1. Koyro xeetu layttaa Kiristtaaneta gakkidabay aybee?

KIITETTIDA PHEEXIROOSI 62⁠ppe 64 M.L. gakkanaashin issi wode, “PHanxxoosa biittan, Galaatiyaa biittan, Qaphphadooqiyaa biittan, Isiyaa biittaaninne Bitiniyaa biittan yedettin laalettidi de7iyaageetuyyo” dabddaabbiyaa xaafiis. (1 PHe. 1:1) Qeeri Isiyan deˈiya, wogan dumma dumma gidida he gubaaˈetussi minttettoynne kaaletoy koshshees. Eta wolqqaamaa yedetay gakkiis. ‘Tamadan xuuggiya paacee’ eta gakkiis. Qassi eti wayssiya wodiyan deˈidosona. PHeexiroosi, “Ubbabaukka wurssettai matattiis” yaagiis. Tammu laytta kumennan Yerusalaamee xayana. He waayissiya wodiyan ubbasan deˈiya Kiristtaaneti genccanaadan maaddana danddayiyaabay aybee?—1 PHe. 4:4, 7, 12.

2, 3. Harata imattanaadan PHeexiroosi ba ishanttussi mintti yootidoy aybissee? (Doomettan deˈiya misiliyaa xeella.)

² Maaddiya issibay, ‘issoy issuwaa imattatettan mokkiyoogaa’ gidiyoogaa PHeexiroosi ba ishanttussi yootiis. (1 PHe. 4:9) Nuuni issi ura imattiyoogee he ura siiqiyoogaanne awu kehiyoogaa  bessees. SHin, PHeexiroosi Kiristtaane gidida ba ishanttinne michontti eti eriyo laggeta “issoi issuwaa” imattatettan mokkanaadan yootidoogaa hassaya. Imattaa mokkiyoogee eta waati maaddii?

³ Hegee eti issoy issuwaara siiqettanaadan maaddees. Nena gakkidabaa qoppa. Issi uri ba son nena shoobbin keehi ufayssiya wodiyaa aatta eray? Hegee neeni keehi ufayssiyaabaa hassayanaadan oottennee? Issi ura ne gubaaˈiyaappe neeni shoobbin intte dabbotay minnibeennee? Nu ishanttanne michontta imattiyoogan hara hanotan eriyoogaappe aaruwan nuuni eta eroos. PHeexiroosa wodiyan deˈida Kiristtaaneti metoy dariyo wode kaseegaappe aaruwan issoy issuwaara siiqettana koshshiis. Ha “wurssetta gallassi” deˈiya Kiristtaanetu hanotaykka hegaara issi mala.—2 Xim. 3:1.

4. Ha huuphe yohuwan nuuni beˈana oyshati awugeetee?

⁴ Nuuni “issoi issuwaa” imattana danddayiyo hanotati aybee? Nuuni imattaa mokkennaadan diggana danddayiyaabaa waati xoonanee? Nuuni loˈˈo imatta gidanaadan aybi maaddana danddayii?

5. Nu shiiquwan waatidi imattaa mokkana danddayiyoo?

⁵ SHiiquwan: Nuuni ayyaanaa qumaa nunaara shoobettidi nu shiiquwaa yiya ubbata mokki ekkoos. Nuna imattiyaageeti Yihoowanne A dirijjitiyaa. (Roo. 15:7) Imattati shiiquwaa yiyo wode nuunikka eta imattoos. Eta maayoy woy alleeqoy aybanne gidin, nuuni eta mokki ekkana koshshees. (Yaaq. 2:1-4) Imatta asa shoobbiyay xayikko, I ne matan uttanaadan oychchuutii? I shiiquwaa kaallanaadaaninne geella xiqisiyaa beˈanaadan neeni maaddin nashshana danddayees. Hegee ‘imattaa mokkiyo’ loˈˈo oge.—Roo. 12:13.

