1-2. (a) Godaa Kahuwawu miilooniyan qoodettiyaageeti shiiqiyo wode Yihooway ay beˈii? (Koyro sinttan deˈiya misiliyaa xeella.) (b) Ha huuphe yohuwan nuuni ay xannaˈanee?

GODAA KAHUWAWU kumetta saˈan miilooniyan qoodettiyaageeti shiiqiyo wode Yihooway ay beˈiyaakko qoppa. I beˈiyoy daro asay shiqidoogaa xalla gidennan, I shiiqida asaa huuphiyan huuphiyan akeekees. Leemisuwawu, layttan layttan ubbatoo shiiqiyaageeta I beˈees. Etappe amaridaageeti wolqqaama yedetay gakkishinkka yiyaageeta gidana danddayoosona. Harati hara shiiqota ubbatoo yaana xayikkonne, eti Godaa Kahuwaa bonchchanawu shiiqiyoogaa gita maatadan xeelloosona. Geelladan he shiiquwaabaa eranawu koyidi, Godaa Kahuwaa baalawu biron koyro yiyaageetakka Yihooway akeekees.

² Godaa Kahuwaa baalawu keehi daro asay shiiqiyoogaa beˈiyoogee Yihoowa ufayssiyoogee qoncce. (Luq. 22:19) Gidoppe attin, Yihoowa qofissiya waannabay daro asay yiyoogaa gidenna. Asay yiyo gaasuwaa Yihooway xoqqu ootti xeellees. Ha huuphe yohuwan, keehi koshshiya oyshaa nuuni beˈana: Nuuni layttan layttan bonchchiyo Godaa Kahuwaa xallawu gidennan, Yihooway bana siiqiyaageetuyyo giigissido, saaminttan saaminttan shiiqiyo shiiqotakka nuuni shiiqiyoy aybissee?

3-4. (a) Nuuni shiiqotun shiiqiyoogee aybissee? (b) Nuuni shiiqotun shiiqiyoogee nubaa ay bessii? (c) Koyro Qoronttoosa 11:23-26y ay qonccissii, Godaa Kahuwaa baalaa nuuni attana koshshennay aybissee?

³ Nuuni gubaaˈe shiiqota shiiqiyo waanna gaasoy eti nu goynuwaa shaaho gidiyo gishshataassa. Nuuni shiiqotun Yihoowappe tamaariyo gishshawukka shiiqoos. Otorettiya asati eti aybanne tamaarana koshshiyaabadan qoppokkona. (3 Yoh. 9) SHin,  nuuni Yihoowappenne I goˈettiyo dirijjitiyaappe tamaaranawu yeemottoos.—Isi. 30:20; Yoh. 6:45.

⁴ Nuuni shiiqota shiiqiyoogee nuuni nuna ziqqi oottiyoogaa, giigetti uttidoogaanne tamaaranawu eeno giyoogaa bessees. Yesuusa hayquwaa hassayiyo qammi, nuuni he keehi koshshiya shiiquwaa shiiqiyoy nu shiiqana bessiyo gishshataassa xalla gidennan, “Hagan tana hassayite” yaagidi Yesuusi azazidoogaa nuna ziqqi oottidi azazettiyo gishshataassa. (1 Qoronttoosa 11:23-26 nabbaba.) He shiiqoy nuuni hidootan naagiyoobaa mintti ammananaadaaninne Yihooway nuna keehi siiqiyoogaa nu hassayanaadan oottees. Gidoppe attin, layttan issitooppe daruwaa nuussi minttettoy koshshiyoogaa Yihooway erees. Hegaa gishshawu, I nuussi saaminttan saaminttan shiiqota giigissees; qassi nuuni shiiqotun shiiqanaadan zorees. Nuuni nuna ziqqi oottiyoogee azazettanaadan denttettees. Nuuni he shiiqotussi giigettiyoogaaninne he shiiqotun shiiqiyoogan saaminttan saaminttan amarida saatiyaa aattoos.

