Yesuusa—Asay Abaa Woygii?

“Naazireeta Yesuusi . . . taarikiyan erettida asa gidiyoogau siree baawa.” —H. G. Wels, Ingglize biittaa asa gidida taarikiyaa eranchaa.

“Taarikiyan erettida gooba asatu ubbaappe Kiristtoosi . . . dumma.” —Filip SHaaf, Suwidinen yelettida haymaanootiyaanne taarikiyaa eranchaa.

SAˈAN deˈida asa ubbaappe aadhiyaagaa geetettanau danddayiyay oonee? Issi ura gitatettaa aybin likkana koshshii? Gooba olancha gidiyoogaanee? Bollaa minotettaanee? Erancha gidiyoogaanee? Woykko, i yootidobaynne oottidobay asaa denttettidoogaaninne i etau leemiso gididoogaanee?

Naazireete asa gidida Yesuus Kiristtoosabaa, ha wodiyan deˈiyaanne beni wode deˈida, taarikiyaa eranchati, saynisiyaa eranchati, xaafeti, polotikan ayssiyaageetinne harati giidobaa akeeka:

“Ha naaˈˈu shaˈu laytta xallan gidennan, asaa naatu taarikiyan deˈida asaa ubbaappe aadhidi erettida uri—Naazireeta Yesuusa gidiyoogaa kashi gaanau issi uri naqaashata geellayana koshshees.”—Reynolds Prays, Amarkka biittaa xaafiyaanne Geeshsha Maxaafaa eranchaa.

“Issi keehippe geeshsha bitanee ba morkketa gujjin, haratu goˈˈau bana yarshsho oottidi aatti immiisinne alamiyaa woziis. Hegaa mala loˈˈo oosoy deˈenna.”—Mohandas K. Ganddi, polotikaaninne haymaanootiyan Hindde biittaa kaalettidaagaa.

“Taassi naatettan, Geeshsha Maxaafaappenne Talmudiyaappe kaaletoy imettiis. Taani Ayhuda, shin Yesuusau deˈiya dumma eeshshay tana ufayssees.”—Albert Anesttayn, Jarmanen yelettida sayinttisttiyaa.

“Yesuus Kiristtoosi Xoossaa Naˈanne Asa Naˈa gidiyoogaa taani qoppiyo wode, taarike wode ubban a mali baawa. I yootidobaynne oottidobay ubbay ha wodiyan nuna goˈˈiyaaba; deˈuwan deˈiya woykko hayqqida hara oonanne xeelliyaagan hegaadan gaana danddayettenna.”—SHolem Aash, Poolandde biittan yelettida xaafiyaa, Kiristtiyan Herald giyo gaazeexan kiyida qofaa; geddi oottidi xaafiday eta.

“Ta deˈuwan 35 layttau aybiininne ammanenna asa gidada deˈaas. Yesuusi tumuppe deˈida asa gidiyoogaa ichashu layttappe kase ammanaas. Yesuus Kiristtoosa timirttiyaa ammanaas; qassi ta kumetta deˈoy sohuwaara laamettiis.”—Liyo Tolisttoy, Ruusiyaa biitta xaafiyaanne palasppaa.

“Taarike wode ubban Yesuusaagaadan daro asaa deˈuwaa laammida asi baawa; qassi gujji gujjidikka laammiiddi deˈees.”—Kenet Skkoot Latuuret, Taarikiyaa eranchanne xaafe gidida Amarkka biitta asa.

“Yesuusa deˈuwaabaa yootiya wonggeliyaa medhi ekkidi xaafidobadan qoppana koshshii? Ta laggiyau, hegee medhi ekkidi xaafidobaa milatennaagee qoncce. Hegaappe dumma hanotan, ooninne siranau malenna Soqiraaxisa taarikiyau Yesuus Kiristtoosaagaa mala loˈˈo naqaashi baawa.”—ZHan-ZHaak Russo, Paransaaye biittaa palasppaa.

Nuuni nu deˈuwan kaallanau leemiso gidana danddayiya uri deˈikko, hegee Yesuus Kiristtoosa gidiyoogee qoncce. Bana kaallanaadaaninne Babaa kawotettatussi yootanaadan Yesuusi doorido, koyro xeetu layttan deˈida, tamaarida asa gidida PHauloosi, nuuni Yesuusa loyttidi ‘xeellanaadan’ zoriis. (Ibraawe 12:2; Oosuwaa 9:3) Nuuni waani deˈanaakko Yesuusappe ay tamaarana danddayiyoo? A deˈoy nena waati goˈˈana danddayii?