KUMETTA saˈan deˈiya cimati Xoossaa asaa giddon banttawu imettida oosuwaa nashshoosona. Eti nu ubbaassi gita anjjo! Gidikkonne, mata wode laamettidabay deˈees. Ceeggida cimati amarida gita aawatettaa yelaga cimatuyyo sheedhdhanaadan odettiis. Ayba ogiyan?

Ooratti giigida issibay woradaa xomoosiyaageetinne deriyan tamaarissiyaageeti etawu layttay 70 gidiyo wode he oosuwaa aggiyoogaa. Qassi layttay 80 gidido cimati, Macara Biiruwaa Konttiyaa shiishshiyoogaa woy gubaaˈe cimata shiishshiyoogaa mala dumma dumma aawatettaa yelaga cimatuyyo sheedhdhoosona. Hegaadan laamettidoogan he siiqo cimati waanidonaa? Eti Yihoowawunne A dirijjitiyawu ammanettidosona!

Macara Biiruwaa Konttiyaa shiishshiyaagaa gididi 49 gidiya layttaa oottida Keni, “Taani ha kuuyettidabaa muleera maayaas” yaagiis. I gujjidi hagaadan giis: “Taani issi gallassi maallado hegaa eranaappe kase, issi yelaga ishay shiishshiyaagaa gididi oottana koshshiyoogaa qonccissada Yihoowa woossaas.” Keni yootidobay ammanettidi oottiya kumetta saˈan deˈiya cimidaageeti yootiyoobaara issi  mala. Eti bantta ishanttuyyo haggaaziyoogaa dosiyo gishshawu, koyro guuttaa azzanidoogee qoncce.

Ba gubaaˈiyan cimata shiishshiyaagaa gididi oottida Esperandu, “Hegee tana guuttaa azzanttiis” yaagiis. SHin I hagaadan giis: “Payyatettay guuxxi guuxxi biyo gishshawu tawu daro wodiyaa koshshees.” Esperandu haˈˈikka Yihoowawu ammanettidi ootteesinne ba gubaaˈiyawu anjjo; hegaadaana giidi nuuni qoppana danddayoos.

Hara haggaazuwaa doommida, daro wodiyawu yuuyi xomoosidaageetubaa shin? Yuuyi xomoosiyaagaa gididi 38 layttawu haggaazida Alani, “Taani hegaa siyido wode dagammaas” yaagiis. Gidikkokka, I he oosuwawu yelagata loohissiyoogee goˈˈiyoogaa akeekiis; qassi I ammanettidi haggaaziyoogaa aggibeenna.

Yuuyi xomoosiyaagaanne deriyan tamaarissiyaagaa gididi muleera 40 layttawu oottida Raasili, inne A machchiyaa koyro azzanidoogaa yootiis. “Nu maatay nuuni keehi nashshiyooba; qassi nuuyyo wolqqay deˈiyaabadan qoppida.” Raasilinne A machchiyaa demmido loohissuwaanne eraa bantta gubaaˈiyan goˈettoosona; hegee etaara haggaaziya aassiyaageeti ufayttanaadan oottees.

Qommoora odettidaageetuugaadan intteyyo siyettana xayikkonne, 2 Sameelan deˈiya issi taarikee hegaadan qoppiyaageetu hanotaa intte akeekanaadan maaddana danddayees.

Kawuwaa Daawita naˈay Abeseloomi makkalido wodiyaa qoppa. Daawiti Yerusalaameppe baqatidi Yorddaanoosa SHaafaappe arshsho baggan deˈiya Maahinayma katamaa biis. Daawitassinne aara deˈiyaageetussi deˈuwawu koshshiya amaridabay koshshiis. Aybi hanidaakko hassayeetii?

Heezzu asati hiixxiyoobata, dumma dumma kattaanne koshshiya miishshata kehatettan ehiidosona. Etappe issoy Barzzillaaya. (2 Sam. 17:27-29) Abeselooma makkalaa teqqin, Daawiti Yerusalaame simmiyo wode Barzzillaayi A Yorddaanoosa gakkanawu moyssiis. Yerusalaame I baanaadan Daawiti A oychchiis. Barzzillaayi “daro dure asa,” qassi kawoy immana giidobay ayyo koshshiyaaba gidenna; yaatikkonne, kawoy koshshiyaabaa ayyo immanaagaa yootiis. (2 Sam. 19:31-33) SHin Daawiti Barzzillaaya eeshshaanne I zorana danddayiyo aybanne nashshennan aggenna. Kawo keettan deˈiyoogeenne oottiyoogee gita maata gidiyoogee erettidaagaa!

Ba hanotaa akeekiya ashkke Barzzillaayi bawu layttay 80 gididoogaa yootiis. I gujjidi, “Taani ha77i iitaanne lo77uwaa shaakkada eranau danddayiyaanaa?” yaagiis. I giidobay woygiyoogee? Ba deˈido adussa wodiyan Barzzillaayi aadhdhida eratettaa demmidoogee  erettidaba. Qassi guyyeppe Kawuwaa Robiˈaama ‘cimati’ zoridoogaadan, I he wodekka loˈˈo zoriyaa zorana danddayees. (1 Kaw. 12:6, 7; Maz. 92:12-14; Lee. 16:31) Yaatiyo gishshawu, Barzzillaayi iitaanne loˈˈuwaa shaakkiyoogaabaa yootidoy cimatettay A bolli gattidobaa gidennan aggenna. I malˈˈuwaa masuhuwaa shaakkiyoogaaranne siyiyoogaara gayttidaagan cimatettay bana qohidoogaa yootiis. (Era. 12:4, 5) Hegaa gishshawu, Daawiti Kimihaama Yerusalaame efaanaadan Barzzillaayi oychchiis; Kimihaami Barzzillaaya naˈaa gidennan aggenna.—2 Sam. 19:35-40.

