XANNAˈIYO HUUPHE YOHUWAA 37
Yihoowawu Eeno Giidi Haarettite
“Aawaayyo keehi darissi [“eeno gi haarettana koshshennee,” NW]?”—IBR. 12:9.
MAZAMURE 9 Yihooway Nu Kawo!
HA XINAATIYAN *
1. Nuuni Yihoowayyo haarettana koshshiyoy aybissee?
YIHOOWAY nuna Medhdhidaagaa gidiyo gishshawu, nuuni ayyo haarettana * koshshees. Hegaa gishshawu, nuuni ay oottana koshshiyaakko nuuyyo yootanawu awu maatay deˈees. (Ajj. 4:11) SHin nuuni Yihoowayyo azazettiyo hara gaasoy, I haariyo ogee keehi loˈˈo gidiyo gishshataassa. Asi de’ido wodetun daro asati harata haaridosona. SHin, eti haarido ogiyaa Yihooway haariyo ogiyaara geeddarssiyo wode, Yihooway eta ubbaappe aaro eran, siiquwan, maarotaaninne qaretan Haariyaagaa gidiyoogaa akeekoos.—Kes. 34:6; Roo. 16:27; 1 Yoh. 4:8.
2. Ibraawe 12:9-11 nuuni Yihoowayyo haarettanaadan oottiyaabaa ay yootii?
2 Yihooway nuuni A bonchchiyo gishsha xallawu gidennan, I nuna siiqiya Aawaa gidiyo gishshawu nuuni awu azazettanaadan koyees. Nuuni ‘Aawaayyo haarettana’ koshshiyoy I nuna “maaddanau” loohissiyo gishshataassa gidiyoogaa, PHawuloosi Ibraawe Kiristtaanetuyyo xaafido dabddaabbiyan yootiis.—Ibraawe 12:9-11 nabbaba.
3. (a) Nuuni Yihoowayyo haarettiyoogaa waati bessiyoo? (b) Nuuni zaarana oyshati awugeetee?
3 Nuuni ubbaban Yihoowayyo azazettanawu nuuyyo danddayettida ubbabaa oottiyoogaaninne nu akeekan zemppanawu koyiyoogaa eqettiyoogan Yihoowayyo haarettoos. (Lee. 3:5) Nuuni Yihoowa loˈˈo eeshshatubaa loytti tamaariyo wode, awu haarettanawu metootokko. Aybissi? I oottiyo ubbaban he eeshshati qoncciyo gishshataassa. (Maz. 145:9) Nuuni Yihoowabaa loytti tamaariyo wode, A loytti siiqana. Qassi nuuni Yihoowa siiqiyo wode, nu ay oottanaakkonne ay oottana koshshennaakko I nuussi daro higgeta yootanaadan koyokko. Nuuni Yihoowaagaadan qoppanawunne nuussi aagaadan siyettanaadan tamaaranawu, qassi iitabaappe naagettanawu baaxetoos. (Maz. 97:10) Gidikkonne, Yihoowayyo azazettiyoogee issi issitoo metana danddayees. Ayssi? Qassi cimati, aawatinne aayoti biittaa haariya Nahimiyaappe, Kawuwaa Daawitappenne Yesuusa aayee Mayraamippe ay tamaarana danddayiyoonaa? Ha huuphe yohuwan ha oyshatu zaarota beˈana.
YIHOOWAWU HAARETTIYOOGEE METIYAABA GIDANA DANDDAYIYOY AYBISSEE?
4-5. Roome 7:21-23y yootiyoogaadan, Yihoowayyo haarettiyoogee metiyaaba gidana danddayiyoy aybissee?
4 Yihoowayyo haarettiyoogee metiyaaba gidanaadan oottiya issi gaasoy, nuuni ubbaykka nagaranchcha gidiyoogaa. Yaatiyo gishshawu, nuuni Xoossawu azazettanawu ubbatoo koyokko. Addaameenne Hewaana Xoossaa bolli makkalidi mittaa ayfiyaappe miyoogan aybi loˈˈokko aybi iitakko banttawu kuuyidosona. (Doo. 3:22) Ha wodiyan, daro asay Addaameegaadaaninne Hewaaniigaadan Xoossawu azazettanawu koyenna; qassi aybi loˈˈokko aybi iitakko bawu kuuyana koyees.
5 Nuuni Yihoowa eriyoonne siiqiyo gishshawu, eta mala gidana xayikkonne, I koyiyo ogiyan ubbatoo oottiyoogee nuna metana danddayees. Kiitettida PHawuloosikka hegaadan metootiis. (Roome 7:21-23 nabbaba.) PHawuloosaagaadan, nuuni Yihoowa sinttan loˈˈobaa oottanawu koyoos. SHin iitabaa oottanawu koyiyoogaa nuuni ubbatoo eqettana bessees.
