1. Yihoowawu haggaaziyoogee metana danddayiyoy awudee?

YIHOOWAYYO haggaazanawu neeni metootana danddayiyoy awudee? Metoy dariyo wodiyaaneeyye, metoy baynna wodiyaanee? Metoy nuna gakkiyo wode, Yihoowan ammanettanawu waayettokko. SHin sarotettaa wode nuuni ay oottanee? Xoossawu haggaazana koshshiyoogaa nuuni issi issitoo dogiyoo? Hegee hanana danddayiyoogaa Israaˈeelatuyyo Yihooway minttidi yootiis.—Zaa. 6:10-12.

2. Kawuwaa Asi nuussi aybin leemiso gidii?

² Kumetta wozanan Yihoowan ammanettidi akeekan oottida Kawuwaa Asi nuussi loˈˈo leemiso. I meto wodiyan xalla gidennan, sarotettay deˈiyo wodiyankka Yihoowawu haggaaziis. Asi ba deˈido laytta ubban, “Xoossaassi wozanappe ammanettiya asa gididi de7iis.” (1 Kaw. 15:14) Asi Yihudaappe worddo goynuwaa xayssiyoogan kumetta wozanan Yihoowassi oottiyoogaa bessiis. Geeshsha Maxaafay hagaadan gees: “Asi allaga xoossatuyyo yarshshiyo sohotanne goinniyo xoqqa sohuwaa xaissiis. Goinnanau shuchchaappe oottido tuussatakka mentterettiis; Asheero giyo xoossee misiletakka qanxxeretti oliis.” (2 Odi. 14:3, 5) I ba aawaa aayyiyo Maaˈikokka kawotettan iyyo deˈiya bonchchuwaappe diggiis. Aybissi? A eeqaa goynuwaa aassido gishshataassa.—1 Kaw. 15:11-13.

3. Nuuni ha huuphe yohuwan ay beˈanee?

³ Asi worddo goynuwaa xayssiyoogaappe harabaakka oottiis. I Yihudaa kawotettay Yihoowakko simmanaadan maaddiyoogan tumu goynuwaa aassiis. Yihooway Asanne Yihudaa  asaa sarotettay * deˈiyo wodiyan anjjiis. Asi kawotido tammu layttatun, “biittaikka shemppiis.” (2 Odi. 14:1, 4, 6) Ha huuphe yohuwan, Asi sarotettay deˈiyo he wodiyaa waati goˈettidaakko beˈana. Yaatidi, Asaagaadan sarotettay deˈiyo wodiyaa akeekan goˈettida beni Kiristtaanetu leemisuwaa beˈana. Wurssettan, nuuni ha oyshaa zaarana: Laˈatettan goynniyo biittan neeni deˈikko, sarotettay deˈiyo he wodiyaa neeni waata akeekan goˈettana danddayay?

4. Naaˈˈantto Hanidabaa Odiya 14:2, 6, 7y yootiyoogaadan, Asi sarotettay deˈiyo wodiyaa waati goˈettidee?

⁴ Naaˈˈantto Hanidabaa Odiya 14:2, 6, 7 nabbaba. Asi Yihooway “nuuyyo ubba baggaara woppaa immiis” giidi asaassi yootiis. Asi he sarotettaa wodiyaa allaxxiyo wodiyaadan qoppibeenna. Yaatiyoogaappe, I katamata, miixata, adussa gimbbetanne penggeta keexxiyoogaa doommiis. I Yihudaa asawu, “biittai ha77ikka nuussa” yaagiis. Asi woyganawu koyidee? I bantta biittan simerettiyoogaanne keexxiyoogaa diggiya morkkee baynnaagaa etawu yootanawu koyiis. I sarotettay deˈiyo he wodiyaa asay akeekan goˈettanaadan minttettiis.

