1. Daro asay oosuwaa waati xeellii?

NEENI deˈiyo heeran daro asay oosuwaa waati xeellii? Daro biittatun, asay awudeegaappenne aaruwan oottiiddi deˈees. Daro oosuwaa oottiya asay shemppanawu, so asaara wodiyaa aattanawu woy ayyaanaaban banttawu koshshiyaabaa kunttanawu darotoo wode demmenna. (Era. 2:23) Hara baggaara qassi, amarida asay oottanawu mule dosenna, qassi ayssi oottennaakko gaasuwaa shiishshees.—Lee. 26:13, 14.

2-3. Oosuwaa xeelliyaagan Yihoowaynne Yesuusi oottido leemiso gidiyaabay aybee?

² Alamiyan daro asay bessiyaagaappe aaruwan oottees woy bessiyaagaa keenaa oottenna. SHin, Yihoowaynne Yesuusi oosuwaa waati xeelliyaakko qoppa. Yihooway oottanawu dosiyoogaa eroos. Yesuusi, “Ta Aawai ubba wode oottees; taanikka oottanau bessees” giidi hegaa geeshshidi yootiis. (Yoh. 5:17) Xoossay daro kiitanchchata, xoolintteta, qassi pilaaneeteta medhdhido wode I oottido ubbabaa qoppa. Nuuni Xoossay ha saˈan medhdhido loˈˈiya darobatakka beˈoos. Mazamuraawee, “Abeet GODAU, ne oosoi ai keena daroo! Ne aadhdhida eratettan neeni eta ubbaa medhdhadasa; sa7ai neeni medhdhidoban kumiis” giidoogee bessiyaaba.—Maz. 104:24.

³ Yesuusi ba Aawaa leemisuwaa kaalliis. Xoossay “salota miccido wode” Yesuusi oosuwan maaddiis. I Yihoowa matan “waanna oosanchcha.” (Lee. 8:27-31) Daro wodee aadhi simmin, Yesuusi saˈan deˈiyo wode gita ooso oottiis. Yesuusi oottanaadan Yihooway immido oosoy ayyo qumaa mala, qassi I saˈan oottido ubbabay Xoossay A kiittidoogaa bessiyaaba.—Yoh. 4:34; 5:36; 14:10.

4. SHemppuwaa xeelliyaagan Yihoowappenne Yesuusappe ay tamaarana danddayiyoo?

 ⁴ Minni oottiyoogan Yihoowaynne Yesuusi nuussi leemiso gidiyoogee nuuni shemppana koshshennaagaa bessiyaabee? CHii gidenna. Yihooway mule daafurenna gishshawu, I issibaa ootti simmidi shemppana koshshenna. SHin Yihooway saluwaanne saˈaa medhdhi simmidi, ‘oosuwaa aggidi shemppidoogaa’ Geeshsha Maxaafay yootees. (Kes. 31:17) Gidoppe attin hegee, Yihooway medhdhiyoogaa aggidi takki giidi ba oottidoban ufayttiyoogaa bessiyaaba gidiyoogee qoncce. Qassi Yesuusi saˈan deˈiyo wode minni oottikkonne, I ba laggetuura shemppanawunne maanawu wodiyaa demmees.—Maa. 14:13; Luq. 7:34.

5. Xoossaa asatuppe darota metiyaabay aybee?

⁵ Xoossaa asay oottiyoogaa dosanaadan Geeshsha Maxaafay minttettees. A ashkkarati minnidi oottiyaageeta gidana besseesippe attin, azallana bessenna. (Lee. 15:19) Ne so asawu koshshiyaabaa kunttanawu maaddana danddayiya oosoy neeyyo deˈennan waayi aggana. Qassi Kiristtoosi erissiyo ashkkaratu ubbawu mishiraachchuwaa sabbakiyo aawatettay deˈees. Gidikkonne, neeni gidiyaagaa keenaa shemppana koshshees. Neeni issi issitoo oosuwawu, haggaazuwawunne shemppuwawu gidiya wodiyaa demmanawu metootay? Nuuni ay keena oottanaakkonne qassi ay keena shemppanaakko waati eranee?

