1. Piliphphisiyuusan gubaaˈee eqqanaadan maaddiday oonee?

KIITETTIDA PHAWULOOSI, Sillaasi, Luqaasinne Ximootiyoosi Piliphphisiyuusa katamaa gakkido wode, Kawotettaa mishiraachchuwaa siyanawu koyiya daro asaara gayttidosona. Ha oyddu minni oottiya ishantti gubaaˈee eqqanaadan maaddidosona; qassi erissiyo ashkkarati ubbay imattaa mokkiya Liidiyo giyo issi michchee son issippe shiiqiyoogaa doommennan aggokkona.—Oos. 16:40.

2. He gubaaˈiyaa sohuwaara gakkida paacee aybee?

² Mati eqqida he gubaaˈiyaa paacee sohuwaara gakkiis. Seexaanay tumaa ixxiya asay PHawuloosinne A laggeti sabbakiyoogaa eqettanaadan eta denttettiis. PHawuloosanne Sillaasa oyqqidosona, gatiman shocidosona, qassi qasho keettan yeggidosona. Eti qasho keettaappe kiyi simmidi, mati erissiyo ashkkara gididaageetukko biidi eta minttettidosona. Hegaappe simmin, PHawuloosi, Sillaasinne Ximootiyoosi he katamaappe bin Luqaasi yan takkennan waayi aggana. Yaatin mati erissiyo ashkkara gidida ishanttinne michchontti waananee? Yihooway ba ayyaanaa baggaara eta maaddin, eti minnidi ayyo haggaaziyoogaa aggibookkona. (Pili. 2:12) PHawuloosi etan ceeqettiyo loˈˈo gaasoy deˈees!

3. Piliphphisiyuusa 1:9-11n odettidaagaadan, PHawuloosi ay xeelliyaagan woossidee?

³ Tammu laytta gidiya wodiyaappe guyyiyan, PHawuloosi Piliphphisiyuusan deˈiya gubaaˈiyawu dabddaabbiyaa xaafiis. Neeni he dabddaabbiyaa nabbabiyo wode, PHawuloosi ba ishantta siiqiyo siiquwaa akeekana danddayaasa. I, “Taani inttena ubbata  Kiristtoos Yesuusappe yiya siiquwan ai keenaa siiqiyaakko” yaagiis. (Pili. 1:8) I etawu Xoossaa woossidoogaa etassi xaafiis. Eta siiqoy diccanaadan, eti keehi koshshiyaabaa shaakki eranaadan, boree baynnaageeta gidanaadan, harata xubbenna mala naagettanaadaaninne xillotettaa ayfiyaa ubbatoo ayfanaadan maaddana mala Yihoowa woossiis. Ha wodiyan, nuunikka PHawuloosi yootidobaappe darobaa tamaarana danddayoos. (Piliphphisiyuusa 1:9-11 nabbaba.) * Ha huuphe yohuwan, I yootidobata pilggana; qassi hegeeta huuphiyan huuphiyan waati oosuwan peeshshana danddayiyaakko tobbana.

4. (a) Koyro Yohaannisa 4:9, 10y yootiyoogaadan, Yihooway nuna siiqiyoogaa waati bessidee? (b) Nuuni Xoossaa ay keena siiqana koshshii?

⁴ Yihooway ba Naˈay nu nagaraa gishshawu hayqqanaadan saˈaa kiittiyoogan nuna keehi siiqiyoogaa bessiis. (1 Yohaannisa 4:9, 10 nabbaba.) Xoossay nuna siiqidoogee nuunikka A siiqanaadan denttettees. (Roo. 5:8) Nuuni Xoossaa ay keena siiqana koshshii? Yesuusi issi Parisaawiyaassi, “Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa” yaagido wode he oyshaa zaariis. (Maa. 22:36, 37) Nuuni Xoossaa nu kumetta wozanaappe siiqanawu koyoos. Qassi A siiqiyo siiqoy galla galla dicci dicci baanaadan koyoos. PHawuloosi eta siiqoy ‘gujji gujji diccana’ koshshiyoogaa Piliphphisiyuusan deˈiya Kiristtaanetussi yootiis. Kaseegaappe aaruwan Xoossaa siiqanawu waatana danddayiyoo?

