1. Yihooway kehatettan immiyoogaa qonccissiyaabay aybee?

YIHOOWAY medhdhiyoogaa doommanaappe kase barkka deˈikkonne, I he wode ba xallaabaa qoppenna. SHin I ayyaana meretatussikka asaassikka deˈuwaa immiis. “Ufayttiya Xoossay” Yihooway loˈˈobaa immiyoogaa dosees. (1 Xim. 1:11, NW; Yaaq. 1:17) I nuunikka ufayttanaadan koyiyo gishshawu, kehatettan immanaadan nuna tamaarissees.—Roo. 1:20.

2, 3. (a) Immiyoogee nuna ufayssiyoy aybissee? (b) Nuuni ay pilgganee?

² Xoossay asaa ba leemisuwan medhdhiis. (Doo. 1:27) Hegee Yihooway nuuni aagaa mala eeshshaa bessanaadan oottidi nuna medhdhiis giyoogaa. Nuuni ufayssaanne Yihoowa anjjuwaa demmanawu, haratussi qoppiyoogaaninne kehatettan immiyoogan Yihoowa leemisuwaa kaallana koshshees. (Pili. 2:3, 4; Yaaq. 1:5) Aybissi? Yihooway asaa hegaadan siiquwan medhdhido gishshataassa. Nuuni nagaranchcha gidikkonne, kehatettan immiyoogan Yihoowa mala gidana danddayoos.

³ Nuuni kehatettan waati immana danddayiyaakko Geeshsha  Maxaafay yootees. Geeshsha Maxaafay hegaa xeelliyaagan tamaarissiyoobaappe amaridabaa ha huuphe yohuwan ane beˈoos. Kehatettan immiyoogan nuuni Xoossaa waati ufayssiyaakko, qassi ha eeshshay nuussi deˈiyoogee Xoossay immido oosuwaa oottanawu nuna waati maaddiyaakko beˈana. Kehatettan immiyoogee nuuni ufayttiyoogaara waani gayttiyaakkonne nuuni muletoo ha eeshshay deˈiyoogeeta gidana koshshiyoy aybissakkokka pilggana.

4, 5. Kehatettan immiyoogan Yihoowaynne Yesuusi nuussi leemiso gidiyaabaa ay oottidonaa?

⁴ Yihooway asay A mala gidanaadan koyiyo gishshawu, nuuni kehatettan immiyoogee A ufayssees. (Efi. 5:1) I nuna maalaalissiya ogiyan medhdhidoogeenne loˈˈiya saˈaanne an deˈiya ubbabaa nuuni ufayttanaadan I medhdhidoogee hegaa qonccissees. (Maz. 104:24; 139:13-16) Hegaa gishshawu, nuuni harata ufayssanawu baaxetiyo wode A bonchchoos.

⁵ Tumu Kiristtaaneti asay kehatettan waati immana danddayiyaakko wottiyoobi baynna ogiyan nuna bessida Kiristtoosa milatoosona. Yesuusi hagaadan giis: “Asa Na7ai, asaayyo oottanaunne daro asaa wozanau ta shemppuwaa immanau yiidoogaappe attin, asi tau oottanau yabeikke.” (Maa. 20:28) Yaatiyo gishshawu, kiitettida PHawuloosi Kiristtaaneta hagaadan zoriis: “Kiristtoos Yesuusan de7iya ha qofai qassi inttenankka de7anau bessees. . . . I ba shenen ubbabaa aggi bayidi, ashkkara meretaa ekkiis.” (Pili. 2:5, 7) Hegaa gishshawu nuuni, ‘Taani Yesuusa leemisuwaa loytta kaallana danddayiyaanaa?’ yaagidi nuna oychchana danddayoos.—1 PHeexiroosa 2:21 nabbaba.

