1, 2. (a) Yelaga Kiristtaaneti iita ayyaana wolqqatuura olettidi xooniiddi deˈiyoy aybissee? (Doomettan deˈiya misiliyaa xeella.) (b) Nuuni beˈanabay aybee?

KIRISTTAANETA kiitettida PHawuloosi olanchchatuura geeddarssiis. Nuuni ayyaanaaban olettoos. Gidikkokka, nuuyyo tumu morkketi deˈoosona. Seexaanaynne daydanttati olaa eraynne daro wodiyaa meezee deˈiyo olanchchata. Hegaa gishshawu, nuuni ubba qassi yelaga gidikko, he olan xoonennaba milatana danddayees. Yelagati he wolqqaama morkketa olan xoonana danddayiyoonaa? Ee, danddayoosona; qassi xooniiddi deˈoosona! Aybissi? Eti ‘Godaaninne A gita wolqqan minnido’ gishshataassa. SHin eti Xoossaa wolqqaa demmiyoogaappe harabaakka oottidosona. Eti olawu gixxidosona. Eti olawu loytti loohida wotaaddaratudan, ‘Xoossay immiyo olaa maayo ubbaa maayidosona.’—Efisoona 6:10-12 nabbaba.

² PHawuloosi ba leemisuwaa yootiyo wode, Rooma wotaaddarati maayiyo olaa maayuwaa qoppennan aggenna. (Oos. 28:16) Hegee bessiya leemiso gidiyoy aybissakko ane beˈoos. Hegaa beˈiyo wode, issi issi yelagati ayyaanaabaa olaa maayuwaa ubbaa maayennaadan  paace gididabaanne he ubbaa maayidoogan goˈettidobaa yootiyoobaa akeeka.

3, 4. Geeshsha Maxaafan deˈiya tumay waanidi Rooma wotaaddaratu qabattuwaa mala gidii?

³ Efisoona 6:14 nabbaba. Rooma wotaaddaratu xeessay qohettennaadan naagiya biratay eta qabattuwaa bolli deˈees. He qabattoy appe qommoora deˈiya ola miishshaa deexuwaappe shemppissanaadan giigiis. Qassi bisuwaanne cubiyaa qaphiyo mino biratay a bolli deˈees. Issi wotaaddaray ba qabattuwaa mintti gixxidi olaa minnidi teqqana danddayees.

⁴ Hegaadan, nuuni Xoossaa Qaalaappe tamaariyo tumay worddo timirttee nuna ayyaanaaban qohennaadan naagees. (Yoh. 8:31, 32; 1 Yoh. 4:1) Qassi nuuni Xoossaa tumaa keehi siiqiyo wode, ‘tiran wottiyo miishshaa’ maayanawu, hegeekka Xoossay xillotettawu kessido maaraa naaganawu metootokko. (Maz. 111:7, 8; 1 Yoh. 5:3) Hegaa bollikka, Xoossaa Qaalan deˈiya tumaa nuuni loytti akeekiyo wode, yeeqennan ammanettidi deˈananne eqettiyaageetu sinttan he tumawu exatana danddayoos.—1 PHe. 3:15.

5. Nuuni tumaa haasayana koshshiyoy aybissee?

⁵ Nuuni Geeshsha Maxaafaa tumaa leemiso hanotan nu xeessan qabattodan qachikko hegaara maayettiya ogiyan deˈoos; qassi ubba wodekka tumaa haasayoos. Nuuni worddotennay aybissee? Seexaanawu keehi ushachchanaadan oottida issi miishshay wordduwaa gidiyo gishshataassa. Worddoy yootiyaagaakka hegaa ammaniyaagaakka qohees. (Yoh. 8:44) SHin nuuyyo danddayettida peeshshan worddotennaadan naagettoos. (Efi. 4:25) SHin hegee wayssana danddayees. Abigaalo giyo 18 laytta naˈiyaa, “Ubbatoo, ubba qassi worddotiyoogee iita hanotaappe kessiyaaba gidiyo wode, tumaa haasayiyoogee maaddiyaaba milatennan aggana danddayees” yaagaasu. Yaatin A ubbatoo tumaa haasayanawu ayssi baaxetay? A hagaadan gaasu: “Taani tumaa yootiyo wode ta kahay Yihoowa sinttan geeshsha. Qassi tana yelidaageetinne ta laggeti tana ammanana danddayiyoogaa eroosona.” Viktoriyo giyo 23 laytta naˈiyaa hagaadan gaasu: “Neeni tumaa yootiyoonne ne ammaniyoobawu exatiyo wode, harati nenaara gaaddetana danddayoosona. SHin ubbatoo keehi loˈˈo goˈˈaa demmaasa: Yayyakka, Yihoowakko kaseegaappe aaruwan shiiqaasa, qassi nena siiqiyaageeti nena bonchchoosona.” Tumukka, “xeessan qabattuwaa gixxiyoogaadan tumatettaa” ubbatoo gixxiyoogee bessiyaaba.