6-7. Yihoowayyo haarettiyoogee metiyaaba gidana danddayiyo hara gaasoy aybee? Leemisuwaa yoota.
6 Yihoowayyo haarettiyoogee metiyaaba gidana danddayiyo hara gaasoy, nuuni diccido heeraa asaa wogaanne eta qofaa kaalliyoogaa. Yihooway koyiyoobaappe dummatiyaabaa daro asay nuussi yootana. Hegaa gishshawu, nuuni he asatuugaadan qoppennaadan ubbatoo baaxetana koshshees. Ane issi leemisuwaa beˈa.
7 Issi issi heeran yelagati bantta deˈuwan daro miishshaa demmanaadan minttettiyoogee meeze gididaba. Mero * giyo issi michchiyo hegaa mala paacee gakkiis. A Yihoowabaa tamaaranaappe kase, ba biittan keehi loˈˈo yuniversttetuppe issuwan tamaaraasu. A daro miishshaa demissiyaanne haratun bonchchissiya oosuwaa demmanaadan so asay O giddanawu baaxetiis. Akka hegaa koyaasu. SHin Yihoowabaa tamaarada A siiqidoogaappe denddidaagan ba halchchuwaa laammaasu. SHin haˈˈikka A metootawusu. A hagaadan gaasu: “Daro miishshaa demissiya ogiyaa taani issi issitoo koyays; shin hegee taani haˈˈi Yihoowawu haggaazaydda deˈiyoogaadan haggaazanaadan oottennaagaa erays. Taani diccido hanotaappe denddidaagan, chii gaanawu haˈˈikka metootays. Yihoowa haggaazuwan taayyo danddayettida ubbabaa oottennaadan diggiya oosuwaa oottanaadan taani paacettiyo wode eqettanaadan Yihooway tana maaddana mala woossays.”—Maa. 6:24.
8. Nuuni haˈˈi ay pilgganee?
8 Nuuni tamaaridoogaadan, Yihoowayyo haarettiyoogee nuuyyo loˈˈo. SHin maatay deˈiyoogeeti, hegeetikka cimati, aawati, qassi aayoti Xoossawu haarettiyo wode harata maaddana danddayoosona. Yihoowa ufayssiya ogiyan maataa waati goˈettanaakko Geeshsha Maxaafan etabay odettido amarida asatuppe nu tamaariyoobaa pilggana.
CIMATI NAAHIMIYAAPPE AY TAMAARANA DANDDAYIYOONAA?
Nahimee Yerusalaame dirssaa gimbbiyaa zaaretti gimbbiyo oosuwaa asaara oottidoogaadan, cimati SHiiquwaa Addaraashaa oosuwaa oottoosona (Mentto 9-11 xeella) *
9. Nahimiyaa gakkida paaceti aybee?
9 Yihooway ba asaa heemmiyo gita aawatettaa cimatuyyo immiis. (1 PHe. 5:2) Nahimee Yihoowa asaa oyqqido ogiyaappe cimati darobaa tamaarana danddayoosona. Nahimee Yihudaa biittaa haariyo gishshawu awu daro aawatettay deˈees. (Nah. 1:11; 2:7, 8; 5:14) Nahimiyaa gakkida amarida paaceta qoppa. Ayhudati Yihoowa goynuwaa bonchchiyoogaa bessenna ogiyan beeta maqidasiyaa goˈettiyoogaa I akeekiis. Qassi eti oottanaadan Yihoowa Higgee yootiyoogaadan, Leewatuyyo miishshaa immibookkona. Yihooway kessido Sambbata higgiyawu eti azazettibookkona; qassi amarida attumaageeti Yihoowawu goynnenna biittatuppe machcho ekkidosona. Biittaa haariya Nahimee ha metiya hanotaa giigissana koshshees.—Nah. 13:4-30.
10. Nahimee Yihoowa asaa waati oyqqidee?
10 Nahimee asay ba qofaa kaallanaadan wolqqanttanawu ba maataa goˈettibeenna. SHin, I Yihooway maaddanaadan minttidi woossiis; qassi Yihoowa Higgiyaa asaa tamaarissiis. (Nah. 1:4-10; 13:1-3) Ubba qassi asay Yerusalaame dirssaa gimbbiyaa zaaretti gimbbanaadan eta maaddiyoogan Nahimee bana ziqqi oottidi asaara issippe oottiis.—Nah. 4:15.