5. Nu siiqoy kaseegaappe aaruwan waani diccana danddayii?

⁵ Nuuni Xoossaa siiqanawu A erana koshshees. Geeshsha Maxaafay, “Xoossai siiqo gidiyo gishshau, siiqenna urai ooninne Xoossaa erenna” yaagees. (1 Yoh. 4:8) Nuuni Yihoowabaa ‘tumu eratettaanne akeeka ubbaa’ demmiyo wode, A siiqiyo siiqoy kaseegaappe aaruwan diccanaagaa kiitettida PHawuloosi yootiis. (Pili. 1:9, 10) Nuuni Geeshsha Maxaafaa xannaˈiyoogaa doommido wode, Yihoowabaa ubbabaa erana xayikkonne, A siiqiyoogaa doommida. Nuuni Yihoowabaa gujjidi tamaarido wode, A siiqiyo siiqoy mino gidiis. Nuuni Geeshsha Maxaafaa ubbatoo xannaˈiyoogeenne hegaa wozanappe wotti dentti qoppiyoogee keehi koshshiyoy hegaassa.—Maz. 77:12.

6. Nu siiqoy gujjiyoogaara gayttidaban 1 Yohaannisa 4:11, 20, 21⁠ppe ay tamaariyoo?

⁶ Xoossay nuna keehi siiqiyoogee nuuni nu ishantta siiqanaadan denttettana. (Koyro Yohaannisa 4:11, 20, 21 nabbaba.) Nu ishanttanne nu michchontta siiqiyoogee metiyaaba gidenna giidi qoppana danddayoos. Ayssi giikko, nuuni Yihoowawu goynnoosinne A milatanawu baaxetoos. Nuna keehi siiqidi ba deˈuwaa nu gishshawu immida, Yesuusa leemisuwaa nuuni kaalloos. SHin issoy issuwaa siiqanaadan immettida azazuwaa azazettiyoogee issi issitoo metana danddayees. Piliphphisiyuusan deˈiya gubaaˈiyaa hanotaa beˈa.

7. PHawuloosi Ewodonne Sinxxiiko zoridobaappe nuuni ay tamaariyoo?

⁷ Ewodanne Sinxxiika kiitettida PHawuloosaara minnidi ‘issippe oottida’ michchontta. SHin eti maayettibeennabay deˈennan aggenna; yaatin eta laggetettay duuxxiis. He michchontti haggaazido gubaaˈiyawu PHawuloosi xaafido dabddaabbiyan, I Ewodinne Sinxxiiki sunttaa denttidi, eti “naa77aikka issi qofan” deˈanaadan zoriis. (Pili. 4:2, 3) PHawuloosi gubaaˈiyan deˈiya ubbay “zuuzummennan  woikko [“palamettennan,” NW] ubbabaa” oottana mala etawu odana bessiyoogaakka qoppiis. (Pili. 2:14,15) PHawuloosa zoree he ammanettida michchonttinne gubaaˈiyan deˈiya hara ishanttinne michchontti issoy issuwaa kaseegaappe aaruwan siiqanaadan maaddidoogee qoncce.

