1. Yesuusi akeekissanawu yootidobaa nuuni siyana koshshiyoy aybissee?

YESUUSI wurssetta gallassabaa yootido hiraagan hagaadan giis: “Aqossi hirggiyooban intte wozanai balenna mala . . . inttena naagite.” (Luq. 21:34) He akeekissuwaa nuuni siyana koshshees. Aybissi? Ha wodiyan, ubba asaa gakkiyaagaa mala unˈˈissiya metota nuuni genccana bessees.

2. Nu ishanttinne michchontti unˈˈettanaadan oottiya ayba metoti eta gakkiyoonaa?

² Issi issitoo, unˈˈettanaadan oottiya daro metoti nuna bolli bollan gakkana danddayoosona. Kaallidi deˈiya leemisota qoppa. Malttipil isklerosis giyo harggiyan sahettiya Joona giyo Yihoowa Markkay, * 19 layttaa aara deˈida A machchiyaa A aggada biido wode keehi dagammiisinne azzaniis. Qassi A naaˈˈu macca naati Yihoowawu haggaaziyoogaa aggi bayidosona. Boobanne Linddo giyo azinaanne machchiyo Joonaagaappe dummatiya metoti gakkidosona. Eti naaˈˈaykka oosuwaappe kiyidosona; qassi guyyeppe bantta keettan deˈanawu koshshiya miishshaa qanxxana danddayibookkona. He metotuppe harabay qassi, worana danddayiya wozanaa harggee Linddo sakkiyoogaanne bollay sahuwaa teqqennaadan diggiya hara harggee O oyqqidoogaa issi dottoree iyyo yootiis.

3. Piliphphisiyuusa 4:6, 7y Yihoowabaa ay yootii?

³ Unˈˈettiyoogee nuna waati qohiyaakko, nuna medhdhidanne siiqiya Aaway, Yihooway akeekiyoogaa ammanettana danddayoos. I nuna gakkiya metota nuuni genccana mala maaddanawu koyees. (Piliphphisiyuusa 4:6, 7 nabbaba.) A ashkkarati genccido metota qonccissiya daro taarikee Xoossaa Qaalan deˈees. Unˈˈettanaadan oottiya hanotata genccanaadan eta Yihooway waati maaddidaakkokka A Qaalay yootees. Ane amarida leemisota beˈoos.

4. Eelaasa ayba metoti gakkidonaa, qassi Yihoowa xeelliyaagan awu aybi siyettidee?

⁴ Eelaasi wayssiya wodiyan Yihoowassi haggaaziis; qassi wolqqaama metoti A gakkidosona. Israaˈeelan kawotida ammanettibeenna kawotuppe issoy, Kawuwaa Akaabi, Baˈaala giyo eeqawu goynniya Elzzaabeelo machchiis. Eti naaˈˈay Israaˈeela biittan Baˈaala giyo eeqaa goynoy kumanaadan oottidosona; qassi Yihooway kiittin hananabaa yootiya darota worissidosona. Eelaasi baqatiis. I Yihoowan ammanettiyoogan wolqqaama koshaappekka paxa attiis. (1 Kaw. 17:2-4, 14-16) Qassi, Eelaasi Baˈaala sunttan hananabaa yootiyaageetanne ayyo goynniyaageeta eqettido wode, Yihoowan ammanettiis. Israaˈeelati Yihoowawu haggaazanaadan I zoriis. (1 Kaw. 18:21-24, 36-38) He wayssiya wodetun Yihooway A waati darotoo maaddidaakkonne naagidaakko Eelaasi beˈiis.

5-6. Koyro Kawotu Maxaafaa 19:1-4y yootiyoogaadan, Eelaasawu aybi siyettidee, qassi Yihooway Eelaasa siiqiyoogaa waati bessidee?

