1-2. (a) Mata layttatuppe ha simmin, issi issi biittatun laamettidabay aybee? (b) Daro asawu haymaanootee baynnay aybissakko amarida gaasota yoota.

DARO shaˈu layttawu, alamiyaa asaappe dariya baggay haymaanootiyaa kaallees. SHin mata layttatuppe ha simmin, gita laame laamettiis. Haymaanootee baynna asaa qooday dari dari bees. Issi issi biittaa asaappe dariya baggay bawu haymaanootee baynnaagaa * yootees.—Maa. 24:12.

² Keehi daro asay banttawu haymaanootee baynnabadan * qoppiyoy aybissee? Issoti issoti banttana ufayssiyaabaa woy bantta metuwaa xallaa qoppana danddayoosona. (Luq. 8:14) Amaridaageeti Xoossi baawa giyaageeta. Harati qassi Xoossan ammanoosona, shin haymaanootee ha wodiyan maaddiyaaba gidenna, qassi saynisiyaaranne asay qoppiyoobaara maayenna giidi qoppoosona. Eti deˈoy lodda laamiyan yiis giyoogaa laggetuppe, asttamaaretuppe woy televizhiine malabatuppe siyennan aggokkona; shin Xoossaa ammananaadan maaddiya loˈˈo qofaa eti darin siyibookkona. Harati qassi miishshanne maata demmanawu yaaretiya, haymaanootiyaa kaalettiyaageeta shenetoosona. Issi issi biittatun, haymaanootiyaa oosuwaa amaridaagaa diggiya higgiyaa kawotettati kessidosona.

3. Ha huuphe yohuwaa halchchoy aybee?

³ Yesuusi, “Asa ubbaa tana kaalliyaageeta oottite” yaagidi  nuna azaziis. (Maa. 28:19) Haymaanootee baynna asay Xoossaa siiqanaadaaninne Kiristtoosi erissiyo ashkkara gidanaadan waati maaddana danddayiyoo? Koyruwan, issi urawu sabbakiyo wode, he uri zaariyoobay I diccido heeraadan gidana danddayiyoogaa nuuni akeekana bessees. Leemisuwawu, nuuni sabbakiyo wode, Awurooppaa biittaa asay Isiyaa biittaa asaagaadan siyennan aggana danddayees. Aybissi? Awurooppan daroti Geeshsha Maxaafaabaa eroosona; qassi Xoossay ubbabaa medhdhidoogaa siyidosona. SHin, Isiyaa biittan daro asay Geeshsha Maxaafaabaa eriyoobay guutta woy aybanne erenna; qassi eti Medhdhidaagaa waayi ammanana. Ha huuphe yohuwaa halchchoy nuuni haggaazuwan demmiyo asa ubbay awa biittaa asa gidin woy eti ammaniyoobay aybanne gidin, eta wozanaa denttettanaadan nuna maaddanaassa.

4. Nuuni ubbatoo loˈˈobaa qoppana danddayiyoy aybissee?

⁴ Loˈˈobaa Qoppiyoogaa. Layttan layttan, haymaanootee baynna asay Yihoowa Markka gidiiddi deˈees. Daroti xoqqa kandduwaa maaraa kaalliyaageetanne asa bessanawu haymaanootiyaa asay haniyoobaa dosennaageeta. Harati qassi, darin kandduwaa maaraa kaallennaageetanne etappe daroti eti aggana koshshiyo iita meezeti deˈiyoogeeta. Yihooway maaddin, “merinaa deˈuwaa demissiya suure wozanaa koshshay” deˈiyoogeeta demmanaagaa nuuni ammanettana danddayoos.—Oos. 13:48, NW; 1 Xim. 2:3, 4.

5-6. (a) Darotoo asay nu yootiyoobaa loytti siyanaadan oottiyay aybee? (b) Kiitettida PHawuloosi haasayissiyo ogiyaa waati laammidee, qassi nuuni A leemisuwaa waati kaallana danddayiyoo?

