Saaro * giyo michchiyaa hagaadan gaasu: “Taani dungguuxa asa, qassi tanan loyttada ammanettikke. Yaatiyo gishshawu, banan ammanettiyoonne wolqqanttiyo eeshshay deˈiyo asaara taani gayttiyo wode ufayttikke. SHin ashkkenne bana ziqqi oottiya uraara gayttiyo wode taani ufayttays. Hegaa mala urawu taayyo siyettiyaabaa yootananne ta metuwaabaa haasayana danddayays. Taassi mata laggeti ashkkenne banttana ziqqi oottiyaageeta.”

Nuuni ashkke gidikko, hara asay nuuyyo lagge gidanawu koyiyoogaa Saara yootidobay bessees. Ashkke gidiyoogee Yihoowakka ufayssees. A Qaalay nuna hagaadan zorees: ‘Ashkketettaa maayite.’ (Qol. 3:12) Ashkketettay aybee? Ashkketettaa Yesuusi waati bessidee? Qassi nuuni nu deˈuwan ufayttanaadan ha eeshshay waati maaddana danddayii?

Ashkketettay woppu gaanaadan oottiya eeshsha. Ashkke uri haratussi qarettidi eta kehatettan oyqqees, qassi hanqqettanaadan oottiyaabay merettiyo wode woppu gees.

Ashkke asaa harati shugo gi qoppoosona, shin hegee tuma gidenna. “Ashkketettaa” geetettida Giriiketto qaalay loohida paraa qonccissanawu goˈettiyo qaala. Paray mino gidikkonne, A wolqqaa maara goˈettanawu loohana koshshees. Hegaadan, nuuni ashkke gidiyo wode, iitabaa oottennaadan naagettoos, qassi haratuura sarotettan deˈoos.

‘Taani ashkke gidikke’ giidi nuuni qoppennan waayi aggana. Daro asay hanqqettiyo gishshawunne danddayanchcha gidenna gishshawu, ashkke gidiyoogee nuussi keehi metiyaaba gidana danddayees. (Roo. 7:19) Hegaa gishshawu, ashkke gididi deˈanawu baaxetana koshshees; yaanikko nuuni ashkke gidanawu ubbatoo baaxetanaadan Yihoowa geeshsha ayyaanay nuna maaddana. (Gal. 5:22, 23) Nuuni ashkke gididi deˈanawu baaxetana koshshiyoy aybissee?

Ashkketettay asay nuukko shiiqanaadan oottiya eeshsha. Qommoora ibaa denttido Saara, nuuni ashkke uraara laggetiyoogan ufayttiyoogaa akeekaasu. Ashkkenne keha asa gidiyoogan Yesuusi loˈˈo leemiso. (2 Qor. 10:1) A mule erenna naatikka akko shiiqanawu koyidosona.—Mar. 10:13-16.

Nuuni ashkke gidiyoogee nuuyyookka nunaara deˈiya haratuyyookka loˈˈo. Nuuni ashkke gidikko, elle yiillotokko woy hanqqettokko. (Lee. 16:32) Nuuni siiqiyo asaa gujjin, harata qohokko, yaatiyo gishshawu nuna mooranchchadan xeellokko. Nu  oottiyoobaynne nu eeshshay harata qohennaadan nuuni naagettiyo gishshawu eti goˈettoosona.

Yesuusawu gita aawatettaynne daro oosoy deˈikkonne, I ubba asawu ashkke. A wode deˈiya daroti toohoy deexxin baaxetiyo gishshawu, etawu shemppuwaa koshshiis. Yesuusi eta ‘taakko haa yiite; taani ashkkenne wozanappe kawuyyiyaagaa’ yaagidoogee eta keehi minttettennan waayi aggana!—Maa. 11:28, 29.

Nuuni Yesuusaagaadan ashkke gidiyoogaa waati tamaarana danddayiyoo? Yesuusi asaa oyqqido ogiyaanne metiya hanotati gayttiyo wode I ay oottidaakko eranawu Xoossaa Qaalaa xannaˈiyoogaana. Yaatikko, nu ashkketettay paacettanaadan oottiya hanotati nuna gakkiyo wode, Yesuusaagaadan oottanawu baaxetoos. (1 PHe. 2:21) Yesuusi ashkke gidanaadan maaddida heezzubata beˈa.

