Neessi Imettida Imotaa Bessiyaagaadan Goˈettay?

“Issoi issuwaara ishanttudan siiqettite; issoi issuwaa bonchchiyoogan ufaittite.” —ROOME 12:10.

1. Xoossaa Qaalan ayba minttettuwaa demmiyoo?

NUUNI hidootaa qanxxiyo wode woykko keehippe azzaniyo wode, Yihooway nuna maaddanaagaa Xoossaa Qaalay darosan qonccissees. Leemisuwau, ha minttettiya qaalata akeeka: “GODAI hokkidaageeta ubbaa zemppissees; kunddidaageeta ubbaa denttees.” “Wozanai meqqidoogeeta i pattees; eta mazunttaakka i qachchees.” (Mazamure 145:14; 147:3) Hegaa bollikka, saluwan deˈiya nu Aaway: “Taani GODAI, ne Xoossai, ne ushachcha kushiyaa oiqqana. Nena, ‘Yayyoppa, taani nena maaddana . . . yaagays’” giis.—Isiyaasa 41:13.

2. Yihooway ba ashkkarata ayba ogiyan maaddii?

² Gidoshin, beettenna saluwan deˈiya Yihooway waatidi ‘nu kushiyaa oyqqii’? Nu wozanay azzanin ‘nuuni hokkiyo wode i waatidi zemppissii’? Xoossaa Yihooway dumma dumma ogiyan hegaa mala maaduwaa immees. Leemisuwau, i ba asau ba geeshsha ayyaanaa baggaara ‘ubbaappe aadhdhiya wolqqaa’ immees. (2 Qoronttoosa 4:7; Yohaannisa 14:16, 17) Xoossaa ayyaanay kaalettin xaafettida, wolqqaa immiya Xoossaa Qaalay, Geeshsha Maxaafaykka Xoossaa ashkkarata xoqqu oottees. (Ibraawe 4:12) Yihooway nuna minttettiyo hara ogee deˈii? Koyro PHeexiroosa maxaafan hegau zaaruwaa demmoos.

‘Xoossaa Aaro Kehatettay Dumma Dumma’ Ogiyan Qonccees

3. (a) Kiitettida PHeexiroosi paaciyaa xeelliyaagan woygidee? (b) PHeexiroosi ba koyro dabddaabbiyan wurssetta heeran ay qonccissidee?

³ Kiitettida PHeexiroosi ayyaanan tiyettida ammaniyaageetussi xaafiiddi, gita woytoy eta naagiyo gishshau ufayttiyo loˈˈo gaasoy deˈiyoogaa yootiis. Kaallidi: “Ha77⁠i guutta wodiyaayyo harai atto dumma dumma paaciyan intte paacettanau koshshikkokka” yaagidi gujjidi yootiis. (1 PHeexiroosa 1:1-6) “Dumma dumma” giya qaalaa akeeka. Hegee, paacee dumma dumma gidiyoogaa malaatees. Gidikkokka, PHeexiroosi ba ishantti hegaa mala dumma dumma paaciyan genccanaakko agganaakko qoppanaadan oottiyaaba xallaa yootibeenna. Hegaappe, PHeexiroosi Kiristtaaneti banttana ayba metoy gakkikkokka, Yihooway eti genccanaadan maaddanaagaa ammanettana danddayiyoogaa qonccissiis. Ha minttettoy imettidoy PHeexiroosi ba dabddaabbiyan wurssetta heeran ‘ubbabaa wurssettaara’ gayttidabaa yootido sohuwaana.—1 PHeexiroosa 4:7.