⁵ Kehiyoogaanne Hiillatiyoogaa. Darotoo, asay nu yootiyoobaa loytti siyiyoy, nuuni yootidobaa gishshawu gidennan, nuuni hegaa yootido ogiyaa gishshataassa. Nuuni keha, hiillanchchanne wozanappe siiqiyaageeta gidiyo wode eti hegaa dosoosona. Nuuni yootiyoobaa siyanaadan, eta wolqqanttokko. SHin, eti bantta haymaanootiyaa qofaa yootiyoobaa akeekanawu nuuni baaxetoos. Leemisuwawu, issoti issoti erenna asaara haymaanootiyaabaa haasayanawu koyokkona. Harati qassi Xoossaabaa issi uri qoppiyoobaa oychchiyoogee borsso giidi ammanoosona. Qassi harati Geeshsha Maxaafaa, ubba qassi Yihoowa Markkaara nabbabiyoogaa hara uri beˈiyo wode yeellatoosona. Hanotay ayba gidinkka, etawu siyettiyaabaa akeekanawu baaxetoos.—2 Xim. 2:24.

⁶ Nuuni “Geeshsha Maxaafaa,” “meretaa,” “Xoossaa,” woy “haymaanootiyaa” giyaagaa mala qaalata goˈettiyo wode issi uri ufayttennaba milatikko, waatana danddayiyoo? Kiitettida PHawuloosa leemisuwaa kaallidi eta haasayissiyo ogiyaa laammana danddayoos. PHawuloosi Ayhudatuura haasayiyo wode Geeshsha Maxaafaappe yootiis. SHin, Ariyosppaagoosan Giriike biittaa eranchchatuura haasayido wode Geeshsha Maxaafaappe ekettidoogaa yootibeenna. (Oos. 17:2, 3, 22-31) PHawuloosa leemisuwaa waani kaallana danddayiyoo? Geeshsha Maxaafaa ammanenna uraara gayttikko, aara haasayiyo wode Geeshsha Maxaafaappe ekettidoogaa odennan aggiyaakko loˈˈo gidana danddayees. Issi uri nenaara Geeshsha Maxaafaa nabbabiyoogaa hara uri beˈanaadan I koyennaagaa neeni akeekikko, harati erenna ogiyan, elektiroonike miishsha malaban xiqiseta bessanawu mala.

7. Koyro Qoronttoosa 9:20-23n qonccidaagaadan, PHawuloosa leemisuwaa kaallanawu ay oottana danddayiyoo?

⁷ Akeekiyoogaanne Ezggiyoogaa. Nunaara gayttiya asay eti qoppiyoobaa aybissi qoppiyaakko nuuni akeekanawu malana koshshees. (Lee. 20:5) PHawuloosi oottidobaa zaarettada beˈa. I Ayhudatu giddon dicciis. SHin, I Ayhuda gidennaageetussi sabbakiyo wode haasayissiyo ogiyaa laammiis; ayssi giikko, eti Yihoowabaanne Geeshsha Maxaafaabaa guuttaa eroosona woy mule erokkona. Nu heeran  deˈiya asay qoppiyoobaanne etawu siyettiyaabaa loytti akeekanawu, pilggana woy gubaaˈiyan deˈiya gasttata zoriyaa oychchana danddayoos.—1 Qoronttoosa 9:20-23 nabbaba.

8. Geeshsha Maxaafaabaa haasayissiyoogaa doommana danddayiyo issi ogee aybee?

⁸ Nu halchchoy siyanawu ‘ufayttiya’ asa koyiyoogaa. (Maa. 10:11) Yaatanawu, asay qoppiyoobaa nuuni oychchananne eti yootiyoobaa loytti ezggana koshshees. Ingilize biittan issi ishay aqo deˈuwan waani ufayttaanakko, naata waati loytti dichchanakko, woy naaqoy deˈishinkka waani genccanaakko asay ba qofaa yootanaadan oychchees. Eta qofaa ezggi simmidi, I hagaadan gees: “Xaafettoosappe 2,000 layttay aadhdhido ha zoriyaa xeelliyaagan ne qofay aybee?” Yaatidi, “Geeshsha Maxaafa” qofaa gidiyoogaa yootennan, loytti doorido xiqiseta ba moobayliyaappe eta bessees.

