1. Yelidaageetussi Yihooway ayba aawatettaa immidee?

YIHOOWAY koyro azinaanne machchiyo naata yeliyo koshshay etawu deˈanaadan oottidi medhdhiis. Geeshsha Maxaafay hagaadan giyoogee bessiyaaba: “Naati GODAAPPE imettiya imota.” (Maz. 127:3) Hegee woygiyoogee? Ne mata laggee ba daro biraa neeni naaganaadan nena oychchiis gaada qoppa. Waatuutee? I nenan ammanettidoogan neeni bonchchettidaban qoppennan waayi aggana. SHin neeni he miishshaa naaga wottanaagee nena hirggissana danddayees. Nu mata Dabboy Yihooway, biraappe keehi aadhdhiya alˈˈobaa naaganaadan yelidaageetussi immiis. Eti bantta naata loytti naagiyoonne naati ufayttanaadan oottiyo aawatettaa yelidaageetussi Yihooway immiis.

2. Nuuni pilggana oyshati awugeetee?

² Azinaynne machchiyaa naata yelanawu koyikko, ooni kuuyana koshshii? Qassi bantta naati deˈuwan ufayttanaadan maaddanawu yelidaageeti waatana danddayiyoonaa? Azinaynne machchiyaa loˈˈobaa kuuyanaadan maaddiya, Xoossaa Qaalan deˈiya maratuppe amaridaageeta ane pilggoos.

3. (a) Issi azinaynne machchiya naata yelanaakko agganaakko kuuyana koshshiyay oonee? (b) Aqo oyqqidaageetu laggetinne so asay qoppana koshshiyo Geeshsha Maxaafay yootiyo maaray awugee?

³ Mati aqo oyqqidaageeti sohuwaara yelana bessees giidi issi issi wogatun asay qoppees. Sohuwaara naata yelanaadan eta soo asaynne harati azinaanne machchiyo ammanttanawu malana danddayoosona. Isiyaa biittan deˈiya Jetiro giyo issi ishay, “Gubaaˈiyan,  naati deˈiyo amarida azinatinne machchoti harati naata yelanaadan minttettoosona” yaagiis. Isiyaa biittan deˈiya Jefiri giyo hara ishay, “naˈi baynna azinaynne machchiyaa cimiyo wode eta heemmiya asi baawa giidi issoti issoti etawu yootiyoogaa” akeekiis. SHin, azinaynne machchiyaa naata yelanaakko agganaakko banttawu kuuyana koshshees. Hegee eti kuuyiyoobanne eta aawatetta. (Gal. 6:5.) Laggetinne so asay mati aqo oyqqidaageeti ufayttanaadan koyiyoogee qoncce. SHin naˈa yeliyoogee woy aggiyoogee azinaynne machchiyaa kuuyiyooba gidiyoogaa ubbay hassayana koshshees.—1 Tas. 4:11.

4-5. Azinatinne machchoti haasayana koshshiya naaˈˈubati aybee, qassi eti hegaabaa haasayana koshshiyo loˈˈo wodee awudee? Qonccissa.

⁴ Naata yelanawu kuuyiya azinaynne machchiyaa keehi koshshiya naaˈˈubata haasayana koshshees: Koyroogee, eti naata yelana koyiyoy awudee? Naaˈˈanttoogee, eti aappun naata yelanawu koyiyoonaa? Azinaynne machchiyaa hegaabaa haasayana koshshiyo loˈˈo wodee awudee? Qassi ha naaˈˈu allaalleti keehi koshshiyoy aybissee?

⁵ Darotoo, azinaynne machchiyaa naata yelanaakko yelennaakko eti aqo oyqqanaappe kase haasayana koshshees. Aybissi? Hegaa xeelliyaagan eta naaˈˈaa qofaykka issi mala gidana koshshiyoy gishshataassa. Qassi, eti he aawatettawu giigidaakkonne qoppana koshshees. Naata yelidi aawanne aayo gidiyoogee daro wodiyaanne wolqqaa wurssiyo gishshawu amarida azinatinne machchoti naata yelennan baa giishin issi laytta woy naaˈˈu laytta takkanawu kuuyoosona. Guutta wodiyawu takkiyoogee aqo deˈuwaa meezetiyo wodiyaa demmanaadaaninne issoy issuwaara keehi matattanaadan maaddees giidi eti qoppoosona.—Efi. 5:33.