4. Koyro PHeexiroosa 4:10y nuna minttettiyoy aybissee?

⁴ PHeexiroosi: “Intte huuphiyan huuphiyan Xoossaappe dumma dumma aaro kehatettaa ekkidoogaadankka, Xoossaa dumma imuwaa loitti gishiyaageetudan, issoi issuwau oottite” yaagiis. (1 PHeexiroosa 4:10) PHeexiroosi haˈˈikka “dumma dumma” giya qaalaa goˈettiis. I giidobay, ‘Paacee dumma dumma ogiyan gakkees; shin Xoossaa aaro kehatettay qoncciyo ogeekka hegaadan dumma dumma’ giyoogaa mala. Ha qofay minttettiyoy aybissee? Nuna ayba qommo paacee gakkikkokka, nuuni he paaciyan genccanaadan maaddiya Xoossaa aaro kehatettay ubbatoo qoncciyoogaa hegee bessees. Gidikkonne, Xoossaa aaro kehatettay nuussi waani qoncciyaakko PHeexiroosa qofaappe akeekadii? Nu mala Kiristtaanetu baggaara qonccees.

 “Issoi Issuwau Oottite”

5. (a) Ubba Kiristtaaneti ay oottana koshshii? (b) Ayba oyshati denddiyoonaa?

⁵ PHeexiroosi Kiristtaane gubaaˈiyan deˈiya ubbaayyo: “Ubbabaappe aattidi issoi issuwaara wozanappe siiqettite” yaagidi yootiis. Gujjidikka, ‘Intte huuphiyan huuphiyan ekkido maaraadan intteyyo imettida imuwaa issoy issuwau oottanau goˈettite’ yaagiis. (1 PHeexiroosa 4:8, 10, NW) Yaatiyo gishshau, gubaaˈiyan deˈiya ubbay ba mala Kiristtaaneta minttettana koshshees. Yihoowabaa gidida alˈˈobau nuussi aawatettay imettiis; qassi nuuni hegaa haratussi immana bessees. Yaatin, he alˈˈobati aybee? PHeexiroosi hegee ‘imota’ gidiyoogaa yootiis. He imotay aybee? Nuuni hegaa ‘issoy issuwau oottanau’ waati goˈettiyoo?

6. Kiristtaanetuyyo imettida imotatuppe issoti issoti awugeetee?

⁶ Xoossaa Qaalay: “Lo77⁠o imo ubbainne kumetta woito ubbai saluwaappe yees” yaagees. (Yaaqooba 1:17) Yihooway ba asaassi immiyo imota ubban a aaro kehatettay qoncciyoogee tuma. Yihooway nuussi immiyo issi gita imotay geeshsha ayyaanaa. He imotay nuuni siiquwaa, loˈˈotettaanne ashkketettaa milatiya, Xoossaa ufayssiya eeshshata dichanaadan maaddees. Ha eeshshati nuunikka nu mala Kiristtaaneta wozanappe siiqanaadaaninne maaddanaadan denttettoosona. Geeshsha ayyaanaa maaduwan nuuni demmiyo loˈˈo imotay tumu aadhida eratettaanne eraakka gujjees. (1 Qoronttoosa 2:10-16; Galaatiyaa 5:22, 23) Nu wolqqaa, nu abbiyaanne nu eraa ubbaa saluwan deˈiya nu Aawaa bonchissanaunne sabissanau goˈettiyo imotadan xeellana danddayoos. Xoossaa aaro kehatettaa nu mala Kiristtaanetuyyo qonccissanau nu abbiyaanne nu eeshshaa goˈettanaadan, Xoossay nuuyyo aawatettaa immiis.

‘Haratussi Oottanau Goˈetta’ —Waatada?

7. (a) “Maaraadan” giya qaalay ay qonccissii? (b) Nuna woygidi oychana koshshii? Aybissi?

⁷ Nuuni demmido imotaa xeelliyaagan PHeexiroosi: ‘Intte huuphiyan huuphiyan ekkido maaraadan intteyyo imettida imuwaa goˈettite’ yaagidikka yootiis. “Maaraadan” giya qaalay abbeenne eeshshay qommuwaa xallan gidennan, yesuwankka dumma dumma gidiyoogaa bessees. Ayba imota gidikkokka, ubbay ‘imuwaa [giishin baayyo imettida ayba imuwaanne] issoy issuwau oottanau goˈettana’ mala zoree imettiis. Hegaa bollikka, ‘loytti gishiyaageetudan goˈettite’ yaagiyaagee  azazo. Yaatiyo gishshau hagaadan nuna oychana koshshees: ‘Tumuppe tau imettida imotaa ta mala Kiristtaaneta minttettanau goˈettiyaanaa?’ (1 Ximootiyoosa 5:9, 10⁠ra gatta xeella.) ‘Woykko Yihoowappe demmido abbiyaa taani koyro sohuwaa immada goˈettiyoy ta goˈˈaassee—geella duretanaassee woykko hayttatanaassee?’ (1 Qoronttoosa 4:7) ‘Issoy issuwau oottanau’ nu imotaa goˈettiyaaba gidikko, Yihoowa ufayssoos.—Leemiso 19:17; Ibraawe 13:16 nabbaba.