6, 7. Xillotettay tiran wottiyo ola maayuwan leemisettidoy aybissee?

⁶ Koyro xeetu layttan Rooma wotaaddaray tiran wottiyo ola maayotuppe issuwan adussa biratata issuwaa haraa miyyiyaa mayssi mayssi wottidoogee deˈees. He biratata tiran wottanawu leeqqanttidi galbbaa bolli sikettida zalabata malabaara oyttoosona. Hegaadan galbbaara oyttido biratay wotaaddarawu xeessaappe qommo baggaa kammees. Hegaa mala maayoy wotaaddaray koyoogaadan qaaxerettennaadan guuttaa diggees, qassi biratati minni ohettidaakkonne ubbatoo xomoosana koshshees. Gidikkokka, wotaaddaraa wozanaa woy hara bolla qommuwaa bisoy woy zubbee caddennaadan he maayoy teqqees.

⁷ Hegee Yihooway kessido xillotettaa maaray nu leemiso wozanaa naagiyoogaa bessiya loˈˈo leemiso! (Lee. 4:23) Tiran wottiyo birataappe oosettidaagaa appe laafiyaaban issi wotaaddaray laammennaagaadan, nuuni goˈettanaadan xillotettawu Yihooway kessido maaraa nu qoppiyooban mule laammokko. Nu qofay keehi bala gidiyo gishshawu, nuussi koshshiya naago demissenna. (Lee. 3:5, 6) Yihooway nuussi immido ‘biratati’ nu leemiso  wozanaa bolli minni ohettidaakkonne nuuni ubbatoo xomoosoos.

8. Yihoowa maaraa mintti kaalliyoogee bessiyaaba gididoy aybissee?

⁸ Yihooway xillotettawu kessido maaray nena laˈatettaa diggiyaabadan issi issitoo qoppay? Daaneela giyo 21 laytta naˈay hagaadan giis: “Taani Geeshsha Maxaafaa maaraa kaalliyo gishshawu asttamaaretinne tanaara tamaariya naati ta bolli qilliiccoosona. Yaatin amarida wodiyawu hirggaasinne unˈˈettaas.” I zaarettidi waani minnidee? I hagaadan giis: “Yihoowa maaraa kaalliyoogaa goˈˈaa guyyeppe akeekaas. Ta lagge gidiyaageetuppe amaridaageeti jallissiyaabaa goˈettiyoogaa doommidosona; harati qassi timirttiyaa aggibayidosona. Eta deˈoy hanidobaa beˈiyoogee azzanttiyaaba. Yihooway tumukka nuna naagees.” Madeseno giyo 15 laytta naˈiyaa, “Yihoowa maaraa mintta naaganawunne ta lagge gidiya naati ufayssiyaabadan xeelliyoobaa kaallennan agganawu keehi baaxetaas” yaagaasu. A waanada genccadee? Hagaadan gaasu: “Taani Yihoowa sunttan xeesettiyoogaanne paacee Seexaanay ta bolli zambbiyooba gidiyoogaa hassayays. Baaxetada xooniyo wode, taban kaseegaappe ufayttays.”

9-11. (a) Kiristtaaneti wottiyo leemiso caammay aybee? (b) Nuuni mishiraachchuwaa ufayttiiddi yootanaadan maaddiyaabay aybee?

⁹ Efisoona 6:15 nabbaba. Ba caammaa wottibeenna Rooma wotaaddaray olawu baanawu giigettibeenna. A caammay saˈaa mintti yedhdhanawu keehi maaddiya heezzu achcha galbbaa gatti oyttidoogaappe oosettiis. He caammay keehi gamˈˈanaadaaninne wottanawu injjetanaadan giigiis.

¹⁰ Rooma wotaaddarati wottiyo caammay wottidi olawu biyooba; shin Kiristtaaneti wottiyo leemiso caammay eti sarotettaabaa yootanaadan maaddiyaaba. (Isi. 52:7; Roo. 10:15) Gidikkokka, injjetiyo wode yootanawu xalana koshshees. Boo giyo 20 laytta naˈay, “Tanaara tamaariyaageetussi markkattanawu kase yayyays” yaagiis. Gujjidikka, “Taani he wode yeellatays. Kasebaa qoppiyo wode, taani ayssi hegaadan hanidaakko erikke. Ta lagge gidiyaageetussi markkattiyoogee haˈˈi tana ufayssees” yaagiis.

