‘NUUGAADAN’ etawu siyettiyo daro asati wozanappe yootidobay Geeshsha Maxaafan odettiis. (Yaaq. 5:17) Leemisuwawu, PHawuloosi Roome 7:21-24n, “Taani lo77obaa oottanau dosishin, iitabaa oottiyoogee tau higge gidiyoogaa demmaas. . . . Taani aiba ufaissi bainna asee!” yaagidi yootidoogaappe awu aybi siyettidaakko nuuni loytti akeekana danddayoos. Nu nagaranchcha asatettaara baaxetiyo wode, PHawuloosa mala ammanettida urawu nuugaadan siyettidoogaa eriyoogee minttettees.

PHawuloosi bawu siyettida harabaakka qonccissiis. I Galaatiyaa 2:20n Yesuusi “[A] siiqidi, [A] gishshau, ba huuphiyaa [immidoogaa]” ammanettiyoogaa qonccissiis! Neeyyookka aagaadan siyettii? Ubbatoo hegaadan siyettennan aggana danddayees.

Kase oottido nagaraa gaasuwan pattenna asadan nuna xeellikko, Yesuusa wozoy nu huuphessi qanxxettidabadan qoppiyoogee atto shin, Yihooway nuna siiqiyoogaanne atto giyoogaa ammananawu issi issitoo metootana danddayoos. Yesuusi nuuni wozuwaa imotadan qoppanaadan koyii? Yaatin, nuuni hegaadan qoppanaadan aybi maaddana danddayii? Ane he naaˈˈu oyshata pilggoos.

Ee, Yesuusi ba wozuwaa nuuni nu huuphessi qanxxettidabadan xeellanaadan koyees. Hegaa waati ammanettana danddayiyoo? Luqaasa 23:39-43n odettida hanotaabaa qoppa. Issi bitanee Yesuusa miyyiyan mittaa bolli kaqettiis. I kase oottido iitaban zilˈˈettiis. I mittaa bolli kaqettidi hayqqanaadan pirddettido gishshawu, keehi gita moorobaa oottidoogee qoncce. I ootto mooroban keehi zilˈˈettidi Yesuusa, “Neeni ne kawotettaa wolqqan yiyo wode, tana dogoppa” yaagidi woossiis.

Yaatin, Yesuusi waatidee? I kaqettida bitaniyaakko simmidi A xeellanawu ay keena waayettidaakko qoppa. I waayettiiddi deˈiyaaba gidikkokka, moocu giidi minttettiya qaalan A, ‘Taani hachchi neessi tumaa odays, neeni tanaara gannatiyan deˈana’ yaagiis. Yesuusi, ‘asa Naˈay, daro asaa wozanawu ba shemppuwaa immanawu yiidoogaa’ he bitaniyawu qonccissana danddayees. (Maa. 20:28) SHin Yesuusi ba wozoy he bitaniyaa maaddiyaaba gidiyoogaa kehatettan ayyo yootiis. Yesuusi laggedan qarettidi “neeni” qassi “tanaara” giya qaalata goˈettiis. Qassi he bitanee saˈay Gannate gidiyo wode yan deˈanaagaa awu yootiis.

Yesuusi yarshsho gidana haniyoogee he bitaniyaakka goˈˈanaagaa I akeekanaadan Yesuusi koyidoogee qoncce. Xoossawu haggaazana danddayibeenna ha mooranchcha bitaniyawu Yesuusi hegaadan qoppikko, Xoossawu haggaazanawu xammaqettida Kiristtaaniyawu I hegaadan qoppanaagaa ammanettoos. Yaatin, Yesuusa wozoy buzo xekkan nuna goˈˈanaagaa ammanettanaadan aybi maaddana danddayii?