8, 9. (a) Alame yuushuwan Kiristtaaneti bantta mala Kiristtaanetussi oottiyo issi issi ogeti awugeetee? (b) Intte gubaaˈiyan ishatinne michoti issoy issuwaa maaddiyoy ayba ogiyaanee?

⁸ Koyro xeetu layttaa Kiristtaaneti issoy issuwau oottido dumma dumma ogiyaa Xoossaa Qaalay yootees. (Roome 15:25, 26; 2 Ximootiyoosa 1:16-18 nabbaba.) Hegaadan ha wodiyankka, tumu Kiristtaaneti banttau imettida imotaa bantta mala Kiristtaanetussi goˈettanaadan imettida azazuwaa ufayssan poloosona. Hegaa oottiyo issi issi ogeta ane beˈoos.

⁹ Daro ishati aginan aginan daro saatiyaa immidi, shiiquwan shiishshiyo kifiliyaa giigettoosona. Eti Geeshsha Maxaafaa xannaˈiiddi demmido issi issi goˈˈiyaanne akeekaa gujjiya qofaa shiiquwan yootiyo wode, hegee gubaaˈiyan deˈiya ubbay genccanaadan denttettees. (1 Ximootiyoosa 5:17) Daro ishatinne michoti bantta mala Kiristtaanetussi siiquwaanne qaretaa bessiyoogan erettoosona. (Roome 12:15) Issoti issoti unˈˈettidaageeta ubbatoo oychoosonanne etaara woossoosona. (1 Tasalonqqe 5:14) Harati paaciyan gencciya bantta mala Kiristtaaneta minttettiya dabddaabbiyaa xaafoosona. Harati qassi abbee baynnaageeti shiiquwan beettanaadan kehatettan maaddoosona. SHaˈan qoodettiya Markkati, daafabay keettaa laalido bantta mala Kiristtaanetu keettaa keexxiyoogan maaddiyo oosuwan shaahettoosona. Hegaa mala ishatinne michoti bessiyo qaretaynne maadoy ubbay ‘Xoossaappe ekkiyo dumma dumma aaro kehatettay’ qoncciyo oge.—1 PHeexiroosa 4:11 nabbaba.

Keehippe Koshshiyay Awugee?

10. (a) PHauloosa keehippe qofissida, Xoossaayyo oottiyo naaˈˈu ogeti awugeetee? (b) Ha wodiyan nuuni PHauloosa leemisuwaa waati kaalliyoo?

¹⁰ Xoossaa ashkkaratussi, bantta mala Kiristtaanetussi goˈettiyo imota xalla gidennan, hara asau yootiyo kiitaykka imettiis. Kiitettida PHauloosi, Yihoowassi i oottiyo oosoy ha naaˈˈubata gujjiyoogaa akeekiis. Efisoona  gubaaˈiyau, i eta maaddanaadan “Xoossai ba aaro kehatettan” ayyo immido oosuwaabaa xaafiis. (Efisoona 3:2) Gidikkonne, i: “Xoossai wonggeliyaa hadaraa ekkanau nuuni ammanettiyaageeta gidin, nuuyyo he hadaraa immiis” yaagidikka xaafiis. (1 Tasalonqqe 2:4) PHauloosaagaadan, nuunikka Xoossaa Kawotettaabaa sabbakiyo oosoy nuuyyo imettidoogaa akeekoos. Nuunikka mishettidi sabbakiyoogan, salettennan mishiraachuwaa sabbakida PHauloosa leemisuwaa kaallanau baaxetoos. (Oosuwaa 20:20, 21; 1 Qoronttoosa 11:1) Kawotettaa kiitaa sabbakiyoogee shemppo ashshana danddayiyoogaa eroos. Gidikkokka, nu mala Kiristtaanetussi “ayyaanaa imuwaa” shaakkiyo injjiyaa koyiyoogankka PHauloosa leemisuwaa kaallanau baaxetoos. —Roome 1:11, 12; 10:13-15 nabbaba.