9. Darotoo Xoossaabaa haasayanawu koyennaageeta nuuni waati maaddana danddayiyoo?

⁹ Darotoo Xoossaabaa haasayanawu koyenna asaayyo eta qofissiyaabaa haasayissiyoogan nuuni eta wozanaa denttettana danddayoos. Leemisuwawu, daroti meretan maalaalettoosona. Yaatiyo gishshawu, nuuni kaallidi deˈiyaagaa malabaa gaana danddayoos: “Saynttistteti oorattabaa medhdhiyo wode, darotoo meretan kase deˈiyaabaa milatissiyoogaa neeni erennan aggakka. Leemisuwawu, maykiraafooniyaa medhdhiyaageeti hayttaabaa xannaˈoosona, qassi kaameeraa medhdhiyaageeti ayfiyaabaa xannaˈoosona. Meretay tumuppe ayba gaada qoppay? Hegee barkka yiidabee, issi uri medhdhidobee, woy hara ogiyan yiidabee?” Loytti ezggi simmidi hagaadan gaana danddayoos: “Issi issibaa medhdhiyaageeti hayttaynne ayfee makkisetti giigido hanotaappe tamaariyo wode, nuuni eti ooppe tamaariyoonaashsha giidi qoppana danddayoos. Danttuwan beni issi uri xaafido ha qofay tana maalaalees: ‘Haittaa wottida Xoossai siyennee? Aifiyaa medhdhidaagee be7ennee? . . . Asaa eraa tamaarissiyaagee bau erennee?’ Issi issi saynttistteti ha qofaa maayoosonanne ubbabay merettidoogaa ammanoosona.” (Maz. 94:9, 10) “Oyshaa Zaaruwaanne Hanidabaa” giddon “Meretaa Doomettaabaa Qoppiyoobaa” giyaagan kaalli kaalli kiyiyagaappe issi biiduwaa jw.org/am^® saytiyan bessana danddayoos (XUUFETA > BIIDUWAA giyaagaa xeella.) Woykko Deˈon Deˈiyaabay Merettidee? woy Deˈuwaa Doomettaa—Oychana Koshshiyo Ichashu Oyshata (Amaarattuwaa) giyo brooshureta etawu immana danddayoos.

10. Xoossaabaa haasayanawu koyenna uraara nuuni waatidi haasayaa doommana danddayiyoo?

¹⁰ Daro asay sinttappe keha wodee yaanaadan amottees. SHin, daroti saˈay xayana woy deˈana  danddayenna soho gidana giidi hirggoosona. Xoossaabaa haasayanawu koyenna asay, darotoo alamiyaa hanotaa haasayanawu koyiyoogaa Norwe biittan yuuyidi xomoosiya issi ishay yootiis. I asaa saroti simmidi hagaadan gees: “Sinttappe keha wodee yaanaagaa xeelliyaagan ne qofay aybee? Nuussi kehabaa ehaanay polotikaa asatee, saynisiyaa eranchchatee woy hara uree?” Loytti ezggi simmidi, I keha wodee yaanaagaa qonccissiya xiqisiyaa nabbabees woy xiqisiyaa qofaa yootees. Geeshsha Maxaafay saˈay merinawu deˈanaagaanne loˈˈo asay an merinawu deˈanaagaa yootiyooban issoti issoti maalaalettoosona.—Maz. 37:29; Era. 1:4.

11. Nuuni dumma dumma ogiyan haasayissanawu baaxetana koshshiyoy aybissee, qassi Roome 1:14-16n qonccidaagaadan, PHawuloosa leemisuwaa waati kaallana danddayiyoo?