Layttaara gayttidaagan laamettidabaa doomettan denttidobay Barzzillaaya qofaara issi mala. Ha wodiyan qoppana koshshiyaabay Barzzillaayaagaadan issi ura hanotaaranne abbiyaara gayttidaba gidennaagee qoncce. Ammanettidi kumetta saˈan haggaaziya cimatussi keehi loˈˈo gididabaa akeekan qoppana koshshiis.

Ha cimida ashkke Kiristtaaneti eti daro wodiyawu aawatettan oottidobaa yelaga ishantti ekkikko Yihoowa dirijjitee sinttappe minnanaagaa sohuwaara akeekana danddayoosona. Barzzillaayi geella ba naˈaa loohissidoogaadaaninne kiitettida PHawuloosi Ximootiyoosa loohissidoogaadan, daro hanotatun yelagata loohissidaageeti cimida ishantta. (1 Qor. 4:17; Pili. 2:20-22) Ha yelaga ishantti eti “Kiristtoosa bollaa keexxanaadan” maaddana danddayiya “imo” gidiyoogaa bessidosona.—Efi. 4:8-12; Qoodaabaa 11:16, 17, 29.

Kumetta saˈan Xoossaa asaa gubaaˈiyaa giddon banttawu deˈiya amarida aawatettaa haratussi immida daroti Yihoowa oosuwan dumma maataa woy daro maataa ekkana danddayoosona.

Yuuyi xomoosiyaagaa gididi 19 layttawu haggaazida Markoy hagaadan giis: “Ta hanotay laamettidoogee nu gubaaˈiyan deˈiya michchotu ammanenna azinata maaddanaadan oottiis.”

Yuuyi xomoosiyaagaa gididi 28 layttawu haggaazida ZHeraldoy, “Ayyaanaaban shuggidaageeta maaddiyoogeenne darota Geeshsha Maxaafaa xannaˈissiyoogee nuuni ooratti halchchidobaappe amaridaagaa” yaagiis. Inne A machchiyaa he wode 15 asata Geeshsha Maxaafaa xannaˈissiyoogaanne ayyaanaaban shuggida unddennaageeti gubaaˈe shiiquwaa shiiqiyoogaa I yootiis.

Qommoora denttido Alani hagaadan giis: “Nuuni haˈˈi sabbakiyo oosuwaa kaseegaappe aaruwan oottana danddayoos. Nuuni dabaaban, zalˈˈe heeraaninne nu shoorotuyyo markkattoos; nu shoorotuppe naaˈˈati shiiquwaa yiidosona.”

Neeyyo Xoossaa asaa giddon ooratta oosoy imettidabanne neeni hegaa loytta oottana danddayiyaanne ammanettida isha gidikko, neeni maaddana danddayiyo dumma ogee deˈees. Neeni meeze oottidobaa ne gubaaˈiyan deˈiya yelagatussi yootiyoogan Yihoowa oosuwaa kaafana danddayaasa. Qommoora denttido Raasili hagaadan giis: “Ufayssiya gooba yelagata Yihooway loohisseesinne goˈettees. Eti minnidi tamaarissiyoogaaninne heemmiyoogan ishantti goˈettoosona!”—“ Yelagati Oottanawu Danddayanaadan Maaddite” giya saaxiniyaa xeella.

Intte mati dumma haggaazuwaa doommidaba gidikko, loˈˈobaa qoppite. Intte wozanappe oottido oosuwan keehi daro asaa denttettideta; qassi haˈˈikka hegaadan oottana danddayeeta. Inttena asay kasekka siiqees; qassi haˈˈikka siiqanaagee erettidaagaa.

Ubbaappe aaruwan, Yihooway inttena mule dogennabaa oottideta. I “Intte oottido oosuwaanne qassi ammaniyaageeta maaddidoogaaninne  ha77ikka maaddiyoogan Xoossaa siiqido siiquwaa” dogenna. (Ibr. 6:10) Ayyaanay kaalettin xaafettida ha xiqisee I qaalaa gelidobay nu kase oottidobaappe keehi dariyoogaa nuuni ubbay ammanettanaadan oottees. Yihoowawu intte keehi alˈˈo gidiyo gishshawu, A ufayssanawu kase oottidobaakka haˈˈi oottiyoobaakka I dogenna!

Neeni qommoora beˈido ooratta oosoy imettido asa gidana xayikko shin? Gidikkokka he qofay nena maaddana danddayees. Ayba ogiyan?

Neeni ba oosuwaa laammida ammanettida cimaara ubbatoo gayttikko, I wozannaamanne meezee deˈiyo asa gidiyoogee nena maaddana danddayees. Zoriyaanne qofaa A oychcha. Qassi I haˈˈi oottiyooban ammanettidi ba meezetidobaa waati goˈettiyaakko akeeka.

Neeni kaseegaappe dumma ogiyan haggaazaydda deˈiya cima gidin, woy hegee goˈˈiyo isha woy michcho gidin, adussa wodiyawu haggaazidanne haˈˈikka hegaadan oottiya ishantti ammanettiyoogaa Yihooway nashshiyoogaa hassaya.