6. Nuuni wayssiya wodiyan deˈiyo gishshawu aqo oyqqida issoti issoti kuuyidobay aybee?

⁶ Issi issi Kiristtaaneti Nohe naatunne eta machchotu leemisuwaa kaallanawu dooridosona. He azinatinne machchoti sohuwaara naata yelibookkona. (Doo. 6:18; 9:18, 19; 10:1; 2 PHe. 2:5) Yesuusi nu wodiyaa ‘Nohe wodiyaara’ geeddarssiis; qassi nuuni deˈiyoy genccanawu ‘wayssiya wodiyaana’ gidiyoogee qoncce. (Maa. 24:37; 2 Xim. 3:1) Hegaa gishshawu, aqo oyqqida issoti issoti Yihoowa haggaazuwan loytti oottana mala naata takkidi yelanawu kuuyidosona.

7. Luqaasa 14:28, 29⁠ninne Leemiso 21:5n deˈiya maaray azinaanne machchiyo waati maaddana danddayii?

⁷ Akeekanchcha aqo laggeti naata yelanaakko agganaakko, qassi aappun naata yelanaakko  kuuyiyo wode, Luqaasa 14:28, 29n deˈiya maaraa oosuwan peeshshoosona. (Nabbaba.) Keettaa keexxanawu koyiya uradan eti banttawu gidiya miishshay deˈiyaakkonne qoppoosona. Naata yelidi dichchanawu miishshay koshshiyoogaa yelidaageeti eroosona. Hegaa bollikka, naata yelidi dichchanawu miishshaa xalaala gidennan, wodiyaakka wolqqaakka wurssiyoogaa eti akeekoosona. Hegaa gishshawu, azinaynne machchiyaa kaallidi deˈiya oyshata qoppiyoogee keehi koshshiyaaba: ‘Nuuni nu soo asassi koshshiyaabaa kunttanawu naaˈˈaykka oottana koshshii? Nu soo asawu tumuppe koshshiyaabati aybakko nuuni maayettiyoo? Nuuni naaˈˈaykka oottikko, nu naata naaganay oonee? Eti qoppiyoobaaninne oottiyooban O leemisuwaa kaallanaadan nuuni koyiyoo?’ Azinatinne machchoti ha oyshata haasayiyo wode, Leemiso 21:5n deˈiya zoriyaa qoppana koshshees.—nabbaba.

8. Azinatinne machchoti gakkana giidi naagana koshshiyo metiyaabay aybee, qassi siiqiya azinay ay oottanee?

⁸ Issi naˈi aawaappekka aayeeppekka daro wodiyaanne wolqqaa koyiyoogee bessiyaaba. Hegaa gishshawu, issi azinaynne machchiyaa naata bolli bollan yelikko, eti ubba naata koshshiyaaban maaddanawu metootana danddayoosona. Cora guutta naati deˈiyo amarida azinatinne machchoti eti keehi unˈˈettiyoogaa yootidosona. Issi aayyiyaa ubbatoo daafurana danddayawusu. Xannaˈanawu, woossanawunne ubbatoo sabbakanawu iyyo wolqqay baynna gishshawu A keehi daafurana danddayawusu. Qassi A gubaaˈe shiiqotun loytta kaallanawunne hegaappe goˈettanawu metootana danddayawusu. Siiqiya azinay shiiquwankka sonkka naata xeellana bessiyo wode, ba machchiyo maaddanawu bawu danddayettidabaa oottiyoogee qoncce. Leemisuwawu, I ba machchiyo son oottiyooban maaddana danddayees. Ubbatoo goynniyo So Asaa Goynuwaa prograamiyan ubbay goˈettanaadan I minni oottana. Qassi I ba soo asaara ubbatoo haggaazana.

