1-2. Eranchchaa 11:6y Kawotettaa mishiraachchuwaa sabbakiyo oosuwaara waani gayttii?

AMARIDA biittatun, asay mishiraachchuwaa siyanawu ufayttees. Hegee eti siyanawu yeemottiyooba! Hara biittatun qassi, asay Xoossaabaa woy Geeshsha Maxaafaabaa siyanawu darin koyenna. Ne deˈiyo heeran asay mishiraachchuwaa siyii? Eti siyin aggin, Yihooway sabbakiyo oosoy polettiis gaana gakkanaashin aggennan nuuni oottanaadan I koyees.

² Sabbakiyo oosoy polettiyo wodiyaa Yihooway kasetidi keeri wottiis. Hegaappe guyyiyan, “wurssettai gakkana.” (Maa. 24:14, 36) Hegaappe kase, “zerettaa zeriyoogaa aggoppa” * giya zoriyaa azazettiyoogaa waati bessana danddayiyoo?—Eranchchaa 11:6 nabbaba.

3. Nuuni ha huuphe yohuwan ay beˈanee?

³ Hagaappe kasetiya huuphe yohoy, ‘asaa oyqqiyoogan’ hegeekka, mishiraachchuwaa sabbakiyoogan gooba gidanawu nuuni oottana koshshiyo oyddu ogeta qonccissiis. (Maa. 4:19) Nuna ay metoy gakkikkonne, nuuni sabbakanawu murttido murttiyaa yaa minttanawu maaddiya heezzu ogeta ha huuphe yohoy qonccissees. Nuuni (1) sabbakiyo oosuwaa nu deˈuwan kaseyana, (2) danddayanchcha gidana, qassi (3) ammanuwaa minttidi deˈana koshshiyoy aybissakko beˈana.

4. Nuuni oottanaadan Yihooway immido oosuwaa kaseyana koshshiyoy aybissee?

⁴ Wurssetta gallassatun asaa hanotay ay mala gidanaakko qassi aybi hananaakko Yesuusi ba erissiyo ashkkaratussi yootiis. He hanotati bana kaalliyaageeti sabbakiyo oosuwaa kaseyennaadan oottana  danddayiyoogaa Yesuusi eriis. Yesuusi ba erissiyo ashkkarati ‘naagi uttanaadan’ yootiis. (Maa. 24:42) Nohe wode, asay naagettanaadan I yootiyo akeekissuwaa eti siyennaadan qofaa shaakkiya darobay deˈees. Hegaa malabati ha wodiyaankka nu qofaa shaakkana danddayoosona. (Maa. 24:37-39; 2 PHe. 2:5) Hegaa gishshawu, nuuni oottanaadan Yihooway immido oosuwaa kaseyanawu koyoos.

5. Mishiraachchuwaa sabbakiyo oosoy ay keena aakkanaakko Oosuwaa 1:6-8y waati qonccissii?

⁵ Nuuni ha wodiyan, Kawotettaa mishiraachchuwaa sabbakiyoogaa kaseyana koshshees. Yesuusi hayqqi simmin, A kaalliyaageeti aggennan sabbakiyo oosuwaa oottanaagaanne I saˈan deˈiyo wodiyaagaappe aaruwan sabbakanaagaa Yesuusi kasetidi yootiis. (Yoh. 14:12) Yesuusi hayqqi simmin, I erissiyo ashkkaratuppe amaridaageeti moliyaa oyqqanawu simmidosona. Yesuusi hayquwaappe denddi simmidi, ba erissiyo ashkkaratuppe amaridaageeti maalaaliya ogiyan moliyaa oyqqanaadan oottiis. Yesuusi maalaaliyaabaa ootti simmidi, sabbakiyoonne erissiyo ashkkara oottiyo oosoy hara ay oosuwaappenne aadhdhiyoogaa I mintti yootiis. (Yoh. 21:15-17) Yesuusi saluwaa baanaappe guutta kasetidi, I doomissido sabbakiyo oosoy Israaˈeela biittaa ubbaa gakkanaagaa ba erissiyo ashkkaratussi yootiis. (Oosuwaa 1:6-8 nabbaba.) Amarida layttatuppe guyyiyan, “Godaa gallassan” * aybi hananaakko kiitettida Yohaannisi ajjuutaa beˈanaadan Yesuusi oottiis. Yohaannisi beˈido maalaalissiya ajjuutaappe issoy, issi kiitanchchay, “asa ubbaayyo, zare ubbaayyo, qommo ubbaayyo, dumma dumma biittaa qaala ubbaayyoonne yara ubbaayyo merinaa wonggeliyaa mishiraachchuwaa [awaajjiyaagaa]” beˈiis. (Ajj. 1:10; 14:6) Ha wodiyan, kumetta saˈan sabbakiyo oosoy attana gakkanaashin nuuni oottanaadan Yihooway koyiyoogee qoncce.

