1. Piliphphisiyuusa 2:3y nuna ay zorii, qassi hegaa nuuni oosuwan peeshshiyoogan demmana goˈˈay aybee?

NUUNI nu huuphiyaa ziqqi oottidi Yihoowawu azazettiyo gaasoy I ubbatoo nuuyyo loˈˈobay aybakko eriyo gishshataassa. (Efi. 4:22-24) Nuuni nu huuphiyaa ziqqi oottiyoogee, nu koyiyoobaappe Yihooway koyiyoobaa kaseyanaadaaninne haraati nuuppe aadhdhoosona giidi qoppanaadan oottees. Hegaappe denddidaagan, Yihoowaara, qassi gubaaˈiyan deˈiya nu ishanttuuranne michchonttuura dabbotaa minttoos.—Piliphphisiyuusa 2:3 nabbaba.

2. Kiitettida PHawuloosi eriyoobay aybee, qassi nuuni ha huuphe yohuwan beˈanabay aybee?

² SHin nuuni naagettana xayikko, otorettiyaanne ba xallaa siiqiya ha alamiyaa asaagaadan hanana danddayoos. * Kiitettida PHawuloosi, “Taani intteyyo yootais; intte qoppanau bessiyaagaappe aattidi, otoruwan qoppoppite; hegaa aggidi, wozannaama asadan qoppite” giidi Roome Kiristtaanetuyyo xaafidoy koyro xeetu layttan deˈiya amarida Kiristtaaneti alamiyaagaadan haniyo gishshawu gidennan aggenna. (Roo. 12:3) Nuuni amarida ogiyan nubaa qoppana koshshiyoogaa PHawuloosi erees. Gidoppe attin, nuuni nu huuphiyaa ziqqi oottiyoogee, nubaa bessiyaagaadan qoppanaadan nuna maaddana. Nu huuphiyaa ziqqi oottiyoogee otoruwaappe naagettanaadan maaddiyo heezzu ginata ha huuphe yohoy qonccissana. Hegeetikka, (1) nu aqo deˈuwaa, (2) nu haggaazo maataa, qassi (3) sooshal miidiyaa goˈettiyo ogiyaa.

3. Aqo deˈuwan metoy gakkiyoy aybissi gidana danddayii, qassi issoti issoti he metuwaa giigissanawu waatiyoonaa?

³ Yihooway azinaynne machchiyaa issoy issuwaara ufayttidi deˈanaadan koyees. SHin eti nagaranchcha gidiyo gishshawu, issi issiban maayettennan aggana danddayoosona. Hegaa gishshawu, PHawuloosi aqo deˈuwaa oyqqiyaageeta issi issi metoy gakkana danddayiyoogaa yootiis. (1 Qor. 7:28) Issi issi aqo laggeti ubbatoo issoy issuwaara walaqettiyo gishshawu, nuuni aqo lagge gidana bessenna giidi qoppana danddayoosona. Eti alamiyaa asaagaadan qoppikko, nuuni paraman shaahettana bessees giidi qoppana. Eti banttabaa xalla qoppananne ufayssaa demmiyoy paraman shaahettikko xallaana giidi qoppana danddayoosona.

4. Nuuni qoppana koshshennabay aybee?

⁴ Nu aqo deˈoy giigana danddayenna giidi qoppana bessenna. Issi uri paraman shaahettana danddayiyoy pokkobaa oottiyo wode xallaana gidiyoogaa Geeshsha Maxaafay yootiyoogaa nuuni eroos. (Maa. 5:32) Hegaa gishshawu, nu aqo deˈuwan metoy merettiyo wode, otoroy hagaadan qoppanaadan oottana danddayees: ‘Ta aqo laggee tawu koshshiyaabaa kunttenna. Tawu koshshiyaagaa keena siiquwaa demmabeykke. Hara uraara deˈiyaakko taani hagaappe aaruwan ufayttana danddayays.’ Nuuni hegaadan qoppikko, nu aqo laggiyaabaa gidennan, nubaa xalla qoppoos. Ha alamiyaa aadhdhida eratettay neeni ne aqo deˈuwaa laaliyaaba gidikkokka, nena ufayssiya aybanne oottanaadan minttettees. SHin Xoossaa aadhdhida eratettay “issoi issuwaa go77iyaabaa koyanaappe attin, [nu] huuphe xalaalaa go77iyaabaa” koyennaadan minttettees. (Pili. 2:4) Neeni ne aqo laggiyaara paraman shaahettanaadan gidennan, issippe deˈanaadan Yihooway koyees. (Maa. 19:6) Yihooway neeni nebaa gidennan, A qofaa kaseyanaadan koyees.