6. Yesuusi Samaare biittaa bitaniyaabaa yootido leemisuwaappe nuuni ay tamaariyoo? (Doomettan deˈiya misiliyaa xeella.)

⁶ Yihooway inne A Naˈay nuussi wottiyoobi baynna leemiso gididobaa nuuni kaalliyo wode ufayttees. Nuuni asawu qoppiyoogaaninne eta maaddiyo ogiyaa koyiyoogan hegaadan oottoos. Yesuusi bana kaalliyaageeti harata, ubba banttaagaappe dumma wogan diccidaageetakka maaddanawu baaxetanaadan koyiyoogaa Samaare biittaa bitaniyaabaa yootido leemisuwan qonccissiis. (Luqaasa 10:29-37 nabbaba.) Yesuusi Samaare biittaa bitaniyaabaa leemisuwaa yootanaadan denttettida oyshaa hassayay? Issi Ayhuda bitanee, “Ta shooroi oonee?” giidi A oychchiis. Yesuusi zaaridobay nunan Xoossay ufayttanaadan nuuni Samaare biittaa bitaniyaadan kehatettan immanawu eeno gaana koshshiyoogaa bessees.

7. Yihooway ubbabaa oottiyo ogee aybippenne aadhdhiyoogaa ammaniyoogaa waati bessiyoo? Qonccissa.

⁷ Kiristtaaneti kehatettan immiyo daro gaasoy deˈees. Leemisuwawu, kehatettan immiyoogee Seexaanay Edene gannatiyan denttido oyshaara gayttidaba. Waanidi? Xoossawu azazettiyoogaappe banttabaa xallaa qoppiyoogeenne bantta koshshawu bichchaariyoogee Addaamessinne Hewaanissi, hegaadankka asa ubbaassi loˈˈo gidanaagaa Seexaanay yootiis. Hewaana ba xallaa siiqaasu; qassi A Xoossaa mala gidanawu koyaasu. Addaamee Hewaano ufayssanawu koyiyoogan ba xallaa siiqiyoogaa bessiis. (Doo. 3:4-6) Eti kuuyidobay kaalettido metoy qoncci beettees. Ba xallaa siiqiyoogee azzantteesippe attin, ufayssenna. Kehatettan immiyoogan, Xoossay ubbabaa oottiyo ogee aybippenne aadhdhiyoogaa ammaniyoogaa bessoos.

8. Koyro azinaynne machchiyaa haratussi immanawu qoppana koshshidoy aybissee?

⁸ Koyro azinaynne machchiyaa Edene gannatiyan banttarkka deˈikkokka, eti harata goˈˈiyaabaa qoppanaadan Xoossay azazuwaa etawu immiis. Yihooway Addaamanne Hewaano anjjiis; qassi eti corattanaadan, saˈaa kumanaadaaninne haaranaadan yootiis. (Doo. 1:28) Xoossay I medhdhido meretaa goˈˈiyaabaa qoppidoogaadan, Addaameenne Hewaana biron yelettibeenna bantta naata ufayssiyaabaa qoppana bessees. Addaamenne Hewaani zerettay kumetta saˈaa gannate oottanawu issippe oottanaadan I koyiis. Hegee gita ooso!

9. Gannatiyaa aassiyoogee ufayssiyaaba gidanay aybissee?

⁹ Wottiyoobi baynna attuma asatinne macca asati kumetta saˈaa Gannate oottiyoogee Yihooway ba halchchidobaa poliyo wode aara wozanappe hashetiyoogaa giyoogaa; yaatiyoogan eti A shemppuwaa sohuwaa gelana. (Ibr. 4:11) He oosoy ay keena woppissiyaabanne ufayssiyaaba gidanaakko qoppa! Harata goˈˈiyaabaa minni oottiyoogee etawu gita anjjuwaanne woppaa demissana.

10, 11. Sabbakanaadaaninne erissiyo ashkkara oottanaadan imettida oosuwaa waati oottana danddayiyoo?

¹⁰ Ha wodiyan, sabbakiyoonne erissiyo ashkkara oottiyo oosuwaa Yihooway ba asawu immiis. He oosuwaa oottanawu, nuuni harata goˈˈiyaabaa wozanappe qoppana koshshees. Nuuni he oosuwaa aggennan oottana danddayiyoy Yihoowanne asaa siiqiyoogee nuna denttettiyo wode xallaana.

¹¹ PHawuloosi inne amarida A laggeti Kawotettaa tumaa zerettaa zeriyo gishshawunne haattaa ushshiyo gishshawu, eti ‘Xoossaara issippe oottiyoogaa’ yootiis. (1 Qor. 3:6, 9) Ha wodiyan, nuunikka nuuyyo deˈiya wodiyan, aquwaaninne wolqqan Xoossay immido sabbakiyo oosuwawu nuuyyo danddayettida ubbabaa oottiyo wode, ‘Xoossaara issippe oottiyaageeta’ gidana danddayoos. Hagee keehi gita maata!