⁵ Koyro Kawotu Maxaafaa 19:1-4 nabbaba. Gidoppe attin, kawiyaa Elzzaabeela A woranawu naassido wode, Eelaasi yayyiis. Yaatiyo gishshawu, I Berssaabeha giyo sohuwaa baqatiis. I keehi hidootaa qanxxidi “haiqqanau woossiis.” Awu hegaadan siyettanaadan oottidabay aybee? Eelaasi ‘nuugaadan siyettiyo’ nagaranchcha asa. (Yaaq. 5:17, NW) I keehi unˈˈettennaaninne daafurennan waayi aggana. Eelaasi asay Yihoowayyo goynnanaadan taani minttettidoogee hada, Israaˈeelan laamettidabi aybinne baawa, qassi Yihoowassi haggaazaydda deˈiyay ta xalla giidi qoppennan  waayi aggana. (1 Kaw. 18:3, 4, 13; 19:10, 14) Ammanettidi hananabaa yootiyaagawu siyettidaban nuuni garamettana danddayoos. SHin Eelaasayyo siyettidabaa Yihooway akeekiis.

⁶ Eelaasi baayyo siyettidabaa yootido gishshawu, Yihooway A hanqqettibeenna. I Eelaasi minettanaadan maaddiis. (1 Kaw. 19:5-7) Guyyeppe, maalaalissiya ba wolqqaa bessiyoogan Eelaasi ba qofaa laammanaadan Yihooway kehatettan maaddiis. Israaˈeelan Baˈaalawu goynnibeenna 7,000 asati deˈiyoogaa Yihooway he wode yootiis. (1 Kaw. 19:11-18) Yihooway Eelaasa siiqiyoogaa maaddiya ogiyan bessiis.

7. Yihooway Eelaasa maaddido ogee nuuni ay ammanettanaadan oottii?

⁷ Unˈˈettanaadan oottiyaabay nena gakkiiddi deˈii? Eelaasayyo siyettiyaabaa Yihooway akeekidoogaa nuuni eriyoogee keehi minttettiyaaba! Hegee I nuuyyo siyettiyaabaa akeekiyoogaakka nuuni ammanettanaadan oottees. I nuuni oottana danddayiyoobaanne oottana danddayennabaa erees; I haray attoshin nu qofaanne nuuyyo siyettiyaabaakka erees. (Maz. 103:14; 139:3, 4) Yihoowan ammanettiyoogan nuuni Eelaasa leemisuwaa kaallikko, unˈˈissiyaabaa genccanaadan I nuna maaddana.—Maz. 55:22.

8. Unˈˈissiyaabaa genccanaadan Yihooway nena waati maaddanee?

⁸ Unˈˈettiyoogee neeni ta hanotay mule laamettenna ga qoppada hidootaa qanxxanaadan oottana danddayees. Hegaadaana gidikko, unˈˈissiyaabaa genccanaadan Yihooway nena maaddanaagaa hassaya. I nena waati maaddanee? Ne metuwaanne hegan neeyyo siyettiyaabaa neeni ayyo yootanaadan I shoobbees. Neeni maaduwaa demmanawu woossiyoobaa I zaarana. (Maz. 5:3; 1 PHe. 5:7) Hegaa gishshawu, ne metuwaa xeelliyaagan ubbatoo Yihoowa woossa. I Eelaasa haasayissidoogaadan nena haasayissanna xayikkonne, ba Qaalaa, Geeshsha Maxaafaa baggaaranne ba dirijjitiyaa baggaara nena haasayissana. Geeshsha Maxaafaappe neeni nabbabiyo taariketi nena minttettananne neessi hidootay deˈanaadan oottana danddayoosona. Ne ishanttinne michchonttikka nena minttettana danddayoosona.—Roo. 15:4; Ibr. 10:24, 25.

9. Ammanttiya laggee nuna waati maaddana danddayii?

⁹ Ba oosuwaappe amaridaagaa Elssaaˈawu immanaadan Yihooway Eelaasawu yootiis. Yaatiyoogan, Eelaasi keehi azzaniyo wode genccanaadan maaddana danddayiya loˈˈo laggiyaa Yihooway ayyo immiis. Hegaadan, nuuyyo siyettiyaabaa issi laggiyawu yootikko, I woy A nuna unˈˈissiyaaban genccanaadan maaddana danddayoosona. (2 Kaw. 2:2; Lee. 17:17) Neeni ne metuwaanne neeyyo siyettiyaabaa yootana danddayiyo asi baynnabadan qoppikko, nena minttettana danddayiya kayma Kiristtaaniyaa neeni demmanaadan maaddana mala Yihoowa woossa.