5. Asi ba olanchchatu wolqqaa minttidoy aybissee?

⁵ Asi he sarotettaa wodiyaa ba olanchchatu wolqqaa minttanawukka goˈettiis. (2 Odi. 14:8) Hegee I Yihoowan ammanettenna giyoogee? CHii. Sinttappe gakkana danddayiya metuwawu asay giigettanaadan oottiyoogee kawuwaa aawatettaa gidiyoogaa Asi erees. Asi he sarotettaa wodee ubbatoo deˈennaagaa eriis; qassi hegee tuma gidiyoogee qoncciis.

6. Beni Kiristtaaneti sarotettay deˈiyo wodiyaa waati goˈettidonaa?

⁶ Beni Kiristtaaneta darotoo yedetay gakkikkokka, eti sarotettan deˈidosona. Eti he wodetun ay oottidonaa? He ammanettida asati aggennan mishiraachchuwaa sabbakidosona. Oosuwaa maxaafay eti, ‘Yihoowassi yayyiyoogaa’ yootees. Eti aggennan mishiraachchuwaa sabbakido gishshawu, “qoodankka dari dari biidosona.” Sarotettay deˈiyo wodiyan mishiraachchuwaa eti minnidi sabbakin, Yihooway eta anjjidoogee qoncce.—Oos. 9:26-31.

7-8. PHawuloosinne harati demmido injje ubban ay oottidonaa? Qonccissa.

⁷ Beni Kiristtaaneti danddayiyo wode ubban mishiraachchuwaa sabbakidosona. Leemisuwawu, PHawuloosi Efisoonan deˈiya darotuyyo sabbakana danddayiyoogaa akeekido wode, I he kataman sabbakiiddi takkiis.—1 Qor. 16:8, 9.

⁸ Qassi kiitettidaageetinne cimati Yerusalaamen qaxxaraa xeelliyaagan kuuyido wode PHawuloosinne hara Kiristtaaneti 49 M.Ln. daro asawu sabbakidosona. (Oos. 15:23-29) PHawuloosinne harati he kuuyettidaba gubaaˈetussi yooti simmin, eti ‘Godaa qaalaa mishiraachchuwaa’ minnidi sabbakidosona. (Oos. 15:30-35) Yaatin, ayba ayfee beettidee? Geeshsha Maxaafay, “[Gubaaˈeti] ammanuwan minnidi, qoodankka gallassappe gallassan dari dari biidosona” yaagees.—Oos. 16:4, 5.

9. Ha wodiyan daro biittatun deˈiya hanotay ay malee, qassi nuna woygidi oychchana danddayiyoo?

⁹ Daro biittatun, nuuni laˈatettan sabbakana danddayoos. Neeni deˈiyoy hegaa mala biittaanee? Yaatikko, ‘Taani ha laˈatettaa waata goˈettaydda deˈiyaanaa?’ gaada nena oychcha. Ha ufayssiya wurssettaa gallassan, Yihoowa dirijjitee awudeegaappenne aaruwan sabbakiyoonne tamaarissiyo oosuwaa minnidi oottiiddi deˈees. (Mar. 13:10) Ha oosuwan nuuni oottana danddayiyo darobay deˈees!

10. Naaˈˈantto Ximootiyoosa 4:2y, nu ay oottanaadan minttettii?

¹⁰ Sarotettay deˈiyo wodiyaa akeekan waata goˈettana danddayay? (2 Ximootiyoosa 4:2 nabbaba.) Neeni woy ne so asay kaseegaappe aaruwan haggaazanawu, ubba qassi aqinye gidanawu hanotaa giigissana danddayiyaakkonne qoppa. Ha wodiyan nuuni duretanawu baaxetana koshshenna; ayssi giikko, nuuyyo deˈiyaabay nunaara gita waayiyaa pinnenna.—Lee. 11:4; Maa. 6:31-33; 1 Yoh. 2:15-17.