6. Sabbakiyo oosuwaa nu deˈuwan ubbatoo waati kaseyana danddayiyoo?

⁶ Yihooway nuna maaddanawu oottido  ubbabaa wotti dentti qoppikko, nuuni ubbatoo sabbakiyo oosuwaa kaseyana danddayoos. Leemisuwawu, I attamettidanne elektiroonike xuufetun, cenggurssaaninne biiduwan giigidaageetun, qassi JW Brodkastingiyan gididi palahiya ayyaanaa qumaa nuussi giigissees. Hagaa qoppa: Nu websaytiyan 1,000⁠ppe dariya doonan giigidabay deˈees! (Maa. 24:45-47) Ha alamiyan deˈiya asati dumma dumma polotikaa qofaa kaafiyo gishshawunne dumma dumma haymaanootiyaa kaalliyo gishshawu, qassi amaridaageeti dure gididi deˈishin harati hiyyeesa gidiyo gishshawu, eti shaahettidosona. SHin, Xoossaa ashkkara gidida, kumetta saˈan deˈiya hosppun miilooniyaappe dariya nu ishanttu maabaray issippetettan deˈees. Leemisuwawu, Arbba, Hosppune 19, 2019n, kumetta alamiyan deˈiya Yihoowa Markkati ubbay biiduwan giigida issi mala gidida gallassa xiqisiyaa haasayaa beˈidoogee eta issuwaa oottiis. He galla qammi, Yesuusa hayquwaa Hassayiyo Baalaa bonchchanawu 20,919,041 asay shiiqiis. Ha wodiyan, nuuni hegaa mala maalaaliyaabaa beˈiyo maataanne hegaassi nu wolqqa keena oottidoogaa wotti dentti qoppiyoogee Kawotettaabaa sabbakiyo oosuwaa kaseyidi deˈanaadan nuna denttettees.

7. Sabbakiyo oosuwaa kaseyidi deˈanawu Yesuusa leemisoy nuna waati maaddii?

⁷ Sabbakiyoogaa kaseyidi deˈana danddayiyo hara ogee Yesuusa leemisuwaa kaalliyoogaa. Mishiraachchuwaa sabbakiyoogaappe aybinne A qofaa shaakkanaadan eeno gibeenna. (Yoh. 18:37) Seexaanay “sa7an de7iya kawotetta ubbaanne eta bonchchuwaa” immanawu shoobbido wodenne harati A kawo kessanawu koyido wode, I cimettibeenna. (Maa. 4:8, 9; Yoh. 6:15) I aquwan duretiyoogaa amottidi cimettibeenna woy wolqqaama yedetaa yayyibeenna. (Luq. 9:58; Yoh. 8:59) Nu ammanoy paacettiyo wode, kiitettida PHawuloosi zoridobaa qoppikko sabbakiyo oosuwaa kaseyidi deˈana danddayoos. Yesuusa leemisuwaa kaallanawu koyiya Kiristtaaneti “wozanaa bayidi [“hidootaa qanxxidi,” NW] daafurenna mala” I minttettiis.—Ibr. 12:3.