11. Koyro Tasalonqqe 2: 7, 8y yootiyoogaadan, cimati gubaaˈiyan deˈiyaageeta waati oyqqana koshshii?
11 Nahimiyaa gakkidaagaa mala metoy cimata waayi gakkana, shin eti daro ogiyan A leemisuwaa kaallana danddayoosona. Leemisuwawu, cimati bantta ishanttanne michchontta maaddanawu minni oottoosona. Qassi maatay deˈiyo gishshawu, haratuppe aadhdhiyaabadan qoppokkona. Eti gubaaˈiyan deˈiya ishanttanne michchontta siiquwan oyqqoosona. (1 Tasalonqqe 2:7, 8 nabbaba.) Cimati banttana ziqqi oottiyo gishshawunne harata wozanappe siiqiyo gishshawu, siiquwan haasayissoosona. Daro layttawu cima gididi oottida ishaa Andru hagaadan giis: “Issi cimay kehanne pashkka asa gidiyo wode, hegee ishanttunne michchonttu wozanaa denttettiyoogaa taani akeekaas. Qassi hegee cimatuura hashetanaadan eta denttettees.” Daro layttawu cima gididi oottida Toona giyo hara ishay hagaadan giis: “Taani Piliphphisiyuusa 2:3n deˈiya zoriyaa oosuwan peeshshanawu baaxetays; qassi harati taappe aadhdhiyaabadan xeellanawu ubbatoo baaxetays. Hegee harati taayyo azazettanaadan wolqqanttanawu malennaadan tana maaddees.”
12. Cimati banttana ziqqi oottiyaageeta gidana koshshiyoy aybissee?
12 Yihooway bana ziqqi oottiyoogaadan, cimati banttana ziqqi oottana koshshees. Yihooway Ubbabaa Haariyaagaa gidikkonne, I “hiyyeesaa buhiyaappe” denttanawu “duge hokkees.” (Maz. 18:35; 113: 6, 7) Banttana ziqqi oottennaageeta Yihooway ixxiyoogaakka Geeshsha Maxaafay nuussi yootees.—Lee. 16:5.
13. Issi cimay ay haasayanaakkonne hegaa waati haasayanaakko naagettana koshshiyoy aybissee?
13 Issi cimay Yihoowayyo haarettiyo issi ogee I ay haasayanaakkonne hegaa waati haasayanaakko naagettiyoogaana. I yaatana xayikko, issi uri A bonchchennan aggiyo wode, ufayssennabaa haasayana danddayees. (Yaaq. 1:26; Gal. 5:14, 15) Qommoora abaa denttido Andri hagaadan giis: “Cimadan tana bonchchibeennabadan taani qoppiyo issi ishawu woy michcheessi issi issitoo ufayssennabaa haasayanawu koyaas. SHin, taani etabay Geeshsha Maxaafan odettido ammanettida asati oottidobaa wotta denttada qoppaas; qassi hegee bana ziqqi oottiyoogeenne ashkke gidiyoogee keehi koshshiyaaba gidiyoogaa tamaaranaadan tana maaddiis.” Issi cimay gubaaˈiyan deˈiya ishanttuuranne michchonttuura woy hara cimatuura siiquwaaninne ufayssiya ogiyan haasayiyoogan Yihoowawu haarettiyoogaa bessees.—Qol. 4:6.
AAWATI KAWUWAA DAAWITAPPE AY TAMAARANA DANDDAYIYOONAA?
14. Yihooway aawatuyyo immido oosoy aybee, qassi eti ay oottanaadan I koyii?
14 Aaway so asawu huuphe gidanaadan Yihooway sunttiis; qassi aaway ba naata loohissanaadaaninne seeranaadan Xoossay koyees. (1 Qor. 11:3; Efi. 6:4) SHin, hegaa giyoogee aawati bantta maataa koyido ogiyan goˈettana danddayoosona giyoogaa gidenna. So asay deˈanaadan oottiday Yihoowa gidiyo gishshawu, aawati bantta so asaa oyqqiyo ogiyan an oyshettoosona. (Efi. 3:14, 15) Aawati bantta maataa Xoossaa ufayssiya ogiyan goˈettiyoogan Yihoowawu haarettiyoogaa bessoosona. Eti Kawuwaa Daawita deˈuwaabaa xannaˈiyoogan darobaa tamaarana danddayoosona.