¹¹ Daro yelagati loytti giigettiyo wode, mishiraachchuwaa yootanawu ufayttiyoogaa akeekidosona. Giigettanawu neeni ay oottana danddayay? Layttay 16 gidido Juuliyaa hagaadan gaasu: “Ta timirtte keettaa borssan xuufiyaa yegga wottays, qassi tanaara tamaariyaageeti eti qoppiyoobaanne ammaniyoobaa yootiyo wode ezggays. Yaatada eta maaddiyaabaa qoppays. Taani giigettido wode, eta maaddanabaa etawu yootana danddayays.” Makenzii giyo 23 laytta naˈiyaa hagaadan gaasu: “Neeni loytta ezggiya keha asa gidikko, ne lagge gidiyaageeta gakkiyaabaa erana danddayaasa. Taani yelagatussi giigidabaa ubbaa nabbabays. Yaatiyo wode, ta laggeta maaddiyaabaa Geeshsha Maxaafaappe woy jw.org saytiyaappe yootana danddayays.” Ha naati yootidobay bessiyoogaadan, neeni sabbakanawu loytta giigettiyo wode, ne leemiso ‘caammay’ ne tohuwaa baqqi oyqqees.

12, 13. Seexaanay yeddiyo ‘wonddafiyaa tamaappe’ amaridaagee aybee?

¹² Efisoona 6:16 nabbaba. Rooma wotaaddaray oyqqiyo oyddu zoozee deˈiyo wogga ‘gonddallee’ hashiyaappe gulbbataa gakkanaashin kammees. SHociyaanne xonggettiya ola miishshatuppe hegee A naagees.

¹³ Seexaanay ne bolli yeddiyo ‘wonddafiyaa tamaappe’ amaridaagee Yihooway neeyyo qoppennanne neeni siiqoy bessiyo asa gidakka yaagidi Abaa yootiyo worddobaa. Ido giyo 19 laytta naˈiyaa pattenna asadan  bana xeelliyoogaa agganawu baaxetawusu. A, “Taayyo darotoo Yihooway taakko shiiqennabadaaninne ta Dabbo gidanawu koyennabadan siyettees” yaagawusu. He wonddafiyaa A waatada teqqay? Ida, “SHiiqoti ta ammanuwaa keehi minttoosona” yaagawusu. Gujjadakka hagaadan gaasu: “Taani kase ta yootiyoobaa ooninne siyanawu koyennabadan qoppada, yan uttada qaalakka qaattikke. SHin haˈˈi shiiquwawu giigettays, qassi heezzutoo woy oyddutoo zaaranawu malays. Hegee wayssikkonne yaatiyo wode tana keehi pashkkissees. Qassi ishanttinne michchontti tana keehi minttettoosona. Yihooway tana siiqiyoogaa erada shiiquwaappe ubbatoo simmays.”

14. Idi hanotay qonccissiyo tumay aybee?

¹⁴ Idi hanotay ha gita tumaa qonccissees: Wotaaddaray oyqqiyo gonddalliyaa yesoy liketti uttidaba, shin nu ammanuwaa gonddallee woy darana woy guuxxana danddayees. Hegee nuuni kuuyiyooba. (Maa. 14:31; 2 Tas. 1:3) Nu ammanuwaa minttiyoogee keehi koshshiyaaba!

15, 16. Hidootay waanidi birata qophe malee?

¹⁵ Efisoona 6:17 nabbaba. Rooma wotaaddarati wottiyo birata qophee huuphiyaa, qooriyaanne somˈˈuwaa shociyaabaa teqqanawu giigiis. Wotaaddaray kushiyan oyqqana mala, issi issi birata qophiyaa oyqqiyoosay deˈees.

¹⁶ Birata qophee wotaaddaraa guuggiyaa naagiyoogaadan, nu ‘atotettaa hidootay’ nu qofaa naagees. (1 Tas. 5:8; Lee. 3:21) Hidootay nuuni Xoossay qaalaa gelidobaa ubbatoo qoppanaadaaninne metuwaa maara  xeellanaadan maaddees. (Maz. 27:1, 14; Oos. 24:15) SHin nuuni nu ‘birata qophee’ goˈˈiyaaba gidanaadan koyikko, huuphiyan wottana koshsheesippe attin, kushiyan oyqqana bessenna.