5. Efisoona 5:33y yootiyoogaadan, azinaynne machchiyaa issoy issuwaa waati oyqqana koshshii?

 ⁵ Azinaynne machchiyaa issoy issuwaa siiquwaaninne bonchchuwan oyqqana bessees. (Efisoona 5:33 nabbaba.) Ekkiyaagaappe immiyaageeta gidanaadan Geeshsha Maxaafay nuna tamaarissees. (Oos. 20:35) Azinaynne machchiyaa issoy issuwaa siiqanaadaaninne bonchchanaadan maaddiya eeshshay awugee? Ba huuphiyaa ziqqi oottiyoogaa. Bantta huuphiyaa ziqqi oottiya azinaynne machchiyaa banttana goˈˈiyaabaappe “hara asa go77iyaabaa” koyoosona.—1 Qor. 10:24.

6. Istiveninne Istefaana yootidobaappe neeni ay tamaarana danddayay?

⁶ Kiristtaane gidida daro azinatanne machchota bantta huuphiyaa ziqqi oottiyoogee aqo deˈuwan ufayttanaadan maaddiis. Leemisuwawu, Istiven giyo azinay hagaadan giis: “Neeninne ne aqo laggee issippe oottiyoogee, ubba qassi walaqettanaadan oottiyaabay merettiyo wode hegee keehi maaddees. ‘Taayyo aybi loˈˈoo?’ giidi qoppiyoogaappe ‘nuuyyo aybi loˈˈoo?’ giidi qoppite.” A machchee Istefaanissikka hegaadan siyettees. A hagaadan gaasu: “Nuuppe ooninne ubbatoo palamettiya uraara deˈanawu koyenna. Metoy merettiyo wode, nuuni he metuwawu gaasuwaa eranawu baaxetoos. Yaati simmidi nuuni woossoos, pilggoosinne nu metuwaa waati giigissanaakko haasayoos. Nuuni he metuwaa giigissanawu baaxetoosippe attin ooyettokko.” Azinaynne machchiyaa bantta aqo laggiyaappe aadhdhennabadan qoppikko, eti ufayttana.

7. Issi ishay Yihoowa dirijjitiyan haggaaziyo maata demmiyo wode ay oottana bessii?

⁷ Nuuni danddayiyo ayba ogiyankka Yihoowawu haggaaziyoogaa gita maatadan xeelloos. (Maz. 27:4; 84:10) Issi ishay Yihoowa dirijjitiyan kaseegaappe aaruwan ba dosan eeno giidi oottiyo maataa demmikko, hegee keehi loˈˈo. Geeshsha Maxaafay, “Ooninne woosa keettaa kaalettiyaagaa [“gubaaˈe cima,” NW] gidanau koyikko, lo77obaa amottiis” yaagees. (1 Xim. 3:1) SHin I aawatettaa ekkiyo wode haratuppe aadhdhiya asadan qoppana bessenna. (Luq. 17:7-10) A halchchoy ba huuphiyaa ziqqi oottidi harata haggaaziyoogaa gidana koshshees.—2 Qor. 12:15.  

8. Diyotirefeesa, Ooziyaananne Abeselooma hanotaappe ay tamaariyoo?

⁸ Geeshsha Maxaafay banttabaa bessiyaagaappe aaruwan qoppida asatubaa yootees. Diyotirefeesi ashkke gidenna gishshawu, gubaaˈiyan “halaqa” gidanawu baaxetiis. (3 Yoh. 9) Ooziyaani otorettidi Yihooway awu immibeenna oosuwaa oottanawu maliis. (2 Odi. 26:16-21) Abeseloomi kawo gidanawu koyido gishshawu, asay A kaafanaadan eta siiqiyaaba milatiis. (2 Sam. 15:2-6) Ha Geeshsha Maxaafaa taariketi yootiyoogaadan, bantta bonchchuwaa koyiya asatun Yihooway ufayttenna. (Lee. 25:27) Guyyeppe, otorettiyaageetanne haratun nashettanawu koyiyaageeta metoy gakkana.—Lee. 16:18.

9. Yesuusi nuuyyo aybin leemiso gididee?

⁹ Yesuusi otorettiya he asatu mala gidenna. Geeshsha Maxaafay Yesuusabaa, “I Xoossaa milatidi deˈikkokka, maataa bonqqiyoogaa, hegeekka, I bana Xoossaara issi lagge gidana koshshees giidi qoppibeenna” yaagees. (Pili. 2:6, NW) Yihoowa xallay baappe aadhdhiyaaba gidikkonne, Yesuusi bessiyaagaappe aattidi babaa qoppibeenna. I ba erissiyo ashkkaratussi, “Intte ubbaa giddon guuxxiyaagee ubbaappe gitatees” yaagiis. (Luq. 9:48) Yesuusaagaadan bantta huuphiyaa ziqqi oottiya aqinyetuura, gubaaˈiyawu oottiyaageetuura, gubaaˈe cimatuuranne woradaa xomoosiyaageetuura haggaaziyoogee gita maata! Bantta huuphiyaa ziqqi oottidi Yihoowawu haggaaziyaageeti Xoossaa dirijjitiyaa shaakkidi erissiya siiquwawu maaddiyaabaa oottoosona.—Yoh. 13:35.