8. Danddayay aybee, qassi hegee ha wodiyan keehi koshshiyoy aybissee?

⁸ Danddayanchcha asi issi hanotay laamettana gakkanaashin woppu giidi naagees. Nuuni dumma dumma hanotatun danddayanchcha gidana koshshees. Nuuni issi metoy aadhdhanaadan koyana woy loˈˈobaa demmanawu adussa wodiyawu naagana danddayoos. Yihudaa biittan deˈiya danobay xayanaadan hananabaa yootiya Imbbaaqoomi amottiis. (Imb. 1:2) Yesuusa kaalliyaageeti Kawotettay ‘matan’ yaananne Rooma haaruwaappe eta laˈa kessana giidi hidootidosona. (Luq. 19:11) Xoossaa Kawotettay iitatettaa xayssiyo wodiyaanne xillotettay kumido ooratta alamiyaa laattiyo wodiyaa yeemuwan naagoos. (2 PHe. 3:13) SHin, nuuni danddayanchcha gidananne Yihooway keerido wodiyaa naagana koshshees. Danddayanchcha gidanaadan Yihooway nuna tamaarissiyo issi issi ogeta qoppa.

9. Yihooway danddayanchcha gidiyoogaa bessiya leemisoti awugeetee?

⁹ Yihooway danddayanchcha gidiyoogan ooppenne aadhdhiyaagaa. I Noheyyo markkabiyaa keexxanawunne ‘xillotettaabaa yootanawu’ gidiya wodiyaa immiis. (2 PHe. 2:5; 1 PHe. 3:20) Iitatettay kumido Sadoomanne Gamoora katamaa xayssanawu Yihooway kuuyidobaa xeelliyaagan Abrahaami zaari zaari oychchido wode I danddayan ezggiis. (Doo. 18:20-33) Keehi daro layttawu, ammanettibeenna Israaˈeelata Yihooway daro danddayiis. (Nah. 9:30, 31) ‘Bantta nagaraappe simmidi’ A dabbo gidanawu koyiya ubba asawu gidiya wodiyaa immido gishshawu, Yihooway danddayanchcha gidiyoogaa nuuni akeekoos. (2 PHe. 3:9; Yoh. 6:44; 1 Xim. 2:3, 4) Yihoowa leemisoy, nuuni aggennan sabbakanawunne tamaarissanawu danddayanchcha gidanaadan maaddees. Qassi I ba Qaalan qonccida  leemisotu baggaara nuuni danddayanchcha gidanaadan tamaarissees.

10. Yaaqooba 5:7, 8n, qonccida goshshanchchaa hanotaappe nuuni ay tamaariyoo?

¹⁰ Yaaqooba 5:7, 8 nabbaba. Goshshanchchay kattaa zeriyo hanotay nuuni waani danddayanchcha gidanaakko tamaarissees. Issi issi kattay sohuwaara diccees. SHin daro zerettati, ubba qassi ayfiyaageeti cahaa gakkanawu daro wodiyaa ekkoosona. Israaˈeela biittan kattay cahaa gakkanawu usuppun agina heera ekkees. Goshshanchchay ofinttaa iray yaanaappe kase ba zeretta zerees; qassi badhdheesaa iray yaanaappe kase kattaa cakkees. (Mar. 4:28) Nuuni danddayanchcha gidiyoogan goshshanchchaa leemisuwaa kaallikko, akeekanchcha gidana. SHin hegee metiyaaba gidana danddayees.

11. Danddayanchcha gidiyoogee haggaazuwan nuna waati maaddanee?

¹¹ Darotoo, nagaranchcha asay bantta oosuwaa ayfiyaa sohuwaara beˈanawu koyees. SHin nu zeridobay diccanaadaaninne ayfanaadan koyikko, nuuni ubba wode koshshiyaabaa oottana bessees. Nuuni ayllana, tokkana, bulˈˈananne haattaa ushshana koshshees. Erissiyo ashkkara oottana koyikko, nuuni hegaadan minni oottana koshshees. Nuuni Geeshsha Maxaafaa xannaˈissiyoogeeti asaa zaggiyoogaa aggidi, asaa siiqiyaageeta gidanaadan maaddanawu daro wodiyaa ekkana danddayees. Asay nu yootiyoobaa siyennan aggiyo wode, nuuni hidootaa qanxxennaadan danddayanchcha gidiyoogee nuna maaddana. Issi issi asay nu yootiyoobaa siyanawunne tamaaranawu eeno giyo wodekka nuuni danddayanchcha gidana koshshees. Geeshsha Maxaafaa xannaˈiyaageeti ammananaadan nuuni wolqqanttana koshshenna. Issi issitoo, Yesuusi erissiyo ashkkaratikka I tamaarissidobaa sohuwaara akeekibookkona. (Yoh. 14:9) Nuuni sabbakananne tamaarissana danddayoos; shin asawu ammanoy deˈanaadan oottiyay Xoossaa gidiyoogaa hassayiyaageeta gidoos.—1 Qor. 3:6.