17, 18. (a) Nu birata qophiyaa digganaadan Seexaanay nuna waatidi denttettana danddayii? (b) Nuuni Seexaanaa geniyan cimettennaagaa waatidi bessana danddayiyoo?

¹⁷ Nuuni nu birata qophiyaa digganaadan Seexaanay waatidi denttettana danddayii? I Yesuusa waatidaakko qoppa. Yesuusi guyyeppe asaa haaranawu hidootan naagiyoogaa Seexaanay eriyoogee qoncce. SHin Yihooway keerido wodee gakkanaashin Yesuusi naagana koshshees. Qassi hegaappe kase I waayettidi hayqqana koshshees. Hegaa gishshawu, he hidootay eesuwan polettiyo qaaday deˈiyoogaa Seexaanay Yesuusawu yootiis. Yesuusi issitoo ayyo goynnikko, he ubbabaa sohuwaara demmanaagaa Seexaanay yootiis. (Luq. 4:5-7) Hegaadankka, nuuyyo asatettan maaddiyaabaa Yihooway ooratta alamiyan immanaagaa Seexaanay erees. SHin nuuni naagana koshshees, qassi hegee gakkanaashin waayettana danddayoos. Yaatiyo gishshawu, nuuni hegaa mala deˈuwaa haˈˈi deˈanawu paacettanaadan oottiyaabaa Seexaanay giigissees. I nuuni kasetidi asatettan goˈˈiya ubbabaa haˈˈi demmanawu qaaqqatanaadan koyees. Kawotettaa naaˈˈanttuwan koyanaadan Seexaanay nuna denttettees.—Maa. 6:31-33.

¹⁸ Yelaga Kiristtaanetu darotuugaadan, Kiˈano giyo 20 laytta naˈiyaa hegan cimettabeykku. A, “Nu meto ubbaa xayssana danddayiyay Xoossaa Kawotettaa xalla gidiyoogaa erays” yaagaasu. He mino hidootay qofaaninne oottiyooban O haˈˈi waati maaddii? “Gannatiyaa hidootay asatettaabaa taani bessiyaagaadan xeellanaadan maaddees” yaagaasu. Gujjadakka hagaadan gaasu: “Ta eran goˈettanawu woy zalˈˈiyan duretanawu baaxetikke. SHin ta wodiyaanne wolqqaa ayyaanaaban halchchidobaa polanawu goˈettays.”

19, 20. Nuuni Xoossaa Qaalaa waatidi kaseegaappe loytti goˈettana danddayiyoo?

¹⁹ Rooma wotaaddarati beni goˈettiyo bisoy 50 santi meetire aduqqees. He wotaaddarati bantta bisuwaara galla galla meezetiyo gishshawu, A loytti goˈettoosona.

²⁰ PHawuloosi Xoossaa Qaalaa Yihooway nuussi immido bisuwaara geeddarssiis. SHin nuuni nu ammanuwawu exatiyo wode woy nu qofaa suurissiyo wode, hegaa loytti goˈettiyoogaa tamaarana koshshees. (2 Qor. 10:4, 5; 2 Xim. 2:15) Neeni hegaa waatada kaseegaappe loytta goˈettana danddayay? Sebastiyana giyo 21 laytta naˈay hagaadan giis: “Taani Geeshsha Maxaafaa nabbabaydda ubba shemppuwaappe issi issi xiqisiyaa xaafays. Taani dosiyo xiqiseta issippe shiishshays. Yaatiyoogee ta qofay Yihoowa qofaa milatanaadan tana daro maaddidabadan qoppays.” Qommoora abaa denttido Daaneeli hagaadan giis: “Taani Geeshsha Maxaafaa nabbabaydda haggaazuwan demmiyo asata maaddana gaada qoppiyo xiqiseta doorays. Asay neeni Geeshsha Maxaafaa keehi dosiyoogaanne eta maaddanawu neeyyo danddayettida ubbaa oottiyoogaa eriyo wode loytti siyiyoogaa akeekaas.”

21. Seexaanaanne daydanttata yayyana koshshennay aybissee?

²¹ Ha huuphe yohuwan denttido yelagatubay bessiyoogaadan, Seexaanaanne daydanttata yayyiyo gaasoy baawa. Eti keehi wolqqaama, shin xoonettennaba gidokkona. Qassi eti hayqqoosona. Mati, Kiristtoosa SHaˈu Layttaa Haaruwaa wode, eti mule qaaxxennaadan qashettana, hegaappe simmin eti xayana. (Ajj. 20:1-3, 7-10) Nuuni nu morkkiya shaakkidi eroos; qassi A maqquwaanne A qofaakka eroos. Yihooway maaddin, nuuni A eqettana danddayoos!