10. Gubaaˈiyan issi metoy maaraa oyqettibeennabadan neeyyo siyettiyo wode neeni ay oottana bessii?

 ¹⁰ Gubaaˈiyan issi metoy merettidabadan, qassi he metuwaa gubaaˈe cimati maaraa oyqqibeennabadan siyettiyo wode neeni ay oottana bessii? Zuuzummiyoogaappe, aawatettay deˈiyoogeetuura hashetiyoogan ne huuphiyaa ziqqi oottiyoogaa bessana danddayaasa. (Ibr. 13:17) Yaatanawu nena hagaadan oychcha: ‘Taani akeekido he metoy giigana koshshiya keehi qofissiyaabee? Hagee he metuwaa giigissana bessiyo wodee? Hegaa giigissiyoogee ta aawatettee? Taani gubaaˈiyaa issippetettawu maaddiyaabaa oottaydda deˈiyaanaayye woy harati tana xoqqu oottidi xeellanaadan baaxetiyaanaa?’

11. Efisoona 4:2, 3y yootiyoogaadan, nu huuphiyaa ziqqi oottidi Yihoowawu haggaaziyo wode nuuni demmiyoobay aybee?

¹¹ Yihooway issi urawu deˈiya eraappe ba huuphiyaa ziqqi oottiyoogaa, qassi oosuwan murutta gidiyoogaappe issippetettaa xoqqu ootti xeellees. Hegaa gishshawu, ne huuphiyaa ziqqi oottada Yihoowawu haggaazanawu neeyyo danddayettida ubbabaa ootta. Yaatiyoogan, gubaaˈiyaa issippetettay minnanaadan neeni oottana. (Efisoona 4:2, 3 nabbaba) Minnada sabbaka. Neeni harata kehatettan maaddana danddayiyo ogeta koya. Gubaaˈiyan aawatettay baynnaageeta gujjin ubba asaa imattatettan mokka. (Maa. 6:1-4; Luq. 14:12-14) Neeni ne huuphiyaa ziqqi oottada gubaaˈiyaara oottiyo wode, harati ne eraa xalla gidennan, neeni ne huuphiyaa ziqqi oottiyoogaa akeekana.

12. Geeshsha Maxaafay nuussi laggeti deˈanaadan minttettii? Qonccissa.

¹² Nuuni nu laggetuuranne nu so asaara wodiyaa aattiyoogan ufayttanaadan Yihooway  koyees. (Maz. 133:1) Yesuusassi loˈˈo laggeti deˈoosona. (Yoh. 15:15) Nuussi loˈˈo laggeti deˈiyoogaa goˈˈaa Geeshsha Maxaafay yootees. (Lee. 17:17; 18:24) Haratuppe nuna shaakkiyoogee loˈˈo gidennaagaakka yootees. (Lee. 18:1) Sooshal miidee daro laggeta demmanaadaaninne haratuppe shaahettennaadan maaddiya oge giidi daroti qoppoosona. SHin nuuni sooshal miidiyaa goˈettiyo wode naagettana koshshees.

13. Sooshal miidiyaa goˈettiya amaridaageetussi haratuppe shaahettidabadan siyettiyoynne eti unˈˈettiyoy aybissee?

¹³ Asay sooshal miidiyan xaafidobaanne yan wottido pootuwaa beˈiyoogan daro wodiyaa aattiyaageetussi haratuppe shaahettidabadan siyettananne unˈˈettana danddayiyoogaa xinaateti qonccissoosona. Aybissi? Hegawu issi gaasoy, asay darotoo sooshal miidiyan wottiyo poototi bantta deˈuwan aattido ufayssiyaa wodiyaabaa bessiyo, eti bantta laggetunne biido keehi loˈˈiyaa sohota bessiya pootota xalla gidiyo gishshataassa. He pootota beˈiya uri ba deˈuwaa etaagaara geeddarissidi bana pattennaabadan xeellidi unˈˈettana danddayees. Layttay 19 gidido issi michchiyaa, “Harati Qeeraanne Woggaa aattido ufayssiya wodiyaa beˈiyo wodenne taani son aattido salettiya wodiyaa qoppiyo wode unˈˈettays” yaagaasu.