9-10. Bantta naata maaddanawu koyiya aawatinne aayoti ay oottana koshshii?

⁹ Yelidaageeti bantta naati Yihoowa siiqiyoogaa tamaaranaadan maaddanawu oottana danddayiyo issi issibati aybee? Ha iita alamiyaa qohuwaappe eti bantta naata waati naagana danddayiyoonaa? Yelidaageeti oottana danddayiyo amaridabata beˈite.

¹⁰ Yihooway maaddanaadan woossite. Samssoona aawaynne aayyiyaa, Maanuheenne A machchiya oottidobaa qoppite. Maanuheenne A machchiyaa attuma naˈa yelanaagaa erido wode, bantta naˈaa waati dichchanaakko kaaletuwaa demmanawu I Yihoowa mintti woossiis.

11. Daannata 13:8y yootiyoogaadan, yelidaageeti Maanuhe leemisuwaa waati kaallana danddayiyoonaa?

¹¹ Bosiniyaa- Herzegovina giyo biitta asa gidida,  Nehadinne Alma Maanuhe leemisuwaappe tamaaridosona. Eti hagaadan giidosona: “Maanuhedan, nuuni waani loˈˈo aawanne aayo gidanaakko Yihooway nuna kaalettanaadan mintti woossida. Yaatin, Yihooway Geeshsha Maxaafaa, Geeshsha Maxaafaa qofay deˈiyo nu xuufetu, gubaaˈe shiiqotunne gita shiiqotu baggaara nu woosaassi zaaruwaa immiis.”—Daannata 13:8 nabbaba.

12. Yooseefinne Mayraama bantta naatussi aybin leemiso gididonaa?

¹² Leemiso gididi tamaarissite. Intte haasayiyoobay koshshiyaaba; shin intte oottiyoobay intte naata keehi maaddana danddayees. Yooseefinne Mayraama Yesuusa gujjin, bantta naatuyyo keehi loˈˈo leemiso gidiyoogaa nuuni ammanettana danddayoos. Ba soo asaa koshshiyaaban maaddanawu Yooseefi minnidi oottiis. Qassi, Yooseefi ba soo asay ayyaanaabaa nashshanaadan minttettiis. (Zaa. 4:9, 10) Yooseefi “laittan laittan” Paasikaa Baalaa bonchchanawu ba soo asaa Yerusalaame efaanaadan Higgiyan odettana xayikkonne, I efiis. (Luq. 2:41, 42) Yooseefa wode deˈida amarida aawati so asa ubbaa efiyoogee keehi wayssiyaaba, daro wodiyaa wurssiyaabanne daro miishshaa kessanaadan oottiyaaba giidi qoppennan aggokkona. SHin, Yooseefi ayyaanaabaa keehi nashshidoogeenne A naatikka nashshanaadan tamaarissidoogee qoncce. Qassi, Mayraama Geeshsha Maxaafaa loyttada erawusu. A haasayiyoobaaninne oottiyooban, ba naati Xoossaa Qaalaa siiqanaadan tamaarissidoogee erettidaba.

13. Issi azinaynne machchiyaa Yooseefanne Mayraami leemisuwaa waani kaallidonaa?

¹³ Qommoora etabaa denttido Nehadinne Alma, Yooseefanne Mayraami leemisuwaa kaallanawu murttidosona. Xoossaa siiqanaadaaninne awu haggaazanaadan oottidi bantta naˈaa dichchanaadan hegee eta waati maaddidee? Eti, “Nuuni Yihooway kessido maaraadan deˈiyoogee keehi loˈˈo gidiyoogaa nu naˈaa bessanawu baaxetida” yaagidosona. Nehadi gujjidi, “Ne naˈay gidanaadan neeni koyiyoogaa mala asa gida” yaagiis.