8. Nuuni nu ishantta siiqanawu keehi metootanaadan oottiyaabay aybee, qassi nuna aybi maaddana danddayii?

⁸ Nuuni issi issitoo Ewodeegaadaaninne Sinxxiikeegaadan nu ishanttu balaa xallaa qoppiyo gishshawu, eta siiqiyoogee keehi metees. Nuuni ubbaykka galla galla balabaa oottoos. Nuuni haratu balaa ubbatoo qoppikko, nu eta siiqiyo siiqoy irxxana. Leemisuwawu, issi ishay SHiiquwaa Addaraashaa geeshshiyoogan maaddiyoogaa dogikko, nuuni yiillotana danddayoos. Nu ishay oottido hara balaa ubbaa nuuni qoppiyoogaa doommikko, A bolli keehi yiillotananne A darin siiqennan aggana. Ne gubaaˈiyan deˈiya issi uraara hegaa mala metoy neeyyo deˈikko, Yihooway nu balaanne nu ishaa balaa beˈiyoogaa neeni wotta dentta qoppiyoogee loˈˈo. SHin he balay deˈishinkka, I nu ishaakka nunakka siiqees. Hegaa gishshawu, nuuni nu ishantta siiqiyoogaaninne ubbatoo eta loˈˈo eeshshaa qoppiyoogan Yihoowa leemisuwaa kaallana koshshees. Nuuni nu ishantta siiqanawu baaxetiyo wode, etaara kaseegaappe aaruwan issuwaa gidana.—Pili. 2:1, 2.

9. PHawuloosi Piliphphisiyuusan deˈiya Kiristtaanetussi yootido ‘keehi koshshiyaabatuppe’ amaridabay aybee?

⁹ Piliphphisiyuusan deˈiya Kiristtaaneti “keehi koshshiyaabaa shaakki erana mala” yootanaadan, Yihooway PHawuloosa kaalettiis. Ha wodiyan nuunikka yaatana koshshees. (Pili. 1:10, NW) Yihoowa sunttaa bonchchissiyo ogeti, I gelido polettiya qaalati, qassi gubaaˈiyaa sarotettaynne issippetettay ha keehi koshshiyaabatu leemisota. (Maa. 6:9, 10; Yoh. 13:35) Hageeti nu deˈuwan keehi koshshiyaabata gidiyo wode, nuuni Yihoowa siiqiyoogaa bessoos.

10. Nuuni boree baynna asadan xeelettanawu ay oottana koshshii?

¹⁰ PHawuloosi nuuni “boree baynnaageeta” gidana koshshiyoogaakka yootiis. Hegaa giyoogee nuuni wottiyoobi baynna asa gidana bessees giyoogaa gidenna. Nuuni Xoossaa Yihoowagaara issi mala ogiyan boree baynnaageeta gidana danddayokko. SHin, nuuni nu siiquwaa gujjanawunne keehi koshshiyaabaa shaakki eranawu nuussi danddayettida ubbabaa oottikko, Yihooway nuna boree baynna asadan xeellana. Nuuni harata xubbennaadan naagettanawu nuussi danddayettida ubbabaa oottiyoogan nu siiquwaa bessana danddayoos.

11. Nuuni harata xubbennaadan naagettana koshshiyoy aybissee?

¹¹ Harata xubbennaadan imettida azazoy keehi wolqqaamaba. Nuuni issi ura waati xubbana danddayiyoo? Nuuni allaxxiyoobaa, maayiyoobaanne oosuwaa dooriyo wode hegaadan oottana danddayoos. Nu oottiyoobay bala gidennan aggana danddayees. SHin nuuni dooriyoobay issi uraa kahaa qohin I woy A xubettikko, hegee wolqqaamaba. Nu ishanttuppe issuwaa nuuni xubbikko, hegee nuussi gaacciyo wogga woxay nu qooriyan qashettin abban mitettiyoogaappe aadhdhida iitaba gidiyoogaa Yesuusi yootiis.—Maa. 18:6.