11. Issoti issoti danddayettida keenan daro asay mishiraachchuwaa siyanaadan ay oottidonaa?

¹¹ Asaa Yihoowaabaa tamaaranawu aassiya daroti ooratta qaalaa tamaaridosona. Eta maaddanawu Xoossaa dirijjitee Geeshsha Maxaafaa qofay deˈiyo xuufeta daro qaalatun giigissees. Leemisuwawu, 2010n, nu xuufeti 500 gidiya qaalatun giigoosona. He qooday gujjidi ha wodiyan 1,000⁠ppe dariya qaalatun giigees!

12. Asay bantta qaalan Kawotettaa mishiraachchuwaa siyiyoogan waani goˈettii? Leemisuwaa yoota.

¹² Asay bantta qaalan Yihoowabaa tamaariyo wode etawu aybi siyettii? Amarkkan deˈiya issi michchiyaa Afirkkan amarida sohowan haasayettiya, Kiniruwanda giyo ba qaalan giigida gita shiiquwaa shiiqaasu. He shiiquwaappe simmin A, “Taani Amarkka biido 17 gidiya layttaasappe hagaadan shiiqotun ayyaanaabaa akeeka erikke” yaagaasu. He michchiyaa ba qaalan giigida he shiiquwaa shiiqido wode A keehi ufayttidoogee qoncce. Ne hanotay injjetikko, ne moottan deˈiya amarida asata maaddanawu hara qaalaa tamaarana  danddayay? Ne moottan deˈiya issi uri neeni A qaalan haasayissiyaaba gidikko, ne yootiyoobaa ufayttidi siyanawu eeno gaanee? Neeni minnada oottiyoogan daro ufayttana.

13. Ruusiyan deˈiya nu ishantti sarotettaa wodiyaa waati goˈettidonaa?

¹³ Laˈatettan sabbakiyaageeti nu ishantta ubbaa gidokkona. Issi issi biittatun, kawotettati sabbakiyo oosuwaa diggido gishshawu, nu ishantti laˈatettan sabbakana danddayokkona. Leemisuwawu, Ruusiyan deˈiya nu ishanttu hanotaa qoppa. Daro layttawu eta yedetay gakki simmin, Laappune 1991n kawotettay goynuwaa laˈatettaa etawu immiis. He wode, Ruusiyan deˈiya Yihoowa Markkati 16,000 heera. Laatamu layttaappe simmin, aassiyaageetu qooday gujjidi 160,000⁠ppe dariis! Laˈatettan sabbakana danddayiyo wodiyaa nu ishantti akeekan goˈettidoogee qoncce. He sarotettaa wodee daro takkibeenna. He biittan hanotay laamettikkokka, eti Yihoowassi minnidi oottiyoogaa aggibookkona. Eti awu haggaazanawu banttawu danddayettida ubbabaa oottoosona.

14-15. Yihooway Asa maaddanawu ba wolqqaa waati goˈettidee?

¹⁴ Asa wode deˈiya sarotettay guyyeppe xayiis. Issi miilooneppe dariya olanchchati Toophphiyaappe yiidosona. Zeraaha giyo olanchchatu gadaawaynne A olanchchati Yihudaa xoonanaagaa ammanettidosona. SHin Asi asaa qoodan gidennan, Yihoowan ammanettiis. Asi hagaadan woossiis: “Abeet GODAU, nu Xoossau, nuuni nenan ammanettidi, ha cora olanchchatuura ne sunttan olettanau yiido gishshau, neeni nuna maadda.”—2 Odi. 14:11.

¹⁵ Toophphiyaa olanchchati Asa olanchchatuppe dakkuwaa gidiyaagaa daroosona; shin  Asi Yihooway wolqqaama gidiyoogaanne I ba asaa maaddana danddayiyoogaa erees. Qassi Yihooway ba asaa maaddiis. Toophphiyaa olanchchati xoonettidosona.—2 Odi. 14:8-13.