6. Nu son nuuni shoobbiyo waannatiyaageeti oona gidana koshshii?

⁶ Uyiyoobawunne miyoobawu: Beni wode, asay issi ura imattiyoy ba son qumaa shoobbiyoogaana. (Doo. 18:1-8; Daan. 13:15; Luq. 24:28-30) Qumaa issippe maanaadan shoobbiyoogee laggetettaanne sarotettaa bessiyaaba. Nuuyyo waanna imattata gidana bessiyay oonee? Nu deˈuwan nuuni darotoo gayttiyo nu gubaaˈiyaa ishanttanne michchontta. Metiya wodiyan, nuuni issoy issuwaara maadettanawu koyokkoo? Nuuni ubbay issoy issuwawu ammanettiya lagge gididi sarotettan deˈana koshshees. Bolla Gididi Heemmiyaagee 2011n Amarkkaa Beeteele keettaa asaa Wochiyo Keelaa Xinaatiyaa doommiyo saatee, omarssi 12:45⁠ppe laamettidi 12:15 gidanaadan oottiis. Aybissi? SHiiqoy kasetidi wuriyo gishshawu, daroti bantta mala Beeteele so asata imattanawu woy etan imatettanawu kaseegaappe aaruwan koyana danddayiyoogee odettiis. Hara macara biirotikka hegaadan oottidosona. Hegee Beeteele keettaa asay kaseegaappe aaruwan siiqettanaadan oottiis.

7, 8. Yihoowa dirijjitiyaappe kiitettidaageeta nuuni waatidi imattana danddayiyoo?

⁷ Dere haasayaa haasayiya hara gubaaˈiyaa ishati, woradaa xomoosiyaageetinne issi issitoo, macaraa biiruwaappe kiitettidaageeti yiyo wode nuuni he ishantta imattana danddayoos. (3 Yohaannisa 5-8 nabbaba.) Miyoobaanne uyiyoobaa shoobbiyoogee hegaadan oottiyo loˈˈo oge. Ne hegaadan shoobbana danddayay?

⁸ Amarkkan deˈiya issi michiyaa hagaadan gaasu: “Haasayaa haasayanawu yiida daro ishatanne eta machchota ta azinaynne taani daro layttawu nu son shoobbida. He ubba wodetun nuuni keehi ufayttidanne ayyaanaaban minettida. Yaatidoogan nuuni mule zilˈˈettokko.”

9, 10. (a) Nunaara guutta wodiyaa takkana danddayiya imattati oonee? (b) Sima keettay deˈiyoogeetikka bantta son shemppissana danddayiyoonaa? Leemisuwaa yoota.

 ⁹ Takkiya imattata: Beni darotoo, ammanettiya imattatuyyo shemppiyo keettaa giigissidi eta mokkoosona. (Iyy. 31:32; Pilm. 22) Nu wodiyankka hegee koshshana danddayees. Woradaa xomoosiyaageeti gubaaˈeta xomoosiyo wode, etawu shemppiyo keetti koshshees. Dumma dumma tiˈokiraase timirtte keettan tamaariyaageetussinne bantta dosan keexxiyaageetussi shemppiyo sohoy koshshana danddayees. Daafabay eta keettaa xayssido issi issi so asatussi hegaa mala wodiyan maaddiyaageeti zaaretti keexxana gakkanaashin, shemppiyo sohoy koshshees. Hegaa mala wodiyan, injjetiya keetti deˈiyoogeetu xallay maaddana giidi nuuni qoppana koshshenna; eti darotoo hegaadan oottennan aggokkona. Intte keettay sima gidikkokka, harata intte son shemppissana danddayeetii?