12. Aqinye gidida azinaynne machchiyaa oottidobaappe nuuni ay tamaariyoo?

¹² Aqinye gidida issi azinaynne machchiyaa Yesuusi yootidobaa waati oosuwan peeshshidoonaa? Eti darobata oottennaadan diggiyo keettan diccida mati xammaqettida issi azinaaranne machcheera gubaaˈiyan issippe haggaazidosona. Ha mati xammaqettidaageeti pilimee kandduwaaban geeshshabaa bessiyaakkonne, Kiristtaaneti hegaa beˈana koshshennabadan  qoppoosona. Aqinye gidida azinaynne machchiyaa pilimiyaa beˈidoogaa eti erido wode keehi yiillotidosona. Hegaappe simmin, aqinye gidida azinaynne machchiyaa mati erissiyo ashkkara gididaageeti bantta kahaa loohissananne iitaa kehaa akeekana gakkanaashin pilime keettaa bibookkona. (Ibr. 5:14) Yaatiyoogan, aqinye gidida azinaynne machchiyaa mati xammaqettida ishaanne michchiyo bolla doonan gidennan, wozanappe siiqiyoogaa bessidosona.—Roo. 14:19-21; 1 Yoh. 3:18.

13. Nuuni issi uri nagaraa oottanaadan waati denttettana danddayiyoo?

¹³ Nuuni issi ura xubbana danddayiyo hara ogee he uri nagaraa oottanaadan denttettiyoogaa. Hegee waani hanii? Ha hanotaa qoppa. Issi Geeshsha Maxaafaa tamaaree ushshaa amaliyaa agganawu daro wodiyawu baaxetidi wurssettan aggiis. I ushshaa harantto mule uyana bessennaagaa akeekiis. I ba deˈuwan daroban laamettidi xammaqettiis. Guyyeppe, issi ishay A gibiraa shoobbidi, awu ushshaa immiiddi hagaadan giis: “Neeni haˈˈi Kiristtaane; Yihoowa ayyaanay neessi deˈees. Geeshsha ayyaanaa macaraappe issoy ba huuphiyaa naagiyoogaa. Neeni ne huuphiyaa naagikko, guutta ushshaa uyana koshshees.” Mati xammaqettida ishay he bala zoriyaa siyin, haranttuwaa ushshay ayyo amale gidikko, hegee keehi azanttiyaaba!

14. Nu shiiqoti Piliphphisiyuusa 1:10n deˈiya zoriyaa oosuwan peeshshanaadan nuna waati maaddiyoonaa?

¹⁴ Kiristtaane shiiqoti Piliphphisiyuusa 1:10n deˈiya zoriyaa oosuwan peeshshanaadan daro ogiyan nuna maaddoosona. Koyroogee, Yihooway keehi koshshiyaaba ootti xeelliyoobaa shiiqotun nuuni tamaariyoobay nuussi  qonccissees. Naaˈˈanttoogee, boree baynna asa gidana mala nuuni tamaariyoobaa waati oosuwan peeshshanaakko tamaaroos. Heezzanttoogee, nuuni issoy issuwaa siiqanaadaaninne loˈˈo oosuwaa oottanaadan shiiqoy denttettees. (Ibr. 10:24, 25) Nu ishantti nuna minttettiyo wode, nuuni Xoossaanne nu ishantta siiqiyo siiqoy kaseegaappe aaruwan diccana. Xoossaanne nu ishantta kumetta wozanaappe siiqiyo wode, nuuni nu ishantta xubbennaadan naagettanawu danddayettida ubbabaa oottana.

15. ‘Xillotettaa ayfiyaa ayfiyoogaa’ giyoogee wogiyoogee?

