CARKKUWAA hanotaa hiraagiya bitanee raadar giyo miishshan beettiya misiliyaa pilggees. I daro heeraa qohana danddayiya wolqqaama gotee yiyoogaa akeekees. I asay qohettennaadan qoppido gishshawu, he gotee gakkanaappe kase asay naagettanaadan minnidi yootees.

Hegaadankka, asay carkkuwaa hanotaabaa siyana danddayiyo aybippenne aaruwan keehi qohiya wolqqaama ‘gotiyaa’ malabaa Yihooway saˈan deˈiya asawu yootiiddi deˈees. I hegaa waati oottiiddi deˈii? Asay hegaa siyidi issibaa oottanawu gidiya wodiyaa I immees giidi nuuni ammanettana danddayiyoy aybissee? Zaaruwaa demmanawu, asay naagettanaadan Yihooway beni wode yootido amaridabaa ane koyro beˈoos.

Beni wode, Yihooway ba azazuwawu eriiddi makkaliya asaa bolli ehiyo dumma dumma ‘gotiyaappe’ woy pirddanawu oottanabaappe eti naagettanaadan yootiis. (Lee. 10:25; Erm. 30:23) He ubba hanotan, I makkalida asati naagettanaadaaninne ayyo azazettanawu ay oottana koshshiyaakko adussa wodiyaappe doommidi yootiis. (2 Kaw. 17:12-15; Nah. 9:29, 30) Asay koshshiyaagaadan laamettana mala, I saˈan ayyo ammanettidi oottiya ashkkarata goˈettidi asay eesuwan laamettanaadan darotoo yootiis.—Amo. 3:7.

Xoossay ba pirddaa yootanaadan goˈettido asatuppe issoy Noha. I he wode pokkobaanne meqetti baynnabaa oottiya asaa bolli yaana Bashshaa Haattaabaa yayyennan daro layttawu yootiis. (Doo. 6:9-13, 17) Bashshaa Haattaappe attanawu eti ay oottana koshshiyaakkokka I yootiis. Nohee daro sabbakido gishshawu, guyyeppe ‘xillotettaabaa yootiyaagaa’ geetettiis.—2 PHe. 2:5.

Xoossay yoota giido kiitaa Bashshaa Haattaappe kase Nohee minnidi yootikkonne, asay siyennan ixxiis. Eti banttawu ayba ammanoynne baynnaagaa bessidosona. Hegaappe denddidaagan, Bashshaa Haattay ‘yiidi eta ubbaa efin’ eti hayqqidosona. (Maa. 24:39; Ibr. 11:7) Bashshay gakkiyo wode, eti Xoossay nuussi yootibeenna gaana danddayokkona.

Yihooway wolqqaama ‘gote’ mala gidida ba pirdday yaanaappe guuttaa kasetidi asay naagettanaadan hara wode yootiis. Gidikkokka, qohettana danddayiyaageeti siyidi attanaadan I etawu gidiya wodiyaa immiis. Leemisuwawu, beni Gibxxe asaa bolli Tammu Boshaa ehaanaappe kase eti naagettanaadan yootiis. Issi leemisoy, shachchan darobaa bashshida laappuntta boshaappe kase, Paarooninne A ashkkarati naagettana mala yootanaadan Yihooway Muusanne Aaroona kiittiis. SHachchay wonttetta galla wodhdhiyo gishshawu, eti gotiyaappe attiyo keettaa demmanawu Xoossay gidiya wodiyaa immidee? Geeshsha Maxaafay hagaadan gees: “Kawuwaa sunttatuppe GODAA qaalaayyo yayyidaageeti bantta ailletanne bantta mehiyaa eesotidi soo gelissidosona. SHin GODAA qaalaa karidaageeti bantta ailletanne bantta mehiyaa gaden aggi bayidosona.” (Kes. 9:18-21) Yihooway bessiyaabaa eesuwan oottiyaageeti haratuugaa keena qohettenna mala naagettanaadan loyttidi yootidoogee qoncce.