Issi aaway woossiyo ogee I bana ziqqi oottiya ura gidiyoogaa A soo asawu bessees (Mentto 15-16 xeella) *
15. Aawati Kawuwaa Daawita deˈuwaabaa xannaˈana koshshiyoy aybissee?
15 Daawiti ba soo asaa xallawu gidennan, kumetta Israaˈeelawu huuphe gidanaadan Yihooway sunttiis. Daawiti kawo gidiyo gishshawu awu daro maatay deˈees. Issi issitoo, I ba maataa bessenna ogiyan goˈettiis; qassi gita nagara oottiis. (2 Sam. 11:14, 15) SHin, I seeraa ekkiyoogan Yihoowawu haarettiyoogaa bessiis. I woossiyo wode, bawu siyettiyaaba ubbaa Yihoowawu yootiis. Qassi Yihoowa zoriyaa azazettanawu bawu danddayettida ubbabaa oottanawu baaxetiis. (Maz. 51:1-4) Attuma asaa xallaappe gidennan, macca asaappekka zoriyaa siyiyoogankka I bana ziqqi oottiis. (1 Sam. 19:11, 12; 25:32, 33) Daawiti ba mooruwaappe tamaariis; qassi ba deˈuwan Yihoowawu haggaaziyoogaa aybippenne aadhdhiyaabadan xeelliis.
16. Aawati Kawuwaa Daawitappe ay tamaarana danddayiyoonaa?
16 Aawati Kawuwaa Daawitappe ay tamaarana danddayiyoonaa? Yihooway inttessi immido maataa bessenna ogiyan goˈettoppite. Intte mooruwaa ammanite; qassi harati Geeshsha Maxaafaa goˈettidi zoriyo zoriyaa siyite. Yaatikko, intte intte huuphiyaa ziqqi oottiyo gishshawu intte soo asay inttena bonchchana. Intte intte soo asaara woossiyo wode, inttessi siyettiyaaba ubbaa Yihoowawu yootite; yaatiyo wode intte Yihoowa maaduwaanne A kaaletuwaa ay keena koyiyaakko intte soo asay erana. Ubbaappe aaruwan, Yihoowa haggaazuwaa intte deˈuwan aybippenne aadhdhiyaabadan xeellite. (Zaa. 6:6-9) Intte intte soo asawu immana danddayiyo aybippenne alˈˈo imotaappe issoy intte loˈˈo leemiso gidiyoogaa.
AAYOTI MAYRAAMIPPE AY TAMAARANA DANDDAYIYOONAA?
17. Yihooway aayetussi immido aawatettay aybee?
17 Yihooway aayeessi so giddon keehi koshshiya aawatettaa immiis; qassi A ba naata tamaarissiyo amarida maataa iyyo immiis. (Lee. 6:20) Issi aayyiyaa oottiyoobaynne haasayiyoobay I naata eta deˈo layttan maaddana woy qohana danddayees. (Lee. 22:6) Aayeti Yesuusa aayee Mayraamippe ay tamaarana danddayiyaakko akeekite.
18-19. Aayeti Mayraamippe ay tamaarana danddayiyoonaa?
18 Mayraama Geeshsha Maxaafaa loyttada erawusu. A Yihoowa wozanappe bonchchada, qassi assi mata dabbo gidada deˈaasu. A Yihooway koyiyoobaa oottiyoogee I deˈuwan ubbabay laamettanaadan oottikkonne, yaatanawu eeno gaasu.—Luq. 1:35-38, 46-55.
Issi aayyiyaa daafurido woy hanqqettido wode, ba soo asawu siiquwaa bessanawu keehi baaxetana koshshennan aggenna (Mentto 19 xeella) *
19 Aayetoo, daro ogiyan Mayraami leemisuwaa kaallana danddayeeta. Waatidi? Koyroogee, intte intterkka Geeshsha Maxaafaa xannaˈiyoogaaninne ubbatoo woossiyoogan Yihoowaara dabbotidi deˈana koshshees. Naaˈˈanttoogee, Yihoowa ufayssanawu intte deˈuwan issi issibaa laammanawu eeno gaana koshshees. Leemisuwawu, darotoo hanqqettiyaanne ba naata cayiya aaway woy aayyiyaa inttena dichchennan aggokkona. Hegaa gishshawu, naata hegaadan dichchiyoogee likke giidi qoppana danddayeeta. Intte intte naata Yihooway koyiyo ogiyan waati dichchanaakko eri simminkka, ubba qassi intte daafuriyo wodenne eti inttessi azazettenna wode, woppu giyoogeenne intte naata danddayiyoogee metana danddayees. (Efi. 4:31) Intteyyo hegaadan siyettiyo wode Yihooway inttena maaddanaadan oychchiyoogee keehi koshshiyaaba. Liidiyo giyo issi aayyiyaa hagaadan gaasu: “Ta naˈay taassi azazettenna wode hanqqettada haasayenna mala issi issitoo wozanappe woossays. Taani haasayiyo qofaa baggan essada, Yihooway maaddanaadan ta wozanan woossaas. Taani woppu gaada deˈanaadan woosay maaddees.”—Maz. 37:5.