11. Nuuyyo imettida, sabbakiyoonne nu ishantta minttettiyo oosuwaa waatidi xeellana koshshii?

¹¹ Kiristtaanetussi imettida ha naaˈˈu oosotuppe keehi koshshiyaagee awugee? Hegaa oychiyoogee, Issi kafuwau naaˈˈu qefiyaappe keehi koshshiyaagee awugee? giyoogaa mala. Zaaroy qoncce. Issi kafoy paallanau naaˈˈu qefeekka koshshees. Hegaadankka, Kiristtaane gidiyoogaadan nuuppe koyettiya ubbabaa polanau, nuuni Xoossaayyo oottiyo naaˈˈu ogetunkka shaahettanau koshshees. Hegaa gishshau, mishiraachuwaa sabbakiyoonne nu mala Kiristtaaneta minttettiyo oosuwaa, issoy issuwaara gayttennabadan xeelliyoogaappe, kiitettida PHeexiroosinne PHauloosi xeellidoogaadan eti issoy issuwaappe shaahettennabadan xeelloos. Ayba ogiyan?

12. Nuuni Yihoowa kushiyan deˈiya miishshadan oottiyoy ayba ogiyaanee?

 ¹² Mishiraachuwaa sabbakiyaageeta gidiyoogaadan, ufayssiya Xoossaa Kawotettaa kiitan nu mala asatu wozanaa denttettanau, nuuyyo deˈiya tamaarissiyo hiillaa ubbaa goˈettoos. Hegaadan oottiyoogan, eti Kiristtoosa erissiyo ashkkarata gidanaadan maaddanau amottoos. Gidikkokka, minttettiya qaalaaninne goˈˈiya oosuwan, giishin Xoossaa aaro kehatettay qoncciyo ogetun, nu mala Kiristtaaneta minttettanau nu abbiyaa ubbaanne hara imotatakka goˈettoos. (Leemiso 3:27; 12:25) Hegaadan oottiyoogan, eti Kiristtoosa erissiyo ashkkarata gididi deˈanaadan maaddanau hidootoos. Naaˈˈu oosotunkka—haratussi sabbakiyoogaaninne ‘issoy issuwau oottiyoogan’—Yihoowa kushiyan deˈiya miishshadan oottiyo gita maatay nuussi deˈees.—Galaatiyaa 6:10.

“Issoi Issuwaara Ishanttudan Siiqettite”

13. Nuuni “issoy issuwau” oottiyoogaa aggikko aybi gakkana danddayii?

¹³ PHauloosi ba mala Kiristtaaneta: “Issoi issuwaara ishanttudan siiqettite; issoi issuwaa bonchchiyoogan ufaittite” yaagidi zoriis. (Roome 12:10) Nu ishata siiqiyoogee nuuni Xoossaappe ekkido imotaa wozanappe goˈettanaadan denttettiyoogee qoncce. Seexaanay nuuni “issoy issuwau” oottennaadan diggikko, nu issippetettaa shugissanaagaa akeekoos. (Qolasiyaasa 3:14) Qassi issippetettay xayiyoogee, mishettidi sabbakennaadan oottees. Kafoy paallenna mala issi qefiyaa qohiyoogaadan, Seexaanaykka nu oosuwaa nuuni polenna mala nu oosuwaappe issuwaa xallaa esissana koshshiyoogaa loytti erees.