¹⁰ Tiˈokiraase timirtte keettan tamaariyaageeta ba son shemppissido ufayssiya wodiyaa Tohossa Kooriyan deˈiya issi ishay hassayees. I hagaadan giis: “Nuuni mati aqo oyqqidonne guutta keettan deˈiyo gishshawu taani koyro mammottaas. SHin tamaaretuura nu son aattido wodee keehi ufayssiyaaba. Nuuni mati aqo oyqqidaageeti, azinaynne machchiyaa issippe ayyaanaaban halchchidi Yihoowawu haggaaziyo wode ay keena ufayttiyaakko akeekida.”

11. Intte gubaaˈiyaa mati yiidaageeta imattana koshshiyoy aybissee?

¹¹ Mati gubaaˈiyaa yiidaageeta: Issi issi asati woy so asati deˈanawu intte heeraa yaana danddayoosona. Amaridaageeti aassiyaageeti koshshiyo gishshawu yeennan aggokkona. Aqinyeti intte gubaaˈiyaa maaddanawu yaana danddayoosona. Deretettay, gubaaˈee, geella qaalay woy wogaykka etawu koyro ooratta gidana danddayees. Miyoobaanne uyiyoobaa eta shoobbiyoogee, woy inttenaara issisaa efiyoogee eti inttenaara laggetanaadaaninne heeraa meezetanaadan maaddees.

12. Imattanawu darobi koshshennaagaa bessiya leemisoy awugee?

¹² Imattanawu darobi koshshenna. (Luqaasa 10:41, 42 nabbaba.) Misoonaawe gididi haggaaziyoogaa doommido wodiyaa qoppidi issi ishay hagaadan giis: “Nuuni yelaga, lammachcha, qassi so asaa laamotoos. Issi omarssi ta keettaayyiyaa so asaa keehi laamotaasu, qassi taani O minttettinkka maaddibeenna. He wode, omarssi, 1:30 heeran nu penggee qoxettiis. Geeshsha Maxaafaa xannaˈiya issinniyaa nuuyyo heezzu burttukaaniyaa ekkada yaasu. A nuna ooratta misoonaaweta mokkanawu yaasu. Nuuni A soo gelanaadan shoobbidi issi burccukko haattaa immida. Yaatidi shayiyaa penttissidi chokolaataappe oosettiyaabaa kattida. Nuuni Suwaletto qaalaa biron eribookko, qassi A Inggilizettuwaa erukku. SHin nuuni he biittaa ishanttuura ufayssiya laggetettaa doommidoy he hanotaana.”

13. Imattiyoogee aybin goˈˈii?

¹³ Neeni imattanawu mammotta eray? Yaanikko, ufayssiya wodiyaa aattananne merinawu laggetiya asaa demmana danddayishin neeppe haliis. Imattiyoogee borasiyoogaa agganawu keehi maaddiyaabaappe issuwaa. SHin neeni, ‘Ay asinne imattanawu ayssi mammottanee?’ gaada qoppana danddayaasa. Hegawu daro gaasoy deˈees.

14. Nuuyyo imatettanawu woy imattanawu wodee woy wolqqay guutta gidikko, ay oottana danddayiyoo?

¹⁴ Wodiyaanne wolqqaa: Yihoowa Markkatuyyo oosoy daro; qassi issotu issotuyyo dumma dumma aawatettay deˈees. Amaridaageeti imattanawu banttawu wodee woy  wolqqi baynnabaadan qoppana danddayoosona. Neeni hegaadan qoppikko, haˈˈi ne oottiyoobaa qorana danddayaasa. Neeni imattanawu woy imatettanawu wodiyaanne wolqqaa demmana mala giigissana danddayiyoobi deˈii? Geeshsha Maxaafay Kiristtaaneti imattaa mokkanaadan zorees. (Ibr. 13:2) Yaatiyo gishshawu, hegawu wodiyaa bazziyoogee bessiyaaba. Neeni darin koshshenna issi issibaa aggana danddayaasa.