¹⁵ PHawuloosi Piliphphisiyuusan deˈiya Kiristtaaneti “xillotettaa aifiyaa aifana” mala wozanappe woossiis. (Pili. 1:11) Eti Yihoowanne A asaa siiqiyoogee ha “xillotettaa aifiyaa” bessiyaaba gidiyoogee qoncce. Hegee eti Yesuusan ammaniyoogaanne ufayssiya bantta hidootaa haratussi yootiyoogaakka xaaxi waaxees. Piliphphisiyuusa 2:14, 15n hara leemisoy, ‘asaa giddon pooˈissiyaabaara’ eta geeddarissees. Yesuusi ba erissiyo ashkkarata “Sa7au intte poo7o mala” giidoogaa hegee nuna hassayissees. (Maa. 5:14-16) Yesuusi bana kaalliyaageeti asaa ‘A kaalliyaageeta oottanaadankka’ azaziis; qassi I eti, “Sa7aa gaxaa gakkanaashinkka . . . markkattiyaageeta gidana” yaagiis. (Maa. 28:18-20; Oos. 1:8) Nuuni ha keehi koshshiya oosuwaa oottanawu nuussi danddayettida ubbabaa oottiyo wode, “xillotettaa aifiyaa” ayfoos.

16. Piliphphisiyuusa 1:12-14y metiyaabay deˈishinkka, pooˈuwaa pooˈissiyaabadan nuuni pooˈissana danddayiyoogaa waati bessii? (Koyro sinttan deˈiya misiliyaa xeella.)

¹⁶ Nu hanotay ayba gidikkonne, pooˈuwaa pooˈissiyaabadan nuunikka pooˈissana danddayoos. Issi issitoo, sabbakennaadan diggiyaaba milatiyaabati nuuni sabbakanaadan oottana danddayoosona. Leemisuwawu, kiitettida PHawuloosi Piliphphisiyuusan deˈiya Kiristtaanetussi dabddaabbiyaa xaafiyo wode, Rooma  biittan ba son qashuwan deˈees. SHin PHawuloosi qashuwan deˈikkokka, naagiyaageetuyyoonne bana oychchanawu yiyaageetuyyo sabbakiyoogaa aggibeenna. PHawuloosi hegaa mala hanotan deˈiiddi minni sabbakiis; qassi hegee ishantti kaseegaappe xalidi ‘Xoossaa qaalaa yashshi baynnan yootanaadan’ maaddiis.—Piliphphisiyuusa 1:12-14 nabbaba; 4:22.

17. Amarida ishanttinne michchontti metiya wodiyankka waati aggennan sabbakidoonaa?

¹⁷ Daro ishanttinne michchontti PHawuloosaagaadan xala gididosona. Eti sabbakiyo oosoy woy sooppe soo oottiyoogee teqettido biittatun deˈiyo gishshawu, mishiraachchuwaa sabbakanawu hara ogiyaa koyoosona. (Maa. 10:16-20) Hegaa mala issi biittan, woradaa xomoosiyaagee aassiyaageeti ubbay dabbotuyyo, shoorotuyyo, banttanaara tamaariyaageetuyyo, banttanaara oottiyageetuyyoonne eriyo asaayyo sabbakana koshshiyoogaa yootiis. Naaˈˈu layttaa giddon, he woradan gubaaˈetu qooday keehi gujjiis. Nuuni deˈiyo biittan sabbakiyo oosoy waayi digettana. SHin, Hiillan oottiya ishanttuppenne michchonttuppe ha keehi maaddiyaabaa tamaarana danddayoos: Neeni haratussi sabbakanawu neessi danddayettida ubbabaa oottikko, metiyo wodiyankka aggennan sabbakanaadan Yihooway neessi wolqqaa immana.—Pili. 2:13.

18. Nuuni ay oottanawu murttana koshshii?

¹⁸ PHawuloosi Piliphphisiyuusan deˈiya Kiristtaanetussi xaafido dabddaabbiyan deˈiya zoriyaa, oosuwan peeshshanawu nuuni ha wodiyan awudeegaappenne aaruwan murttana bessees. Nuuni keehi koshshiyaabaa shaakki eriyaageeta, boree baynnaageeta, harata xubbennaadan naagettiyaageetanne xillotettaa ayfiyaa ayfiyaageeta gidana koshshees. Yaatiyo wode, nu siiqoy diccana, qassi nu siiqo Aawaa Yihoowa nuuni bonchchissana.