10. Eelaasa gakkidabay nuunikka genccanaagaa hidootan naaganaadan waati oottii, qassi Isiyaasa 40:28, 29n Xoossay gelido qaalay nuna waati maaddana danddayii?

¹⁰ Eelaasi unˈˈissiyaabaa genccanaadaaninne ammanettidi daro layttawu haggaazanaadan Yihooway maaddiis. Eelaasa hanotay nuuyyo hidootay deˈanaadan oottees. Issi issitoo nuuni asatettaaninne qofan keehi daafuranaadan oottiya unˈˈissiyaabay nuna gakkana danddayees. Gidoppe attin, nuuni Yihoowan ammanettikko, ayyo aggennan haggaazanaadan koshshiya wolqqaa I nuuyyo immana.—Isiyaasa 40:28, 29 nabbaba.

11-13. Beni wode Xoossawu oottida heezzu asata unˈˈettiyoogee waati qohidee?

¹¹ Geeshsha Maxaafan etabay odettido haratakka unˈˈissiyaabay gakkiis. Leemisuwawu,  Haanna naˈa yelana danddayabeennaagaa gaasuwaaninne I dawuttiyaa O baceessanawu oottiyoobaa gaasuwan A keehi unˈˈettaasu. (1 Sam. 1:2, 6) Haanna keehi unˈˈettidoogee A keehi mishettada yeekkanaadaaninne qumaa meennan ixxanaadan oottiis.—1 Sam. 1:7, 10.

¹² Kawuwaa Daawiti issi issitoo keehi unˈˈettiis. A gakkida metota ane qoppa. I ba oottido daro moorotu gaasuwan keehi zilˈˈettiis. (Maz. 40:12) I siiqiyo A naˈay Abeseloomi A bolli denddiis; yaatidi guyyeppe Abeseloomi hayqqiis. (2 Sam. 15:13, 14; 18:33) Qassi Daawitassi mata laggetuppe issoy A kaddiis. (2 Sam. 16:23–17:2; Maz. 55:12-14) Daawiti xaafido daro mazamureti I azzanidobaa, qassi wozanappe Yihoowan ammanettiyoogaa qonccissoosona.—Maz. 38:5-10; 94:17-19.

¹³ Guyyeppe issi mazamuraawee iita asatu deˈuwaa amottiyoogaa doommiis. I ‘Xoossaa geeshsha sohuwan’ haggaazida Leewa zare gidida Asaafa yara gidennan waayi aggana. Ha mazamuraawee unˈˈettidoogee I azzananaadaaninne woppu geennaadan oottiis. I haray attoshin Xoossawu haggaaziyoogan demmiyo anjjuwaa siriyoogaa doommiis.—Maz. 73:2-5, 7, 12-14, 16, 17, 21.

14-15. Maaduwaa demmanawu Yihoowa woossiyoogaa xeelliyaagan Geeshsha Maxaafan etabay odettido heezzu asatuppe ay tamaariyoo?

¹⁴ Qommoora etabaa denttido Yihoowa ashkkarati heezzati maaduwaa demmanawu Yihoowan ammanettidosona. Eti banttana unˈˈissidabaa xeelliyaagan Yihoowa woossidosona. Eti keehi unˈˈettidoy aybissakko ayyo qoncce gidida ogiyan yootidosona. Eti Yihoowawu goynniyo sohuwaa ubbatoo biidosona.—1 Sam. 1:9, 10; Maz. 55:22; 73:17; 122:1.

