1. Naaˈˈantto Qoronttoosa 3:1-3y issi xinaatee diccidi xammaqettanaadan maaddiyo maataa nashshanaadan nuna waati maaddii? (Koyro sinttan deˈiya misiliyaa xeella.)

GEESHSHA MAXAAFAA xannaˈiya issi uri ne gubaaˈiyaa moottaappe xammaqettiyo wode, neeyyo aybi siyettii? Hegee neeni ufayttanaadan oottiyoogee qoncce. (Maa. 28:19) Qassi xannaˈissiday nena gidikko, I xammaqettiyo wode neeni keehi ufayttana! (1 Tas. 2:19, 20) I ayyaanaaban diccidi xammaqettidoogee neeninne gubaaˈiyan deˈiya harati A maaddanawu minni oottidoogaanne haggaazidoogaa bessees. Yaatiyo gishshawu, xammaqettidi mati erissiyo ashkkarata gididaageeta eta xannaˈissidaageetussi xalla gidennan, kumetta gubaaˈiyawu eti paxa deˈiya markkattiya dabddaabbe gaana danddayoos.—2 Qoronttoosa 3:1-3 nabbaba. *

2. (a) Nuuni qoppana koshshiya oyshay awugee, qassi aybissi? (b) Geeshsha Maxaafaa xannaˈissiyoogaa giyoogee woygiyoogee? (Tohossa qofaa.)

² Aadhdhida oyddu layttatun, kumetta alamiyan aginan aginan 10,000,000 gidiya Geeshsha Maxaafaa xinaateti * deˈiyoogaa eriyoogee ufayssees. He oyddu layttatun, 280,000 gidiyaageeti layttan layttan xammaqettidosona. He miilooniyan qoodettiya harati xammaqettanaadan nuuni waati maaddana danddayiyoo? Asay Yihoowa Markka gidanaadan Yihooway  asawu injjiyaa immiiddi deˈees. Diccidi xammaqettanaadan sohuwaara eta maaddanawu nuussi danddayettida ubbabaa nuuni oottiyoy hegaassa. Wodee wuriiddi deˈees!—1 Qor. 7:29a; 1 PHe. 4:7.

3. Geeshsha Maxaafaa xannaˈissiyoogaa xeelliyaagan ha huuphe yohuwan ay beˈanee?

³ Ha wodiyan erissiyo ashkkara oottiyoogee keehi koshshiyo gishshawu, Geeshsha Maxaafaa nu xannaˈissiyoogeetuppe daroti diccidi xammaqettanaadan nuuni ay oottana danddayiyaakko Bolla Gididi Heemmiyaagee macara biirota oychchiis. Ha huuphe yohuwaaninne hagaappe kaalliyaagan, kayma aqinyetuppe, misoonaawetuppenne woradaa xomoosiyaageetuppe nuuni ay tamaarana danddayiyaakko beˈana. * (Lee. 11:14; 15:22) Geeshsha Maxaafaa xannaˈissiyo wode xannaˈiya ura loytti maaddanawu asttamaaretinne tamaareti ay oottana danddayiyaakko eti yootidosona. Tamaareti ubbay diccidi xammaqettanawu oottana koshshiya ichchashubata ha huuphe yohuwan beˈana.

4. Kariyan eqqidi Geeshsha Maxaafaa xannaˈissiyoogaa xeelliyaagan nuuni ay erana koshshii?

⁴ Nu ishanttuppenne michchonttuppe daroti eta keettaa kariyan eqqidi Geeshsha Maxaafaa xannaˈissoosona. Geeshsha Maxaafaa xannaˈana mala koyanaadan denttettanawu hegee loˈˈo gidikkonne, darotoo hegee qantta, ubba qassi saaminttan saaminttan oosettennan aggana danddayees. Issi issi ishanttinne michchontti he ura koshshaa dichchanawu, A adrashaa oychchoosona; yaatidi dawalidi Geeshsha Maxaafaabaa yootoosona woy kiitaa kiittoosona. Hegaadan qanttan eti amarida aginawu asaara haasayana danddayoosona. Xoossaa Qaalaa xannaˈanawu hegaappe aaruwan wodiyaanne wolqqaa issi uri bazzana xayikko, ba huuphiyaa sheedhdhidi xammaqettana danddayii? Danddayenna.