Tammantta Boshaappe kase Paarooninne A ashkkarati naagettana mala hegaadan odettiis. SHin, eti eeyyatettan siyennan ixxidosona. (Kes. 4:22, 23) Hegaappe denddidaagan eta bayra naati hayqqidosona. Hegee keehi azzanttiyaaba! (Kes. 11:4-10; 12:29) Eti wodee aadhdhiichchennan odettidabaa oottana danddayiyoonaa? Ee! Muusee Israaˈeelati yaana haniya tammantta boshaappe naagettanaadaaninne bantta soo asaa ashshanaadan etawu sohuwaara yootiis. (Kes. 12:21-28) Muusee yootidobawu ay keena asay azazettidee? Issi issi xinaateti yootiyoogaadan, Israaˈeelata  gujjin heezzu miiloone asay, Israaˈeela gidenna “hara daro asai,” qassi Gibxxeti Xoossaa pirddaappe attidi Gibxxeppe kiyidosona.—Kes. 12:38.

Ha leemisoti bessiyoogaadan, asay naagettanaadan I yootiyoobaa azazettanawu Yihooway ubbatoo etawu gidiya wodiyaa immees. (Zaa. 32:4) Hegaadan oottanaadan Xoossaa denttettiyaabi aybee? Kiitettida PHeexiroosi Yihooway “ooninne ba nagaraappe simmanaadan koyeesippe attin, ooninne xayana mala” koyennaagaa qonccissiis. (2 PHe. 3:9) Ee, Xoossay asawu qoppees. I ba pirdday gakkanaappe kase asay ba nagaraappe simmana malanne koshshiyaagaadan laamettana mala koyees.—Isi. 48:17, 18; Roo. 2:4.

Ha wodiyankka naagettanaadan kumetta saˈan yootiyo keehi koshshiyaabawu asay ubbay azazettana bessees. Yesuusi saˈan deˈiyo wode ha alamee ‘iita waayiyaa’ wodiyan wurssettan xayanaagaa yootiis. (Maa. 24:21) Sinttappe yaana he pirddaa xeelliyaagan A kaalliyaageeti loyttidi akeekanabaanne eta gakkanabaa qonccissiya hiraagaa Yesuusi yootiis. Nuuni ha wodiyan kumetta saˈan hanishin beˈiyo gitabata Yesuusi qonccissiis.—Maa. 24:3-12; Luq. 21:10-13.

He hiraagaa maaraadan, Yihooway ha wodiyan ubba asay ayyo azazettanaadaaninne haggaazanaadan minttettees. I bawu azazettiya asay haˈˈi ufayssiya deˈuwaa, qassi sinttappe xillotettay deˈiyo ooratta alamiyan anjjuwaa demmana mala koyees. (2 PHe. 3:13) I gelido qaalaa asay ammananaadan minttettanawu “asa ubbau markka gidana mala . . . sa7a ubban” odettanaagaa Yesuusi yootido, shemppo ashshiya ‘Kawotettaa wonggeliyaa mishraachchuwaa’ Yihooway yootissiiddi deˈees. (Maa. 24:14) He ‘markkatettaa’ woy Xoossaa kiitaa 240 gidiya biittatun sabbakanaadan Xoossay baayyo tuman goynniyaageeta daraajjayissiis. Yihooway danddayettida keenan daro asay I yootiyoobaa siyidi yiya ‘bashshaappe’ woy A xillo pirddaa gotiyaappe attanaadan koyees.— Sof. 1:14, 15; 2:2, 3.

Hegaa gishshawu, Yihooway asay naagettanaadan I yootidobawu azazettana mala gidiya wodiyaa immiishsha, giidi oychchiyoogee keehi koshshiyaaba gidenna. I ubbatoo hegaadan oottiyoogaa naqaashay bessees. SHin, keehi koshshiya oyshay hagaa: Naagettanaadan Xoossay yootiyoobaa wodee aadhdhiichchennan asay siyanee? Nuuni Xoossay kiittidoogeeta gidiyo gishshawu, danddayettida keenan daro asay ha alamiyaa bashshaappe attana mala simi ubbatoo maaddoos.