14. Nuuni “issoy issuwau” oottiyoogan goˈettiyay oonee? Leemisuwaa yoota.

¹⁴ “Issoy issuwau” oottiyoogee Xoossaa aaro kehatettaa ekkiyaageetu xallaa gidennan, gishiyaageetakka goˈˈees. (Leemiso 11:25) Leemisuwau, Amarkkan Illinoyn deˈiya Riyaananne a machee Reeni hanotaa akeeka. Katriina giyo wolqqaama gotee bantta mala Yihoowa Markkatu keettaappe xeetan qoodettiyaagaa laalidoogaa erido wode, eti bantta oosuwaanne bantta keettaa aggidi, makiinan goochiyo galˈˈa keettaa shammi giigissidi, 1,400 kilo meetiriyaa haakkiya Luuziyaana giyoosaa baanaadan ishatetta siiqoy denttettiis. Bantta wodiyaa, wolqqaanne aquwaa bantta ishantta maaddanau goˈettiiddi, issi layttappe dariya wodiyaa yan deˈidosona. Layttay 29 gidiyo Riyaani: “Ha oosuwan shaahettidoogee Xoossaara deˈiya ta dabbotaa minttiis. Yihooway ba asaayyo koshshiyaabaa waatidi kunttiyaakko akeekaas” yaagiis. Riyaani gujjidikka: “Taappe cimiya ishatuura issippe oottiyoogan, ishatussi qoppiyoogaa waatada bessanaakko darobaa tamaaraas. Nuuni yelagati Yihoowa dirijjitiyan oottiyo darobi deˈiyoogaakka akeekaas” yaagiis. Layttay 25 gidiyo Reena: “Taani harata maaddana danddayidoogan keehippe ufayttaas. Ta deˈuwan hegaadan ufaytta erikke. Ha loˈˈo temokruwan daro layttau goˈettanaagaa erays” yaagaasu.

15. Xoossaa aaro kehatettaa gishiyaageeta gididi ubbatoo oottiyoogee keehippe koshshiyoy aybissee?

¹⁵ Mishiraachuwaa sabbakanaadaaninne nu mala Kiristtaaneta minttettanaadan Xoossay immido azazuwaa poliyoogee ubbau anjjuwaa demisssiyoogee tuma. Nuuni maaddiyoogeeti ayyaanaaban minnoosona; qassi immiyoogaa xallan beettiya wozanaa ufayssaa demmoos. (Oosuwaa 20:35) Gubaaˈiyan deˈiya ubbay harata wozanappe siiqiyo wode, kumetta gubaaˈee siiquwan dichaa bessees. Hegaa bollikka, nuuni issoy issuwau bessiyo siiqoynne qaretay nuuni tumu Kiristtaane gidiyoogaa qonccissees. Yesuusi: “Intte issoi issuwaara siiqettikko, ta erissiyo ashkkarata gidiyoogaa asai ubbai erana” yaagiis. (Yohaannisa 13:35) Ubbaappe aaruwan, harata minttettiyo, Yihoowa ufayssiya eeshshaa saˈan deˈiya a ashkkarati bessiyo wode, saluwan deˈiya nu siiqo Aaway bonchettees. Yaatiyo gishshau, ‘Xoossaa aaro kehatettaa loytti gishiyaageetudan, issoi issuwau oottanau’ nu imotaa goˈettiyoogee keehippe koshshiyaaba! Neeni ubbatoo hegaadan oottuutii?—Ibraawe 6:10 nabbaba.

Hassayay?

• Yihooway ba ashkkarata ayba ogetun minttettii?

• Nuuyyo imettidabay aybee?

• Nu mala Kiristtaanetussi oottana danddayiyo issi issi ogeti awugeetee?

• Nu imotaa “issoy issuwau” oottiyoogan ubbatoo goˈettanaadan nuna denttettiyay aybee?

[Oyshata]

[Sinttaa 20n deʼiya misiliyaa]

Neessi imettida “imotaa” haratussi oottanau goˈettayiyye ne huuphe ufayssau goˈettay?

[Sinttaa 21n deʼiya misiliyaa]

Nuuni haratussi mishiraachuwaa sabbakoosinne nu mala Kiristtaaneta maaddoos

[Sinttaa 22n deʼiya misiliyaa]

Bantta goˈˈaa yarshshidi daafabay gakkidoogeeta maaddiyaageetussi galatay bessees