5. Luqaasa 14:27-33n, nu xinaateta maaddanawu nuuni goˈettana danddayiyo Yesuusi yootidobay aybee?

⁵ Issi uri Yesuusi erissiyo ashkkara gidanawu koyikko, he uri ay oottana koshshiyaakko Yesuusi leemisuwan yootiis. SHuchcha keettaa keexxanawu koyida issi uraabaanne olaa baanawu koyida kawuwaabaa I yootiis. Keexxiyaagee keettaa wurssanawu ‘koyroora uttidi qoodana’ koshshiyoogaa, qassi kawoy ba olanchchati qoppidoogaadan xoonana danddayiyaakkonne eranawu ‘koyroora uttidi zorettana’ koshshiyoogaa Yesuusi yootiis. (Luqaasa 14:27-33 nabbaba.) Hegaadankka, Yesuusi erissiyo ashkkara gidanawu koyiya issi uri Yesuusa kaallanawu oottana bessiyaabaa loytti qoppana koshshiyoogaa Yesuusi erees.  Hegaa gishshawu, xinaateti saaminttan saaminttan nunaara xannaˈanaadan minttettana koshshees. Hegaadan waati oottana danddayiyoo?

6. Xinaateti diccanaadan ay oottanawu malana danddayiyoo?

⁶ Karen eqqosan xannaˈiyaageeta qanttan xannaˈissiyoogan doomma. Neeni xomoosiyo wode ubban issi xiqise xalla gidennan, naaˈˈu xiqiseta tobbana danddayaasa. Neeni xomoosiyo wode keettaaway adussa saatiyawu tobbanawu ufayttikko, issippe uttidi qassi qanxxennan xannaˈiyo sohoy deˈana danddayiyaakkonne oychcha. Keettaawaa zaaroy I Geeshsha Maxaafaa xannaˈiyoogaa ay keena xoqqu ootti xeelliyaakko bessana. Xinaatee elle diccanaadan maaddanawu, saaminttan naaˈˈuttoo xannaˈanawu eeno giyaakkonne A oychchanakka danddayaasa. SHin, saaminttan issitoo woy naaˈˈuttoo xannaˈiyoogaa xallay gidenna.

7. Xannaˈissanaappe kase ubbatoo asttamaaree waati loytti giigettana danddayii?

⁷ Neeni asttamaare gidiyoogaadan, loytta giigettana koshshees. Issippe xannaˈiyoobaa nabbabiyoogaaninne xiqiseta beˈiyoogan doommana danddayaasa. Waanna qofata loytta akeeka. He timirttiyaa huuphe yohuwaabaa, sima huuphe yohotubaa, oyshatubaa, “nabbaba” giya xiqisetubaa, misiletubaa, qassi he qofaa qonccissanawu maaddana danddayiya biidotubaa qoppana danddayaasa. Ne xinaatiyaabaa qassi I metootennan akeekananne hegaa oosuwan peeshshana mala qonccenne geliya ogiyan waata yootanaakko qoppa.—Nah. 8:8; Lee. 15:28a.

8. Qolasiyaasa 1:9, 10n kiitettida PHawuloosi yootidobay nu xinaatetussi woossiyoogaabaa nuna ay tamaarissii?

⁸ Neeni giigettiyo wode, ne xinaatiyaanne awu koshshiyaabaa xeelliyaagan Yihoowa woossa. He ura wozana denttettiya ogiyan Geeshsha Maxaafaappe tamaarissanawu Yihooway nena maaddana mala woossa. (Qolasiyaasa 1:9, 10 nabbaba.) Xinaatee akeekanawu metootana danddayiya qofay woy I maayettana danddayenna qofay deˈiyaakkonne nena oychcha. Ne halchchoy I diccidi xammaqettanaadan maaddiyoogaa gidiyoogaa hassaya.

9. Asttamaaree xinaatee giigettanaadan waati maaddana danddayii? Qonccissa.

⁹ Nu xinaateti ubbatoo Geeshsha Maxaafaa xannaˈiyoogee Yihoowaynne Yesuusi oottidobaa nashshanaadan maaddana, qassi kaseppe aaruwan tamaaranawu koyanaadan oottanaagaa ammanettoos. (Maa. 5:3, 6) Xinaatee  xannaˈiyoobaappe loytti goˈettanawu, tamaariyooban xeelaa wottana koshshees. I yaatanaadan maaddanawu, tamaaranabaa ubbatoo kaseti nabbabidi giigettiyoogeenne hegaa waati oosuwan peeshshanaakko qoppiyoogee A ay keena maaddiyaakko qonccissa. I giigettanaadan waata maaddana danddayay? Issi timirttiyaa ne xinaatiyaara giigettiyoogan hegaa waati oottana danddayiyaakko bessa. * Oyshawu sitta zaaruwaa waati demmanaakko, qassi he zaaruwaa hassayanawu waanna qaalatun woy qofatun waati malaatanaakko bessa. Yaatada, I xuufiyaappe nabbabennan zaaranaadan minttetta. I hegaadan oottikko, xannaˈiyoobaa loytti akeekidoogaa neeni erana. SHin ne xinaatee oottanaadan neeni minttettana koshshiya harabaykka deˈees.