20. Issi issi aayotussi meto gididabay aybee, qassi he metuwaa waati xoonana danddayiyoonaa?
20 Issi issi aayeta metana danddayiya harabay bantta naata siiqiyoogaa etawu qonccissanawu metootiyoogaa. (Tii. 2:3-5) He aayetuppe daroti diccido keettan eta yelidaageeti bantta naatuura wozanappe siiqettokkona. Intte hegaa mala hanotan diccikko, inttena yelidaageeti oottidoogaa mala balaa intte oottana koshshenna. Yihooway koyiyoobawu haarettiya issi aayyiyaa ba naatuyyo siiquwaa waata qonccissanaakko tamaariyoogee iyyo koshshana danddayees. A qoppiyo ogiyaa, iyyo siyettiyaabaanne issibaa oottiyo ogiyaa laammiyoogee O metana danddayees. SHin hegeetun A laamettana danddayaawusu; hegee anne I soo asay kaseegaappe aaruwan ufayttanaadan oottana.
YIHOOWAWU HAARETTIYOOGAA AGGOPPITE
21-22. Isiyaasa 65:13, 14y yootiyoogaadan, Yihoowawu haarettiyoogan nuuni demmiyo goˈˈay aybee?
21 Yihoowawu haarettiyoogee keehi loˈˈo gidiyoogaa Kawuwaa Daawiti eriis. I hagaadan giis: “GODAA wogai likke; wozanaa ufaissees. GODAA azazoi geeshsha; wozanaa poo7issees. Qassi tana ne ashkkaraa naagettanaadan zorees; ne higgiyaa naagiyoogan taani daro go7ettais.” (Maz. 19:8, 11) Ha wodiyan, Yihoowayyo haarettiyaageetu giddooninne I siiquwan zoriyoogaa ixxiyaageetu giddon deˈiya dummatettaa akeekana danddayoos. Yihoowawu haarettiyaageeti “wozanan ufaittidi yexxana.”—Isiyaasa 65:13, 14 nabbaba.
22 Cimati, aawati, qassi aayoti Yihoowawu haarettiyo wode, eta deˈoy giiga gidana, eta soo asay keehi ufayttana, qassi kumetta gubaaˈee kaseegaappe aaruwan issuwaa gidana. Ubbappe aaruwan, eti Yihoowa ufayssoosona. (Lee. 27:11) Hegee nuuni ufayttana danddayiyo aybippenne aaruwan ufayssees!
MAZAMURE 123 Xoossaa Maarawu Ammanettidi Haarettiyoogaa
^ MENT. 5 Ha huuphe yohoy nuuni Yihoowayyo haarettana koshshiyoy aybissakko qonccissees. Cimati, aawati qassi aayoti Yihooway etassi immido maataa waati goˈettana bessiyaakkokka yootees. Biittaa haariya Nahimiyaappe, Kawuwaa Daawitappenne Yesuusa aayee Mayraamippe eti darobaa tamaarana danddayoosona.
^ MENT. 1 QONCCISSIDO QAALAA: Haarettiyoogaa giya qaalay harati wolqqan azazettanaadan oottiyo asata ufayssiyaaba gidenna. SHin, Xoossaa asay eeno giidi ayyo azazettiyo gishshawu, Xoossawu haarettiyoogaa eti ufayssennabadan qoppokkona.
^ MENT. 7 Ha huuphe yohuwan issotu issotu sunttay laamettiis.
^ MENT. 62 MISILIYAA QONCCISSUWAA: Nahimee Yerusalaame dirssaa gimbbiyaa zaaretti gimbbidi maaddidoogaadan, issi cimay ba naˈaara SHiiquwaa Addaraashaa giigissiyoogan oottees.
^ MENT. 64 MISILIYAA QONCCISSUWAA: Issi aaway ba soo asaa gishshaa wozanappe Yihoowa woossees.
^ MENT. 66 MISILIYAA QONCCISSUWAA: Issi naˈay biiduwaa kaassaa kaaˈiyoogan daro saatiyaa aattees, qassi assi imettida so giddo oosuwaa woy asttamaaree immido so oosuwaa wurssibeenna. A aayyiyaa ooso sohuwaappe daafura yaada, A bolli hanqqettennan woy iita qaalaa haasayennan A seerawusu.