14. Yelidaageeti bantta naati oonaara laggetiyaakko erana koshshiyoy aybissee?

¹⁴ Intte naati loˈˈo laggeta dooranaadan maaddite. Bantta naati oonaara laggetiyaakko, qassi eti ay oottiyaakko aayyiyaakka aawaykka erana koshshees. Hegaa giyoogee yelidaageeti bantta naati sooshal miidiyaaninne moobayliyan oonaara haasayiyaakko erana koshshees giyoogaa. Naati qoppiyoobaaninne oottiyooban he laggeta kaallana danddayoosona.—1 Qor. 15:33.

15. Yelidaageeti Jeesa hanotaappe ay tamaarana danddayiyoonaa?

¹⁵ Yelidaageeti komppiyuteriyaabaanne moobayle mala miishshatubaa darin erana xayikko, waatana danddayiyoonaa? Pilippinsse biittan deˈiya Jeesi giyo aaway hagaadan giis: “Nuuni elektiroonike miishshaabaa qiibaa eroos. SHin hegee nuuni nu naata elektiroonike miishshay qohana danddayiyoogaa xeelliyaagan tamaarissennaadan diggibeenna.” Jeesi he miishshata darin erenna gishshawu ba naati goˈettennaadan diggibeenna. I hagaadan giis: “Ta naati ooratta qaalaa tamaaranawu, gubaaˈiyawu giigettanawunne galla galla Geeshsha Maxaafaa nabbabanawu elektiroonike miishshata goˈettanaadan minttettaas.” Intte yelidaageeta gidikko, jw.org^® sayttiyan “Yelagata” giyoogaa garssan deˈiya elektiroonike miishshan kiitaa kiittiyoogaabaanne Intternneetiyan pootuwaa wottiyoogaabaa intte naatuura issippe nabbabidi tobbi ereetii? Haariyay Oonee?—Neneeyye Ne Moobaylee? Qassi Sooshal Networkiyaa Goˈettiyo Ogiyan Akeekancha Gida giyo biidota etaara issippe beˈidi tobbi ereetii? * Intte intte naati  elektiroonike miishshata waati akeekan goˈettanaakko tamaarissanawu hegeeti maaddoosona.—Lee. 13:20.

16. Yelida daroti ay oottidonaa, qassi ay ayfiyaa demmidonaa?

¹⁶ Daro aawatinne aayeti bantta naati Xoossaassi haggaaziyoogan loˈˈo leemiso gidiyaageetuura wodiyaa aattanaadan maaddanawu baaxetidosona. Leemisuwawu, Kot divuwaare giyo biittan deˈiya Nidananne Bomeno giyo aqo laggeti woradaa xomoosiya ishay bantta son takkanaadan darotoo shoobbidosona. Nidanee hagaadan giis: “Hegee nu naˈaa keehi maaddiis. I aqinye gidiis; qassi haˈˈi woradaa xomoosiya ishaa gishshaa xomoosees.” Intte naati hegaadan laggetanaadan oottana danddayeetii?

17-18. Yelidaageeti naata loohissiyoogaa awude doommana koshshii?

¹⁷ Guutta naatettaappe doommidi naata loohissite. Qommoora etabay odettido yelidaageeti bantta naata keehi loˈˈobaa loohissidosona. (Lee. 22:6) Guyyeppe misoonaawe gididi Kiitettida PHawuloosaara oottida Ximootiyoosabaa qoppite. Ximootiyoosa aayyiyaa, Euniiqanne A aayee aayyiyaa Loyda A ‘guutta naatettaasappe doommidi’ loohissidosona.—2 Xim. 1:5; 3:15.

¹⁸ Kot divuwaren deˈiya ZHankilodanne Peeso giyo azinaynne machchiyaa bantta naati usuppunatikka Yihoowa siiqanaadaaninne awu haggaazanaadan oottidi dichchidosona. Etawu injjetanaadan maaddidabay aybee? Eti Euniiqinne Loydi leemisuwaa kaallidosona. Eti hagaadan giidosona: ‘Nu naata guutta naatettaappe doommidi Xoossaa Qaalaa loytti tamaarissiyoogaa doommida.’—Zaa. 6:6, 7.