Yesuusi PHawuloosawu sabbakiyo maata immido gishshawu, I awu hayqqidoogaa ammanettiis. Waanidi? I hagaadan giis: “Taani oottiyo oosuwan  taayyo wolqqaa immida nu Godaa Kiristtoos Yesuusa galatais. Tana ba oosuwau sunttidi, tana he oosuwau bessiyaagaa giidi qoodiyo gishshaukka a galatais. Taani hagaappe kase a cayiyaagaa, a yedettiyaagaanne tuggayiyaagaa.” (1 Xim. 1:12-14) PHawuloosi daro iitabaa oottida asa gidikkokka, sabbakiyo maataa Yesuusi awu immidoogee A atto giidoogaa, siiqidoogaanne an ammanettidoogaa akeekanaadan oottiis. Sabbakiyo maata Yesuusi nuussikka immiis. (Maa. 28:19, 20) Hegee I neeyyo hayqqidoogaa ammanettanaadan oottennee?

Gubaaˈiyaappe bohettidi 34 laytta takkidi, Yihoowakko simmida Alberti hagaadan giis: “Ta nagarai ubbatoo ta sinttaana. SHin, taani haggaaziyo wode kiitettida PHawuloosawu siyettidoogaa mala qofay tawu siyettees; sabbakiyo oosoy Yesuusi tawu immido maata. Hegee taani keehi ufayttanaadan qassi haˈˈi deˈuwankka sinttanaabawukka tabaa loˈˈobaa qoppanaadan maaddees.”—Maz. 51:3.

Tumaa eranaappe kase ba deˈo layttan ubban makkalabaanne danobaa oottidi takkida Aleni hagaadan giis: “Taani asatu bolli gattido iitabaa haˈˈikka qoppays. Hegee issi issitoo taani unˈˈettanaadan oottees. SHin taagaa mala nagaranchcha gidida asati haraatuyyo mishiraachuwaa sabbakanaadan Yihooway koyiyoogaa taani qoppays. Asay mishiraachchuwaa siyanawu koyiyoogaa beˈiyoogee, Yihooway ay keena loˈˈokkonne siiqiyaagaa gidiyaakko taani hassayanaadan oottees. Eta deˈoy ta kase deˈuwaa mala gidido asata taani maaddana mala I tana goˈettiiddi deˈiyaabadan tawu siyettees.”

Nu haggaazoy nuuni nu wolqqaa loˈˈobawu goˈettanaadaaninne loˈˈobaa qoppanaadan maaddees. Yesuusi nuna maariyoogaa, siiqiyoogaa, qassi nunan ammanettiyoogaa akeekanaadankka oottees.

Iita gidida ha Seexaana alamee xayana gakkanaashin, kase nu oottido nagaran nuuni haˈˈikka zilˈˈettiiddi deˈana danddayoos. Hegaa eqettanaadan nuna aybi maaddanee?

Naatettan deˈiyo wode naaˈˈu qommo deˈuwaa deˈido gishshawu darotoo zilˈˈettiya Jiina, “‘Xoossai nu wozanaappe gita’ giyaagaa keehi dosays” yaagaasu. (1 Yoh. 3:19, 20) Nuuni nagaranchchata gidiyoogaa Yihoowaynne Yesuusi nuuppe aaruwan loytti akeekiyoogaa eriyoogan nuunikka minettana danddayoos. Wozuwaa yarshshuwaa eti siiquwan giigissidoy polo gidida asatussa gidennan, bantta nagaraappe simmiya nagaranchchatussa gidiyoogaa hassaya.—1 Xim. 1:15.

Yesuusi nagaranchcha gidida asata waati oyqqidaakko wotti dentti qoppiyo wodenne I nuussi immido Kawotettaa mishiraachchuwaa sabbakanawu nuuyyo danddayettida keena baaxetiyo wode, wozoy nuussi buzo xekkan qanxxettidoogaa ammanana. Yaatiyoogan, Yesuusi “tana siiqidi, ta gishshau, ba huuphiyaa [immiis]” yaagida PHawuloosaagaadan nuuyyookka siyettana.