15. Issoti issoti harata imattanawu hirgganaadan oottiyaabay aybee?

¹⁵ Nena ne xeelliyo ogiyaa: Neeni imattanawu koyikkonne hegaa danddayennabadan qoppa eray? Issoti issoti dungguuxa gidiyo gishshawu, imattati boorasana giidi qoppana danddayoosona. Harati qassi banttawu deˈiyaabay guutta gidiyo gishshawu, gubaaˈiyan deˈiya haratuugaadan mokkana danddayennabadan qoppoosona. Issi keettawu koshshiya waannabay he keettay mankkatidaagaa, geeshshanne ufayssiyaagaa gidiyoogaappe attin, a allˈˈotettaa gidennaagaa hassaya.

16, 17. Imattanawu hirggennaadan maaddana danddayiyaabay aybee?

¹⁶ Neeni imattanawu hirggiya asee? Haratikka neegaadan hirggoosona. Birttaaniyan deˈiya issi cimay hagaadan giis: “Imattanawu giigettiyo wode guuttaa yashshana danddayees. SHin, Yihoowawu oottiyo hara ubbabaagaadan, demmiyo anjjoynne ufayssay yashshaa dogissiyaaba. Imattatuura uttidi tukkiyaa uyiiddi haasayiyoogee tana keehi ufayssees.” Imattati koyiyoobaa qoppiyoogee ubbatoo maaddiyoogaa hassaya. (Pili. 2:4) Daroti bantta deˈuwan hanidabaa haratuyyo yootiyoogan ufayttoosona. Nuuni issippe gayttiyo wodee eta deˈuwan hanidabaa siyanawu keehi loˈˈo wode. Hara cimay qassi hagaadan giis: “Gubaaˈiyan deˈiya ishantta ta soo shoobbiyoogee eta, ubba qassi eti tumaa waati siyidaakko loytta eranaadaaninne eta qofaa akeekanaadan tana maaddees.” Siiqiyoogeenne haratussi qoppiyoogee keehi ufayssiya wodiyaa aattanaadan maaddees.

¹⁷ Dumma dumma tiˈokiraase timirtte keettatun tamaariyaageeta mokkida issi aqinyaa hagaadan gaasu: “Ta keettay keehi guutta, qassi so giddo miishshaykka galˈˈaa shammidoogaa gidiyo gishshawu koyro tana qofissiis. Issi asttamaariyaa machchiyaa tana woppissaasu. He michchiyaa anne I azinay woradaa oosuwan keehi ufayssiya wodiyaa aattiyoy aqoy darana xayikkonne etaagaadan Yihoowawu oottiyoogaanne sima deˈuwaa deˈiyoogaa sinttayiya uraara takkiyo wodiyaa gidiyoogaa tawu yootaasu. Hegee ta aayyiyaa nuuni naatettan deˈiyo wode darotoo, ‘Siiqoi de7iyoosan santtaa miyoogee keha’ yaagiyoogaa tana hassayisees.” (Lee. 15:17) Imattanaadan siiqoy nena denttettana bessees; qassi neeni hirggana koshshenna.

18, 19. Imattiyoogee haratussi lancciyoogaa agganaadan nuna waati maaddii?

¹⁸ Neeni harata xeelliyo ogiyaa: Nena lanccissida uri intte gubaaˈiyan deˈii? Neeni lancciyoogaa agganawu baaxetana xayikko, hegaa agganawu danddayakka. Eeshshaa dummatettay neeni imattanawu qoppiyoogaa diggana danddayees. Woy issi uri kase nena qohido gishshawu, he qohuwaa doganawu metootana danddayaasa.