5. Bana ziqqi oottiya asay Yihoowa shoobiyaa waatii?

⁵ Layttan layttan, Yihoowa shoobiyaa ekkidi daro asay bana ziqqi oottidi appe tamaarees. (Isi. 50:4) Eti Godaa Kahuwawu shiiqoosona; qassi guyyeppe hara shiiqotunkka shiiqiyoogaa doommoosona. (Zak. 8:20-23) Tuman deˈiyaageetinne oorattati ‘nuna maaddiyaanne ashshiya’ Yihoowappe tamaariyoogaaninne A kaaletuwaa kaalliyoogan ufayttoosona. (Maz. 40:17) Yihoowappenne I keehi siiqiyo Yesuusappe tamaaranaadan shoobettido shoobiyaa ekkiyoogaappe aaruwan keehi ufayssana danddayiyaabi woy keehi koshshiyaabi aybee?—Maa. 17:5; 18:20; 28:20.

6. Bana ziqqi oottiyoogee issi bitanee Godaa Kahuwaa bonchchanawu shiiqanaadan waati maaddidee?

⁶ Layttan layttan, Yesuusa hayquwaa hassayiyo baalaa danddayettida keenan daro asay bonchchanaadan shoobboos. Bana ziqqi oottiya daro asay nu shoobiyaa siyidi yiyoogan goˈettiis. Ane issi leemisuwaa beˈa. Amarida layttappe kase, issi bitanee Godaa Kahuwaa shoobiyaa woraqataa ekkiis; shin hegaa ayyo immida ishawu I shiiquwaa yaana danddayennaagaa yootiis. Gidoppe attin, Godaa Kahuwaa bonchchiyo qammi, he bitanee SHiiquwaa Addaraashaa geliyaagaa beˈidi he ishay garamettiis. Ishantti A loytti mokkido gishshawu, he bitanee keehi garamettidi saaminttan saaminttan shiiqiyo shiiqota shiiqiyoogaa doommiis. Hegaappe kaalliya kumetta layttan I yeennan attidoy heezzu shiiqo xalla. I ubba shiiqota shiiqanawu kuuyanaadan A maaddidabay aybee? I ashkke gidiyo gishshawu ba qofaa laammiis. A shoobbida ishay guyyeppe, “I bana keehi ziqqi oottiya asa” yaagiis. Yihooway baassi ha bitanee goynnanaadan A ehiidoogee qoncce; qassi I haˈˈi xammaqettida isha.—2 Sam. 22:28; Yoh. 6:44.

7. Nuuni shiiqotun tamaariyoobaynne Geeshsha Maxaafaappe nabbabiyoobay nuna ziqqi oottanaadan waati maaddana danddayii?

⁷ Nuuni shiiqotun tamaariyoobaynne Geeshsha Maxaafaappe nabbabiyoobay nuuni nuna ziqqi oottanaadan maaddana danddayees. Godaa Kahuwaappe kasetiya saaminttatun, nu shiiqoti darotoo Yesuusi leemiso gididi oottidobaanne I ba shemppuwaa nu gishshawu aattidi immiyoogan bana ziqqi oottidoogaa loytti qonccissoosona. Qassi nuuni Godaa Kahuwaappe kasetiya gallassatun, Yesuusa hayquwaabaanne dendduwaabaa yootiya Geeshsha Maxaafaa taariketa nabbabana danddayoos. Nuuni he shiiqotun tamaariyoobaynne Geeshsha Maxaafaappe nabbabiyo he taariketi Yesuusi nu gishshawu yarshshido yarshshuwaa nuuni loytti nashshanaadan oottoosona. Nuna metiyaabay deˈishinkka, nuuni Yesuusi bana  ziqqi oottido leemisuwaa kaalloosinne Yihoowa sheniyaa oottoos.—Luq. 22:41, 42.

8. Xala gidiyoogaa Yesuusi waati bessidee?

⁸ Nuuni xala gidiyoogankka Yesuusa leemisuwaa kaallanawu baaxetoos. I hayqqanaappe kasetiya gallassatun xalido xalatettaa qoppa. I bana ba morkketi mata wode kawushshanaagaa, lissuwan garafanaagaanne woranaagaa loyttidi erees. (Maa. 20:17-19) SHin, I hayqqanawu eeno giis. Wodee gakkin, I banaara Geetesemaanen deˈiya kiitettida ammanettidaageetussi, “Denddidi hinddite; be7ite, tana aattidi immiyaagee hageeho gakkiis” yaagiis. (Maa. 26:36, 46) Olaa miishshaa oyqqida daro asay Yesuusa oyqqanawu yiido wode, I sinttawu kiyidi, I oonakko yootiis, qassi wotaaddarati kiitettidaageeta yeddanaadan I azaziis. (Yoh. 18:3-8) Yesuusi keehi maalaalissiya xalatettaa bessiis! Ha wodiyan, tiyettida Kiristtaanetinne hara dorssati xala gidiyoogan Yesuusa leemisuwaa kaallanawu baaxetoosona. Waatidi?