Yesuusi bana wozanappe ziqqi oottiya asa. Yesuusi I “ashkkenne wozanappe kauyyiyaagaa” gidiyoogaa yootiis. (Maa. 11:29) Ashkketettay bana ziqqi oottiyoogaara gayttida eeshsha gidiyo gishshawu, he naaˈˈu eeshshata Geeshsha Maxaafay issippe qonccissees.—Efi. 4:1-3.

Nu huuphiyaa ziqqi oottiyoogee nuuni elle yiillotennaadan woy hara asi nubaa haasayidoban elle qohettennaadan naagettana mala maaddees. Yesuusi asay A “yoraanne woine eessaa uyiyaagaa” giidi borido wode waatidee? Hegee tuma gidennaagaa I ba deˈuwan bessiis. I bana ziqqi oottiyaagaa gidiyo gishshawu, “aadhdhida eratettai ba oosuwan tuma gididi beettees” giidi ashkketettan yootiis.—Maa. 11:19.

Issi uri ne zariyaa, ne mattumaa, woy ne kase hanotaa xeelliyaagan yuushshi qoppennan haasayikko, ashkketettan zaaranawu ne baaxetiyoogee bessiyaaba. Tohossa Afirkkan deˈiya gubaaˈe cima gidida Piteri hagaadan giis: “Taani issi uri haasayidoban yiillotiyo wode, ‘Yesuusa gidiyaakko waatanee?’ gaada tana oychchays. Qassi taani tabaa bessiyaagaappe aattada qoppana bessennaagaa akeekaas.”

Asay nagaranchcha gidiyoogaa Yesuusi erees. Yesuusi erissiyo ashkkarati likkebaa oottanawu koyikkonne, eti nagaranchcha gidiyo gishshawu, hegaadan ubbatoo oottibookkona. Leemisuwawu, Yesuusi hayqqanaappe kase qammi, PHeexiroosi, Yaaqoobinne Yohaannisi xiskkennan takkanaadan I yootidoogaa eti naagibookkona. Eti xiskkido wode Yesuusi “ayyaanai giigi uttiis; shin ashoi daafuranchcha” giidoogee eti xiskkido gaasuwaa I akeekidoogaa bessees. (Maa. 26:40, 41) Eti nagaranchcha gidiyoogaa Yesuusi eriyo gishshawu, I ba kiittidoogeeta hanqqettibeenna.

Mandi giyo issi michchiyaa harata kase keehi borawusu, shin A ashkke gidiyoogan Yesuusa leemisuwaa kaallanawu haˈˈi keehi baaxetawusu. A hagaadan gaasu: “Taani ubba asay nagaranchcha gidiyoogaa hassayanawunne Yihoowagaadan asaa loˈˈo eeshshan xeelaa wottanawu baaxetays.” Yesuusi asay daafuranchcha gidiyoogaa akeekidi etawu qarettidoogee neeni harata ashkketettan oyqqanaadan maaddana danddayiyoogee tuma.

Yesuusi Xoossan ammanettiis. Yesuusi saˈan deˈiyo wode, naaquwaa gencciis. Harati abaa bala ogiyan akeekidosona, A karidosona, qassi barchchiya bessidosona. Gidikkonne, I “xillo pirddiya Xoossaayyo bana aattidi” immido gishshawu ashkke gididi deˈiis. (1 PHe. 2:23) Yesuusi saluwan deˈiya ba Aaway genccanaadan bana maaddanaagaanne iita ogiyan A oyqqidaageeta bessiya wodiyan qaxxayanaagaa erees.

Nuna asi bessenna ogiyan oyqqin nuuni hanqqettidi zaarikko, nu hanotay yaa iitanaadan oottana danddayoos. Hegaa gishshawu, Geeshsha Maxaafay hagaadan gees: “Asa hanqqoi Xoossai koyiyo xillotettaa eheenna.” (Yaaq. 1:20) Nuna hanqqetissidabay deˈikkonne, nuuni nagaranchcha gidiyo gishshawu bessenna ogiyan hanqqettana danddayoos.