12. Nuuni ammanenna nu so asawu sabbakiyo wode waani danddayanchcha gidiyoo?

¹² Nuuni ammanenna nu so asawu sabbakiyo  wode, danddayanchcha gidiyoogee metiyaaba gidana danddayees. Eranchchaa 3: 7n deˈiya maaray nuna maaddees. Xiqisee, “Co77u gaanau wodee de7ees; qassi haasayanaukka wodee de7ees” yaagees. Nu loˈˈo eeshshay nu dabboti nuuni yootiyoobaa siyanawu koyanaadan maaddana danddayees. Eti koyiyo wode, Yihoowaabaa yootanawu nuuni ubbatoo giigi uttana bessees. (1 PHe. 3:1, 2) Nuuni minnidi sabbakananne tamaarissana koshshees; shin nu so asaa gujjin, ubbatoo asa ubbaa danddayiyaageeta gidana koshshees.

13-14. Danddayanchcha gidiyoogan nuussi leemiso gidiya amaridaageeti awugeetee?

¹³ Geeshsha Maxaafan etabay odettidoogeetuppenne ha wodiyan deˈiya ammanettida asatuppe danddayanchcha gidiyoogaa nuuni tamaarana danddayoos. Imbbaaqoomi iitatettay xayanaadan koyiis; shin I, “Wochchiyo adussa gimbbiyaa bolli kiya eqqada taani naagana” giido wode danddayaa bessiis. (Imb. 2:1) Kiitettida PHawuloosi ba haggaazuwaa “polanau” koyiyoogaa yootiis. Gidoppe attin, I aggennan danddayidi ‘wonggeliyaa mishiraachchuwaa loyttidi markkattiis.’—Oos. 20:24.

¹⁴ Giiliyaade timirtte keettaappe anjjettidi aassiya guuttati deˈiyoonne daro asay Kiristtaane gidenna biittaa maddabettida azinaanne machchee hanotaa qoppa. Yan daro asay Geeshsha Maxaafaa xannaˈanawu koyenna. SHin, Giiliyaaden etaara tamaarida hara biittan haggaaziyaageeti dichchaa bessiya daro xinaateta xannaˈissiiddi deˈiyoogaa etawu yootoosona. Gidikkonne, eta moottan deˈiya daro asay eti yootiyoobaa siyennaba gidikkokka, he azinaynne machchiyaa danddayan ubbatoo sabbakidosona. Eti hosppun layttaa sabbakiiddi takkikkonne, eti yootiyoobaa siyida asay keehi guutta; wurssettan eti Geeshsha Maxaafaa xannaˈissidoogeetuppe issoy xammaqettin beˈidi ufayttidosona. Beni wodenne ha wodiyan deˈiya ha leemisotuppe nuuni ay tamaariyoo? He ammanettida asati minnidi oottiyoogaa aggibookkona woy aggennan sabbakidosona; qassi eta danddayaa gishshawu Yihooway eta woytiis. Nuuni “Xoossai immana giidoogaa ammanuwaaninne genccan laattiyaageetu mala” gidanawu koyoos.—Ibr. 6:10-12.

15. Nuuni aggennan sabbakanawu murttidoogan nu ammanuwaa minttanaadan maaddiya issi ogee aybee?

¹⁵ Nuuni sabbakiyoobaa ammanoos; yaatiyo gishshawu hegaa daro asawu yootanawu nuussi danddayettida ubbabaa oottanawu koyoos. Nuuni Geeshsha Maxaafan deˈiya Xoossay qaalaa gelidoban ammanettoos. (Maz. 119:42; Isi. 40:8) Ha wodiyan Geeshsha Maxaafaa hiraagay polettidoogaa nuuni beˈida. Geeshsha Maxaafaa zoriyaa asay bantta deˈuwan oosuwan peeshshiyo wode eta deˈoy keehi laamettidoogaa nuuni beˈida. Ha naqaashay Kawotettaa mishiraachchuwaa asay ubbay siyana koshshiyoogaa kaseegaappe aaruwan nuuni ammananaadan oottees.