9. (a) Nuuni ubbatoo shiiqotun shiiqanawu xalatettaa koshshana danddayiyoy aybissee? (b) Bantta ammanuwaa gaasuwan qashettida nu ishantta nu leemisoy waati maaddana danddayii?

⁹ Nuuni ubbatoo shiiqotun shiiqanawu, metoy gakkishinkka nuuni xala gidiyoogaa bessana koshshennan waayi aggana. Nu ishanttuppenne michchonttuppe amaridaageeti kayyottanaadaaninne hidootaa qanxxanaadan oottiyaabay woy sahoy deˈishinkka, shiiqoosona. Harati qassi so asaa yameti woy kawotettaa sunttati wolqqaama yedetaa gattishinkka xalidi shiiqoosona. Bantta ammanuwaa gaasuwan qashettida nu ishantta nu leemisoy ay keena maaddiyaakko qoppa. (Ibr. 13:3) Metiyaabay deˈishinkka nuuni ubbatoo Yihoowawu haggaaziyoogaa eti siyiyo wode, eta ammanoy kaseegaappe yaa minnana; qassi eti kaseegaappe yaa xalana. Kiitettida PHawuloosa hegaa malabay gakkiis. I Roomen qashettido wode, ba ishantti ammanettidi Xoossawu haggaaziyoogaa siyiyo wode ubban I keehi ufayttiis. (Pili. 1:3-5, 12-14) PHawuloosi qashuwaappe birshshettanaappe guuttaa kasetidi woy birshshetti simmidi sohuwaara, Ibraawe Kiristtaanetussi dabddaabbiya xaafiis. I ammanettida he Kiristtaaneti “ishata siiqiyoogaa” aggennaadaaninne issippe shiiqiyoogaa mule aggenaadan he dabddaabbiyan minttettiis.—Ibr. 10:24, 25; 13:1.

10-11. (a) Nuuni Godaa Kahuwawu oona shoobbana koshshii? (b) Yaatanaadan, Efisoona 1:7y ay qonccissii?

¹⁰ Nuuni nu dabbota, nunaara issippe oottiyaageetanne nu shoorota Godaa Kahuwawu shoobbiyo wode nu xala gidiyoogaa bessoos. Nuuni eta shoobbiyoy aybissee? Nuuni harata Godaa Kahuwaa shoobbiyoogan Yihoowaynne Yesuusi nuuyyo oottidobaa keehi nashshoos. Yihooway wozuwaa baggaara bessido ‘aaro kehatettaappe’ waati goˈettana danddayiyaakko eti tamaarana mala nuuni koyoos.—Efisoona 1:7 nabbaba; Ajj. 22:17.

¹¹ Nuuni haratuura issippe shiiqiyoogan xalatettaa bessiyo wode, Xoossaynne A Naˈay  bessido hara eeshshaa maalaalissiya ogiyan bessoos.

12. (a) Nu shiiqoti nuuni Yihoowanne Yesuusa kaseegaappe aaruwan siiqanaadan waati maaddiyoonaa? (b) Yesuusa leemisuwaa kaallidi nuuni ay oottanaadan 2 Qoronttoosa 5:14, 15y minttettii?

¹² Nuuni Yihoowanne Yesuusa siiqiyoogee shiiqotun shiiqanaadan nuna denttettees. Qassi nuuni shiiqotun tamaariyoobay Yihoowanne A Naˈaa kaseegaappe aaruwan siiqanaadan oottees. Eti nuuyyo oottidobaa nuuni muletoo hassayanaadan shiiqoti maaddoosona. (Roo. 5:8) Nuna, ubba qassi wozoy keehi koshshiyoogaa biron akeekibeennaageetakka eti keehi siiqiyoogaa Godaa Kahoy hassayissees. Nuuni deˈuwan ubba gallassi Yesuusa leemisuwaa kaallanawu baaxetiyoogan galatiyaageeta gidana bessees. (2 Qoronttoosa 5:14, 15 nabbaba.) Qassi, Yihooway wozuwaa giigissido gishshawu nuuni A sabbanaadan nu wozanay nuna denttettees. Nu shiiqotun wozanappe zaariyoogee nuuni A sabbana danddayiyo issi oge.