10. Geeshsha Maxaafaa galla galla nabbabiyoogee keehi koshshiyoy aybissee, qassi Geeshsha Maxaafaa nibaabiyaappe loytti goˈettanawu ay oottana koshshii?

¹⁰ Tamaaree saaminttan saaminttan ba asttamaariyaara xannaˈiyoogaa bolli gujjidi goˈettanawu issibaa barkka galla galla oottana koshshees. I Yihoowaara haasayana bessees. Waatidi? Yihooway yootiyoobaa siyiyoogaaninne aara haasayiyoogan. I Galla galla Geeshsha Maxaafaa nabbabiyoogan Xoossay yootiyoobaa siyana danddayees. (Yaas. 1:8; Maz. 1:1-3) “Geeshsha Maxaafaa Nibaabiyaa Prograamiyaa” giya jw.org saytiyan kiyidaagaa waati goˈettanaakko A bessa. * Ba Geeshsha Maxaafaa nibaabiyaappe Yihoowabaa ay tamaariyaakko, qassi I tamaaridobaa ba deˈuwan waati oosuwan peeshshana danddayiyaakko wontti dentti qoppanaadan minttettiyoogan maaddiyoogee waannaba gidiyoogee qoncce.—Oos. 17:11; Yaaq. 1:25.

11. Issi xinaatee loytti woossiyoogaa waati tamaarana danddayii, qassi darotoo Yihoowakko woossiyoogee awu keehi koshshiyoy aybissee?

¹¹ Ne xinaatee galla galla woossiyoogan Yihoowaara haasayanaadan minttetta. Xinaatiyaa doommiyoonne wurssiyo wode wozanappe woossa; qassi he woosan ne xinaatiyaabaa qonccissa. I ne woossiyoogaa siyiyo wode, wozanappe waati woossanaakko tamaarana, qassi I Yesuus Kiristtoosa sunttan Xoossaa Yihoowakko wozanappe woossana bessees. (Maa. 6:9; Yoh. 15:16) Geeshsha Maxaafaa galla galla nabbabiyoogee (Yihooway yootiyoobaa siyiyoogaa) qassi woossiyoogee (Yihoowaara haasayiyoogaa) ne xinaatee kaseegaappe aaruwan Xoossaakko shiiqanaadan maaddana! (Yaaq. 4:8) I hegaa galla galla oottikko, hegee I bana  sheedhdhidi xammaqettanaadan maaddana. A maaddana harabay aybee?

12. Issi xinaatee Yihoowaara dabbotanaadan asttamaaree waati maaddana danddayii?

¹² Issi xinaatee tamaariyoobay guuggiyaa eraa xallassa gidennan, A wozanaa denttettana koshshees. Aybissi? Nu wozanay hegeekka, nu koyiyoobaynne nuussi siyettiyaabay issibaa oottanaadan nuna denttettiyo gishshataassa. Yesuusi daro asa tamaarissiis; qassi eti appe tamaariyoogaa dosidosona. Eta wozanaa denttettido gishshawukka asay A kaalliis. (Luq. 24:15, 27, 32) Ne xinaatee issi uraara dabbotana danddayiyoogaadan Yihooway ayfiyan beettiyaagaa keena awu qoncce gidiyoogaa akeekana, qassi A bawu Aawadan, Xoossaadaaninne Dabbodan xeellana koshshees. (Maz. 25:4, 5) Geeshsha Maxaafaa xannaˈissiyo wode, Xoossaa eeshshati beettiyaagaa keena qoncce gidanaadan ootta. (Kes. 34:5, 6; 1 PHe. 5:6, 7) Intte xannaˈiyo huuphe yohuwaa ubban hegaa ootta. Yihoowa siiquwaa, kehatettaanne qaretaa akeekanaadan ne xinaatiyaa maadda. Yesuusi, “Ubbaappe gitatiya azazonne qassi ubbaappe aadhdhiya” azazoy “neeni Godaa ne Xoossaa ne kumetta wozanaappe . . . siiqa” yaagiis. (Maa. 22:37, 38) Ne xinaatee Yihoowa siiqanaadan maaddanawu baaxeta.