16. Sarotettan deˈiyo wodee takkennaagaa nuuni waati eriyoo?

¹⁶ Nuna ubbaa sinttappe aybi gakkanaakko nuuni wurssi erokko, shin ha wodiyan Yihoowa ashkkaratussi deˈiya sarotettaa wodee takkennaagaa eroos. Wurssetta gallassatun, Yesuusi ba erissiyo ashkkaratuyyo “dere ubbai inttena ixxana” giidi kasetidi yootidoogaa hassaya. (Maa. 24:9) Hegaadankka, kiitettida PHawuloosi, “Kiristtoos Yesuusan Xoossaa milatidi de7anau dosiya ubbai yedetettana” giis. (2 Xim. 3:12) Seexaanay keehi ‘hanqqettiis,’ qassi A hanqqoy gattiyo qohuwaappe nuuni mule attana danddayokko.—Ajj. 12:12.

17. Nu ammanoy ayba ogetun paacettana danddayii?

¹⁷ Mata wode, nu ubbaa ammanoy paacettana. Qassi, “sa7ai merettoosappe hachchi gakkanaashin de7ibeennabainne qassi hagaappe sinttaukka mule de7enna iita waayee he wode de7ana.” (Maa. 24:21) He wode, nu so asay nu bolli denddananne nu oosoy muleera teqettana danddayees. (Maa. 10:35, 36) Nuuni ubbaykka Asaagaadan, maaduwaanne naaguwaa demmanawu Yihoowan ammanettanee?

18. Ibraawe 10:38, 39y yootiyoogaadan, sarotettay xayiyo wodiyawu giigettanaadan nuna aybi maaddanee?

¹⁸ Nu ammanoy minnanaadan Yihooway ha wodiyan nuna loohissees. Nuuni ubbay minnidi deˈanaadan Yihooway ‘ammanettida wozannaama ashkkaraa’ baggaara “qumaa koshshiyo wodiyan” nuussi immees. (Maa. 24:45) SHin, nuussi Yihoowan mino ammanoy deˈanaadan nuuni ubbay nuuyyo danddayettida ubbaa oottana koshshees.—Ibraawe 10:38, 39 nabbaba.

19-20. Nuuni 1 Hanidabaa Odiya 28:9, nabbabi simmidi nuna oychchana bessiya oyshati awugeetee, qassi aybissi?

¹⁹ Kawuwaa Asaagaadan, nuunikka ‘Yihoowa koyana’ bessees. (2 Odi. 14:4; 15:1, 2) Nuuni Yihoowabaa tamaariyo wodenne xammaqettiyo wode A koyiyoogaa doommoos. Yihoowa mintti siiqanawu nuussi danddayettida ubbabaa oottoos. Hegaa gishshawu, ‘Gubaaˈe  shiiqota ubbatoo shiiqiyaanaa?’ giidi nuuni nuna oychchana danddayoos. SHiiqotun, nuuni Yihoowayyo ubbatoo haggaazanawu minotettaa demmoos, qassi nu ishanttuppenne michchonttuppe minttettuwaa demmoos. (Maa. 11:28) Nuna hagaadankka oychchana danddayoos: ‘Taani Geeshsha Maxaafaa ubbatoo xannaˈiyaanaa?’ Neeni so asaara issippe deˈikko, saaminttan saaminttan so asaa goynuwaa oottay? Woy neeni nerkka deˈikko, neeni so asaara issippe deˈiyoogaadan xannaˈanawu wodiyaa bazzay? Qassi sabbakanawunne tamaarissanawu neeyyo danddayettida ubbabaa oottay?

²⁰ Nuuni he oyshata oychchana koshshiyoy aybissee? Nu qofaaninne nu wozanan deˈiyaabaa Yihooway qoriyoogaa Geeshsha Maxaafay yootees; nuunikka hegaadan oottana koshshees. (1 Hanidabaa Odiya 28:9 nabbaba.) Nu halchchuwan, eeshshan woy qofan laamettana koshshiyoogaa nuuni akeekikko, hegan nuna Yihooway maaddanaadan oychchana bessees. Sinttappe yaana paaciyawu nuuni giigettiyo wodee haˈˈa. Yaatiyo gishshawu, sarotettay deˈiyo wodiyaa akeekan goˈettiyoogaa nena aybinne digganaadan oottoppa!