppe haa simmin, ufayssiya oorattabay oosettiiddi deˈees. Issi issitoo, hegee demmiyo miishshaappe kessiyo miishshay daranaadan oottiis. Hegaa gishshawu, dirijjitee kaseegaadan miishshaa kessennan aggiyo ogiyaa koyees; qassi neeni kehatettan immiyo miishshaa loytti goˈettidi danddayettida keenan darobaa oottanawu oosuwaa poxxees.

14-16. (a) Neeni immiyooban oosettiiddi deˈiya issi issibay aybee? (b) Ha giigissidobaappe neeni ayba ogiyan goˈettadii?

¹⁴ Yihoowawu daro layttawu haggaazidaageetuppe daroti ayyaanaaban darobay giigido hagaa mala wodiyaa mule beˈi erokko yaagi haasayiyoogaa siyoos. Ane qoppa! Mata wode, jw.org sayteenne JW Brodkastingee doomettiis. Ooratta Alamiyaa Geeshsha Maxaafaa Birshshettay daro doonatun attamettiis. Qassi 2014/2015n, kumetta saˈan 14 katamatun deˈiya gita isttaadeemetuppe amaridaageetun “Kasetidi Xoossaa Kawotettaa Koyite!” giya daro biittaa ishantti issippe shiiqiyo heezzu gallassa gita shiiqoy giigiis. He shiiquwan shiiqidaageeti keehi ufayttidosona.

¹⁵ Nuuni Yihoowa dirijjitiyaappe keehi maaddiyaaba demmiyo gishshawu daroti hegaa nashshidosona. Leemisuwawu, JW  Brodkastingiyaa xeelliyaagan, Isiyan deˈiya issi biittan haggaaziya azinaynne machchiyaa hagaadan giidosona: “Nuuni haggaaziyoy qeeri katamaana. Hegaa gishshawu, nuuni nurkka deˈiyaabadan qoppoos; qassi Yihoowa oosoy ay keena aahokko sohuwaara dogoos. SHin, JW Brodkastingiyan deˈiya dumma dumma prograameta beˈosaara nuuni kumetta saˈan deˈiya ishanttu maabaraa yame gidiyoogaa hassayoos. He kataman deˈiya ishanttinne michchontti JW Brodkastingiyan keehi ufayttoosona. Eti aginan aginan kiyiya prograamiyaa beˈi simmidi, Bolla Gididi Heemmiyaagaa yaratuura keehi dabbotidabadan haasayiyoogaa nuuni darotoo siyoos. Eti Xoossaa dirijjitiyaa yame gidiyoogan haˈˈi awudeegaappenne aaruwan ceeqettoosona.”

¹⁶ Kumetta saˈan, 2,500 gidiya SHiiquwaa Addaraashay keexettiiddi deˈees; woy qassi keehi bottokonettees. Honddurasen deˈiya issi gubaaˈiyaa yarati bantta ooratta SHiiquwaa Addaraashaa goˈettiyoogaa doommi simmidi hagaadan giidosona: “Nuuni nu heeran yeemottidoogaadan SHiiquwaa Addaraashaa demmanaadan maaddida, saluwaaninne saˈan deˈiya Yihoowa soo asaanne kumetta saˈan deˈiya maalaalissiya nu ishanttu maabaraa yame gididoogan keehi ufayttoos.” Daroti bantta doonan birshshettida Geeshsha Maxaafaanne hara xuufeta demmidi, qohettidaageeta maaddiyaageeti oottiyooban maadetti simmidi, woy asay dariyo sohuwaaninne bantta heeran dabaaban markkattiyoogee demissiyo ayfiyaa beˈidi hegaadan nashshoosona.

17. Yihooway ba dirijjitiyaa ha wodiyan maaddiyoogaa nuuni waati eriyoo?

¹⁷ He ubba oosuwaa dosan imettiya miishsha xallaa goˈettidi nuuni waati oottiyaakko hara asay akeekana danddayenna. Issi gita dirijjitiyaa alaafee nuuni xuufiyaa attamiyo pabirkkatuppe issuwaa beˈiis. Oosettidaba ubbay miishsha demmanawu aybanne oottennan, bantta dosan oottiya asatun, dosan imettiya miishshan oosettidoogan I maalaalettiis. Nuuni oottidobay oottana danddayettennaba gidiyoogaa yootiis. He qofay nuunikka maayiyooba. Nuuni hegaa oottana danddayidoy Yihooway maaddido gishsha xallaassa gidiyoogaa eroos.—Iyy. 42:2.

18. (a) Nuuni Kawotettaabaa oosuwaa maaddanawu immiyo wode demmiyo anjjoy aybee? (b) Nuuni nu naatinne oorattati immanaadan waati loohissana danddayiyoo?

¹⁸ Yihooway ha wodiyan oosettiya gita oosuwaa maaddiyo maataa nuussi immidi nuna bonchchiis. Nuuni Kawotettaabaa oosuwaa maaddanawu immiyo wode, I nuna anjjanaagaa odiis. (Mil. 3:10) Kehatettan immiya uri duretanaagaakka Yihooway yootiis. (Leemiso 11:24, 25 nabbaba.) Qassi “ekkiyaagaappe immiyaagee anjjettidaagaa” gidiyo gishshawu, immiyoogee ufayssaa demissees. (Oos. 20:35) Waati immana danddayiyaakkonne waati daro anjjuwaa demmana danddayiyaakko nu naatanne oorattata nuuni haasayiyoobaaninne oottiyooban loohissiyo maatay nuuyyo deˈees.

19. Ha huuphe yohoy nena waati minttettidee?

¹⁹ Nuussi deˈiya ubbabaa Yihoowappe ekkida. Ayyo zaarettidi immiyoogee nuuni A siiqiyoogaanne I nuussi oottido ubbabaa nashshiyoogaa bessees. (1 Odi. 29:17) Beeta maqidasee keexettiyo wode, “Asai ba sheniyan ba kumetta wozanan GODAAYYO immido gishshau ufaittiis.” (1 Odi. 29:9) Hegaadankka nuuni Yihoowa kushiyaappe ekkidobaa ayyo zaarettidi immiyoogan ubbatoo ufayttiyaageeta gidoos.