¹⁵ Eta ubbawukka Yihooway qaretan zaariis. Haanna sarotettaa demmaasu. (1 Sam. 1:18) Daawiti hagaadan giis: “Xillo asa metoi  daro; shin GODAI a he ubbaappe ashshees.” (Maz. 34:19) He mazamuraawee Yihooway ‘ba ushachcha kushiyaa oyqqidi,’ bana siiquwan zoridi kaalettiyoogaa guyyeppe akeekiis. I, “Taassa gidikko, taani Xoossaa matan de7iyoogee taayyo lo77o. Taani Ubbaa Haariya GODAA taayyo baqata attiyo soho oottaas” yaagidi yexxiis. (Maz. 73:23, 24, 28) Nuuni ha hanotatuppe ay tamaariyoo? Issi issitoo, nuuni unˈˈettanaadan oottiya wolqqaama metoti nuna gakkoosona. SHin, Yihooway harata waati maaddidaakko nuuni wotti dentti qoppikko, woosan an ammanettikkonne nuuni oottanaadan I oychchiyoobaa oottiyoogan ayyo azazettikko genccana danddayoos.—Maz. 143:1, 4-8.

16-17. (a) Nuuni Yihoowappenne A ashkkaratuppe shaahettana koshshennay aybissee? (b) Nuuni zaarettidi waani minettana danddayiyoo?

¹⁶ He heezzu asatu hanotay nuuni Yihoowappenne A asaappe shaahettana koshshennaagaakka nuna tamaarissees. (Lee. 18:1) Azinay O aggidi bin unˈˈettida Nanssa hagaadan gaasu: “Taani daro gallassawu oonakka beˈanawu woy oonaarakka haasayanawu koyabeykke. SHin, taani asappe keehi shaahettido wode, ta azzanoy yaa gujjiis.” Nanssa metoy gakkido harata maaddiyo ogiyaa koyiyo wode, hanotay laamettiis. A hagaadan gaasu:  “Harati bantta metuwaa yootiyo wode taani siyays. Taani etabaanne eta metuwaa qoppiyo wode, ta hanotaanne ta metuwaa kaseegaa keena qoppennaagaa akeekaas.”

¹⁷ Gubaaˈiyaa shiiqota shiiqiyoogan nuuni minettana danddayoos. Nuuni shiiqota shiiqiyo wode, Yihooway nuna ‘maaddanaadaaninne minttettanaadan’ oottoos. (Maz. 86:17) I nuna yan ba geeshsha ayyaanaa baggaara, ba Qaalaa baggaaranne ba asaa baggaara minttettees. SHiiqotun nuuni issoy issuwan ‘minettiyoogan’ ufayttana danddayoos. (Roo. 1:11, 12) Soofiyo giyo michchiyaa hagaadan gaasu: “Yihoowaynne nu ishanttu maabaray taani genccanaadan maaddidosona. Nu Gubaaˈe shiiqoti taassi keehi koshshiyaaba. Taani loyttada haggaaziyo wodenne gubaaˈiyan loyttada oottiyo wode, tana unˈˈissiyaabaanne hirggissiyaabaa kaseegaappe aaruwan gencciyoogaa akeekaas.”

18. Nuuni hidootaa qanxxikko, Yihooway nuuyyo ay immana danddayii?

¹⁸ Nuuni hidootaa qanxxiyo wode, Yihooway nuna unˈˈissiyaabaa sinttappe merinawu xayssana xallawu gidennan, unˈˈissiyaabaa nuuni ha wodiyan genccanaadan maaddanawukka qaalaa gelidoogaa ane hassayoos. Unˈˈissiyaabaanne hidootaa qanxxissiyaabaa xoonanaadan I nuuyyo “koshshaanne wolqqaa” immees.—Pili. 2:13, NW.

19. Roome 8:37-39y nuuni ay ammanettanaadan yootii?

¹⁹ Roome 8:37-39 nabbaba. Xoossaa siiquwaappe nuna aybikka shaakkana danddayennaagaa kiitettida PHawuloosi yootiis. Unˈˈissiyaabaa genccanawu baaxetiiddi deˈiya nu ishanttanne michchontta waati maaddana danddayiyoo? Nu ishanttinne michchontti unˈˈettiyo wode, etawu qarettiyoogaaninne eta maaddiyoogan nuuni waanidi Yihoowa milatana danddayiyaakko kaalliya huuphe yohoy qonccissees.