13. Issi xinaatee Yihoowa eeshshata akeekanaadan waati maaddanaakko leemisuwan yoota.

¹³ Neeni Yihoowa siiqiyoy aybissakko ne xinaatiyawu qonccissa. Hegee xinaatee ikka Yihoowa dabbo gidananne A siiqiyoogaa tamaarana koshshiyoogaa akeekanaadan maaddana danddayees. (Maz. 73:28) Leemisuwawu, intte xannaˈiyo xuufiyan woy xiqisiyan Yihoowa siiquwaa, aadhdhida eratettaa, suure pirddaa woy wolqqaa xeelliyaagan ne wozanaa denttettida neeni yootana koyiyo qofay deˈii? Hegaa ayyo yoota, qassi neeni saluwan deˈiya Aawaa siiqiyo daro gaasotuppe issoy hegaa gidiyoogaa eranaadan ootta. Xinaateti ubbay diccidi xammaqettanawu oottana koshshiya harabay deˈees.

14. Issi xinaatee diccanaadan maaddanawu Ibraawe 10:24, 25y gubaaˈe shiiquwaabaa ay yootii?

¹⁴ Nuuni ubbay nu xinaateti diccidi xammaqettanaadan koyoos. Nuuni eta maaddana danddayiyo waanna ogetuppe issoy eti gubaaˈe shiiqota shiiqanaadan minttettiyoogaa. Sohuwaara shiiqota shiiqiya xinaateti elle dicciyoogaa xannaˈissiyoogan meezee deˈiyoogeeti yootoosona. (Maz. 111:1) Xannaˈissiya issoti issoti bantta xinaateti Geeshsha Maxaafaa timirttiyaappe baggaa etaara xannaˈiyo wode,  qassi baggaa gubaaˈe shiiqotuppe tamaaridoogaa yootoosona. Ne xinaatiyaara Ibraawe 10:24, 25 nabbaba; qassi yaatada I shiiqota yiyoogee awu loˈˈo gidiyoy aybissakko qonccissa. Kawotettaa Addaraashan Oosettiyaabay Aybee? * giyo biiduwaa A bessa. Ne xinaatee issi shiiquwaanne attennan shiiqanawu murttidaagaa gidanaadan maadda.

15. Issi xinaatee shiiqota aggennan shiiqanaadan waati maaddana danddayiyoo?

¹⁵ Ne xinaatee hanno gakkanawu shiiquwaa shiiqibeennabaa woy issi issitoo shiiqiyaaba gidikko, ay oottana danddayay? Neeni mati shiiqido shiiquwaappe ufayssiya issibaa yoota. SHiiquwaa xeelliyaagan neeyyo aybi siyettiyaakko I akeekiyo wode, shiiqana danddayees. SHiiquwan haˈˈi xannaˈiiddi deˈiyo Wochiyo Keelaa woy Kiristtaanetu Deˈuwaanne Haggaazuwaa—Xannaˈiyo Xuufiyaa awu imma. Kaalliya shiiquwan xannaˈanabaa A bessa; qassi hegan keehi ufayssiya qofay awugaakko A oychcha. Ne xinaatee koyro shiiqiyo shiiquwan I beˈiyoobaynne siyiyoobay hara haymaanoote shiiquwan I beˈidonne siyido aybippenne aadhdhiyaagaa gidana. (1 Qor. 14:24, 25) I kaallana danddayiyo loˈˈo leemiso gidiyaageetanne diccidi xammaqettanaadan maaddana danddayiya haratuura I erettana.

16. Xinaateti diccidi xammaqettanaadan ay oottana koshshii, qassi kaalliya huuphe yohuwan ay beˈanee?

¹⁶ Xinaateti diccidi xammaqettanaadan waati maaddana danddayiyoo? Tamaaree saaminttan saaminttan xannaˈanaadaaninne hegawu giigettanaadan minttettiyoogan xannaˈiyoogee xoqqu ootti xeelliyooba gidiyoogaa akeekanaadan maaddana danddayoos. Qassi I galla galla Yihoowaara haasayanaadaaninne aara dabbotanaadan minttettanawu koyoos. Xinaatee gubaaˈe shiiqota shiiqanaadan minttettanawu koyoos. (Sinttaa 12n, “ Xinaateti Diccidi Xammaqettanawu Oottana Koshshiyaabata” giya saaxiniyaa xeella.) SHin, kaalliya huuphe yohoy qonccissanaagaadan, xinaateti xammaqettanaadan xannaˈissiyaageeti oottana danddayiyo hara ichchashubati deˈoosona.