16. Mazamure 46:1-3 maaran, nuuni Yihoowaninne Yesuusan ammaniyoogee sabbakiyo oosuwan kaseegaappe yaa murttanaadan waati maaddii?

¹⁶ Nuuni nu sabbakiyo mishiraachuwawu Pultto gidida Yihoowaninne I Kawotettaa Kawo gididi haaranaadan maataa immido Yesuusankka ammanoos. (Yoh. 14:1) Nuna gakkiya hanotay ayba gidikkonne, ubbatoo Yihooway nuuni naagetti attiyo sohonne nuuyyo wolqqa gidana. (Mazamure 46:1-3 nabbaba.) Hegaa bollikka, Yesuusi Yihooway immido wolqqaaninne maatan saluwan uttidi sabbakiyo oosuwaa kaalettiiddi deˈiyoogaa nuuni ammanettoos.—Maa. 28:18-20.

17. Nuuni aggennan sabbakana koshshiyoy aybissakko bessiya leemisuwaa yoota.

¹⁷ Issi issitoo, ammanoy nuuni naagibeenna ogiyan Yihooway nu baaxiyaa anjjanaagaa ammanettanaadan oottees. (Era. 11:6) Leemisuwawu, shaˈan qoodettiya asay nuuni nu xuufeta wottido xarapheezaanne gaariyaa ubba galla beˈees.  He sabbakiyo hiillay loˈˈoo? Ee loˈˈo! Hidaare 2014n kiyida Nu Kawotetta Haggaazuwaa maxeetee yuniverisitiyan tamaariya issi yelagiyaa anjjettiyo wode giigissiyo xuufiyaa Yihoowa Markkata xeelliyaagan xaafana koyidoogaa yootiis. A SHiiquwaa Addaraashaa demmana danddayabeykku; shin yuniverisitiyaa heeran xarapheezaa goˈettidi dabaaban markkattiyaageeta demmaasu; qassi A anjjettanawu giigissiyo xuufiyaassi maaddiyaabaa hegaappe demmaasu. Guyyeppe, A xammaqettaasu; qassi haˈˈi ubba wode aqinye gidada haggaazawusu. Kawotettaa mishiraachchuwaa siyanawu koyiya asay haˈˈikka deˈiyoogaa bessiya hegaa mala taarikee, nuuni aggennan sabbakanaadan denttettees.

18. Yihooway koyido wodiyan Kawotettaaba sabbakiyo oosoy polettanaagaa nuuni ammanettiyoy aybissee?

¹⁸ Kawotettaa mishiraachchuwaa sabbakiyo oosoy keerettida wodiyan polettanaagaa nuuni ammanettana danddayoos. Nohe wode hanidabaa qoppa. Yihooway oottiyoobata ubbatoo bessiya wodiyan oottiyoogaa qonccissiis. Yihooway Bashshaa Haattay yaana wodiyaa 120 gidiya layttaappe kase kuuyiis. Daro layttaappe guyyiyan, Nohee markkabiyaa keexxanaadan Yihooway yootiis. Bashshaa Haattay doommanaappe kase, Nohee markkabiyaa 40 woy 50 layttawu minnidi keexxennan aggenna. I yootiyoobaa asay siyennan ixxikkokka, Yihooway mehiyaanne doˈaa markkabiyaa gelissiyo wodee gakkiis gaana gakkanaashin I sabbakiyoogaa aggibeenna. Hegaappe simmin, “GODAI markkabiyaa penggiyaa gorddiis.”—Doo. 6:3; 7:1, 2, 16.

19. Nuuni aggennan sabbakiyaageeta gidikko, ay demmana giidi naagana danddayiyoo?

¹⁹ Mata wode, Kawotetta mishiraachchuwaa sabbakiyo oosoy polettidoogaa Yihooway nuussi erissana. Hegaappe simmin, I Seexaanaa alamiyaa xayssana; yaatidi Xoossawu azazettiya asay kumido ooratta alamiyaa ehaana. He wode gakkanaashin, Noha, Imbbaaqoomanne aggennan mishiraachchuwaa sabbakida haratu leemisuwaa kaalliyaageeta gidoos. Sabbakiyo oosuwaa aggennan oottiyaageeta, danddayanchchata, Yihoowaninne I gelido qaalan ammanuwaa minttidi deˈiyaageeta gidoos.