6. Marqqoosa 6:30-34y, Yesuusi oosuwaanne shemppuwaa bessiyaagaadan xeelliyoogaa waati bessii?

⁶ Oosuwaa bessiyaagaadan xeelliyoogee keehi koshshiyaaba. Ayyaanay kaalettin Kawuwaa Solomoni, ‘oosettiyaabawu ubbawu wodee deˈiyoogaa’ yootiis. I tokkiyoogaa, keexxiyoogaa, yeekkiyoogaa, miicciyoogaa, duriyoogaanne harabata qonccissiis. (Era. 3:1-8) Nu deˈuwan keehi koshshiyaabatuppe naaˈˈati oosuwaanne shemppuwaa. Yesuusi oosuwaanne shemppuwaa bessiyaagaadan xeelliis. Issi wode, Yesuusi kiittidoogeeti daro sohuwaa biidi sabbaki simmidosona. “Qumaa maanaukka eta gattennan” ixxanaagaa keenaa eti minnidi oottidosona. Yesuusi, “Guuttaa shemppi ekkanau asi bainnasaa hinddite” yaagiis. (Marqqoosa 6:30-34 nabbaba.) Inne I erissiyo ashkkarati issi issitoo koyiyoogaa keenaa shemppana xayikkonne, Yesuusi eti ubbay shemppana koshshiyoogaa eriis.

7. Sambbataa higgiyaa nuuni tamaariyoogee ay oottanaadan nuna maaddii?

⁷ Issi issitoo, shemppana woy oosuwaa laammana koshshees. Xoossay beni ba asay saaminttan saaminttan sambbataa gallassaa bonchchanaadan giigissido keehi koshshiyaabaappe hegaa akeekoos. Nuuni ha wodiyan Muuse Higgiyaa kaallana xayikkonne, I Sambbataa xeelliyaagan yootiyoobaappe tamaariyoogan goˈettana danddayoos. Nuuni oosuwaanne shemppuwaa bessiyaagaadan xeelliyaakkonne qoppanaadan, nu tamaariyoobay nuna maaddana danddayees.

8. Kessaabaa 31:12-15y yootiyoogaadan, Sambbatay nu ay oottiyo gallassee?

⁸ Xoossay usuppun “gallassi” medhdhi simmidi, I saˈan medhdhiyoogaa aggidoogaa Xoossaa Qaalay yootees. (Doo. 2:2) SHin, Yihooway oottiyoogaa dosees; qassi hara ogetun I “ubba wode oottees.” (Yoh. 5:17) Yihooway usuppun “gallassatun” oottidi laappuntta ‘gallassan’ shemppiis; qassi Israaˈeelati laappuntta gallassaa ubban shemppanaadankka yootiis. Xoossay Sambbatay A giddooninne Israaˈeelatu giddon malaata gidiyoogaa yootiis. Hegee Yihoowayyo “dummatida shemppo” Sambbata. (Kessaabaa 31:12-15 nabbaba.) Naata,  ashkkarata, ubba qassi meheta gujjin, ooninne he gallassi oottana bessenna. (Kes. 20:10) Hegee asay ayyaanaaban xeelaa wottanaadan maaddees.

9. Yesuusi saˈan deˈiyo wode Sambbataa xeelliyaagan amarida asawu deˈiya bala qofay aybee?

⁹ Sambbata gallassay Xoossaa asaayyo loˈˈo; shin haymaanootiyaa kaalettiya daroti Yesuusi saˈan deˈiyo wode Sambbataa higgiyawu azazettiyoogaa xeelliyaagan bessenna wogata kessidosona. Eti Sambbata gallassi, maanawu banggaa tiyaa duuttiyoogee woy sahettida asa pattiyoogee bala yaagoosona. (Mar. 2:23-27; 3:2-5) Hegee Xoossaa qofaa gidenna; qassi Yesuusi I yootiyoobaa siyiyaageetussi hegaa loytti qonccissiis.