12, 13. Erissiyo ashkkara oottiyoogee demissiyo anjjuwaa yoota.

¹² Sabbakanawunne erissiyo ashkkara oottanawu nu wodiyaanne nu wolqqaa kehatettan immiyoogee daro ufayssaa demissees. Harata Geeshsha Maxaafaa xannaˈissida daro ishanttinne michchontti yootiyoobay hegaa. Nuuni xannaˈissiyoogeeti tumaa akeekidi ufayttiyoogaa, ammanuwan minniyoogaa, laamettiyoogaanne haratussi tumaa yootiyoogaa beˈiyoogee keehi ufayssees. Sabbakanaadan Yesuusi kiittido 70ti loˈˈo ayfiyaa demmido gishshawu ‘ufayssan simmido’ wode, ikka keehi ufayttiis.—Luq. 10:17-21.

¹³ Kumetta saˈan aassiyaageeti mishiraachchoy asaa deˈuwaa laammiyoogaa  beˈidi keehi ufayttoosona. Arshsho Awurooppan sabbakiyaageeti keehi koshshiyoosan loytta haggaazanawu biida aqo oyqqabeenna Ani deˈuwan hanidabaa qoppa. * A, “Hagan Geeshsha Maxaafaa xannaˈissana danddayiyo hanotay daro; qassi taani hegaa keehi dosays” yaagaasu. A gujjada hagaadan gaasu: “Ta haggaazoy tana keehi ufayssees. Taani soo gakkiyo wode, tabaa qoppanawu tawu wodee baa. Taani xannaˈissiyoogeetu metuwaabaanne eta hirggissiyaabaa qoppays. Taani eta minttettiyoonne eta maaddiyo ogiyaa koyays. Qassi ‘ekkiyoogaappe immiyoogee ufayttanaadan’ oottiyoogaa taani akeekaas.”—Oos. 20:35.

14. Asay siyennan ixxikkonne, neeni sabbakiyoogan waana ufayttana danddayay?

¹⁴ Asay nuuni yootiyo mishiraachchuwaa siyennan ixxikkonne, etassi odidoogan ufayttana danddayoos. Ha wodiyan nu oosoy hananabaa yootiya Hizqqeelaagaara issi mala; Yihooway ayyo, “Eti . . . siyin ixxin, ta qaalaa etau yoota” yaagiis. (Hiz. 2:7; Isi. 43:10) Issi issi asay nu yootiyoobaa nashshana xayikkonne, Yihooway nu oottiyoobaa nashshiyoogaa eroos. (Ibraawe 6:10 nabbaba.) Issi aassiyaagee hegaara gayttidaagan loˈˈobaa qoppiis. I ba haggaazuwaa xeelliyaagan hagaadan giis: “Yihooway asaa koshshay gujjanaadan oottanaagaa qoppidi, nuuni tokkida, haattaa ushshidanne woossida.”—1 Qor. 3:6.

15. Nuuni kehatettan immana koshshiyoy asay nuna galatiyo wode xallaanee? Qonccissa.

¹⁵ Kehatettan immiyoogan nuuni ufayttanaadan Yesuusi koyees. Kehatettan immiyo wode daro asay nashshees. I hagaadan giis: “Immite; Xoossai intteyyo immana. Baqqi naaqqidi siilli kunttin, palahidi wora laalettiyaagaa Xoossai intte kiyuwan idinttidi immana. Aissi giikko, intte harau immanau likkidi makkiyooban Xoossai intteyyo likkidi immana.” (Luq. 6:38) Neeni kehatettan immiyo wode, galatiyay ubba asaa gidenna. SHin amaridaageeti galatiyo wode, neeni kehatettan immiyoogee etikka yaatanaadan denttettana danddayees. Yaaniyo gishshawu, asay nashshiyaaba milatin aggin  kehatettan imma. Neeni issitoo kehatettan immidoogee ay keena maaddana danddayiyaakkonne ooni erii.