Jarmanen deˈiya Kaati giyo michchiyaa, ‘Issi uri bana naagana xayikko, hara asi A naagenna’ gaada kase qoppawusu. SHin A Yihoowan ammanettiyoogaa tamaarido wode, I qofay laamettiis. A hagaadan gaasu: “Haˈˈi taani tana naaganawu ubbatoo giiga uttana koshshenna. Yihooway saˈan deˈiya iitaba ubbaa giigissanaagaa taani eriyo gishshawu ashkketettan zaarays.” Neeni naaqettidaba gidikko, Xoossan ammanettiyoogan Yesuusa leemisuwaa kaalliyoogee neeni ashkke gidada deˈanaadan maaddana.

Nuuni ufayttanawu koyikko, ashkke gidana bessiyoogaa Yesuusi yootiis. “Ashkketi anjjettidaageeta [woy ufayttiyaageeta]” gidiyoogaa I yootiis. (Maa. 5:5) Kaallidi deˈiya hanotatun ashkketettay waati maaddiyaakko akeeka.

Aqo deˈuwan unˈˈissiyaabay merettiyo wode, hegaa giigissanawu ashkketettay maaddees. Awusttiraaliyaa biittan deˈiya Roberta giyo ishay hagaadan giis: “Taani haasayanawu koyabeenna qohiya darobaa ta maccaasee bolli haasayaas. SHin neeni hanqqettada haasaya simmada, aynne haasayabeennabadan asi qoppanaadan oottana danddayakka. Taani O keehi qohidoogaa akeekido wode azzanaas.”

Haasayiyooban “nuuni ubbaikka daroban baleettees,” qassi nu qoppennan haasayiyoobay nu aqo deˈuwan metoy merettanaadan oottana danddayees. (Yaaq. 3:2) Hegaa mala hanotatun, nuuni woppu gaanaadaaninne nu inxxarssaa naaganaadan ashkketettay maaddees.—Lee. 17:27.

Roberti ashkke gidanawunne ba huuphiyaa naaganawu keehi baaxetiis. Hegee ay demissidee? I hagaadan giis: “Taaninne ta keettayiyaa maayettenna wode, loytta ezgganawu, ashkketettan haasayanawu, qassi yiillotennan agganawu haˈˈi baaxetays. Ta keettaayeera kaseegaappe aaruwan siiqettoos.”

Ashkketettay nuuni haratuura saruwan deˈanaadan maaddees. Eesuwan yiillotiya daro asawu daro laggeti baawa. SHin ashkketettay ‘issippe gatti qachchiya sarotettaa’ naagidi deˈanaadan nuna maaddees. (Efi. 4:2, 3) Qommoora ibaa denttido Kaata hagaadan gaasu: “Amarida asatuura saruwan deˈiyoogee metiyaaba gidikkonne, taani ashkke gidiyo wode haratuura wodiyaa aattiyoogan ufayttana danddayays.”

Ashkketettay woppu gaanawu maaddees. Geeshsha Maxaafay “bollappe yiya aadhdhida eratettai” ashkketettaaranne sarotettaara gayttidaba gidiyoogaa yootees. (Yaaq. 3:13, 17) Ashkke urawu “woppu giida wozanai” deˈees. (Lee. 14:30) Ashkke gidanawu keehi baaxetida Martiini hagaadan giis: “Issibay taani koyiyoogaadan oosettanaadan haˈˈi ubbatoo koyikke, qassi taani kaseegaappe aaruwan woppu gaysinne ufayttays.”

Ashkke gidanawu nuuni keehi baaxetana koshshiyoogee tuma. Issi ishay, “Haˈikka taani issi issitoo hanqquwaa suullays” yaagiis. SHin ashkke gidanaadan nuna minttettiya Yihooway nu hegawu baaxetiyo wode maaddana. (Isi. 41:10; 1 Xim. 6:11) I nuna loohissidi polana danddayees, qassi “minttana” danddayees. (1 PHe. 5:10) Kiitettida PHawuloosadan, nuuni guyyeppe ‘Kiristtoosa doshotettaanne A ashkketettaa’ kaallana danddayoos.—2 Qor. 10:1.