19. Intte naata Xoossaa Qaalaa “tamaarissiyoogaa” giyoogee woygiyoogee?

¹⁹ Intte naata Yihoowa Qaalaa “tamaarissiyoogaa” giyoogee woygiyoogee? Zaarettido Wogaa 6:6, 7n “tamaarissa” geetettida Ibraawetto qaalay “darotoo zaarettiyoogan hassayissiyoogaa” giyoogaa. Yaatanawu, yelidaageeti bantta naatuura ubbatoo wodiyaa aattana koshshees. Yelidaageeti bantta naata zaari zaaridi tamaarissiyo gishshawu, issi issitoo hidootaa qanxxana danddayoosona. SHin, yelidaageeti he injjiyan bantta naati Xoossaa Qaalaa akeekanaadaaninne hegaa oosuwan peeshshanaadan maaddanawu baaxetana danddayoosona.

20. Naata dichchiyoogaara gayttidaagan Mazamure 127:4 waani oosuwan peˈana danddayiyaakko qonccissa.

 ²⁰ Intte naata loytti erite. Mazamure 127y naata tooraara woy wonddafiyaara geeddarssees. (Mazamure 127, 4 nabbaba.) Wonddafee dumma dummabaappe giigana danddayiyoogaadaaninne yesuwan dummatana danddayiyoogaadan, naati ubbay dumma dumma. Yaatiyo gishshawu, yelidaageeti bantta naata issuwaa issuwaa waati loohissanaakko kuuyana koshshees. Ha wodiyan Israaˈeela biittan bantta naaˈˈu naati Yihoowawu haggaazanaadan loohissidi dichchida azinaynne machchiyaa banttana maaddidabaa hagaadan giidosona: “Nuuni nu naata Geeshsha Maxaafaa dumma dumma xannaˈissida.” Hegaadan xannaˈissiyoogee koshshiyaakko koshshennaakko so asawu huuphe gidida uri kuuyiyoogee qoncce.

21. Yelidaageeti ayba maaduwaa Yihoowappe demmanaagaa naagana danddayiyoonaa?

²¹ Yelidaageeti bantta naata tamaarissiyoogee issi issitoo keehi deexxiyaabadan qoppana danddayoosona; shin naati Yihoowa imota. Yelidaageeta maaddanawu I ubbatoo giigi uttiis. Yelidaageetu woosaa siyanawu koyees. Qassi Geeshsha Maxaafaa baggaara, nu xuufetu baggaara, qassi gubaaˈiyan deˈiya leemiso gidiya kayma aawatinne aayoti immiyo zoriyaa baggaara Yihooway eta woosaa zaarees.

22. Yelidaageeti bantta naatussi immana danddayiyo keehi loˈˈobatuppe amaridaageeti aybee?

²² Issi issi asay naˈa dichchiyoogee 20 layttaa ekkiyoogaa yootees; shin yelidaageeti naata dichchiyoogaa mule aggokkona. Siiqoy, wodeenne Geeshsha Maxaafaa maaraadan loohissiyoogee, eti bantta naatussi immana danddayiyo keehi loˈˈobatuppe amaridaageeta. Naati ubbay imettiya loohissuwaa issi mala ogiyan oosuwan peeshshokkona. SHin Yihoowa siiqiya aawatinne aayoti dichchido naatuppe darotuyyo Isiyan deˈiya Joˈan Maˈe giyo issi michcheegaadan siyettees. A hagaadan gaasu: “Aawaynne aayyiyaa tana loohissido loohissuwaa taani hassayiyo wode, eti tana seerido gishshawunne Yihoowa siiqanaadan tamaarissido gishshawu taani eta keehi galatays. Eti taani coo deˈo deˈanaadan gidennan, ufayttada deˈanaadan oottidosona.” (Lee. 23:24, 25) Miilooniyan qoodettiya ishanttussinne michchotussikka hegaadan siyettees.