14. Koyro PHeexiroosa 3:8n deˈiya zoree nuuni sooshal miidiyaa akeekan goˈettanaadan waati maaddii?

¹⁴ Sooshal miidiyaa nuuni loˈˈobawu, hegeekka nu so asaaranne nu laggetuura gayttanawu goˈettana danddayoos. Amarida asati sooshal miidiyan xaafiyoobay, wottiyo pootoynne biidoy harati eta sabbanaadan oottiyoogaa neeni akeekabeykkii? Eti asay ubbatoo banttana nashshanaadan koyiyaabaa milatees. Ubba qassi issoti issoti bantta pootuwaa woy harati wottido pootuwaa xeelliyaagan kawushshiyaabaanne pokkobaa xaafoosona. Kiristtaaneti bantta huuphiyaa ziqqi oottanaadaaninne harata siiqanaadan minttettoy imettido gishshawu, sooshal miidiyaa hegaa mala ogiyan goˈettokkona.—1 PHeexiroosa 3:8 nabbaba.

15. Nuuni haratuppe aadhdhiyaabadan qoppennaadan Geeshsha Maxaafay nuna waati maaddana danddayii?

¹⁵ Neeni sooshal miidiyaa goˈettiyaabaa gidikko nena hagaadan oychcha: ‘Taani xaafidoobati, wottido poototi woy biidoti taani otorettiyaabadan harati qoppanaadan oottii? Taani harati qanaatanaadan oottaydda deˈiyaanaa?’ Geeshsha Maxaafay, “Ha sa7an de7iya ubbabai, hegeekka:  asatettaa amoi, aifen xeellidi qaaqqatiyoogeenne miishshan ceeqettiyoogee ha sa7aappe yiidoogaappe attin, Xoossaappe yibeenna” yaagees. (1 Yoh. 2:16) Geeshsha Maxaafaa qofaa qonccissiya issi xuufee ‘miishshan ceeqettiyoogaa’ giya qofaa “haratuppe bana aattidi xeellanawu koyiya” ura giidi birshshees. Kiristtaaneti haratuppe aadhdhiyaabadan asay qoppanaadan koyokkona. Eti, “Otorettiyoogaa, woikko issoi issuwaa yiilloyiyoogaa, woikko issoi issuwaa qanaatiyoogaa aggoos” giya Geeshsha Maxaafaa zoriyaa kaalloosona. (Gal. 5:26) Nuuni nu huuphiyaa ziqqi oottikko, otorettiyaanne haratuppe aadhdhiyaabadan asay banttana qoppanaadan koyiya ha alamiyaa asaa mala gidokko.

16. Nuuni otorettana koshshennay aybissee?

¹⁶ Otorettiyaageeti “wozannaama asadan” qoppenna gishshawu, nuuni nu huuphiyaa ziqqi oottana koshshees. (Roo. 12:3) Otorettiyaageeti haratuura maayettokkona, qassi bantta xallaa siiqoosona. Darotoo eti qoppiyoobaynne oottiyoobay etakka haratakka qohees. Eti naagettana xayikko, otoruwan qoppanaadan oottiyoogan Seexaanay eta qofay jallanaadaaninne moorettanaadan oottana danddayees. (2 Qor. 4:4; 11:3) Hara baggaara qassi, ba huuphiyaa ziqqi oottiya uri wozannaama asadan qoppees. I harati daro ogiyan baappe aadhdhiyoogaa akeekiyo gishshawu, bessiyaagaappe aattidi bana xeellenna. (Pili. 2:3) Qassi, “Xoossai otorettiyaageeta ixxees; shin banttana kaushshiyaageetuyyo aaro kehatettaa immees” giya qofaa I erees. (1 PHe. 5:5) Wozannaama asati Yihooway banttana ixxanaadan koyokkona.

17. Nuuni nu huuphiyaa ziqqi oottidi deˈanawu waatana bessii?

¹⁷ Nuuni nu huuphiyaa ziqqi oottidi deˈanawu, “ceega meretaa a oosuwaara [nuuppe] xaissirggidi . . . ooratta meretaa [maayite]” giya Geeshsha Maxaafaa zoriyaa oosuwan peeshshana koshshees. Hegawu minni oottana koshshees. Nuuni Yesuusa leemisuwaa xannaˈnawunne danddayettida keenan A kottiyaa kaallanawu baaxetana bessees. (Qol. 3:9, 10; 1 PHe. 2:21) Nuuni yaatikko, keehi goˈettana. Nuuni nu huuphiyaa ziqqi oottiyo wode nu so asay ufayttana; gubaaˈiyaa issippetettay minnanaadan oottana, qassi sooshal miidiyaa bessenna ogiyan goˈettiyoogaappe waani naagettanaakko erana. Ubbaappe aaruwan, Yihooway nuna anjjananne nashshana.