16. Nuuni ooyyo kehatettan immana koshshii, qassi aybissi?

¹⁶ Wozanappe kehatettan immiya asi kushiyaa zaaranaadan giidi immenna. Yesuusi, “Neeni qumaa katissiyo wode, hiyyeesata, quunata, wobbeta, qooqeta xeesa. Eti ne kushiyaa zaaranau danddayenna gishshau, neeni anjjettana” yaagidi tamaarissido wode hegaa qoppiis. (Luq. 14:13, 14) Geeshsha Maxaafay, “Keha asi . . . anjjettana” yaagees. Hagaadankka gees: “Hiyyeesaayyo qoppiya asi anjjettidaagaa.” (Lee. 22:9; Maz. 41:1) Harata maaddiyoogee ufayssiyo gishshawu nuuni immana koshshees.

17. Nuuni immiyoogan ufayttanaadan oottiya amaridabay aybee?

¹⁷ Yesuusi, “Ekkiyaagaappe immiyaagee anjjettidaagaa” giidoogaa PHawuloosi yootidoogee aquwawu koshshiyaabaa immiyoogaa xalla gidennan, minttettoy, kaaletoynne maadoy koshshiyoogeetussi hegaadan oottiyoogaarakka gayttidaba. (Oos. 20:31-35) Nuuni nu wodiyaa, wolqqaanne nu siiquwaa kehatettan immiyoogee keehi koshshiyaaba gidiyoogaa PHawuloosi yootidobaaninne oottidoban nuna tamaarissiis.

18. Kehatettan immiyoogaa xeelliyaagan eranchchati kuuyidobay aybee?

¹⁸ Immiyoogee asay ufayttanaadan oottiyoogaa deretettaabaa saynisiyaa xannaˈiyaageetikka akeekidosona. Issi xuufee yootiyoogaadan, “asay haratussi loˈˈobaa ootti simmidi keehi ufayttidoogaa odees.” Harata maaddiyo wode, nuuni deˈiyoogee keehi goˈˈiyaabadan nuuyyo siyettiyoogaa xannaˈiyaageeti yootoosona. Yaatiyo gishshawu, asay kaseegaappe aaruwan ufayttanawunne payya gidanawu ba dosan oottanaadan issi issi eranchchati yootoosona. Hegee maalaaliyaaba gidenna; ayssi giikko, immiyoogee ufayssiyoogaa nuna siiqiya Medhdhidaagee, Yihooway ubbatoo yootees.—2 Xim. 3:16, 17.

19, 20. Neeni kehatettan immana koyiyoy aybissee?

¹⁹ Nuuni haratuugaappe banttabaa kaseyiya asaa giddon deˈiyo gishshawu, ubbatoo kehatettan immiyoogee metiyaaba gidana danddayees. SHin, nu kumetta wozanaappe, kumetta shemppuwaappe, kumetta qofaappenne kumetta wolqqaappe Yihoowa siiqiyoogeenne nu shooruwaa nu huuphedan siiqiyoogee azazo ubbaappe aadhdhiya naaˈˈu azazo gidiyoogaa Yesuusi yootiis. (Mar. 12:28-31) Nuuni ha huuphe yohuwan beˈidoogaadan, Yihoowa siiqiyaageeti A leemisuwaa kaalloosona. Yihooway haratussi immees; qassi Yesuusikka immees. Hegee nuuni wozanappe ufayttanaadan oottiyo gishshawu, eti nuunikka hegaadan oottanaadan minttettoosona. Nuuni Xoossawunne asawu oottiyooban keha gidanawu baaxetikko, Yihooway bonchchettanaadaaninne nuuninne harati goˈettanaadan oottana.

²⁰ Harata, ubba qassi ne mala Kiristtaaneta maaddanawu neeni minna oottiyoogee qoncce. (Gal. 6:10) Neeni ubbatoo hegaadan oottikko, siiqiyoonne nashshiyo asa gidanaagee erettidaagaa; qassi hegee neeni ufayttanaadan oottana. Leemiso 11:25y, “Keha asi duretana; harata maaddiya asi maadettana” yaagees. Nu deˈuwaaninne haggaazuwan nu xallaa siiqennan kehatettan immana danddayiyo daro ogee deˈees. Kaalliya huuphe yohuwan hegeetuppe amaridaageeta xannaˈana.