¹¹ Nuuni demmiyo asaa dumma dumma ogetun haasayissana koshshees. Aybissi? Asa ubbay dummatiyo gishshataassa. Issi uri siyanawu dosiyoobaa haray ixxana danddayees. Issoti issoti Xoossaabaa woy Geeshsha Maxaafaabaa haasayanawu eeno goosona; harati qassi koyro harabaa haasayanawu eeno goosona. Hanotay ayba gidinkka, nuuni asa ubbawu sabbakanawu danddayettida ubbabaa oottana koshshees. (Roome 1:14-16 nabbaba.) Suurebaa siiqiyaageetu wozanan tumay diccanaadan oottiyay Yihoowa xalla gidiyoogaakka nuuni hassayana koshshees.—1 Qor. 3:6, 7.

12. Amarida Isiyaa biittaa asay sooninne timirtte keettan tamaaridobay eta qofaa waatidee?

¹² Kumetta saˈan aassiya daroti, kawotettati haymaanootiyaa oosuwaa diggido sohuwaappe yiida amaridaageeta gujjin, Isiyaa biittaa asatuura gayttoosona. Xoossi baawa giyoogaa, Isiyaa biittan daro sohotun daro asay sooninne timirtte keettan tamaariis. Medhdhidaagee deˈin aggin eti mule qoppokkona. Issoti issoti Medhdhidaagaabaa eranawu koyoosonanne Geeshsha Maxaafaa xannaˈanaadan shoobbiyoogaa eeno goosona, shin harati ooratta qofaa tamaaranawu koyennan aggana danddayoosona. Nuuni eta waati maaddana danddayiyoo? Laggedan haasayissiyoogee, etassi qoppiyoogaa bessiyoogeenne koshshiyaaba gidikko, Geeshsha Maxaafay yootiyo maaray ba deˈuwaa laammanawu maaddidoogaa yootiyoogee loˈˈo gidiyoogaa, meezee deˈiyo amarida aassiyaageeti akeekidosona.

13. Geeshsha Maxaafay yootiyooban asay ufayttanaadan maaddana danddayiyaabay aybee? (Koyro sinttan deˈiya misiliyaa xeella.)

¹³ Geeshsha Maxaafay yootiyo aadhdhida eratettay koyro daro asaa ufayssees. (Era. 7:12) Niwu York Siiti giyo kataman, issi michchiyaa Mandirine qaalaa haasayiya asawu hagaadan gawusu: “Taani eta ufayssiyaabaa eranawunne eti yootiyoobaa siyanawu baaxetays. Eti mata wode hara biittaappe yiidoogaa taani akeekikko, hagaadan oychchays: ‘Heeraa meezetaydda deˈay? Ooso demmadii? Heeraa asay loytti oyqqii?’” Yaatiyoogee Geeshsha Maxaafay tamaarissiyoobaa erissanaadan issi issitoo O maaddees. Koshshiyaaba gidikko, michchiyaa gujjada hagaadan gawusu: “Asaara loˈˈo dabbotay deˈanaadan nuuni oottana bessiya keehi koshshiyaabay ayba gaada qoppay? Geeshsha Maxaafaappe issi leemisuwaa taani nena bessoo? Xiqisee hagaadan gees: ‘Ooshshai doommiiddi, zeeruwaa xuussiya haattaa mala; hegaa gishshau, ooshshaappe kasetada palamaa aggaaga.’ Ha zoree haratuura dabbotanaadan nuna maaddees gaada qoppay?” (Lee. 17:14) Hegaadan haasayiyoogee gujjidi tamaaranawu koyiya asaa shaakkidi eranawu nuna maaddees.

14-15. (a) Taywaanen deˈiya issi ishay Xoossaa ammanenna asata waati maaddii? (b) Arshsho Isiyan deˈiya issi ishaa leemisuwaappe ay tamaarana danddayiyoo?