10. Sambbataa Yesuusi waati xeelliyaakko, Maatiyoosa 12:9-12⁠ppe ay tamaarana danddayiyoo?

¹⁰ Yesuusinne A kaalliya Ayhudati Muuse baggaara Israaˈeelatuyyo imetida Higgiyaa azazettiyo gishshawu, eti Sambbata gallassan shemppidosona. * SHin Sambbata gallassan haratuyyo kehabaanne maaddiyaabaa oottiyoogee bala gidennaagaa Yesuusi haasayidonne oottido daroban bessiis. I geeshshidi, “Sambbata gallassi lo77obaa oottiyoogee higge” yaagiis. (Maatiyoosa 12:9-12 nabbaba.) I Sambbatan kehabaanne maaddiyaabaa oottiyoogee bala giidi qoppibeenna. Xoossay ba asay Sambbata gallassi shemppanaadan yootido waanna gaasuwaa Yesuusi akeekidoogaa I oottidoban bessiis. Ubba galla oottiyo oosuwaappe he gallassi Xoossaa asay shemppiyo gishshawu, eti bantta xeelaa ayyaanaaban wottana danddayoosona.  Yesuusi Sambbata gallassaa Xoossawu goynnanawu goˈettiya so asaara diccidoodee qoncce. “Haroodeegaadan [Yesuusi] Sambbata gallassan Aihuda woosa keettaa gelidi, nabbabanau denddiis” giya, Yesuusi ba diccido Naazireete kataman deˈiyo wodiyaabaa nu nabbabiyoobay hegaa bessees.—Luq. 4:15-19.

11. Oosuwaa xeelliyaagan Yesuusayyo loˈˈo leemiso gididay oonee?

¹¹ Waanidi anaaxe gidanaakko, qassi Xoossay oosuwaa waati xeelliyaakko Yooseefi Yesuusa tamaarissiis. (Maa. 13:55, 56) Qassi Yooseefi ba son deˈiya daro asawu koshshiyaabaa kunttanawu galla galla minnidi oottiyoogaa Yesuusi beˈiis. Guyyeppe, Yesuusi ba erissiyo ashkkaratussi, ‘Oosanchchaassi damoozaa qanxxanawu koshshees’ yaagiis. (Luq. 10:7) Yesuusi waanidi minni oottiyaakko eriyoogee qoncce.

12. Minnidi oottiyoogaa xeelliyaagan Geeshsha Maxaafay woygiyaakko yootiya xiqiseti awugeetee?

¹² Kiitettida PHawuloosikka waati minni oottanaakko akeekiis. Yesuusabaanne Yesuusi tamaarissidobaa haraatussi yootiyoogee awu waanna ooso. SHin, PHawuloosi bawu koshshiyaabawu miishshaa demmanawukka oottiis. I oossinne “tooho gidenna mala, qamminne gallassi daafuriiddinne jaamiiddi oottidi” deˈidoogaa Tasalonqqen deˈiyaageeti eroosona. (2 Tas. 3:8; Oos. 20:34, 35) PHawuloosi ba oosuwaabaa yootiyo wode, I dunkkaaniyaa sikkiyo oosuwaabaa yootennan aggenna. I Qoronttoosan deˈiyo wode, Aqiilaaranne PHirisqqiliira takkiis; qassi “A oosoinne eta oosoi issi mala dunkkaane siho gidiyo gishshau, etaara uttidi, issippe oottiis.” PHawuloosi “qamminne gallassi” oottiis giyoogee I aggennan oottiis giyoogaa gidenna. I dunkkaaniyaa sikkiyo oosuwaa Sambbatan oottibeenna. Aagaadan Sambbatan oottenna Ayhudatussi sabbakanawu I he gallassa goˈettiis.—Oos. 13:14-16, 42-44; 16:13; 18:1-4.

13. PHawuloosa leemisuwaappe nuuni ay tamaarana danddayiyoo?

¹³ Kiitettida PHawuloosi nuuyyo loˈˈo leemiso gidees. I oosuwaa oottees; shin geeshsha gidida “Xoossaa wonggeliyaa mishiraachchuwaa” ubbatoo yootees. (Roo. 15:16; 2 Qor. 11:23) I haratikka ubbatoo sabbakanaadan minttettiis. Aqiilinne PHirisqqila PHawuloosaara “Kiristtoos Yesuusa oosuwaa . . . issippe” oottidosona. (Roo. 12:11; 16:3) PHawuloosi Qoronttoosan deˈiyaageeti “Godaa oosuwan oottiyo darobay” deˈiyoogeeta gidanaadan minttettiis. (1 Qor. 15:58, NW; 2 Qor. 9:8) Kiitettida PHawuloosi, “Oottanau koyenna urai ooninne mooppo” giidi xaafanaadankka Yihooway A denttettiis.—2 Tas. 3:10.