13. Nuuni Yihoowanne A Naˈaa loytti siiqiyoogaa waati bessana danddayiyoo? Qonccissa.

¹³ Nuuni nu goˈˈaa aggibayanawu eeno giyoogan Yihoowanne A Naˈaa loytti siiqiyoogaa bessana danddayoos. Darotoo, nuuni shiiqotun shiiqanawu dumma dummabaa aggibayana bessees. Daro gubaaˈeti issi shiiquwaa shiiqiyoy nuuni daafurana danddayiyo ooso gallassi omarssaana. Qassi hara shiiquwaa shiiqiyoy hara asay shemppiyo saaminttaa wurssetta gallassaana. Nuuni daafurikkonne, nu shiiqota shiiqiyoogaa Yihooway akeekii? Ee, akeekees! Nuuni shiiqanawu baaxetiyoogaa Yihooway akeekeesinne xoqqu ootti xeellees.—Mar. 12:41-44.

14. Yesuusi ba goˈˈaa aggibayidi siiqiyoogan nuussi waani leemiso gidii?

¹⁴ Yesuusi ba goˈˈaa aggibayidi siiqiyoogan nuussi leemiso gidiis. I ba erissiyo ashkkaratussi hayqqanawu eeno giyoogaa xalla gidennan, ubba gallassi ba koyiyoobaappe etaagaa kaseyidi deˈiis. Leemisuwawu, I asatettan daafurido woy unˈˈettido wodekka bana kaalliyaageetuura gayttiis. (Luq. 22:39-46) Qassi I haratuppe demmana danddayiyoobaa gidennan, haratussi immana danddayiyoobaa ubbatoo ba qofan wottiis. (Maa. 20:28) Nuuni Yihoowanne nu ishantta keehi siiqiyo wode, Godaa Kahuwaa bonchchanawu, ubba qassi gubaaˈe shiiqota  ubbaa shiiqanawu nuussi danddayettida ubbabaa oottana.

15. Nuuni oona maaddanawu keehi koyiyoo?

¹⁵ Nuuni tumu Kiristtaane ishanttu maabaraa yame gidiyo gishshawu, ooratta asay nunaara shiiqanaadan nuussi danddayettida ubban shoobbiyoogan ufayttoos. SHin, ‘nunaara ammanuwan deˈiyaageeta’ gidikkonne, sabbakiyoogaa woy shiiqiyoogaa aggidaageeta maaddanawu keehi koyoos. (Gal. 6:10) Nuuni eti nu shiiqota shiiqanaadan, ubba qassi Godaa Kahuwaa bonchchanaadan minttettiyoogan nu eta siiqiyoogaa qonccissoos. SHuggidaageeti nu siiqo Aawanne Henttanchcha gidida Yihoowakko simmiyo wode, nuuni Yihoowagaadaaninne Yesuusaagaadan keehi ufayttoos.—Maa. 18:14.

16. (a) Nuuni issoy issuwaa waati minttettana danddayiyoo, qassi nu shiiqoti nuuni ay oottanaadan maaddiyoonaa? (b) Yesuusi Yohaannisa 3:16n yootido qofaa hassayanawu hagee laytta giddon loˈˈo wode giyoy aybissee?

¹⁶ Kaalliya saaminttatun, Hosppune 19, 2019n Arbba galla omarssi, Godaa Kahuwaa bonchchanawu nuussi danddayettida keenan daro asaa shoobboos. (“ Neeni Eta SHoobbana Danddayay?” giyo saaxiniyaa xeella.) Ha laytti, Yihooway nuussi giigissido ubba shiiqota shiiqiyoogan issoy issuwaa minttettanawu nuussi danddayettida ubbabaa oottanawu koyoos. Ha alamiyaa xayoy mati mati biyo wode, nu shiiqoti nuuni nuna ziqqi oottidi, xalidinne siiqiyaageeta gididi deˈanaadan maaddana koshshees. (1 Tas. 5:8-11) Nuuni Yihoowanne A Naˈaa keehi siiqiyoogaa wozanappe bessoos!—Yohaannisa 3:16 nabbaba.