¹⁴ Xoossaa ammanokko giidi nuussi yootiya asatubaa woygana danddayiyoo? Taywaanen haymaanootee baynna asatussi daro wodiyawu sabbakida issi ishay hagaadan giis: “Darotoo, issi uri ‘taani Xoossaa ammanikke’ giyo wode, he  uri eeqa xoossatussi goynnikke giyoogaa. Hegaa gishshawu, daro eeqa xoossati asi medhdhidobaanne tumubaa gidennaagaa taani darotoo maayays. Taani Ermmaasa 16:20n deˈiya, ‘Woni asi bau xoossata medhdhanau danddayiiyye? Danddayenna! I medhdhiyaakkokka eti tumu xoossata gidokkona!’ giya xiqisiyaa darotoo nabbabays. Yaatada, ‘Tumu xoossay awugaakkonne asi medhdhidoogee awugaakko waati erana danddayiyoo?’ gaada oychchays. I yootiyoobaa siya simmada Isiyaasa 41:23n deˈiya, ‘Intte xoossata gidiyoogaa nuuni erana mala, sinttappe yaanau de7iyaabaa nuussi yootite’ giya xiqisiyaa nabbabays. Yaatada, Yihooway sinttappe polettanabaa waati yootidaakko issi leemisuwaa bessays.”

¹⁵ Arshsho Isiyan deˈiya issi ishay zaaretti oychchiyo wode, hagaadan gees: “Geeshsha Maxaafan aadhdhida eratettay deˈiyoogaa bessiyaabata, polettida hiraagatanne saluwaanne saˈaa ayssiya higgiyaa taani eta bessays. Yaatada, ha ubbabay paxa deˈiyaanne eranchcha gidida Medhdhidaagee deˈiyoogaa qonccissiyoogaa taani eta bessays. Issi uri Xoossay deˈiyoogaa ammanana danddayettees giidi qoppiyo wode taani Geeshsha Maxaafay Yihoowabaa yootiyoobaa A bessays.”

16. Harati Xoossaanne Geeshsha Maxaafaa ammananaadan maaddanawu, PHawuloosi Ibraawe 11:6n yootidobaa nuuni waati goˈettana danddayiyoo?

¹⁶ Nuuni haymaanootee baynna asaa Geeshsha Maxaafaa xannaˈissiyo wode, Xoossay deˈiyoogaa mintti ammananaadan eta ubbatoo maaddana koshshees. (Ibraawe 11:6 nabbaba.) Qassi Geeshsha Maxaafaa loytti ammananaadan nuuni eta maaddana bessees. Hegawu issi issi timirtteta darotoo zaarettana koshshennan aggenna. Eta xannaˈissiyo wode ubban, Geeshsha Maxaafay Xoossaa Qaalaa gidiyoogaa naqaashaa shiishshiyoogaa koshshana danddayees. Hegee Geeshsha Maxaafaa hiraagati waani polettidaakko, Geeshsha Maxaafay saynisiyaabaanne taarikiyaabaa qonccissiyo wode ay keena tumakko, qassi Geeshsha Maxaafay nuna galla galla deˈuwan waati maaddiyaakko qonccissiyoogaa gidana danddayees.

17. Nu siiqoy asaa waati maaddana danddayii?

¹⁷ Asawu haymaanootee deˈin aggin, nuuni eta siiqiyoogan eti Kiristtoosa erissiyo ashkkara gidanaadan maaddoos. (1 Qor. 13:1) Nuuni eta tamaarissiyo wode, nu halchchoy Xoossay nuna siiqiyoogaanne nuunikka A siiqanaadan I koyiyoogaa bessanaassa. Layttan layttan haymaanootiyaa darin woy mule koyenna shaˈan qoodettiyaageeti Xoossaa siiqiyoogaa tamaaridi xammaqettidosona. Yaatiyo gishshawu, loˈˈobaa qoppa, qassi asa ubbaa siiqa. Eti yootiyoobaa ezgga. Eti qoppiyoobaa akeekanawu baaxeta. Leemiso gidada, eti Kiristtoosa erissiyo ashkkara gidanaadan tamaarissa.