¹⁹ Haray atto morkketuura sigettanawukka eta imattanaadan Geeshsha Maxaafay zorees. (Leemiso 25:21, 22 nabbaba.) Harata imattiyoogee lancciyoogaa agganaadaaninne nuuni sigettanaadan maaddees. Yaatiyoogee, Yihooway he ura tumawu ehiyo wode beˈido A loˈˈo eeshshaa nuunikka akeekanaadan oottees. (Yoh. 6:44) Issi uri qoppennan deˈishin nuuni siiquwan A shoobbikko, loˈˈo laggetettay doommana danddayees. Yaatanawu, siiqoy nena  denttettidoogaa waata akeekana danddayay? Hegawu maaddiya issibay Piliphphisiyuusa 2:3y, ‘nu huuphiyaa kawushshidi harati nuuppe gitatiyaabadan qoppanaadan’ zoriyoobaa oosuwan peeshshiyoogaa. Ammanuwan, genccan, xalatettan woy hara loˈˈo eeshshan nu ishantti woy nu michchontti nuuppe aadhdhiyoogaa akeekiyoogee nuuni eta keehi siiqanaadaaninne wozanappe ufayttidi eta mokkanaadan maaddees.

20. Nuuni eeno giido shoobiyaa aybissi, qassi waatidi bonchchana koshshii?

²⁰ Mazamuraawee Daawiti, “Abeet GODAU, ne dunkkaaniyaa gelanau bessiyaagee oonee?” yaagiis. (Maz. 15:1) I hegaa gi simmidi, Xoossay ba imattatuppe koyiyo eeshshata qonccissiis. I, “Ba caaqqidoogaa ai deexxinkka poliyaagaa” yaagidi, hegeetuppe issoy nu qaalaa naagiyoogaa gidiyoogaa yootiis. (Maz. 15:4) Issi uri nuna shoobbin eeno giikko, pattennabaa gaasoyidi attana bessenna. Nuna shoobbida uri loytti giigettennan aggenna; qassi nuuni attikko, A daafuray ubbay hada gidees. (Maa. 5:37) Issi issi asay loˈˈuwaa dariyaaba milatiya shoobiyawu baanawu giidi koyro shoobettidosaa beennan aggees. Hegee siiqiyoogaanne bonchchiyoogaa bessiyaabee? Nuna shoobbiyaageeti giigissidobay aybanne gidin, he shoobiyaa nashshidi shoobettana koshshees. (Luq. 10:7) SHoobiyaasaa beennaadan diggiyaabay merettikko, shoobbida urawu sohuwaara yootiyoogee siiqiyoogaanne ayyo qoppiyoogaa bessiyaaba.

21. Heeraa wogaa bonchchiyoogee nuuni loˈˈo imatta gidanaadan waati maaddii?

²¹ Heeraa wogaa bonchchiyoogeekka keehi koshshiyaaba. Issi issi wogan imattay qoppennan yiikkokka asay mokkees; hara wogan qassi kaseti giigissiyoogee loˈˈo. Issi issi heeran, imattatussi keehi malˈˈobaa giigissidi, so asawu hegaappe simabaa giigissoosona; hara heeran qassi ubbawu issi malabay giigees. Issi issi heeran shoobettidaageeti shoobettidosaa issi issibaa ekkidi boosona; hara heeran qassi shoobbiyaageeti imattati hegaa malabaa ehaanaadan koyokkona. Issi issi wogan, shoobettida asay issitoo woy naaˈˈutoo koyikke gaana bessiyaabadan qoppoosona; hara heeran hegaadan oottiyoogee nashshennaagaa bessiyaaba. Harati nuna imattiyo wode eta ufayssanawu nuuyyo danddayettida ubbabaa oottana koshshees.

22. Nuuni ‘issoi issuwaa imattatettan mokkiyoogee’ keehi koshshiyoy aybissee?

²² Awudeegaappenne aaruwan, “ubbabaukka wurssettai matattiis.” (1 PHe. 4:7) Alamiyan hanno gakkanawu hani erenna iita waayee keehi matiis. Metoy yaa dariyo wode, nu ishanttuuranne michchonttuura wozanappe siiqettana bessees. PHeexiroosi Kiristtaanetussi, “Issoi issuwaa imattatettan mokkite” giido zoree ha wodiyan awudeegaappenne aaruwan koshshiyaaba.—1 PHe. 4:9.