14. Yesuusi yootido Yohaannisa 14:12n deˈiya qofay woygiyoogee?

¹⁴ Ha wodiyan nuuni oottana danddayiyo ay oosoppenne aadhdhiyaagee sabbakiyoogaanne tamaarissiyoogaa. Yesuusi ba erissiyo ashkkarati I oottidoogaappe aadhdhiya oosuwaa oottanaagaa kasetidi yootiis! (Yohaannisa 14:12 nabbaba.) I oottidoogaadan nuuni maalaaliyaabaa oottana danddayiyoogaa yootibeenna. SHin A kaalliyaageeti I oottido sohuwaappe daro sohuwan, daro asawu qassi daro wodiyawu sabbakanaagaanne tamaarissanaagaa yootiis.

15. Nuuni ayba oyshata nuna oychchana koshshii, qassi aybissi?

¹⁵ Neeyyo oosoy deˈikko, nena hagaadan oychcha: ‘Taani ta ooso sohuwan mino oosanchcha gidiyoogan erettiyaanaa? Ta oosuwaa koshshiyo wodiyan wurssiyaanaa, qassi loyttada oottiyaanaa?’ Neeni ee gaada zaarikko, nena ootissiyaagee nenan ammanettana danddayees. Ne ooso sohuwan deˈiya asay mishiraachchuwaa siyanawu kaseegaappe aaruwan koyana danddayees. Ne sabbakiyoonne tamaarissiyo ogiyaa xeelliyaagan nena hagaadan oychcha: ‘Taani haggaazuwan minnada oottiyoogan  erettiyaanaa? Koyro haasayissanawu loytta giigettiyaanaa? Eranawu koyiya asaa eesuwaara zaaretta oychchiyaanaa? Qassi dumma dumma ogetun ubbatoo haggaaziyaanaa?’ Neeni ee gaada zaarikko, haggaazuwan neeni ufayssaa demmana.

16. Yesuusinne I kiittidoogeeti shemppuwaa waati xeellidonaa, qassi hegee ha wodiyan deˈiya daro asaa xeelaappe waani dummatii?

¹⁶ Yesuusinne I kiittidoogeeti issi issitoo shemppana koshshiyoogaa Yesuusi akeekiis. Gido shin, he wodenne ha wodiyan deˈiya daro asay Yesuusi yootido leemisuwan odettida dure bitaniyaa mala. He bitanee bana hagaadan giidi ammanttiis: “SHemppa, ma, uya, ufaitta.” (Luq. 12:19; 2 Xim. 3:4) I deˈuwan keehi koshshiyaabay shempponne ufayssaa giidi qoppiis. Hegaappe dumma hanotan, Yesuusinne I kiittidoogeeti deˈuwan keehi koshshiyaabay banttana ufayssiyoogaa giidi qoppibookkona.

17. Nuuni oosuwaappe shemppiyo wodiyaa waati goˈettiyoo?

¹⁷ Ha wodiyan, nuuni oosuwaappe shemppiyo wodiyaa shemppo xallaassa gidennan, haratussi markkattiyoogaanne gubaaˈe shiiqota shiiqiyoogaa mala loˈˈobaa oottanawu goˈettiyoogan, Yesuusa leemisuwaa kaallanawu baaxetoos. Erissiyo ashkkara oottiyoogeenne shiiquwaa shiiqiyoogee nuussi keehi koshshiyaaba. Hegaa gishshawu, nuuyyo danddayettida ubban hegeeta Yihoowawu oottiyoogaa aggokko. (Ibr. 10:24, 25) Nuuni manddariyo wodekka, nu biidosan shiiqota ubbatoo shiiqoos; qassi nunaara gayttiya asawu Geeshsha Maxaafaabaa yootoos.—2 Xim. 4:2.

18. Nu Kawoy, Kiristtoos Yesuusi nu ay oottanaadan koyii?

¹⁸ Nu Kawoy, Kiristtoos Yesuusi nu oottana danddayiyoogaappe aaruwan oottanaadan koyenna gishshawunne shemppuwaanne oosuwaa bessiyaagaadan xeellanaadan nuna maaddiyo gishshawu A keehi galatoos! (Ibr. 4:15) Nuuni koshshiyaagaadan shemppanaadan I koyees. Qassi nuussi koshshiyaabaa kunttanawunne erissiyo ashkkara oottiyo ufayssiya oosuwaa nuuni minnidi oottanaadan I koyees. Kaalliya huuphe yohuwan, nuna meqetti baynna aylletettaappe ashshanawu Yesuusi oottiyoobaa tobbana.